Mateu 7:22 - ꞌRe Ihâimana Uꞌâsi Mono Zadawa Wasuꞌu

²² Nimahã bâtâ na ropsi'utõrĩzéb ãma, Ĩmama za oto da'ãma isipo'ozéb ãma hã te za da'ahâ na ĩma nharĩ za'ra ni, ãne: “Wanhib'apito, Wanhib'apito, wa norĩ hã asadawa para, wa tô wa te dama 're sadawa wasu'u za'ra, 'Re ihâimana u'âsi mono hã. Asadawa para, wa tô duré wa'uburé hã wa te dama 're sãmra za'ra. Marĩ dama i'manharĩ waihu'u'õ hã wa tô duré wa te dama 're 'manharĩ za'ra, asadawa para.” Ãne na hã da'ahâ na te za ĩma tasiwasu'u za'ra ni, ĩnhib'a'uwẽ uptabi na hã 're danomro mono newa.

Mateu 7:22 ပူးပေါင်းရင်းမြစ်များ

Mateu 10:15

Tô sena, wa aima waihu'u za'ra wa'wa. Niwapsi 'Re ihâimana u'âsi mono, da'ãma isipo'ozéb ãma hã Sodoma ãma duré Gomora ãma 're idahâimana wasété uptabi za'ra mono norĩ ma, te te irob'manharĩ pipa zém nhipai u, te za asô 're itob'uzu za'ra wa'aba mono õ norĩ ma hã te te tãma 're arob'manharĩ za'ẽtẽ.

Mateu 24:36

Tawamhã Zezusi hã ma duré ãne na tãma waihu'u siromo za'ra: — Ãne hã uburé za daré 're iromhâimana mono zéb da hã, ni'wa bâdâ hã te te waihu'u õ di. Duré Hâiwa ãma romhuri'wa norĩ zama, bâdâ hã te te siwi waihu'u õ di. Duré 'Re ihâimana u'âsi mono 'ra nherẽ, te te duré bâdâ hã waihu'u õ di. Imama ma si hã, waihu'u pese di bâdâ hã.

Mateu 25:11

— Tawamhã ãma ronomro za'ra parip si, ma tô isiré norĩ hã apâ aihutu, pi'õ ipréduptém norĩ hã, aibâ pi'õi ãma imrozéb u hã. Sihutu wamhã, ãne te nasi 'mahârâ za'ra, rowi hawi: “Apito, apito, wei wama 'ridawa za'ra na, ãma atẽme wanhisisi da.”

Mateu 7:21

— Ãté ni'wam norĩ hã te za dama 're siwasu'u za'ra, ãne: “Zezusi hã ta hã Ĩnhib'apito. Wa hã tãma romhuri'wa na, wa tô 're ĩhâimana u'âsi.” Ãne ni'wam norĩ hã dama 're siwasu'u za'ra mono nherẽ, uburé 're sisisi mono õ di za, 'Re ihâimana u'âsi mono, da'ãma 're isib'a'uwẽ mono zéb u hã. Ni'wam norĩ si te za 'Re ihâimana u'âsi mono nhib'a'uwẽ, 're hâimana za'ra, Ĩmama hã hâiwa ãma 're isãmra mono hã te te sima 're i'awẽ mono zéb zarina, marĩ iwẽ si te te 're i'manharĩ za'ra mono norĩ si hã.

Luca 10:12

Ma duré tãma waihu'u za'ra, ãne: — Niwapsi, aiwẽ'õ'wa norĩ wa'aba ma hã, 're robze za'ra mono õ di za. Niwapsi bâdâ hã iwa iwaptã'ãzém na, te za dazô nhamra, marĩ, da te 're i'manharĩ za'ra mono zém na, te te 're da'awaihu'u mono da, 'Re ihâimana u'âsi mono hã. Sodoma ãma 're idasi'ubumroi mono norĩ ma, te te irob'manharĩ pipa zém nhipai u, te za tô aiwẽ'õ'wa norĩ wa'aba ma, te te tãma 're arob'manharĩ za'ẽtẽ.

Zuwã 11:51

Ãne te te tãma rowasu'u za'ra wamhã, ã wahum na sasedoti ipire uptabi na 're ihâimana mono zéb zarina, si'uihâ nai õ nherẽ, te tãma rowaihu'u siromo za'ra, Zezusi hã dazada idâ'âzém na hã.

1 Tesalonita 5:4

Wasiré isazei'wa norĩ, a norĩ wa'wa hã Wanhib'apito apâ wei imorĩzéb zô, te sô 're asimipari za'ra wa'aba mo. Tahawa, awa'awi za wei morĩ nherẽ, tãma a'rãmi za'ra wa'aba õ di za, bara na isimisaihuri norĩ ma, 're idasi'rãmi za'ra mono ne.

2 Tesalonita 1:10

Tawamhã wei morĩ wamhã, isimiroti zarina 're danomro wẽ mono da, te te 're idapawaptob za'ra mono norĩ hã te za ãma tiwata za'ra, te te sina 're i'umnhasi za'ra mono norĩ hã. Te za tô ãma titob'uzu za'ra. A norĩ wa'aba zama, wanhimirowasu'u zarina iwasu'uwẽ na 're isaze za'ra wa'aba mono norĩ hã, te za ãma dame aiwata za'ra wa'wa za. Te za duré ãma atob'uzu za'ra wa'wa za. Tane tô, bâdâ ipire, iwa waptã'ã wapsi, te za uburé dama ãma uwaimra.

2 Timotiu 1:12

Tahawa, te te ĩpisutuzéb zarina, te ĩsina uwaimrami wa, wa oto te 're robzépata. Tane nherẽ, 're ĩnhisé mono õ di, isadawa wasu'u'wa na 're ĩmorĩ tõ da. Wanhib'apito hã wa ĩsina te 're umnhasi, te te 're ĩpawaptob u'âsi mono da. Ta hã ĩma waihu'u pese di, iwaihu'u pese na hã. Wa hã wa tô tãma ĩsihâiba nho, tô sena tãma waihu'u pese wa, te te 're ĩ'madâ'â mono zéb da hã, bâdâ iwa waptã'ã õ ré, apâ we imorĩzéb u hã.

2 Timotiu 1:18

Ãne wa, wa ĩsima wẽ, Wanhib'apito hã iwẽ na te te ãma tãma uwaimrami da, bâdâ iwa tãma waptã'ã wa, dahâimanazém na te te ida'awaihu'uzéb da hã. Onesifuru hã ma tô marĩ mono bâ nasi ĩpawapto, Éfézu ãma 're ĩhâimana mono ré hã. Ãne na hã aima waihu'u pese di.