Neemia 12:44 - ꞌRe Ihâimana Uꞌâsi Mono Zadawa Wasuꞌu

⁴⁴ Tawamhã tô taha bâtâ na ma tô aibâ norĩ romnhimi'warazé te te 're i'madâ'â za'ra mono da hã dasiwi pisutu za'ra ni, 'Re ihâimana u'âsi mono nhorõwa 'ri ma danhoprubzé nhimi'warazé hã, 10 na amnho tehâri wasi misi da te 're isani za'ra mono nhimi'warazé hã, wahup sidâpâsi amnho duré robrã imorĩ'rata na da te 're isinarĩ za'ra mono nhimi'warazé hã. Tahawa, aibâ norĩ hã 'ri nho'õmo mono waptoma da te 're irobzuri mono na 're idanhoprub za'ra mono hã te te siwi 're waibu, 'Re ihâimana u'âsi mono nhimiroti na rob'ui'éré te te i'ruzéb zarina, sasedoti norĩ ma, duré levita norĩ ma, te te tãma 're sõmri za'ra mono da. Tawamhã uburé Zudaha nhihudu norĩ hã tãma to za'ẽtẽ za'ra di, sasedoti norĩ nhimiromhurizé ma hã, duré levita norĩ nhimiromhurizé ma hã.

Neemia 12:44 ပူးပေါင်းရင်းမြစ်များ

Neemia 10:36

'Re ihâimana u'âsi mono nhimiroti zarina, wa za duré wawa'õtõ mono bâ wa'ra norĩ imorĩ'rada hã wa te 're ãwisi za'ra, isõrõwa 'ri u, tame sasedoti norĩ te te tãma 're hâiba nhomri za'ra mono da. Wanhimizama powawẽ zapu imorĩ'rata na 're ipoto za'ra mono na, pone'ẽrebâ zéré mapure imorĩ'rata na, duré pone'ẽrebâ zéré uzé imorĩ'rata na, wa za duré ãma tãma 're wanhoprub za'ra.

Provébiu 8:34

Ni'wa hã te te 're ĩwapari pese mono hã te za tãma robze sina 're hâimana, ĩnhorõwa 'ridawa ãma tame ĩzô bâtâ sidâpâsi 're isimipari mono hã.

Roma 12:7

Duré ni'wam norĩ hã isazei'wa norĩ pawapto'wa da, te te sima 're apisutu mono wamhã, ta norĩ zama te za tô taha zarina si te te tãma 're dapawaptob u'âsi za'ra. Duré 'Re ihâimana u'âsi mono nhimiroti na dama rowahutu'wa da, te te sima 're i'apisutu mono norĩ hã te za tô ta norĩ zama isarina si te te ãma 're dapawaptob za'ra.