Mateu 9:24 - ꞌRe Ihâimana Uꞌâsi Mono Zadawa Wasuꞌu

²⁴ Tawamhã ãne te dama tinha: — Mo oto aiwairébé aba. Azarudu hã dâ'â õ di. Taré te nhono. Tawamhã ma tô ãma tato za'ra ni, dâ'â uptabi nherẽ, taré isõtõ na te te waihu'u wa, Zezusi hã.

Mateu 9:24 ပူးပေါင်းရင်းမြစ်များ

Marcu 5:40

Tawamhã asa te tãma nharĩ za'ra, ãne: — Oro taré sõtõ za. Pẽ'ẽzani õ di. Tawamhã Zezusi hã ma tô dama rob'ru, rob u dawairébé da, uburé. Si'ubdatõ isiré 're inomro mono norĩ hã ma tô isiré asisi, 'ri 're wa'wa u, inomrozéb u hã. Ina norĩ si, ma tô isiré tizasi zahuré.

Luca 8:53

Tawamhã asa te tãma nharĩ za'ra ni: — Oro taré sõtõ za, te pẽ'ẽzani ãna nomro. Idâ'âzém na, ma tô waihu'u za'ra ni. Tahawa, ma tô ãne tãma nharĩ za'ra ni.

Zuwã 11:4

Tawamhã Zezusi, ãne hã te te wapari wamhã, te tinha, ãne: — Tane tô. Dâ'â u'âsi nomro õ di za. Tahawa, te za 'Re ihâimana u'âsi mono ãma 're dawata za'ra, waihu'u pese wa. Ĩ'ãma zama te za duré 're dawata za'ra. Wa hã i'ra wa, te za duré ĩ'ãma 're dawata za'ra.

Zezusihi zadawa wasuꞌuꞌwa norĩ nhimiromhuri na robꞌuiꞌéré 20:10

Tahawa, Paulu hã ma tô itẽme si'ra. Te te itẽme si'rai wamhã, ma tô sô aiwẽ'ẽ. Tawamhã ma tô iré pahato, te te sa'ra da. Tawamhã ãne ma tô dama tinha: — Aipẽ'ẽwara za'ra wa'aba tõ. Hâiba ré, te nomro.

Zezusihi zadawa wasuꞌuꞌwa norĩ nhimiromhuri na robꞌuiꞌéré 9:40

Tahawa, ma tô Pedru hã tãma rob'ru za'ra, aihĩni wairébé da. Wairébé za'u si, ma tô hi'rãtitõ nhamra, 'Re ihâimana u'âsi mono ma, mreme da. Tawamhã ma tô aipi'ra, pi'õ idâ'â u. Te tãma tinha, ãne: — Tabita, ai'utu. Tawamhã pi'õ hã ma tô toporo. Pedru te te 'madâ'â wamhã, ma tô udu.