Mateu 7:21 - ꞌRe Ihâimana Uꞌâsi Mono Zadawa Wasuꞌu

²¹ — Ãté ni'wam norĩ hã te za dama 're siwasu'u za'ra, ãne: “Zezusi hã ta hã Ĩnhib'apito. Wa hã tãma romhuri'wa na, wa tô 're ĩhâimana u'âsi.” Ãne ni'wam norĩ hã dama 're siwasu'u za'ra mono nherẽ, uburé 're sisisi mono õ di za, 'Re ihâimana u'âsi mono, da'ãma 're isib'a'uwẽ mono zéb u hã. Ni'wam norĩ si te za 'Re ihâimana u'âsi mono nhib'a'uwẽ, 're hâimana za'ra, Ĩmama hã hâiwa ãma 're isãmra mono hã te te sima 're i'awẽ mono zéb zarina, marĩ iwẽ si te te 're i'manharĩ za'ra mono norĩ si hã.

Mateu 7:21 ပူးပေါင်းရင်းမြစ်များ

Mateu 12:50

Ni'wam norĩ hã Ĩmama, hâiwa ãma 're isãmra mono te te sima 're iwẽ za'ra mono zéb zarina, te te tãma ãma 're i'uwaimrami za'ra mono norĩ si, te za ĩsisãnawã na hã, duré ĩna na hã 're hâimana za'ra.

Mateu 16:17

Tawamhã Zezusi, te Pedru oto 'mahâ: — Sima, Zuwãhã 'ra, aima 're rowẽ mono di za. Ma tô ãma i'uwaimra. A hã danhimirowasu'u hawi, ãne na ĩwaihu'u õ di. Ĩmama, hâiwa ãma 're isãmra mono si ma tô ãne na aima ĩwaihu'u.

Mateu 18:10

— Ãhãta ai'uté norĩ hã te asimro. Ãma 're rosa'rata wasété za'ra wa'aba mono tõ, dama iwapu newa. Tô sena, wa aima rowasu'u za'ra wa'wa. Hâiwa ãma 'Re ihâimana u'âsi mono ma romhuri'wa norĩ hã te ai'uté mono bâ te te 're 'madâ'â pese za'ra, misi si, tite mono bâ. Ta norĩ hã te Ĩmama nho'a te te 're 'madâ'â pese za'ra, hâiwa ãma 're isãmra mono nho'a.

Mateu 18:19

— Ãne wa za duré tô sena aima waihu'u za'ra wa'wa. Ni'wam norĩ hã maparane na aihâiba nherẽ, marĩ na ti'ai ãma 're asisaze za'ra wa'aba mono wamhã, Ĩmama wi 're irowaptẽrẽ za'ra wa'aba mono zéb uwaibaba, te za tô te te aima ãma 're a'uwaimrami 'wa, hâiwa ãma 're isãmra mono hã.

Mateu 18:3

Tawamhã te tãma nharĩ za'ra oto, ãne: — Tô sena, wa aima waihu'u za'ra wa'wa. Aihâimanazém na saprĩ za'ra wa'aba õ wamhã, 'Re ihâimana u'âsi mono hã ai'ãma 're sib'a'uwẽ za'ra wa'aba mono õ di za. Dama iwapu na ai'uté hâimanazém ne 're aihâimana za'ra wa'aba mono wapsi, te za ai'ãma 're sib'a'uwẽ za'ra wa'wa.

Mateu 18:35

Tawamhã ãne ma tô timreme hã tãma 'rãsutu za'ra, Zezusi hã: — Ãne hã asiré isazei'wa hã asada 're iwasété za'ra wa'aba mono zém na sena na asina 're 'madâ'â zahâri za'ra wa'aba mono õ wamhã, te za Ĩmama hã te te aima 're rob'manharĩ wasété za'ra wa'wa aihâiba mono bâ wa'aba, hâiwa ãma 're isãmra mono hã.

Mateu 19:24

E niha te za awaru ba'õmore hã isi'uwazi para'õtõ zapu'u 'remhã ãzé. Sébré waihu'u õ di. Tane, isibro pese norĩ hã si'uihâ na 're sisisi waihu'u mono õ di za, 'Re ihâimana u'âsi mono, da'ãma 're isib'a'uwẽ mono zéb u hã.

Mateu 25:10

— Tawamhã pi'õ ipréduptém norĩ hã hâimana nhimiza'rese ãna 're ihâimana za'ra mono norĩ hã ma tô ai'aba'ré, rob'rãi wa'u tob zô, te te sima 'mai'uipra za'ra da. Tawamhã ta norĩ za'u si ma tô oto aibâ hã wi, timro zô. Wisi wamhã, pi'õ ipréduptém norĩ hã 5 na ihâiba hã hâimana nhimiza'rese 're ihâimana za'ra mono norĩ hã ma tô isiré asisi 'ri para u, isiré saihuri da, sina imro zahuré zém na. Sisisi wamhã, ma tô oto iré 'ridawa nhitop tete za'ra ni.

Mateu 25:21

— Tawamhã isib'apito te asa tãma tinha, ãne: “Wẽ di tô. A hã ĩma romhuri wẽ 'wai uptabi. Ĩma ai'umnhasi di. Rob'uiprazé hã surure na hâimana nherẽ, ma tô ãma iromhuri wẽ, ĩzô. Tahawa, ãhã nhipai u wa za oto aima pisutu, marĩ ahâ uptabi na ĩma 're ab'madâ'â u'âsi mono da. Te za oto ĩsiré 're aihâimana mo, wasiré ãma 're watoi u'âsi mono da.” Ãne ma tô tãma ropisutu siro, tãma iromhuri wẽ 'wai ma.

Mateu 26:39

Tawamhã romhâ prã na ma tô isiti timorĩ za'ra, Zezusi hã. Dumana na te nomro ti'ai wa, Timama ma, mreme da. Ãne te tãma mre: — Ĩmama, asima wẽ wamhã, ĩma ba'a, ĩdâ'âzé hã te sépata tõ da. Tane nherẽ, te ĩsima iwẽzéb uwaibaba, ĩma pisutu õ di za. Asima iwẽzéb uwaibaba si, te 'manharĩ da hã, ĩma wẽ di, wa hã.

Mateu 26:42

Tawamhã te duré romhâ prã na isiti timorĩ za'ra, Timama ma mreme da. Ãne te tãma mre: — Ĩmama, ĩdâ'âzé hã te sépata da, asima wẽ wamhã, ĩma wẽ di duré, asima iwẽzéb uwaibaba, ĩma pisutu da.

Marcu 3:35

Ni'wam norĩ hã 'Re ihâimana u'âsi mono te te sima 're iwẽ za'ra mono zéb zarina, te te tãma ãma 're i'uwaimrami za'ra mono norĩ hã, ta norĩ hã ĩno, duré ta norĩ hã ĩhidiba, duré ta norĩ hã ĩna.

Luca 11:28

Tahawa, te Zezusi hã asa tãma tinha, ãne: — Tane tô. Tãma 're rowẽ mono nherẽ, isipai u ni'wam norĩ ma, 're rowẽ uptabi za'ra mono di za. Ni'wam norĩ hã, 'Re ihâimana u'âsi mono zadawa wasu'u hã tipo're na te te 're wapari za'ra mono wamhã, duré te te 're 'madâ'â pese za'ra mono wamhã, tãma 're rowẽ uptabi za'ra mono di za.

Luca 13:25

Nimahã na te za 'ri tede'wa hã wahudu, te te siré 'rinhitop tete da. Tawamhã te za i'ridawa ta'a za'ra wa'wa, rowi 're ai'ubumroi wa'aba mono hã. 'Ri tede'wa hã te za i'mahârâ za'ra wa'wa, ãne: “Apito, ma'ãpé we wazô 'ridawa za'ra na, ãma atẽme wanhisisi da.” Ãne te za 're i'mahârâ za'ra wa'aba mo. Tazahã, te za asa aima nharĩ za'ra wa'wa, ãne: “Te aiwaihu'u za'ra wa'aba õ di. E ma hawimhã, a norĩ wa'wa hã.”

Luca 18:25

E niha te za awaru ba'õmore hã isi'uwazi para'õtõ zapu'u 're ãzé. Sébré waihu'u õ di. Tane, isibro pese norĩ hã si'uihâ na 're sisisi waihu'u mono õ di za, 'Re ihâimana u'âsi mono, da'ãma 're isib'a'uwẽ mono zéb u hã.

Luca 6:46

— E marĩ da, ma tô Asib'apito na asiwi 're ĩnhisi za'ra wa'aba mo, ĩnhimiroti hã 're 'madâ'â pese za'ra wa'aba mono õ nherẽ.

Zuwã 14:7

A norĩ wa'wa hã oto asiwi ĩwaihu'u aba wa, te za duré Ĩmama zama oto 're iwaihu'u za'ra wa'aba mo. Tahawa, ã hawim haré te za tô Ĩmama hã 're iwaihu'u pese za'ra wa'aba mo. Ma tô duré asiwi 're i'madâ'â aba mo, atõmo na wa'aba.

Zuwã 15:23

Wa hã da te dasiwi 're ĩ'ruiwapari mono wamhã, ĩ'u'âbâ te za duré Ĩmama hã da te dasiwi 're 'ruiwapari.

Zuwã 3:5

Tawamhã Zezusi te duré asa tãma tinha, ãne: — Tô sena, wa aima waihu'u za'ra wa'wa. Ai'uté hã dama 're poto za'ra mono wamhã, 'Re ihâimana u'âsi mono nhib'a'uwẽ, 're nomro siromo mono õ di za. Tipẽ'ẽzani hã te te dama 're anhomri mono wapsi, te za 're dapoto téb za'ra, dapẽ'ẽ 're. Tawapsi te za oto isib'a'uwẽ si 're danomro. 'Re ihâimana u'âsi mono hã 're idanomro wasété mono hawi te te 're da'a'upsõi mono wa, duré Tipẽ'ẽzani hã te te dama 're anhomri mono wapsi, te za oto dapẽ'ẽ 're, 're dapoto téb za'ra. Tawapsi te za oto duré isib'a'uwẽ 're danomro. Dapẽ'ẽ 're, 're dapoto téb za'ra mono õ wamhã, 'Re ihâimana u'âsi mono nhib'a'uwẽ, 're danomro mono õ di za.

Zuwã 5:17

Tawamhã Zezusi hã ma tô tãma nharĩ za'ra, ãne: — Ĩmama hã te za te te 're da'apawaptob u'âsi. Ĩzama wa za duré te 're da'apawapto.

Zuwã 6:40

Ĩmama ma tô duré te te sima 're da'awẽ, da te dasina 're ĩ'umnhasi za'ra mono wa, rowẽ na 're dahâimana u'âsi za'ra mono da, hâiwa ãma. Tawamhã 're dâ'â za'ra mono wa, wa za bâtâ na hâiwa'utu za'ra, ti'a isi'utõrĩzéb ãma.

Zuwã 7:17

E niha te za da te 're ĩwaihu'u za'ra, 'Re ihâimana u'âsi mono nhimiroti na si te dama 're irowasu'u mono na hã, niha wamhã, ĩsi'uihâ na ĩnhimiroti na si te dama 're irowasu'u mono õ na hã. 'Re ihâimana u'âsi mono nhimiroti si, da te 're 'madâ'â pese za'ra mono wamhã, te za da te ãma 're ĩwaihu'u za'ra.

Zezusihi zadawa wasuꞌuꞌwa norĩ nhimiromhuri na robꞌuiꞌéré 14:22

'Ri nho'õmo wa'wai baba neb zahuré wamhã, ma tô isazei'wa norĩ hã pawaptob za'ra, hâimana nhiptete na 're nomro mono da, 'Re ihâimana u'âsi mono ãma te te 're sasõmri u'âsi za'ra mono da. Ãne te duré tãma nharĩ za'ra: — A norĩ wa'wa hã Zezusihi zazei'wai wa, marĩ iwasédé hã da te aima 're 'manharĩ za'ra wa'aba mono wamhã, tãma 're aipahi za'ra wa'aba mono õ di za. Ãne na hã te za tô 're irobzépata za'ra wa'aba mo. Tane nherẽ, 'Re ihâimana u'âsi mono nhib'a'uwẽ oto 're anomro aba mono wa, te za niwapsi hâiwa ãma i'rata 're aihâimana u'âsi za'ra wa'aba mo, rowẽ na. — Ãne te tãma nharĩ za'ra.

Roma 12:2

Ti'ai ãma dahâimana wasété na 're idanomro mono norĩ ãma hã, 're sasõmri za'ra wa'aba mono õ di za. 'Re ihâimana u'âsi mono wi si, te za 're irowaptẽrẽ u'âsi za'ra wa'aba mo, asimirosa'rata wẽ na si, aipẽ'ẽ 're, 're aihâimana za'ra wa'aba mono zé hã te te aima 're pisutu za'ra wa'aba mono da, 're aihâimana za'ra wa'aba mono zép tém na si, oto 're anomro aba mono da. Tawapsi te za 'Re ihâimana u'âsi mono, te te aima 're ipisutu za'ra wa'aba mono hã asina 're iwaihu'u pese za'ra wa'aba mo, marĩ iwẽ si tãma 're i'manharĩ za'ra wa'aba mono zém na hã.

Roma 2:13

E 'Re ihâimana u'âsi mono nhimiroti 'rata na rob'ui'éré hã, taré dapo're na da te 're wapari za'ra mono nherẽ, te za 'Re ihâimana u'âsi mono hã te te 're da'awẽsãmri. Mare di. Isimiroti zarina 're dahâimana wẽ za'ra mono wapsi, te za te te 're da'awẽsãmri, 'Re ihâimana u'âsi mono hã.

Éfézu 6:6

E asib'apito nho'a si te za romhuri hã tãma 're i'madâ'â pese za'ra wa'aba mo. Mare di. Isa're'ra nherẽ, te za romhuri hã tãma 're i'madâ'â pese za'ra wa'aba mo, te te 're aiwẽsãmri za'ra wa'aba mono da, asimiromhuri na hã. Cristuhu ma 're iromhuri za'ra wa'aba mono ne, te za duré ti'ai ãma asib'apito aba ma zama romhuri hã 're i'madâ'â pese za'ra wa'aba mo, 'Re ihâimana u'âsi mono te te sima 're iwẽ mono zéb zarina.

Colosu 4:12

Epafrasi te duré ãma asawi za'ra wa'wa, tame asiré isazei'wa norĩ siré 're ihâimana mono hã, Cristu Zezusihi ma romhuri'wa hã. Ta hã te ai'ãma 're mreme u'âsi 'wa simi'ẽ na, 'Re ihâimana u'âsi mono ma, taha si te te 're aipawaptob u'âsi za'ra wa'aba mono da, asiptete sina ãma 're anomro aba mono da, duré aihâimana prédup sina 're aihâimana wẽ za'ra wa'aba mono da, ta hã te te aima 're iwẽ za'ra wa'aba mono zéb zarina si. Cristu hã asina 're i'umnhasi za'ra wa'aba mono zém na 're asiptete za'ra wa'aba mono da, te duré ai'ãma 're mreme u'âsi za'ra wa'wa.

1 Tesalonita 4:3

'Re ihâimana u'âsi mono hã ma tô te te sima 're aiwẽ za'ra wa'wa, 're anomro wẽ wa'aba mono da, pi'õ norĩ, duré aibâ norĩ zama aihâiba na asiwi 're asimisaihuri si'uiwa za'ra wa'aba mono zé hã ai'ãma 're hâimana za'ra wa'aba mono tõ da oto.

1 Tesalonita 5:18

Wẽ wa, te za ãma 're aiwata u'âsi za'ra wa'aba mo. Rowẽ na 're anomro aba mono wamhã, duré robzei'õ na 're anomro aba mono nherẽ, wẽ wa, te za tô ãma 're aiwata u'âsi za'ra wa'aba mo. Ãne na 're aihâimana za'ra wa'aba mono da, 'Re ihâimana u'âsi mono, ma tô aima pisutu za'ra wa'wa, Cristu Zezusihi nhib'a'uwẽ 're anomro aba mono wa.

Titu 1:16

Ta norĩ hã te 're siwasu'u za'ra, 'Re ihâimana u'âsi mono te te iwaihu'u za'ra na. Tane nherẽ, 're nomro wasété mono wa, tô senai õ di, 're isiwasu'u za'ra mono zé hã. Te te 're ida'ruiwapari za'ra mono zép si, te tãma 're hâimana za'ra. Te duré po're'õ u'âsi hã 're nomro. Marĩ iwẽ hã te te 're 'manharĩ waihu'u za'ra mono õ di, duré ta norĩ hã.

Hebreu 4:6

Duréihã ti'ai wẽ wa, 're idanomro wẽ mono zé wasu'u wapari 'rata 'wa norĩ hã, ta norĩ 're idawa'utu u'âsi za'ra mono ne, iwa 're hâimana za'ra mono da, 'Re ihâimana u'âsi mono te te tãma ipisutu za'ra zé hã te te sina uwaimrami za'ra õ di, isimiroti hã te te 're 'madâ'â za'ra mono õ wa, ta norĩ hã. E tawamhã õhõ haré ma tô dawi sizâ 'Re ihâimana u'âsi mono hã, 're idawa'utu u'âsi za'ra mono ne, rowẽ uptabi na 're idanomro u'âsi mono zé hã. Mare di. Si'utõrĩ waihu'u õ di, ta hã. Ni'wam norĩ hã te za tô rowẽ uptabi na 're idahâimana za'ra mono zéb u 're sisisi, 'Re ihâimana u'âsi mono te te tãma ipisutu za'ra zéb zarina.

Tiagu 1:22

Taré isimiroti hã aipo're na 're wapari za'ra wa'aba mono õ di za, imreme wapari pese 'wa na, taré 'râwi asima 're asadawa nhipese za'ra wa'aba mono tõ da. Tô sena te za isimiroti hã 're i'madâ'â za'ra wa'aba mo.

1 Pedru 2:15

'Re ihâimana u'âsi mono hã ma tô sima aiwẽ za'ra wa'wa, aihâimana wẽ na dama 're aihâimana za'ra wa'aba mono da. E marĩ da. Aihâimana wẽ na dama 're aihâimana za'ra wa'aba mono nherẽ, taré da te aima 're nharĩ wasété za'ra wa'aba mono tõ da.

1 Pedru 4:2

Tahawa, ti'ai ãma 're aihâimana za'ra wa'aba mono ré, te za 're aihâimana wẽ za'ra wa'aba mo, 'Re ihâimana u'âsi mono te te sima 're iwẽ mono zéb zarina si, marĩ na asima 're irosa'rata wasété za'ra wa'aba mono zéb zarina, 're aihâimana za'ra wa'aba mono ãna oto.

Apocalipsi 22:14

Duré, ni'wam norĩ hã ti'uzazé hâirã da, te te 're i'upsõi pese za'ra mono norĩ ma si hã tãma 're rowẽ uptabi za'ra mono di za. Tane tiwasété wi, 're isipizari za'ra mono hã, 'Re ihâimana u'âsi mono, iwasédé te te tãma 're i'a'upsõi mono zé, te wasu'u, i'uza hâirã hã. Ta norĩ si te za rob'rãi u'â hã te te 're huri, da te 're huri mono wa, 'Re ihâimana u'âsi mono 'rata ãma 're idanomro u'âsi mono zé hã. Ta norĩ si te za duré õne haré 'ri nho'õmo u 're sisisi, 'ridawa za'ẽtẽ na, ni'wa te te tiwi sitob za'ra ãna.

Apocalipsi 3:5

“Duré ni'wam norĩ hã tidâ'âzéb u ĩwi sipizari ãna Satanasihi ãma te te i'ai'uté za'ra norĩ hã te za duré uza hâirã na ĩ'rata 're hâimana za'ra. Ibaihâ na 're idahâimana u'âsi za'ra mono norĩ nhisi, 're isimi'wara mono zém na isisi isimi'wara hã te tiwi pari za'ra õ di za. Ĩmama nho'a, wa za sõ'awi ĩnhib'a'uwẽ na hã te tãma 're wasu'u za'ra, hâiwa ãma duré tãma iromhuri'wa norĩ nho'a zama.