Provébiu 14:23 - ꞌRe Ihâimana Uꞌâsi Mono Zadawa Wasuꞌu

²³ Ni'wa hã simi'ẽ na te te 're romhuri pese mono wamhã, te za tihâimanazéb da hã te te sima 're azani. Tane nherẽ, ni'wam norĩ robzanhamri ma si 're hâimana za'ra mono wamhã, te za marĩ zô tiwi 're irowaptâ'â za'ra mono zé hã te te sisô 're sani za'ra.

Provébiu 14:23 ပူးပေါင်းရင်းမြစ်များ

Provébiu 10:10

Ni'wa hã sena na niha na 're iromhâimana mono zé hã te te dawi 're tété mono wamhã, te za niha na romhâimanazé hã te te dazada 're azani. Tane nherẽ, ni'wa hã sena na marĩ na te te dama 're arowasu'u mono wamhã, te za te te ãma 're da'apẽ'ẽ nomri.

Provébiu 12:24

Ni'wa hã tinhiptede te te sima 're 'manharĩ mono wamhã, te za dama i'rãnho'õmo na 're hâimana. Tane nherẽ, iwa'a norĩ hã te za danhib'a'uwẽ na hã te te dama 're romhuri za'ẽtẽ u'âsi za'ra.

Provébiu 14:22

E i'uwaibaba õ di bété, marĩ iwasété na si da te 're irosa'rata za'ra mono zarina, 're idasisimini za'ra mono zé hã. Tô i'uwaibaba. Tane nherẽ, marĩ iwẽ na si te te sima 're irowa'õtõ za'ra mono norĩ hã te za da te 're isawi za'ra mono zé hã, duré dasina da te 're i'umnhasi za'ra mono zé hã te te sina 're uwaimrami za'ra.

Provébiu 14:24

I'rãi waihu'u wẽ norĩ hã te za tinhimarĩ hã te te sima 're sani za'ra. Tane nherẽ, isimiza'rese'õ norĩ hã te za tinhimiza'rese õ zarina niha na romhâimanazé hã te te sima 're sani za'ra.

Provébiu 28:19

Ni'wa tiburu na te te 're romhuri pese mono wamhã, te za sa 're romnhimi'wara, sa'ẽtẽ na isazéb da hã. Tane nherẽ, ni'wa marĩ iwapure zô si 're irĩtĩ mono na taré bâdâ te te sina 're uprosi mono wamhã, te za simarĩ õ u'âsi 're hâimana.

Zuwã 6:27

Dasa hã siwamnarĩ su'u di. Tahawa, taha zô si 're romhuri za'ra wa'aba mono õ di za. Dasa ne isi'utõrĩ'õ zô si, te za 're irob'ruiwapari za'ra wa'aba mo, wẽ na 're ihâimana u'âsi mono zô si. Ta hã rowẽ u'âsi dadâ'â ãna 're idahâimana u'âsi za'ra mono zé, te wasu'u. Wa hã ti'ai ãma dasiré ĩpoto wa, ma tô Ĩmama hã ĩpisutu, isadawa para te dama 're anhomri mono da, rowẽ u'âsi 're idahâimana u'âsi za'ra mono zé hã.

1 Timotiu 5:13

Duré pi'õi mrotõ hâiba tém norĩ nhisi na ihi norĩ nhisi zu, 're rob'ui'éré za'ra mono wamhã, ãté dawaptom na te za dama 're wa'a za'ra. Ãté sihâiwi na te za 'ri babap si oto 're nomro, mro õ wẽ te. Ãté marĩ te te wapari wamhã, te za te te dama 're rowasu'u za'ra. Ãté aimawi timreme na te za te te dawi ãma 're ro'wa'rutu za'ra. Ãté marĩ taré te te 're wapari za'ra mono ãna, te za te te dama 're rowasu'u za'ra.