Mateu 9:8 - ꞌRe Ihâimana Uꞌâsi Mono Zadawa Wasuꞌu

⁸ Tawamhã ãne hã da te 'madâ'â za'ra wamhã, ma tô tãma tapẽ'ẽwara za'ra ni, dama sa'rese õ wa. Ma tô duré 'Re ihâimana u'âsi mono ãma tawata za'ra ni, tiwaihu'u pe hã te te dama 're anhomri mono wa.

Mateu 9:8 ပူးပေါင်းရင်းမြစ်များ

Mateu 12:23

Tawamhã da'ahâ na ma ãma tatob'uzu za'ra ni. Tahawa, te dasima nharĩ za'ra ni, ãne: — Ãté õ hã apito Dawihi nhihudu, sô 're iwanhimipari za'ra mono.

Mateu 15:31

Tawamhã imreme'õ norĩ hã ma tô mreme wairé. Duré i'rãtẽire norĩ hã ma tô timorĩ wẽ za'ra. Imorĩ'õ norĩ hã te duré oto para na 're nomro. Itob'a norĩ hã te te duré rob'madâ'â wẽ za'ra di oto. Tawamhã ãne hã da te 'madâ'â za'ra wamhã, ma tô ãma tatob'uzu za'ra ni. 'Re ihâimana u'âsi mono ãma, ma tô duré ãma tawata za'ra ni, Izaraéu nhihudu norĩ nhib'apito ãmamhã.

Mateu 28:18

Tawamhã Zezusi hã ma tô 'râwi itẽme timorĩ za'ra oto. Taha wamhã, ma tô tãma nharĩ za'ra, ãne: — Ĩmama hã ma tô ĩma pisutu, isadawa para dama ĩpire na 're ĩhâimana mono da, ti'ai ãma, duré hâiwa ãma zama.

Mateu 5:16

Tane duré, a norĩ wa'wa hã te za sõ'awi dama 're aihâimana za'ra wa'aba mo, rob'uiwẽzé hã sõ'awi te te dama 're irob'uiwẽ za'ra mono ne. Uburé marĩ hã te za dama 're i'manharĩ wẽ u'âsi za'ra wa'aba mo, dama 're i'manharĩ wẽ za'ra wa'aba mono zé hã da te 're i'madâ'â za'ra mono zéb zarina, Aimama za'ra wa'aba ãma 're dawata za'ra mono da, hâiwa ãma 're isãmra mono ãma.

Mateu 9:7

Tawamhã awa'awi ma tô wahudu aibâ hã, tinhorõwa u morĩ da.

Marcu 2:12

Tawamhã awa'awi ma tô wahudu, aibâ hã. Tiza'warizé, ma tô ti'â. Rob u, ma tô oto iré watobro, danho'a. Tahawa, uburé, ma ãma tatob'uzu za'ra ni. 'Re ihâimana u'âsi mono ãma, te duré ãma tawata za'ra ni. Ãne ma tô dasima rowasu'u za'ra ni: — Ãne hã niwa wa te i'madâ'â za'ra õ.

Marcu 7:37

Tawamhã isimirowasu'u, da te wapari za'ra wamhã, ma tô ãma tatob'uzu za'ra ni. Ãne te Zezusi hã dasima wasu'u za'ra ni: — Tô sena, te uburé marĩ iwẽ hã te te dama 're ab'manharĩ. Ipo'reptõ mreme waihu'u'õ na 're ihâimana mono hã ma tô pese.

Luca 13:13

Taha pari, ma tô tinhib'rada hã ãma tihi. Tawamhã ma tô awa'awi wãi wahudu. Wãi wahutu wamhã, te ãma tiwata, 'Re ihâimana u'âsi mono ãma, te te pese wẽ te.

Luca 17:15

Tawamhã ma tô misi apâ mo Zezusihi u, tihâiba hã te te 'madâ'â wa. Ta hã samaritanu. 'Re ihâimana u'âsi mono ãma wata sina, te apâ mo, mreme 'rãihâ sina.

Luca 17:18

Wasiré zudeu'õ nherẽ, e niha te we ãhã si mo apâ siwaprosi. 'Re ihâimana u'âsi mono ãma wata da, isimipese waihu'u pese na.

Luca 18:43

Tawamhã awa'awi ma tô rob'madâ'â wẽ, aibâ hã. Zezusihi siré te oto mo, 'Re ihâimana u'âsi mono ãma, wata sina. Uburé, ãma i'madâ'â'wa norĩ zama, te 'Re ihâimana u'âsi mono ãma tiwata za'ra. Ãne Zezusi, itob'a te te ito pesezé wasu'u hã.

Luca 2:20

Taha pari, te apâ ai'aba'ré, pone'ẽrebâ 'madâ'â'wa norĩ hã. Morĩ sina, te ãma tiwata za'ra, 'Re ihâimana u'âsi mono ãma, rowasu'u te te iwapari za'ra zém na, duré te te i'madâ'â za'ra zém na. Hâiwa ãma romhuri'wa nhimirowasu'u zarina, tô sena na te te waihu'u za'ra wa, ma tô tinho're na ãma tiwata za'ra.

Luca 23:47

Tawamhã aibâ hã ma tô tinhowẽ, da'wapéi'wa norĩ wada'uri'wa hã, romanu hã. Sõwẽ wamhã, te ãma tiwata, 'Re ihâimana u'âsi mono ãma. Ãne te tinha: — Nare õ hã, aibâ 're imorĩ wẽ tô.

Luca 7:16

Dâ'â zahã, oto sahâ na sãmra wa, ma tãma tapẽ'ẽwara za'ra ni. Ãne te dasima nharĩ za'ra ni: — Tinhib'a'uwẽ norĩ hã te za we te te 're wa'apawapto, 'Re ihâimana u'âsi mono hã. Ma tô we watẽme satõ, tizadawa wasu'u'wa hã. Mreme pire uptabi di.

Zuwã 15:8

'Re anomro wẽ uptabi aba mono wamhã, ĩzazei uptabi 'wa na te za da te 're aiwaihu'u za'ra wa'wa. Tawamhã Ĩmama ãma te za 're dawata za'ra. E marĩ wa. 'Re anomro wẽ wa'aba mono da, te te 're aipawaptob u'âsi za'ra wa'aba mono wa.

Zezusihi zadawa wasuꞌuꞌwa norĩ nhimiromhuri na robꞌuiꞌéré 11:18

Ãne hã te te wapari za'ra wamhã, asa te te tãma nharĩ waihu'u za'ra õ di oto. Tahawa, ma tô ãma tiwata za'ra, 'Re ihâimana u'âsi mono ãma. Tawamhã te oto sima rowasu'u za'ra, ãne: — 'Re ihâimana u'âsi mono hã ma tô zudeu'õ norĩ zama pisutu za'ra, tiwasété wi 're sipizari za'ra mono da, 'Re ihâimana u'âsi mono siré, rowẽ na 're hâimana u'âsi za'ra mono da.

Zezusihi zadawa wasuꞌuꞌwa norĩ nhimiromhuri na robꞌuiꞌéré 21:20

Pauluhu mreme te te wapari za'ra wamhã, aihĩni ma tô ãma tiwata za'ra, 'Re ihâimana u'âsi mono ãma. Tahawa, te asa tãma rowasu'u za'ra, Pauluhu ma, ãne: — Wasisãnawã, ãhã na wa za aima wasiwasu'u za'ra ni. Zudeu norĩ, wasiré hã ahâ uptabi na ma tô Zezusi hã te te sina 're umnhasi za'ra, Danho'reptui'wa na. Aihĩni, te simi'ẽ na 're hâimana za'ra, 'Re ihâimana u'âsi mono nhimiroti 'rata na Mozésihi nhimi'ui'éré zarina.

Zezusihi zadawa wasuꞌuꞌwa norĩ nhimiromhuri na robꞌuiꞌéré 4:21

Aibâ ihi'ré hã pese õ ré hã, 40 na ma tô ãma tiwahu. Tahawa, aihĩni 'Re ihâimana u'âsi mono ãma te tawata za'ra ni, aibâ ihi'ré hã morĩ wẽ wa oto. Tahawa, da te dasiwi ahâri da, te te dama 'ru waihu'u za'ra õ di, zudeu norĩ ma roti'wa norĩ hã. Tahawa, te taré duré tãma amhâzépa zahuré ni, Pedru norĩ ma, Zuwãhã me, te te dama rowasu'u zahuré tõ da oto, Zezusihi wasu'u na. Taha parimhã, ma tô duré oto tãma rob'ru zahuré ni, neb zahuré da.

2 Corĩtu 9:13

A norĩ wa'wa hã tãma asõprub za'ra wa'aba zém na, pawaptob za'ra wa'aba wa, te za tãma ãma i'uwaimrami za'ra wa'wa, 'Re ihâimana u'âsi mono ma hã. Tahawa, ahâ na te za tô 'Re ihâimana u'âsi mono ãma tiwata zara, Cristuhu wasu'uwẽ zarina 're anomro wẽ wa'aba mono na, duré asõprub uptabi na pawaptob za'ra wa'aba wa, ta norĩ hã, duré darob amoi ãma 're ihâimana za'ra mono norĩ hã, pawaptob za'ra wa'aba wa.

Galata 1:24

Tahawa, Wanhib'apito zazei'wa norĩ hã, 'Re ihâimana u'âsi mono ãma si, te 're wata u'âsi za'ra, te te ĩnho'reptui wẽ te ta hã.

1 Pedru 2:12

A norĩ wa'wa hã Wanhib'apito zazei'õ'wa norĩ wazari, te 're aihâimana za'ra wa'aba mo. Tahawa, te za aihâimana wẽ na si dama 're aihâimana za'ra wa'aba mo. Tawamhã aihâimana wasété na, taré da te aima 're nharĩ za'ra wa'aba mono nherẽ, te za da te 're aiwaihu'u za'ra wa'wa, dama 're aihâimana wẽ za'ra wa'aba mono zém na. Tawamhã Cristu hã apâ wei morĩ wapsi, te za 'Re ihâimana u'âsi mono ãma tawata za'ra ni, isimiroti zarina aihâimana wẽ na, dama 're aihâimana za'ra wa'aba mono wa.