Provébiu 12:4 - ꞌRe Ihâimana Uꞌâsi Mono Zadawa Wasuꞌu

⁴ Pi'õ damro hã iwẽ na si 're hâimana mono wamhã, te za imro tãma 're ipẽ'ẽ toi mono zarina ãma 're wata. Tane nherẽ, imro rowazé te te sina tãma 're isani mono hã, aiwa ihi na ihâzé pire te te 're ihi ware mono wam ne hã, te te 're hi uprosi mono wa.

Provébiu 12:4 ပူးပေါင်းရင်းမြစ်များ

Provébiu 11:22

Pi'õ, dama 'madâ'â ze nherẽ, simiza'rese ãna 're hâimana mono wamhã, aiwa ẽtẽ waipo pré oru 'manharĩ na danhiptõmohi wasisizém ne uhâbâ nhisi're za'ruzé isisi're ãma 're isimnhatã mono ne hã te 're hâimana.

Provébiu 12:5

Sena na 're ihâimana za'ra mono norĩ nhimirowa'õno hã i'uwaibaba na si te 're hâimana. Tane nherẽ, iwasété norĩ nhimiroti hã da'rãiwamnarĩ da si te 're hâimana.

Provébiu 14:1

Pi'õ i'rãi waihu'u wẽ hã tinhorõwa 'madâ'â wẽ 'wa na te za 're hâimana. Tane nherẽ, isimiza'rese'õ sihawim na tinhib'rata na tinhorõwa 'remhã romhâimanazé iwẽ te za te te 're a'uprosi pese.

Provébiu 14:30

Dapẽ'ẽ 're rowẽzé hã te za dahâiba nhiptetezé hã te te dama 're sõmri. Tane nherẽ, marĩ zô, da te dasima 're irob'ruiwapari za'ra mono zé hã aiwa dahi na dazépu'u pire te te 're idahi ware za'ra mono ne hã.

Provébiu 18:22

Ni'wa timro da, pi'õ te te 'manhopẽtẽ wamhã, tãma irowẽ uptabi zép si, te za sõpẽtẽ. Ta hã, Uburé Danhib'apito, aibâ te te iwẽsãmrizé te wasu'u.

Provébiu 21:19

Wẽ di aibâ a'ubuni wi timro nhiti 're ihâimana mono da hã, imro isimiwati pe isiwapsari zei me 're isãmra mono nhipai u.

Provébiu 21:9

Wẽ di, aibâ 'ri upsibi hâpâ zasé're ãma, timro nhiti 're ihâimana mono da hã, imro isimiwati pese me 'ri 're, 're isãmra mono nhipai u.

Provébiu 30:23

pi'õ dama iwẽ'õ uptabi, imrozé hã; duré pi'õi ma romhuri'wa sipi'õ, tinhib'ihâ'a nhowa're're isébré hã.

Provébiu 31:29

“Damro norĩ iwẽ hã ahâ uptabi na 're hâimana za'ra mono nherẽ, a hã uburé danhipai u aiwẽ uptabi di.”

1 Corĩtu 11:11

Tane nherẽ, wa norĩ hã Wanhib'apito ãma oto 're wanomro mono wa, aibâ norĩ hã pi'õi ãna 're hâimana waihu'u za'ra mono õ di za oto. Duré pi'õ norĩ zama hã, aibâ ãna 're hâimana waihu'u za'ra mono õ di za. Ãne hã aiwa te wama wasu'u za'ra.

1 Corĩtu 11:7

Tane nherẽ, isazei'wa norĩ, siré 're si'rã'õtõ mono ré, aibâ norĩ hã 'rã ubu ré, dasiré 're hâimana za'ra mono õ di za. E marĩ wa. 'Re ihâimana u'âsi mono ne, 're hâimana za'ra mono wa, ta norĩ hã. Tane nherẽ, pi'õ norĩ hã aibâ norĩ zapari 're ihâimana za'ra mono zé hã, pi'õi ma, aibâ ipirezé, te wasu'u.

Ruti 3:11

Tahawa, ãhã na hã aipahi tõ. 'Ri nho'õmo ãma hã dama aiwaihu'u pese di, a hã pi'õ, rob'uwaibaba na si 're i'aihâimana mono zém na hã. Tahawa, uburé wa za ab'manha, ĩwi iwaptẽrẽzéb zarina.