Mateu 9:15 - ꞌRe Ihâimana Uꞌâsi Mono Zadawa Wasuꞌu

¹⁵ Tawamhã te Zezusi asa hã tãma nharĩ za'ra ãne: — Aibâ hã imrozéb u, sô ihârâ za'ra norĩ sihutu wamhã, e aibâ imro da hã isiré sãmra za'ra ré, te za robzei'õ na hã tihâimana za'ra, ta norĩ hã. Mare di. Ãne hâimana za'ra õ di za. Niwapsi te za bâdâ hã iwa waptãrã, aibâ imro da hã isiwadi norĩ wa'wa hawi, da te tiwi i'âri za'ra zéb da hã. Tawapsi te za tô sai ãna hã, duré tãma za'ra robzei'õ na hã 're si'ubumro za.

Mateu 9:15 ပူးပေါင်းရင်းမြစ်များ

Mateu 9:14

Tawamhã Zuwã Batistaha siré 're inomro mono norĩ hã ma tô Zezusihi u ai'aba'ré. Taha wamhã, te ãne siwi sadanha: — Wa norĩ hã, farizeu norĩ me hã 'Re ihâimana u'âsi mono ma, 're wamreme zusi mono da hã, wasai ãna wa a'â 're wahâimana za'ra, bâtâ na hã. E marĩ wa, bété a'â sai ãna asiré 're inomro mono norĩ hã wasine 're hâimana za'ra mono õ di.

Mateu 9:16

— Duré da'uza hâ'ratare wamhã, te za hâihata. E tawamhã ihâté hânhihâri na te za ãma hâiwa'aba ni. Mare di. Ihâté hânhihâri na da te hâiwa'aba wa, duré oto da te iré hâ'upsõi wamhã, te za tihâzahutu za, ihâiwa'aba zébre hã. Taha wamhã, te za oto duré hâsisinarĩ pese, da'uza hâ'rada hã.

Marcu 2:19

Tawamhã Zezusi, ma tô asa tãma waihu'u za'ra: — Aibâ hã imrozéb u, sô ihârâ za'ra norĩ hã sihutu wamhã, e saihuri ãna, te za tihâimana za'ra. Mare di. Saihuri ãna hâimana za'ra õ di za. Aibâ imro da hã i'rata sãmra za'ra ré, te za tô isiré tisa hã tihu, to sina.

Marcu 2:20

Niwapsi te za bâdâ hã iwa waptãrã, aibâ imro da hã isiwadi norĩ wa'wa hawi, da te tiwi i'âri za'ra zéb da hã. Tawapsi te za tô sai ãna 're si'ubumro, robzei'õ na.

Luca 17:22

Tawamhã te tãma nharĩ za'ra, tisiré 're inomro mono norĩ ma, ãne: — Niwapsi te za asima iwẽ za'ra wa'wa, bâdâ iwa waptã'ã da, ti'ai ãma dasiré ipodo hã te te dama 're iroti mono zé hã. Ãté ãne te za asima inharĩ za'ra wa'wa: “Misi bâtâ na nherẽ, Wanhib'apito na, wa te wasina waihu'u za'ra neza.” Ãne te za asima inharĩ za'ra wa'wa. Tawamhã a'â asina waihu'u za'ra wa'aba õ di za.

Luca 5:34

Tahawa, te Zezusi hã asa tãma nharĩ za'ra, ãne: — Aibâ hã imrozéb u, sô ihârâ za'ra norĩ hã sihutu wamhã, e te za dasa hã tiwi sawi za'ra ni, saihuri ãna si'ubumro da, ta norĩ hã. Mare di. Aibâ imro da hã, i'rata sãmra za'ra ré, te za tô isiré tisa tihu, to sina.

Luca 5:35

Niwapsi te za bâdâ hã iwa waptãrã, aibâ imro da hã isiwadi norĩ wa'wa hawi, da te tiwi i'âri za'ra zéb da hã. Tawapsi te za tô sai ãna 're si'ubumro, robzei ãna.

Zuwã 3:29

Dasina 're damro za'ra mono wamhã, aibâ hã oto mro wa, isiwadi hã tãma toi uptabi di. Aibâ hã imro hã tito na siwasu'u wamhã, toi uptabi di, isiwadi hã. Tane duré wa hã, ĩtoi uptabi di. E marĩ wa. Da'ahâ na oto 're danomro mono wa, Zezusihi u.

Zezusihi zadawa wasuꞌuꞌwa norĩ nhimiromhuri na robꞌuiꞌéré 14:23

Tawamhã 'ri nho'õmo mono bâ isazei'wa norĩ hã siré 're isi'rã'õtõ mono sidâpâsi ma tô da'madâ'â'wa da hã te te 're apisutu zahuré, Paulu norĩ hã. Sai ãna, te duré ta norĩ hã timreme zahuré, Wanhib'apito ma, te te sina 're i'umnhasi za'ra mono ma, iwasété wi da'wawi 're isimapa za'ra mono zém na te te 're pawaptob u'âsi za'ra mono da, da'madâ'â'wa norĩ hã.

1 Corĩtu 7:5

Tahawa, aimro ré 're i'aihâimana za'ra wa'aba mono norĩ, aimro wi aihâiba hã 're sawi za'ra wa'aba mono õ di za oto. Ãté nimahã bâtâ na si te za ãma 're asisaze za'ra wa'aba mo, aimro ma, aihâiba hã a'â 're sõmri za'ra wa'aba mono tõ da, 'Re ihâimana u'âsi mono ma si, a'â 're asisõmri za'ra wa'aba mono da, tãma 're aimreme zusi aba mono da. Ãne wamhã, 'Re ihâimana u'âsi mono ma, 're aimreme zusi aba mono pari, aihâiba hã aimro wi 're sawi za'ra wa'aba mono ãna, te za tô aihâiba na apâ asima ãma 're atob za'ra wa'aba mo, aiwasédé hã aihâiba na 'râwi nherẽ, aimro õ ne, asiwi 're 'manharĩ za'ra wa'aba mono tõ da, asina 're asiptete za'ra wa'aba mono õ wa, Satanasi hã te te 're aipibu za'ra wa'aba mono tõ da.

2 Corĩtu 11:27

Duré ãma 're ĩhâimana mono zéb da hã, wa tô te ĩsima 're romhuri pese, ĩnhib'rata na. Bâtâ ahâ na wa tô duré ĩnhotõ ãna hã ĩza'wari. Mram na zama hã te duré robzépata ahâ di, duré 'rubu na zama. Ĩsai ãna te 're iromhuri mono zém na hã, wa tô duré te 're robzépata. Ĩ'uza ãna 're ĩhâimana mono zém na zama, wa tô duré te 're robzépata.

Apocalipsi 19:9

Tawamhã hâiwa ãma 'Re ihâimana u'âsi mono ma romhuri'wa hã te ĩma tinha, ãne: — Ma'ãpé, ãne na ãma rob'ui'éré: “Pone'ẽrebâ imrozém na da te dasima ãma iromhu'u za'ra zéb u sihutu da, 'Re ihâimana u'âsi mono hã sô ihârâ za'ra norĩ ma, tãma 're rowẽ uptabi za'ra mono di za.” Ãne te duré ĩma tinha: — Ã hã 'Re ihâimana u'âsi mono mreme hã tô sena uptabi.

Apocalipsi 21:2

Tawamhã wa tô duré 'madâ, 'ri nho'u hã, iwasédé iwa 're ihâimana mono õ hã, Zeruzalẽ itém na isisi hã. Ta hã te hâiwa hawi wei mo, 'Re ihâimana u'âsi mono hawi. Pi'õ hã oto mro da, 're isi'uza wẽ uptabi za'ra mono ne, ma we si'ra, 'ri nho'u iwẽ uptabi hã.