Mateu 8:16 - ꞌRe Ihâimana Uꞌâsi Mono Zadawa Wasuꞌu

¹⁶ Tawamhã bâdâ sébrézéb u, ma tô wa'uburé ré 're idanomro mono hã da te simro, Zezusihi u, ahâ uptabi na. Tawamhã misi si te nasi dama azatõ wa'uburé hã, misi haré timreme na. Uburé ihâzé ré norĩ zama te duré apese.

Mateu 8:16 ပူးပေါင်းရင်းမြစ်များ

Ezodu 15:26

Tahawa, te ãne tãma nharĩ za'ra: — Te aima inharĩ za'ra wa'aba zém na ĩwapari pese za'ra wa'aba wamhã, i'uwaibaba na marĩ 're 'manharĩ za'ra wa'aba mono wamhã, duré aima ĩnhimiroti za'ra wa'aba zé hã asima 're tété za'ra wa'aba mono wamhã, wa hã aihâzé na te i'aihâ za'ra wa'aba da hã mare di za, ezipsiu norĩ te ãma ihâ za'ra zém ne hã. Wa hã Uburé Danhib'apito, te 're i'aipese za'ra wa'aba mono 'wa.

Mateu 12:22

Tawamhã Zezusihi tẽme, ma tô aibâ hã dasiwi saprõni ni, wa'uburé te te 're pibui u'âsi mono wa, itob'a na duré imreme'õ 're ihâimana mono hã. Tawamhã Zezusi hã ma tô pese. Te te pese parip si, ma oto apâ mreme watobro. Duré te te oto rob'madâ'â wẽ di, aibâ hã.

Mateu 14:14

Tawamhã Zezusi hã uba're hawi watobro wamhã, da'ahâ uptabi na ma tô da'ab'madâ. Te te da'ab'madâ'â wamhã, ma tô da'ãma tipẽ'ẽzé, Zezusi hã. Tahawa, ihâzé ré norĩ tame isi'ubumro norĩ hã ma tô apese.

Mateu 8:15

Tawamhã ma tô sib'rata upi, Zezusi hã. Te te sib'rata upi wamhã, ma tô tiwahâ. Taha wamhã, pi'õ hã ma tô wahudu. Wahutu wamhã, ma tô isa hã tãma tisõ Zezusihi ma, sa da.

Mateu 8:33

Tawamhã uhâbâ 'madâ'â'wa norĩ hã ma tô isiti sisa're. 'Ri nho'õmo u ma tô sisa're. Tame ma tô uburé dama rowasu'u za'ra, aibâ norĩ ma, niha iromhâimana zahuré zém na hã, wa'uburé ré 're ineb zahuré ma.

Mateu 9:2

Tamomo ma tô ni'wam norĩ hã we siwi ti'â, imorĩ'õ hã isimiwaptâ ré. Imorĩ'õ za te te ipesezém na hã ma tô ãma siwi umnhasi, Zezusi hã. Tawamhã Zezusi hã taha na ma tô sina simirosa'rata waihu'u za'ra, aibâ norĩ hã. Tahawa, te imorĩ'õ ma tinha ãne: — Ĩsiwadi, aiwi robzei'õ tõ. Aiwasédé hã 're i'ab'manharĩ wasété mono zé hã te ai'ãma 're ab'madâ'â mono õ di za oto.

Marcu 2:3

Tawamhã Zezusi hã rowasu'u wẽ na te te dama rowasu'u ré, aibâ norĩ, ma tô ihi'ré hã itẽme siwi ãwisi, isimiwaptâ wa. Aibâ norĩ hã maparane si'uiwa na ihâiba za'ra hã.

Marcu 5:8

Ãne te Zezusihi ma tinha wa'uburé hã, te te tãma rob'rui wa, aibâ hâiba hawi watobro da.

Marcu 9:25

Tawamhã Zezusi hã itẽme idasi'rã'õtõ norĩ hã da'ahâ na te te da'ab'madâ'â wamhã, ma tô wa'uburé ma rob'ru, ãne: — Wa'uburé, ai'repudu 're upi u'âsi mono wa, te mreme'õ u'âsi 're hâimana. Te duré po'reptõ u'âsi 're sãmra. Aiwatobro, ai'reputu hawi. Niwa apâ asébré tõ, ai'reputu 'remhã.

Luca 13:12

Tawamhã Zezusi te te 'madâ'â wamhã, te 'mahâ, ãne: — Pi'õ, aihâzé hã te za oto aima apa.

Luca 4:40

Tawamhã bâdâ sébrézéb u, ma tô we itẽme ãwisi za'ra ni Zezusihi u, isiwadi norĩ hã, ihâzé sipu'u norĩ hã. Tawamhã tinhib'rada, ma tô te te da'ãma aza'ra, misi si. Tahawa, ma tô tazéptâ'â za'ra ni.

Luca 4:41

Duré wa'uburé hã ma tô dahawi wairé. Da'ahâ na, iré 're idanomro mono norĩ hawi, ma tô wairé, wa'uburé norĩ hã. Tawamhã dahawi wairébé sina, te ãne 'mahârâ za'ra: — A hã, 'Re ihâimana u'âsi mono 'ra. Zezusi hã, Danho'reptui'wa da, 'Re ihâimana u'âsi mono te te ipisutu na te te waihu'u za'ra wa, ma tô Zezusi hã imreme hã tiwi sisisi za'ra sa'ẽtẽ, ari'iwi dahawi wairébé da.

Zezusihi zadawa wasuꞌuꞌwa norĩ nhimiromhuri na robꞌuiꞌéré 5:15

Ãne hã Zezusihi zadawa wasu'u'wa norĩ hã te te dama 're 'manharĩ za'ra mono wa, ma tô ihâzé ré norĩ hã da te 're sa'ra, 'ri nhi'riti wa, 're simi'wara mono da, isa'warizé wa, duré wetenhamri wa. Pedru hã iwa'wai baba za'ra te te ro'razâri wa, i'awã hã te te hâiba upsibi za'ra da, te tame 're simi'wara, te te pese za'ra da.