Provébiu 14:22 - ꞌRe Ihâimana Uꞌâsi Mono Zadawa Wasuꞌu

²² E i'uwaibaba õ di bété, marĩ iwasété na si da te 're irosa'rata za'ra mono zarina, 're idasisimini za'ra mono zé hã. Tô i'uwaibaba. Tane nherẽ, marĩ iwẽ na si te te sima 're irowa'õtõ za'ra mono norĩ hã te za da te 're isawi za'ra mono zé hã, duré dasina da te 're i'umnhasi za'ra mono zé hã te te sina 're uwaimrami za'ra.

Provébiu 14:22 ပူးပေါင်းရင်းမြစ်များ

Zenezi 24:27

Ãne te tinha: — Uburé Danhib'apito, Abra'ã ĩnhib'apito te, 'Re ihâimana u'âsi mono hã, iwẽ uptabi. Tô sena ma tô ĩnhib'apito ma, umnhasi sina ãma 're isiwãrĩ wẽ mono na hã tãma 're hâimana. Taha zarina ma tô isisãnawã norĩ nhorõwa u hã awa'awi u'âsi we ĩzaprõni wẽ.

Salmu 36:4

Tinhimiwaptâ wa, 're sa'wari mono ré, te marĩ iwasédé te te i'manharĩ da hã te te sima ãma 're rowa'õtõ. Bâdâdi iwasété na si hã te 're mo. Duré niwamhã marĩ iwasédé hã te te siwi 're awẽ'õ waihu'u mono õ di.

Provébiu 12:2

Iwẽ norĩ hã te Uburé Danhib'apito hã te te 're awẽsãmri. Tane nherẽ, wasété na te te sima 're irowa'õtõ za'ra mono norĩ si te te siwi 're awẽ'õ pese, niha hã te te tãma 're apisutu mono da hã.

Provébiu 12:26

Sena na 're ihâimana mono hã te za tisiré zaprõni wẽ 'wa na 're hâimana. Tane nherẽ, iwasété norĩ hã te tihâimanazém na 're sisimini za'ra.

Provébiu 14:17

Ni'wa i'rãi wa'ro su hã te tô marĩ iwẽ'õ hã te te 're ab'manharĩ, isimiza'rese'õ zarina. Tane nherẽ, te 'rã nhimiza'rese na 're ihâimana za'ra mono norĩ hã atãma na 're hâimana za'ra.

Provébiu 14:23

Ni'wa hã simi'ẽ na te te 're romhuri pese mono wamhã, te za tihâimanazéb da hã te te sima 're azani. Tane nherẽ, ni'wam norĩ robzanhamri ma si 're hâimana za'ra mono wamhã, te za marĩ zô tiwi 're irowaptâ'â za'ra mono zé hã te te sisô 're sani za'ra.

Provébiu 19:22

Ni'wa tinhimizawi pese zém na 're hâimana mono wamhã, ãma 'ruiwapari za'ẽtẽ di. Duré danhimarĩ'õ na 're idahâimana za'ra mono da hã wẽ uptabi di, dazadawa nhipese na 're idahâimana za'ra mono zém nhipai u hã.

Provébiu 24:8

Ni'wa hã marĩ iwasédé te te 're i'manharĩ mono da si, te te sima 're irosa'rata u'âsi mono, te za ro'wa'rutu poto'wa na da te 're waptẽrẽ za'ra.

Provébiu 3:29

Aiwaptoma 're ihâimana mono ma, marĩ iwasédé tãma 're 'manharĩ mono da hã 're rosa'rata mono tõ. E marĩ wa. Aiwaptoma 'râwi ai'umnhasi sina ta hã 're hâimana mono wa.

Provébiu 3:3

Asimizawizé hã, duré dama ai'umnhasizé hã 're rẽme mono õ di za. Te za õne u'â aipẽ'ẽ na asima 're itété u'âsi mo.

Provébiu 6:14

Simirosa'rata wasété na 're hâimana za'ra mono wa, te õne u'âsi te te sima 're rowa'õtõ za'ra, marĩ te te 're i'manharĩ wasété za'ra mono zéb da hã. Te duré ro'wa'rutuzém na hã ropâ te te dama ãma 're ropé.

Mateu 5:7

— Duré, ni'wam norĩ hã da'ãma 're ipẽ'ẽzé za'ra mono zéb zarina, da'ãma 're isina mono norĩ hã, ta norĩ ma si, tãma 're rowẽ za'ẽtẽ za'ra mono di za. Ta norĩ ãma si te za 'Re ihâimana u'âsi mono hã ãma tipẽ'ẽzé za'ra, za da'ãma isipo'ozéb ãma hã.

Zozué 2:14

Tawamhã aibâ norĩ ma tô ãma tãma wa'rãmi zahuré, ãne: — Wa za tô ropisutu ni aima. Tawamhã wamreme wa te wasina uwaimrami õ wamhã, tô i'uwaibaba na hã wa aré tô wa norĩ si wadâ'â ni. A hã aré i'atâ'â da hã mare di. Tawamhã a hã ãme wa te i'manharĩzé hã ni'wai ma wasu'u õ wamhã, aima wanhimiropisutuzé hã i'uwaibaba wa za tô wasina uwaimrami ni. Uburé Danhib'apito, apto'o ré ã hã ti'a te te wama sõmri za'ra wamhã, tawamhã iwẽ na hã wa za aima wasihâi'ré ni, sena na wa te aima inharĩ na hã.