Mateu 7:26 - ꞌRe Ihâimana Uꞌâsi Mono Zadawa Wasuꞌu

^26-27 — 'Ri'wa hâiba amo na, wa za duré ãma aima simiré'é za'ra wa'wa, tãma ãma irosa'rata waihu'u õ na. Ta hã supara nhisiwip si ma tô sima 'ri, siptete na tãma 're sab u'âsi mono da newa. Tawamhã tã hã pĩni za'ẽtẽ na 're ta'a mono wamhã, ma tô 're âpré. 'Re âpré mono wamhã, ma tô 'ri u â hã 're praba. Rowa'u'u za'ẽne hã ma tô duré 're pusi, 'ri uwaibaba. Tawamhã 'ri hã ma tô 'marõwĩ, awa'awi. Tane duré, ã hã te irotizé ni'wam norĩ tipo're na te te 're wapari za'ra mono nherẽ, te te 're 'madâ'â pese za'ra mono õ wamhã, ta norĩ si te za si'uihâ na 're sisimini za'ra, 'Re ihâimana u'âsi mono 'rata za 're idahâimana u'âsi za'ra mono zém na hã.

Mateu 7:26 ပူးပေါင်းရင်းမြစ်များ

Provébiu 14:1

Pi'õ i'rãi waihu'u wẽ hã tinhorõwa 'madâ'â wẽ 'wa na te za 're hâimana. Tane nherẽ, isimiza'rese'õ sihawim na tinhib'rata na tinhorõwa 'remhã romhâimanazé iwẽ te za te te 're a'uprosi pese.

Mateu 7:24

— Ãne, wa za duré ãma aima simiré'é za'ra wa'wa, 'ri'wai wasu'u na. 'Ri'wa hã tãma ãma rosa'rata waihu'u pese wa, ma tô ẽtẽ nhisiwi 'ri hã 'manha, siptete na 're sa mono da. Tawamhã tã hã pĩni za'ẽtẽ na 're ta'a mono wamhã, ma tô 're âpré. Duré 're âpré mono wamhã, ma tô 'ri u â hã 're praba. Rowa'u'u za'ẽne hã ma tô duré 're pusi, 'ri uwaibaba, te te aré ime da hã. Tane nherẽ, 'ri hã simei õ di, ẽtẽ nhisiwi te te sima 'ri wa, aibâ hã. Tane duré, ã hã te irotizé, ni'wam norĩ te te 're wapari za'ra mono wa, te te oto 're 'madâ'â pese za'ra mono wamhã, ta norĩ si te za rowẽ na 're hâimana u'âsi za'ra, 'Re ihâimana u'âsi mono 'ratamhã.

Luca 6:49

Ãté ni'wam norĩ hã te za ĩnhimiroti hã tipo're na te te 're wapari za'ra. Tane nherẽ, te te 're 'madâ'â za'ra mono õ di za, ĩnhimiroti hã. Tahawa, wa za ĩnhimiroti 'madâ'â'õ'wai ãma simiré'é, 'ri'wa ihâiba amo na. Aibâ hã 'ri na'rata da, te te ab're õ di. Ti'a nhisiwip si, ma tô sima 'ri. Tawamhã 'ri u, â 're praba mono wamhã, â, ma tô 'marõwĩ, 'ri hã. Tâibâ oto. Tahawa, ma tô aipru pese, 'ri hã.

Tiagu 2:20

E niha te rosa'rata ãna 're aihâimana mo. Ãté ni'wa hã te za dama 're siwasu'u, Zezu Cristuhu zazei'wa 're imorĩ na. Tane nherẽ, marĩ iwẽ na te te 're da'apawapto mono õ wamhã, marĩ dai õ di za, dama 're isiwasu'u mono zé hã. Ma'ãpé, ãne hã waihu'u.

1 Samuéu 2:30

Wa hã Izaraéu nhihudu norĩ te, 'Re ihâimana u'âsi mono Uburé Danhib'apito hã wa tô ropisutu duréihã aihi'rata norĩ ma hã za isihudu norĩ hã õne u'â te te ĩma 're iromhuri za'ra mono na hã sasedoti na. Tane nherẽ, ãhã na hã wa za tinha, õne u'â 're ihâimana mono õ na hã za oto. E marĩ wa. Wa hã za oto te 're da'awazé mono dâ'âsina, da te 're ĩwazéb za'ra mono norĩ hã, duré za oto te 're da'awazé mono õ dâ'âsina, da te 're ĩwazéb za'ra mono õ norĩ hã.