Provébiu 12:2 - ꞌRe Ihâimana Uꞌâsi Mono Zadawa Wasuꞌu

² Iwẽ norĩ hã te Uburé Danhib'apito hã te te 're awẽsãmri. Tane nherẽ, wasété na te te sima 're irowa'õtõ za'ra mono norĩ si te te siwi 're awẽ'õ pese, niha hã te te tãma 're apisutu mono da hã.

Provébiu 12:2 ပူးပေါင်းရင်းမြစ်များ

Salmu 112:5

Ni'wa hã, marĩ da te tiwi waptẽrẽ wa, sõprum na a'â iwa'rãmib zô te te dama isõmri hã te za toi u'âsi 're sãmra. Sena na tinhimarĩ na te te ãma 're iromhuri mono hã te za duré toi u'âsi 're sãmra.

Provébiu 1:31

Tahawa, marĩ 're i'manharĩ za'ra wa'aba mono zéb zarina te za tô iwasété na si 're asaihuri aba mo.

Provébiu 12:1

Ni'wa hã tihâimanazém na te te upai wa, da te tãma roti wamhã, te za sima wẽ upta, te te iwaihu'u wẽ da si. Simiza'rese ãna 're ihâimana mono si tihâimana pese zé te te sina 're i'uzei mono da hã mare di za. Te za te te sina 're wẽ'õ.

Provébiu 14:17

Ni'wa i'rãi wa'ro su hã te tô marĩ iwẽ'õ hã te te 're ab'manharĩ, isimiza'rese'õ zarina. Tane nherẽ, te 'rã nhimiza'rese na 're ihâimana za'ra mono norĩ hã atãma na 're hâimana za'ra.

Provébiu 14:22

E i'uwaibaba õ di bété, marĩ iwasété na si da te 're irosa'rata za'ra mono zarina, 're idasisimini za'ra mono zé hã. Tô i'uwaibaba. Tane nherẽ, marĩ iwẽ na si te te sima 're irowa'õtõ za'ra mono norĩ hã te za da te 're isawi za'ra mono zé hã, duré dasina da te 're i'umnhasi za'ra mono zé hã te te sina 're uwaimrami za'ra.

Provébiu 3:4

Ãne hã 're 'manharĩ mono wamhã, te za 'Re ihâimana u'âsi mono ma, sa'ẽtẽ na asina tãma 're irowẽ zani mo. Duré ti'ai ãma zama te za asina dama 're irowẽ zani mo. Te za duré da te dasima 're aiwasu'u wẽ za'ra.

Provébiu 8:35

E marĩ wa. Ni'wa hã te te ĩnhopẽtẽ wamhã, te za rowẽ na 're ihâimana u'âsi mono zé hã sõpẽtẽ. Ãne wamhã, Uburé Danhib'apito tãma ipẽ'ẽto zarina, te za wẽsã.

Zezusihi zadawa wasuꞌuꞌwa norĩ nhimiromhuri na robꞌuiꞌéré 11:24

Banabé hã, aibâ iwẽ. 'Re ihâimana u'âsi mono pẽ'ẽzani na si 're imorĩ u'â ta hã. Wanhib'apito te te sina 're i'umnhasi u'âsi mono. Tahawa, ma tô Wanhib'apito zazei'wa hã dasina tahâ'â ni, Banabéhé nhimirowasu'u zarina.

Roma 5:7

Ni'wa hã uburé danhimiroti wẽ hã te te 're 'madâ'â pese mono nherẽ, taha upana ida'matâ'â da hã, mare di. Ni'wa hã da'ãma 're isiwamri mono, 're 'maihâimana mono wamhã, taha upana si ida'matâ'â da hã, ãté te za 're si'madâ'â za'ra.