Mateu 8:8 - ꞌRe Ihâimana Uꞌâsi Mono Zadawa Wasuꞌu

⁸ Tawamhã romanu hã te duré tãma tinha ãne, da'wapéi'wa norĩ wada'uri'wa hã: — Tô'ã, apito. Wa hã aima ĩwapure di, ĩnhorõwa u asébré da hã. Tahawa ma'ãpé, taré ã hawi aimreme na si hã pese, séptâ'â da. Taha wamhã, te za tãma tirowẽ za, ĩma romhuri'wai ma hã.

Mateu 8:8 ပူးပေါင်းရင်းမြစ်များ

Zenezi 32:10

Wa hã asib'a'uwẽ, tarére na 're ĩhâimana mono nherẽ, ĩma asimizawi pese zé hã duré ai'umnhasi u'âsi wa, ĩ'ãma 're aiwamri mono zé hã aré tô ĩma hã ibâi õ di. Panho'u Zodã pa na te saprĩ wamhã, ĩsiwazusizéb ré si wa tô saprĩ. Tane nherẽ, ãhã na awa'awi na hã wa oto maparane dawa'õtõ na abaze norĩ ré hã apâ ĩsina siri.

Salmu 10:17

Uburé Danhib'apito, a hã te za da te ãma 're iro'wa'rutu za'ra mono norĩ mreme hã 're i'awapari mo. Te za duré ipẽ'ẽ nhiptetezé hã tãma 're i'anhomri mo.

Mateu 3:11

Te duré dama tinha: — Wa hã wa tô â uptabi na si, â dawabzuri hã te aima 're ab'manharĩ 'wa, aiwasété wi 're aipizari za'ra wa'aba mono zém na, da te oto ãma 're aiwaihu'u za'ra wa'aba mono da. Tane nherẽ, ĩza'u si te za ĩma ipire uptabi hã wei wi. Taha si te za oto 'Re ihâimana u'âsi mono pẽ'ẽzani na te te duré 're aihâiba ubu za'ra wa'wa, unhama ne na zama, â na te aima 're i'ab'manharĩ aba mono ne hã. Ta hã ĩma pire uptabi wa, ipara'uza hã te tãma mrami waihu'u õ di za, tãma ĩwapure wa, wa hã.

Mateu 3:14

Tane nherẽ, Zuwã Batista, isimirosa'rada te te ãma tiwi saprĩ da, ma tô aré pibu, â dawabzuri te te tãma 'manharĩ tõ da. Tahawa te ãne tãma tinha: — E marĩ da, te ĩma aipire uptabi nherẽ, ĩma asi'ru, â dawabzuri te aima 'manharĩ da. A hã te aré ĩma i'manha.

Mateu 8:3

Tawamhã Zezusi ma tô tinhib'rada hã wahutu, te te ãma upi da. Te te upi wamhã, te ãne tãma tinha: — Tane tô. Wa tô ĩsima aiwẽ tô, te aipese da hã. Tahawa tâibâ oto aihâzé hã. Taha wamhã, awa'awi ma tô i'wa're hã tãma ai'utõ.

Mateu 8:7

Tawamhã Zezusi te asa hã tãma tinha ãne: — Wa za ãma mo, te pese da.

Mateu 8:9

Wa hã da'wapéi'wa norĩ wada'uri'wa zapari romhuri'wa. Ĩzapari te duré 're hâimana za'ra, da'wapéi'wa norĩ hã. Nimomo te 'mazatõrĩ wamhã, te za 'maimo. Duré sô ĩ'maihârâ wamhã, te za we ĩtẽme hã 'maimo. Duré ĩma romhuri'wai ma, marĩ hã te 'rui wamhã, te za 'manha awa'awi, ĩzadawa para.

Luca 15:19

Ĩwasété wa, ãté ĩ'ãma 're ai'ra mono õ di za oto. Aima romhuri'wa da, oto 're ĩmorĩ da, te za ĩma ipisu.’ ” Ãne ma tô rosa'rada hã sima 'manha, ai'repudu hã.

Luca 15:21

Tawamhã te timama ma tinha, ai'repudu hã, ãne: “Ĩmama, ĩwasété na, wa tô 're mo. 'Re ihâimana u'âsi mono nhimiroti hã, wa tô upa. Asimiroti zama, wa tô duré upa. Ĩwasété wa, ãté ĩ'ãma 're ai'ra mono õ di za.” Ãne te timama ma tinha, ai'repudu hã.

Luca 5:8

Tebe ahâ na te te awaibui wamhã, ma tô ãma titob'uzu za'ra. Tiagu norĩ zama, ma tô ãma titob'uzu zahuré, Zuwãhã me. Ta norĩ hã Zebedehe 'ra zahuré. Isiré tepe na, te te 're romhuri zahuré, Simahã siré hã. Tawamhã hi'rãtitõ, ma aime Zezusihi papara, Sima Pedru hã, tebe ahâ na te te 'madâ'â wa. Ãne te Zezusihi ma tinha: — Ĩ'rata asãmra õ di za. Te za oto aimo, ĩnhiti. Wa hã ĩwasétére di. Tawamhã Zezusi te asa tãma tinha, ãne: — Asina aipahi õ di za. Tepe na 're iromhuri mono ne, te za oto ĩma 're ida'awaibui wẽ mo.