Mateu 7:2 - ꞌRe Ihâimana Uꞌâsi Mono Zadawa Wasuꞌu

² Asi'uihâ na asiwi 're dawẽ'õ pese za'ra wa'aba mono wamhã, taha zarina te za tô duré 'Re ihâimana u'âsi mono hã te te siwi 're aiwẽ'õ pese za'ra wa'wa, iwa'rãmi. Asiwi 're dawẽ'õ za'ra wa'aba mono õ wamhã, tawapsi, te te duré siwi 're aiwẽ'õ za'ra wa'aba mono õ di za, ãne na hã aiwa.

Mateu 7:2 ပူးပေါင်းရင်းမြစ်များ

Mateu 6:14

Tawamhã ãne te duré tãma roti za'ra: — Dawasédé hã da te ai'ãma 're i'manharĩ za'ra wa'aba mono zé hã asina 're 'madâ'â u'âsi za'ra wa'aba mono wamhã, Aimama 'wa hã te za duré uburé aiwasédé 're i'manharĩ za'ra wa'aba mono zé hã te te ai'ãma 're 'madâ'â u'âsi za'ra wa'wa. Dawasédé hã da te ai'ãma 're 'manharĩ za'ra wa'aba mono nherẽ, asina 're 'madâ'â za'ra wa'aba mono õ wamhã, tawapsi, aiwasété 'wa hã te te ai'ãma 're 'madâ'â za'ra wa'aba mono õ di za Aimama 'wa, hâiwa ãma 're isãmra mono hã.

Marcu 4:24

— Ni'wam norĩ hã 'Re ihâimana u'âsi mono hã isimirowaihu'u na te te 're 'ruiwapari u'âsi za'ra mono wamhã, taha zarina te za 'Re ihâimana u'âsi mono hã sa'ẽtẽ na tãma ãma 're sõprub za'ra, te te aré 're iwaihu'u za'ra mono zém nhipai u, te te waihu'u pese za'ra da oto. Tane nherẽ, ni'wam norĩ hã isimirowaihu'u na te te 're 'ruiwapari za'ra mono õ wamhã, ta norĩ wi te za tinhimirowaihu hã tãma waihu'u pese za'ra õ nherẽ, te te tiwi 're awaibu 'Re ihâimana u'âsi mono hã, te te aré ãma 're iwaihu'u za'ra mono zé hã.

Luca 6:38

Asibrom na te za dama 're asõprub za'ra wa'aba mo, isimarĩ'õ norĩ ma. Tawamhã 'Re ihâimana u'âsi mono hã te za marĩ hã iwa'rãmi sa'ẽtẽ na te te aima 're sõmri za'ra wa'wa. Marĩ na asima 're asõprub za'ẽtẽ za'ra wa'aba mono ne, te za aima 're sõprub za'ẽtẽ za'ra wa'wa. Sa'ẽtẽ na dama 're sõmri za'ra wa'aba mono wamhã, te za sa'ẽtẽ na te te aima 're sõmri za'ra wa'wa, iwa'rãmi, 'Re ihâimana u'âsi mono hã. Suru na dama 're sõmri za'ra wa'aba mono wamhã, te za suru na te te aima 're sõmri za'ra wa'wa.

2 Corĩtu 9:6

Ãne na, wa za duré ãma aipo're pu'u za'ra wa'wa, ãma rosa'rata za'ra wa'aba da. Amnho hã suru na da te 're izuri mono zéb zarina, te za suru na da te 're ubumro za'ra, dama 're 'rã za'ra mono wamhã. Sa'ẽtẽ na, da te 're zuri mono wapsi, te za oto sa'ẽtẽ na da te 're ubumro za'ra. Tane duré, dasima 're idanhoprub za'ra mono zéb zarina, te za 'Re ihâimana u'âsi mono hã dama 're sõpru, iwa'rãmi.

Tiagu 2:13

Nimahã bâtâ na dahâimanazém na te te da'awaihu'u wapsi, da'ãma 're ipẽ'ẽzé za'ra mono õ norĩ ãma, pẽ'ẽzé õ di za, 'Re ihâimana u'âsi mono hã, ti'ab ré da'ãma 're isiwamri za'ra mono õ norĩ ãma hã. Da'ãma 're ipẽ'ẽzé u'âsi za'ra mono norĩ ãma si, te za ãma 're pẽ'ẽzé za'ra.

Apocalipsi 18:6

Ma'ãpé Babilonia ãma 're idahâimana za'ra mono norĩ ma, tãma ãma wa'rãmi za'ra wa'aba asa, aiwab da, ĩnhib'a'uwẽ norĩ ma, te te 're irob'manharĩ za'ra mono ne. Ta norĩ nhimirob'manharĩzéb zarina ma tô ĩnhib'a'uwẽ norĩ hã te te 're robzépata za'ẽtẽ za'ra. Tahawa, ĩnhib'a'uwẽ norĩ ma, te te tãma 're irob'manharĩ za'ra mono zém nhipai u, te za tãma ãma iwa'rãmi za'ra wa'wa, Babilonia ãma 're idahâimana za'ra mono norĩ ma, isipai u te te 're robzépata za'ẽtẽ za'ra mono da.

Zuize 1:7

Ãhã wa, te Adoni-Bezequi hã tinha ãne: — Wa hã wa tô ti'ru, 70 na apito norĩ nhiptõmohi na'rata za'ra hã, duré iparadub'rã na'rata za'ra hã, da te tiwi sihâri za'ra da. Ta norĩ hã ma tô ĩte wedeza zahâpâ dasai'a'a hã te te 're waibu. Tahawa, ãhã na awa'awi na hã 'Re ihâimana u'âsi mono, ma tô ãne hã ĩma 'manha, ta norĩ ma, te 're i'ab'manharĩ mono zém ne hã. Tawamhã Adoni-Bezequi, 'rinho'u Zeruzalẽ u ma tô dasiwi saprõni ni. Tahawa, tame ma tô oto dârâ.

Zuize 5:27

Tawamhã ta hã pi'õi para ãma ma hi'rãtitõ nhamra. Taha pari dâ'â siromo waptã'ã wa, ma tô taha haré oto nomro.

1 Samuéu 15:33

Tawamhã te Samuéu hã tãma tinha ãne: — Asi'wa hã dana norĩ 'ra ãna 're hâimana za'ra mono da, te te tãma 're i'manharĩ za'ra mono ne, te za ãhã na hã ana zama oto 'ra ãna tihâiba. Taha pari, ma tô oto Samuéu hã ãma aiwã õne haré, Gilga ãma, danhoprubzéb da, ẽtẽ za'ra nho're.