Mateu 7:6 - ꞌRe Ihâimana Uꞌâsi Mono Zadawa Wasuꞌu

⁶ — Duré 'Re ihâimana u'âsi mono 'ruiwapari'wa norĩ ma, iwasu'uwẽ na tãma 're rowasu'u za'ra wa'aba mono õ di za, te te ãma 're iwasété za'ra mono norĩ ma hã. E marĩ wa. Ta norĩ hã wapsã ma, marĩ ise hã da te tãma 're a za'ra mono nherẽ, dazô 're sipizari za'ra mono wa, te te 're idahâzu mono ne, te za ta norĩ hã asada 're hâimana wasété za'ra wa'wa. Uhâbâ norĩ hã marĩ wẽ zô, sima 're sõpré waihu'u mono õ di. Marĩ iwẽ hã wa'âbâ za'ẽtẽ nherẽ, uhâbâi ma, da te 're sãmra mono wa, taré te te 're iwati'i za'ra mono ne, te za ta norĩ hã taré te te 're wapari za'ra, iwasu'uwẽ hã. Tahawa, ta norĩ ma, 're rowasu'u za'ra wa'aba mono õ di za, 'Re ihâimana u'âsi mono 'ruiwapari'wa norĩ ma hã.

Mateu 7:6 ပူးပေါင်းရင်းမြစ်များ

Provébiu 11:22

Pi'õ, dama 'madâ'â ze nherẽ, simiza'rese ãna 're hâimana mono wamhã, aiwa ẽtẽ waipo pré oru 'manharĩ na danhiptõmohi wasisizém ne uhâbâ nhisi're za'ruzé isisi're ãma 're isimnhatã mono ne hã te 're hâimana.

Provébiu 23:9

Isimiza'rese'õ ma 're irobzanhamri mono da hã, marĩ dai õ di. E marĩ wa. Ai'rãiwaihu'u wẽ hawim na tãma irobzanhamrizém na hã za te te aiwazéb õ dâ'âsina.

Provébiu 26:11

Wapsã tinho'o te te 're huri mono da, apâ sô 're isi'ãsi za'ra mono ne, te za isimiza'rese'õ, tinhimiza'rese õ zarina marĩ hã te te 're ab'manharĩ zahu.

Provébiu 26:4

Ihâimana nhimiza'rese'õ nhinharĩzém na, aiwam na a hã ãma sada'âbâ wamhã, te za õhõ sine tawamhã oto 're aihâimana mo.

Mateu 15:26

Tawamhã Zezusi ma te ãma tãma wa'rã ãne: — E i'u'ẽtẽ wapu da'ra norĩ te te 're huri mono ré, te za da'ra wi hã da te 're waibu, wapsã ma, da te 're sãmra mono da hã. Mare di. Ãne hã i'uwaibaba õ di. — Ãne te Zezusi hã pi'õi ma ãma tãma romnhimiré'é za'ra, zudeu'õ norĩ ãma, sõ'awim nai õ nherẽ.

Mateu 24:10

Ãne na daré 're romhâimana mono ré, te za ĩzazei'wa norĩ hã te te 're ĩzazei utõrĩ za'ra, ahâ na. 'Râwim nherẽ, te za duré dama 're sihâiba nhomri za'ra, da te 're i'ruiwapari za'ra mono zéb zarina, da te 're waibui mono da. Ĩzazei'wai wa, tisisãnawã na sima 're hâimana za'ra mono nherẽ, te za oto duré 're si'ruiwapari za'ra, 'râwim nherẽ.

2 Corĩtu 11:26

Daro mono bâ 're ĩmorĩ ré hã, ĩma romnhimimnhasi uptabi nherẽ, wa tô âpré na te 're saprĩ, panho'õmo na hã. Duré isimisaihuri norĩ ahâ di, bâdâdi na hã, danhibrob zô dapãrĩ'wa norĩ hã. Ni'wam norĩ hã ĩsiré zudeu 're hâimana za'ra mono nherẽ, ma tô duré ĩzada 're hâimana wasété u'âsi za'ra, zudeu'õ norĩ zama hã duré. 'Ri nho'õmo mono bâ, ma tô duré da te dasima 're ĩ'ru za'ra, niha na da te ĩma 're rob'manharĩ za'ra mono da. A'ubuni wi 're ĩmorĩ ré hã, ĩsina romnhimimnhasi na, wa tô duré 're ĩhâimana, â poré na zama 're ĩmorĩ ré hã. Ni'wam norĩ hã tô sena Cristuhu zazei'wa 're hâimana za'ra mono newa, ma tô duré ĩzada 're hâimana za'ra, ta norĩ zama. Tahawa, ĩsina romnhimimnhasi uptabi nherẽ, wa tô 're ĩhâimana u'âsi.

Filipu 3:2

Tahawa, te za a norĩ wa'wa hã 're asi'madâ'â pese za'ra wa'aba mo, wapsã dazada 're isiwamnarĩ za'ra mono ne, rosa'rata wasété na dazada 're ihâimana za'ra mono norĩ wi. Marĩ iwasété si te ta norĩ hã te te 're 'manharĩ za'ra. Ãne te ta norĩ hã te te dama 're rowasu'u za'ra: “Aibâ norĩ hã Cristu te te 're saze za'ra mono da, te te sima 're wẽ za'ra mono wamhã, te za da te 're sihâiwata nhihâri za'ra, taha zarina 'Re ihâimana u'âsi mono hã ãma 're sib'a'uwẽ za'ra mono da.” Ãne te ta norĩ hã te te dama 're roti za'ra, senai'õ na. Tane nherẽ, te ta norĩ hã dahâiba hã taré te te dawi 're wamnarĩ za'ra, taha zarina 'Re ihâimana u'âsi mono hã ãma 're sib'a'uwẽ za'ra mono da newa.

Hebreu 10:29

Ãne, duréihã 'Re ihâimana u'âsi mono nhimiroti 'rata wẽ'õ'wa norĩ ma hã, 're ropipa za'ra mono di. E niha tawamhã za, 'Re ihâimana u'âsi mono 'ra, te te siwi 're i'ruiwapari za'ra mono norĩ ma, 're iromhâimana za'ra mono zé hã za. Tãma 're ropipa uptabi za'ra mono di za tô. 'Re ihâimana u'âsi mono hã te za tô ta norĩ hã hâ za'ra za'ẽtẽ, rob'rãsutuzéb ãma hã. Duré 'Re ihâimana u'âsi mono te te dama iropisutuzép tém na, Cristu hã dazada idâ'âzé hã taré newa, te ta norĩ hã te te ãma 're rosa'rata upa za'ra. Ta norĩ hã te duré 'Re ihâimana u'âsi mono pẽ'ẽzani ãma te te 're wasété u'âsi za'ra, isimizawi uptabi ãma hã.

2 Pedru 2:22

Ta norĩ hã apâ tiwasété u 're sipizari za'ra mono wa, ma tô te te sina ãma 're uwaimrami za'ra, dahâimanazém na tô sena na da te dasima 're inharĩ za'ra mono zé hã, ãne: “Wapsã hã te za apâ mo, tinho'o'o zô, te te 'rẽne da. Duré uhâbâ hã da te 're upsõ za'ra mono nherẽ, te za apâ 're si'uptob za'ra, ti'ai wai'o na.”

Apocalipsi 22:15

Ni'wam norĩ si 'ri nho'õmo u 're sisisi waihu'u mono õ di za, marĩ iwasété uptabi na 're idahâimana wasété uptabi za'ra mono norĩ hã, duré simi'â na 're idahâimana za'ra mono norĩ hã, duré dahâiba na 're idahâimana wasété za'ra mono norĩ hã, duré dapãrĩ'wa norĩ hã, duré romhâiba 'manharĩ ãma, 'Re ihâimana u'âsi mono upana 're idawata za'ra mono norĩ hã, duré sadawa nhipese ze te, uburé dama 're isadawa nhipese za'ra mono norĩ hã. Ta norĩ hã 're sisisi waihu'u mono õ di za, 'ri nho'õmo u hã.