Provébiu 14:3 - ꞌRe Ihâimana Uꞌâsi Mono Zadawa Wasuꞌu

³ Simiza'rese ãna 'râwi 're isi'madâ'â ze za'ra mono norĩ hã te timreme zarina robzépada hã te te sitẽme 're ãwisi za'ra. Tane nherẽ, isimiza'rese wẽ norĩ hã te 'râwi timreme na si'wawi 're simapa za'ra.

Provébiu 14:3 ပူးပေါင်းရင်းမြစ်များ

Provébiu 12:6

Iwasété norĩ mreme hã simimnhasi uptabi di, dapãrĩ'wa norĩ hã rosa'rese õ ré, dazô 're iwairébé mono ne. Tane nherẽ, i'uwaibaba na si 're ihâimana za'ra mono norĩ mreme hã te za marĩ isimimnhasi hawimhã te te 're da'anho'reptu.

Provébiu 13:3

Ni'wa tinhimirobzanhamri wasété wi, 're sisadawa uwati mono wamhã, te za tihâimana wẽ zém na hã 're si'madâ'â. Tane nherẽ, ni'wa siwa'ru te te 're robzanhamri hâ mono wamhã, te za 'râwi tihâimana wẽ zé hã te te siwi 're uprosi.

Provébiu 14:4

Powawẽ ti'ai hâipo'o'wa da, dama hâimana õ wamhã, amnho hã dama watobro õ di za. Tane nherẽ, powawẽ isiptede dama ihâimana zarina amnho tehârizé hã sa'ẽtẽ di za.

Provébiu 18:6

Isimiza'rese'õ, timreme zahi zarina, te za dasi'wapé hã te te 're azani. Te za duré ti'ahârizé hã te te sisada ãma 're azani.

Provébiu 18:7

Isimiza'rese'õ nhimirobzanhamrizéb zarina te za ti'uprosizé hã te te sima ãma 're sani. Duré timreme na te za sisõwada, abaze mramizém na.

Provébiu 21:24

'Re isi'madâ'â ze mono waptẽrẽzé hã, da'ãma 're iwa'ẽi mono na. Ta hã te simiwazéb õ na 'râwi 're si'madâ'â zei u'âsi.

Provébiu 22:8

Ni'wa hã marĩ iwasété na te te dama irob're zarina, te za ropipazéb si te te sima 're atehâri. Tawamhã marĩ iwasédé hã te za sô aipi'ra.

Provébiu 28:25

Ni'wa marĩ zô si te te sima 're irob'ruiwapari mono hã te za õne u'â dasi'wapé hã te te 're poto za'ra. Tane nherẽ, Uburé Danhib'apito te te 're i'umnhasi mono si te za rowẽ isa'ẽtẽ ré hã 're hâimana.

Daniéu 7:20

Wa tô duré tiwi waptẽ, ropoto siwamnarĩ 'rã na i'u 10 na ihâimana za'ra na zama te te ĩma ãma isaprĩzé hã, duré i'õmo hâiba amo iwatobro na isaprĩzé hã. Ta hã si'ubdatõ i'u te te i'marõpãrĩ za'ra hã, i'õmo hâiba amo norĩ nhipai u isiptete uptabi, ito duré tãma ihâiba hã, duré 're isi'madâ'â zei mono na tizadawa na te te 're inharĩ mono.

2 Pedru 2:18

Ta norĩ hã simiroti pire newa, 'râwi sina 're wata za'ra mono sina, te za te te dama 're rowasu'u za'ra, da te dasima 're iwẽ za'ra mono zéb uwaibaba, 're dahâimana wasété za'ra mono da, dama ãma 're rowẽ za'ra mono da newa. Ãne wamhã, nimosi isazei'õ'wa norĩ hâimana wasétézém hawi 're idasipizari za'ra mono norĩ hã, te za oto te te ãma 're sasõmri za'ra, senai'õ na rowasu'u'wa norĩ ãma hã.

Apocalipsi 12:11

Pone'ẽrebâ hã dazada idâ'âzéb zarina, ma tô wasiré isazei'wa norĩ hã ãma ai'uté za'ra, Satanasihi ãma. Iwasu'uwẽ hã sena na te te dama 're isadawa wasu'u za'ra mono zém na zama, ma tô ãma ai'uté za'ra. Duré da te 're 'ruiwapari za'ra mono wa, dawi 're sihâiba zawi za'ra mono õ di, 're dâ'â tõ za'ra mono da. Tahawa, 'Re ihâimana u'âsi mono wi sipizari ãna, ma tô duré Satanasihi ãma ai'uté za'ra.

Apocalipsi 3:10

Da te aima 're rob'manharĩ wasété za'ra wa'aba mono nherẽ, te aima iroti za'ra wa'aba zéb zarina, ĩmreme na si 're anomro aba mono wa, ma tô asina i'uwaimrami za'ra wa'wa, ĩnhimiroti hã. Tahawa, ropsi'utõrĩzéb u, za marĩ ipipa hã iwairébé mono na hã wa za aima ba'a za'ra wa'wa, iwasété norĩ, za te te ida'apibui mono zéb ãma hã, ti'ai ãma daro mono bâ 're idahâimana za'ra mono norĩ hã.

1 Samuéu 2:3

Aimreme na asina 're aiwata za'ra wa'aba mono tõ, duré 're asi'madâ'â ze za'ra wa'aba mono zarina, asima 're rowasu'u za'ra wa'aba mono tõ. E tihai wa. Uburé Danhib'apito 'Re ihâimana u'âsi mono ma, tiha hã tãma waihu'u pese di. Ta hã te uburé te te da'ãma 're arowairébé, da te 're i'manharĩ za'ra mono zém na te te 're ida'awaihu'u mono zéb zarina.