Provébiu 15:14 - ꞌRe Ihâimana Uꞌâsi Mono Zadawa Wasuꞌu

¹⁴ I'rãi waihu'u wẽ norĩ hã te rowaihu iwẽ zô si sima 're sõpré. Tane nherẽ, simiza'rese ãna 're ihâimana za'ra mono hã te tizaihâ na si te te 're rob'masi za'ra, tinhimiza'rese'õ zarina.

Provébiu 15:14 ပူးပေါင်းရင်းမြစ်များ

Salmu 119:100

Ĩ'rãiwaihu'u wẽ hã te sa'ẽtẽ na ĩma 're hâimana, ihi norĩ nhipai u, asimiroti si te 're wapari pese mono wa.

Salmu 119:97

Asimiroti hã wa te te 're sawi pese. Tahawa, wa bâtâ bâre õne u'â te ĩsima ãma 're rosa'rata u'âsi.

Provébiu 1:5

'Rãi waihu'u wẽ na 're ihâimana za'ra mono zama ã hã rowaihu iwẽ hã te te 're po're 'repu'u za'ra mono wamhã, te za isimirowaihu iwẽ hã te te sina tãma 're hâimo za'ra. Te za duré tinhimirowaihu'uzé iwẽ te te ãma 're iwaihu'u ahâ za'ra mono zé hã te te 're pibui pese za'ra,

Provébiu 12:23

Isimiza'rese wẽ norĩ hã mreme wadi õ di, tinhimirowaihu'u na hã. Tane nherẽ, simiza'rese ãna 're ihâimana za'ra mono norĩ hã te za simiza'rese ãna niha na tihâimanazé hã te te dama 're hâi'ré za'ra.

Provébiu 15:15

Robzei ãna 're ihâimana za'ra mono norĩ hã te za bâtâ bâre ropire na 're hâimana za'ra. Tane nherẽ, pẽ'ẽ toi u'âsi 're ihâimana za'ra mono norĩ hã te za tihâimana ze zém na 're hâimana u'âsi za'ra.

Provébiu 18:15

I'rãiwaihu'u wẽ 're ihâimana mono hã te õne u'â tipẽ'ẽ na marĩ te te 're iwaihu'u mono da hã sô 're si'wapé.

Provébiu 9:9

Ni'wa i'rãi waihu'u wẽ ma, marĩ na ãma tãma 're roti mono wamhã, te za ti'rãi waihu'u wẽ hã te te ãma sima 're sa'ẽtẽ. Duré i'uwaibaba si 're imorĩ ma, marĩ na ãma tãma 're rowaihu'u mono wamhã, te za ti'rã nhimiza're hã te te sima 're sa'ẽtẽ.

Zezusihi zadawa wasuꞌuꞌwa norĩ nhimiromhuri na robꞌuiꞌéré 17:11

Beréa ãma 're isi'ubumroi mono norĩ nhimirosa'rada hã, wẽ di. Tesalonita ãma 're isi'ubumroi mono norĩ nhimirosa'rata nei õ di. Zezusihi wasu'uwẽ hã ma tô wapari pese za'ra. Awẽ sidâpâsi, ma tô 'Re ihâimana u'âsi mono zadawa wasu'u na rob'ui'éré 'rada hã da te 're sõré za'ra, Paulu norĩ nhimirowasu'u hã tô sena zô da te ãma 're rosa'rata pese za'ra mono da.

2 Pedru 3:18

Ma'ãpé, 're aihâimana wẽ u'âsi za'ra wa'aba mono, aihâimana wẽ hã asima 're sa'ẽtẽ za'ra wa'aba mono da, Wanhib'apito Zezu Cristu te te 're iwa'apawapto mono zém na. Duré Wanho'reptui'wa Zezu Cristuhu ãma rowaihu hã, te za asima 're isa'ẽtẽ za'ra wa'aba mo. Ta hã Wanho'reptui'wai wa, wa za ãma 're wawata u'âsi za'ra. Tane tô.