Provébiu 15:30 - ꞌRe Ihâimana Uꞌâsi Mono Zadawa Wasuꞌu

³⁰ Ni'wa ubu toi u'âsi na da te 'madâ'â wamhã, te za dapẽ'ẽ 'remhã ãma dama rowẽ waze. Duré rowasu'u wẽ hã da te wapari za'ra wamhã, dama rowẽ za'ra di.

Provébiu 15:30 ပူးပေါင်းရင်းမြစ်များ

Esdra 9:8

Tane nherẽ, Uburé Danhib'apito, wate 'Re ihâimana u'âsi mono, ãhã na awa'awi na ma tô nimosi prã na iwẽ na wama 're i'ab'manharĩ mono na hã isãna'ra. Taha zarina ma tô ni'wam norĩ ma, wasimani za'ra da hã wama irowairébé za'ra, ãme ro iwazéb zahi ãma wasima iwẽ na 're iwahâimana za'ra mono da hã. Duré wapawa'âbâ ãna danhimiwada'uri zarina 're iwahâimana za'ra mono zém hawi wasimani za'ra da hã ma tô wama irowairébé za'ra. Ma tô duré wahâimanazép té hã wama isõmri za'ra.

Salmu 89:15

Tinho're na ai'ãma 're iwata za'ra mono norĩ hã te za robze sina toi u'âsi 're nomro, ate rowa'a na si 're ihâimana za'ra mono norĩ hã!

Provébiu 12:25

Marĩ na dapẽ'ẽ 're, 're idahâtâ'â za'ra mono zé hã te za te te 're dahâiba pire za'ra. Tane nherẽ, te za damreme iwẽ hã te te dama 're robze zani za'ra.

Provébiu 13:9

I'uwaibaba na si 're ihâimana za'ra mono norĩ hã te rob'uiwẽzé te te 're irowa'a pese mono zém ne 're hâimana za'ra. Tane nherẽ, iwasété norĩ hã aiwa rob'uiwẽzé idâ'â pese ne hã te 're hâimana za'ra.

Provébiu 15:29

Uburé Danhib'apito romhâ na te iwasété norĩ nhiti 're hâimana. Tane nherẽ, te iwẽ norĩ tãma 're imreme zusi mono zé hã te te 're awapari.

Provébiu 15:31

Ni'wa hã tihâimana pese zé iwẽ hã te te sina 're uzei mono wamhã, te za i'rãi waihu'u wẽ norĩ me hã 're hâimana u'âsi.

Provébiu 17:22

Dapẽ'ẽ 're rowẽzé hã te wedenhi iwẽ uptabi ne hã dama 're hâimana. Tane nherẽ, õne u'â dapẽ'ẽ 're robzei ãna 're idahâimana za'ra mono zé hã te za atãma na te te 're danhib'uwa zani za'ra.

Provébiu 25:25

Rowasu'u wẽ, romhâ hawi datẽme 're isihutu mono hã, aiwa 'rubu ré â wahâ da te 're i'âhuri mono ne hã.

Provébiu 3:8

Ãne wamhã, te za aihâzé'õzé hã aima tisõ. Te za duré te te 're aihi nhiptete u'âsi.

Apocalipsi 21:23

Duré 'ri nho'õmo na hã bâdâ te te 're rob'uiwẽ mono õ di za oto, duré a'amo zama hã. 'Re ihâimana u'âsi mono nhimirowa'a si te za oto te te 're rowa'a, Pone'ẽrebâ nhimirowa'a zama.

Apocalipsi 22:5

Tamemhã 're mara waihu'u mono õ di za. 'Re robra waihu'u mono õ na dâ'âsina, rob'uiwẽzém na da te 're rob'uiwẽ za'ra mono õ di za oto. Duré bâdâ hã te te 're rob'uiwẽ mono õ di za oto. Uburé Danhib'apito uptabi, 'Re ihâimana u'âsi mono si te za te te dama 're rowa'a. Tawamhã isib'a'uwẽ norĩ hã te za isadawa para pire na 're hâimana u'âsi za'ra, õne u'âsi.