Neemia 10:29 - ꞌRe Ihâimana Uꞌâsi Mono Zadawa Wasuꞌu

²⁹ wa ãhã na wama ipire za'ra norĩ me ropisudu hã romnhihâtâ 'remhã ãne na hã wasiwi 'manharĩ za'ra ni: Wa norĩ, tinhib'a'uwẽ Mozésihi ma, 'Re ihâimana u'âsi mono tinhimiroti te te isõmri na si wa za 're wahâimana za'ra. Duré Wanhib'apito, wate 'Re ihâimana u'âsi mono timreme uburé te te wama 're i'ru za'ra mono zém na si, wa za duré 're wahâimana za'ra. Wa za duré wapo're pese na 're iwahâimana za'ra mono zém na imreme hã wa te ãma tãma 're uwaimrami za'ra. Tawamhã wa te iropisutu za'ra zé, wa te duré ãma 're uwaimrami za'ra mono õ wamhã, te za iwẽ'õ hã te te wama 're apisutu.

Neemia 10:29 ပူးပေါင်းရင်းမြစ်များ

Neemia 13:25

Tahawa aibâ norĩ ma, wa tô pẽtẽ za'ra. Wa tô duré 'Re ihâimana u'âsi mono nhimi'ahârizé hã sada waptẽrẽ za'ra. Tahawa, wa tô duré hâ za'ra. Wa tô duré séré zano za'ra. Tawamhã 'Re ihâimana u'âsi mono nhisi na wa tô tiwi waptẽrẽ za'ra, niwamhã i'ra norĩ hã wasiré a'uwẽ'õ norĩ nhipi'õ na hã 're mro zahu za'ra mono tõ da.

Neemia 7:46

à hã 'Re ihâimana u'âsi mono nhorõwa 'ri 're, romhuri'wa norĩ hã ãne, ã norĩ nhihudu mono hã, Babilonia ãma sito pese na 're ihâimana za'ra mono zém hawi, apâ isihutu norĩ hã: Zia, Hasufa, Tabaote

Neemia 8:2

Tawamhã Esdra, 'Re ihâimana u'âsi mono nhimiroti na rob'ui'éré ré hã ma tô ti'â, aibâ norĩ, pi'õ norĩ, duré ai'uté norĩ rob'ui'éré te te isadaihu'u za'ra da zama isi'rã'õtõzéb u.

Neemia 8:3

Tawamhã tame 're idasisõpẽtẽ pese za'ra mono zéb ãma 'ridawa za'ẽtẽ nho're, ma tô Esdra bâdâ i'rãi watobrozém hawi, abzuma wa'wa u hã, Uburé Danhib'apito nhimiroti na rob'ui'éré hã dama sõré. Tahawa, uburé ari'iwi pese ma tô wapari za'ra ni, te te isõrézé hã.

Neemia 9:2

Izaraéu nhihudu norĩ na 're ihâimana za'ra mono norĩ hã ma tô uburé tisiré a'uwẽ'õ norĩ nhiti sisani za'ra. Tawamhã tite mono bâ tisi'ubumrozém hawi para na oto hâiwi simasa wamhã, ma tô tiwasété na hã duré tihi'rata norĩ wasété na hã siwẽ'õ za'ra.

Neemia 9:38

Tawamhã ãne hã uburé wama 're iromhâimana za'ra mono zarina, uburé wa norĩ Izaraéu nhihudu norĩ hã wa oto rob'ui'éré na 're idasisihâtâ za'ra mono zém na wasisazezé hã wasiwi 'manharĩ ni. Tawamhã wate dama ipire norĩ hã, levita norĩ hã, duré wate sasedoti norĩ hã te za duré taha na hã ãhã na ãma sisihâtâ za'ra.

Salmu 119:106

Te iropisutuzé hã wa za aima suwa, asimiroti i'uwaibaba na ãma asimirowaihu'uzé hã te 're i'madâ'â pese mono na.

Salmu 8:1

Uburé Danhib'apito, Wanhib'apito za'ra, daro mono bâ ma tô asisi za'ẽtẽ na hã da te 're aiwaihu'u za'ra. Duré ai'ãma 're idawata za'ra mono zé hã te hâiwa u 're zasi.

Salmu 8:9

Uburé Danhib'apito, Wanhib'apito za'ra, daro mono bâ ma tô asisi za'ẽtẽ na hã da te 're aiwaihu'u za'ra.

Zuwã 15:14

Ĩnhimiroti si 're 'madâ'â pese uptabi za'ra wa'aba mono wamhã, ĩzawi pese 'wa, te za 're anomro aba mo.

Zuwã 7:19

Duréihã Mozési hã ma tô aima sõmri za'ra wa'wa, 'Re ihâimana u'âsi mono nhimiroti hã, aihi'rata norĩ wa'aba ma hã. Tane nherẽ, isimiroti hã 're 'madâ'â pese za'ra wa'aba mono õ di. E marĩ wa, te bété asima iwẽ za'ra wa'wa, asiwi ĩwĩrĩ aba da.

Zezusihi zadawa wasuꞌuꞌwa norĩ nhimiromhuri na robꞌuiꞌéré 11:23

Tamomo wisi wamhã, ma tô waihu'u, 'Re ihâimana u'âsi mono hã iwẽ na dama 're isõpru mono zém na hã tame. Tahawa, toi uptabi di, Banabé hã. Tawamhã ma tô dama roti, ãne: — Aihĩni, aipẽ'ẽ na sada 're asimi'ẽ za'ra wa'aba mono, Wanhib'apito niwĩp si 're aihâimana u'âsi za'ra wa'aba mono da.

Zezusihi zadawa wasuꞌuꞌwa norĩ nhimiromhuri na robꞌuiꞌéré 17:34

Tane nherẽ, ni'wam norĩ hã ma tô Pauluhu ãma sasõmri za'ra. Zezusi hã ma tô saze za'ra. Aibâ hã, Dionizi'u na isisi hã ma tô saze, da'ãma rowairébé'wa norĩ siré Atena ãma, dama ipire uptabi hã. Pi'õ Damarisi na isisi hã ma tô duré saze. Duré ni'wam norĩ hã tamemhã umro na ma tô siré saze za'ra.

Zezusihi zadawa wasuꞌuꞌwa norĩ nhimiromhuri na robꞌuiꞌéré 23:21

Tawamhã itẽme satõrĩ za'ra da, saze za'ra õ di za. Tô'ã. Aibâ norĩ hã 40 nhipai u ihâiba hã ma tô sima 'ru za'ra, te te siwi wĩrĩ da. Te te siwi wĩrĩ õ ré hã, saihuri õ di za, u. Duré â hã te te âhuri õ di za, u. 'Re ihâimana u'âsi mono ma, ma tô duré si'ru za'ra, te te uprosi da, te te sima i'ru za'ra zé hã te te ãma uwaimrami za'ra õ wamhã. Te za, u, sô aima'uri za'ra. Asa tãma irowaihu'u za'ra zéb zô si, te ãhã na hã mapari za'ra.

Roma 12:9

Taré asimizawizé hã aima 're hâimana za'ra wa'aba mono tõ da, te za tô sena na asimizawi pese zé hã aima 're hâimana u'âsi za'ra wa'wa. Uburé marĩ wasété nhiti, te za 're aihâimana za'ra wa'aba mo, asiwi 're wẽ'õ pese za'ra wa'aba mono sina. Uburé aihâimanazé iwẽ na si te za oto 're aihâimana za'ra wa'aba mo.