Mateu 6:9 - ꞌRe Ihâimana Uꞌâsi Mono Zadawa Wasuꞌu

⁹ Ãhã zarina si te za 're aimreme zusi aba mo, 'Re ihâimana u'âsi mono ma: “Wamama, hâiwa ãma 're asãmra mono hã, asisi wẽ na uburé da te 're aiwaihu'u za'ra mono da, wa da'ãma aima 're ĩmreme.

Mateu 6:9 ပူးပေါင်းရင်းမြစ်များ

Neemia 9:5

Tawamhã levita norĩ Zesua, Cadmi'é, Bani, Hasabnéia, Serebia, Hodia, Sebania, duré Petaia, ma tô 'Re ihâimana u'âsi mono ãma dawata za'ra da hã dazô tihârâ za'ra. Tahawa, ma tô ãne dama nharĩ za'ra: “Ma'ãpé hâiwi aipara na aimasa aba, Uburé Danhib'apito, ate 'Re ihâimana u'âsi mono ãma aiwata za'ra wa'aba da, õne u'â 'Re ihâimana u'âsi mono, 're ihâimana mono ãma! Duré isisi wẽ na uburé, ãma 're dawata za'ra mono, ãma 're idawata za'ra mono zém na da te iwab 're sa'ra mono dai õ nherẽ!”

Salmu 72:18

Uburé Danhib'apito, Izaraéu nhihudu norĩ te, 'Re ihâimana u'âsi mono ãma si 're wawata za'ra wa'aba mono, õhõ si marĩ iwẽ uptabi hã te te 're ab'manharĩ mono wa.

Mateu 10:29

Sire wa'â hã wa'âbâ surure nherẽ, uburé Damama zadawa para õ nherẽ, 're si'utõrĩ mono da hã, mare di, sire norĩ hã.

Mateu 23:9

Dawaptẽrẽ pire zém na, aimama za'ra wa'aba na hã 're danhisi za'ra wa'aba mono õ di za. E marĩ wa. Misire te Aimama za'ra wa'wa hã 're hâimana hâiwa ãma, siwaprosi.

Mateu 26:29

Tô sena, wa za aima ĩsiwasu'u za'ra wa'wa. Ãne hã rob'rãi wa'u te 're hâsi mono õ di za oto, a'â. Niwapsi Ĩmama hã uburé da'ãma 're sib'a'uwẽ mono wapsi, wa za duré te 're hâsi, asiré wa'aba.

Mateu 26:42

Tawamhã te duré romhâ prã na isiti timorĩ za'ra, Timama ma mreme da. Ãne te tãma mre: — Ĩmama, ĩdâ'âzé hã te sépata da, asima wẽ wamhã, ĩma wẽ di duré, asima iwẽzéb uwaibaba, ĩma pisutu da.

Mateu 5:16

Tane duré, a norĩ wa'wa hã te za sõ'awi dama 're aihâimana za'ra wa'aba mo, rob'uiwẽzé hã sõ'awi te te dama 're irob'uiwẽ za'ra mono ne. Uburé marĩ hã te za dama 're i'manharĩ wẽ u'âsi za'ra wa'aba mo, dama 're i'manharĩ wẽ za'ra wa'aba mono zé hã da te 're i'madâ'â za'ra mono zéb zarina, Aimama za'ra wa'aba ãma 're dawata za'ra mono da, hâiwa ãma 're isãmra mono ãma.

Mateu 5:48

Tahawa, te za a norĩ wa'wa hã uburé 're idazawi pese za'ra wa'aba mo, 'Re ihâimana u'âsi mono hã te te da'ãma 're a'upai mono ãna, uburé te te 're ida'azawi pese mono ne.

Mateu 6:14

Tawamhã ãne te duré tãma roti za'ra: — Dawasédé hã da te ai'ãma 're i'manharĩ za'ra wa'aba mono zé hã asina 're 'madâ'â u'âsi za'ra wa'aba mono wamhã, Aimama 'wa hã te za duré uburé aiwasédé 're i'manharĩ za'ra wa'aba mono zé hã te te ai'ãma 're 'madâ'â u'âsi za'ra wa'wa. Dawasédé hã da te ai'ãma 're 'manharĩ za'ra wa'aba mono nherẽ, asina 're 'madâ'â za'ra wa'aba mono õ wamhã, tawapsi, aiwasété 'wa hã te te ai'ãma 're 'madâ'â za'ra wa'aba mono õ di za Aimama 'wa, hâiwa ãma 're isãmra mono hã.

Mateu 6:6

Duré, a norĩ wa'wa hã 'Re ihâimana u'âsi mono ma, 're aimreme zusi aba mono da, te za 'ri para u 're asisisi aba mo, asõrõwa 'ri 're wa'wa u. Tawamhã te za asiré 're i'ridawa nhitob za'ra wa'aba mo, Aimama aba ma, 're aimreme zusi aba mono da, romnhiwasi nimahã bâtâ na da te 're i'madâ'â waihu'u za'ra mono õ ma hã. Ãne wamhã, aihâiba pisutu 're aimreme zusi aba mono ré, Aimama aba si te te ai'ãma 're 'madâ'â za'ra wa'aba mono wa, te za taha si iwẽ hã te te aima 're sõmri za'ra wa'wa, iwa'rãmi.

Mateu 7:11

Tane duré, a norĩ wa'wa hã 're anomro wẽ uptabi aba mono õ nherẽ, te marĩ iwẽ si tô ai'ra norĩ ma, 're isõmri za'ra wa'aba mo. E tawamhã Aimama 'wa hã hâiwa ãma 're isãmra mono hã wẽ uptabi na 're hâimana mono nherẽ, e ai'ra norĩ ma 're asõprub za'ra wa'aba mono zém nhipai u, te te aima 're sõmri za'ra wa'aba mono õ di za bété, tinhoprubzé iwẽ hã. Te za tô isipai u te te aima 're sõmri za'ra wa'wa iwẽ hã, tiwi 're iwaptẽrẽ za'ra wa'aba mono zéb uwaibaba.

Luca 15:18

Tahawa, wa za oto mo, ĩmama u apâ. Ĩwisi wamhã, wa za ĩmama ma ĩsiwasu'u, ãne: ‘Ĩmama, ĩwasété na wa tô 're mo. 'Re ihâimana u'âsi mono nhimiroti hã, wa tô upa. Asimiroti zama, wa tô duré upa.

Luca 15:21

Tawamhã te timama ma tinha, ai'repudu hã, ãne: “Ĩmama, ĩwasété na, wa tô 're mo. 'Re ihâimana u'âsi mono nhimiroti hã, wa tô upa. Asimiroti zama, wa tô duré upa. Ĩwasété wa, ãté ĩ'ãma 're ai'ra mono õ di za.” Ãne te timama ma tinha, ai'repudu hã.

Luca 2:14

— 'Re ihâimana u'âsi mono hã sõprub di, hâiwa ãma 're isãmra mono hã. Ma tô sima dawẽ, iwẽ hã te te dama 're anhomri mono da, rowẽ na 're danomro mono da oto, ti'ai ãma hã.

Zuwã 20:17

Tawamhã Zezusi te tãma tinha, ãne: — Ĩtété õ di za. Zahadu apâ ĩmorĩ õ di, Ĩmama u hã. Mo oto aimorĩ, ĩsisãnawã norĩ u tãma ĩzadawa wasu'u za'ra da. Ĩmama u, wa za oto mo apâ hâiwa u, Aimama aba u. Ĩnhib'apito u, wa za oto mo, Asib'apito za'ra wa'aba u. Ãne tãma ĩzadawa wasu'u za'ra na za.

Roma 1:7

'Re ihâimana u'âsi mono ma, asawi pese za'ra wa'aba di. Taha si ma tô aipisutu za'ra wa'wa, isib'a'uwẽ si oto 're anomro aba mono da, tãma. Tahawa, wa ãhã na aima ãma rob'ui'éré za'ra wa'wa, Roma ãma 're aihâimana za'ra wa'aba mono norĩ ma. Wamama ma, wa ai'ãma 're ĩmreme u'âsi za'ra wa'wa, 'Re ihâimana u'âsi mono ma, duré Wanhib'apito Zezu Cristuhu ma zama, isimizawizé hã ai'ãma 're hâimana u'âsi za'ra wa'aba mono da, rowẽ u'âsi, ãma 're anomro aba mono da.

Roma 8:15

E marĩ da, ma tô 'Re ihâimana u'âsi mono hã Tipẽ'ẽzani te te aima 're sõmri za'ra wa'wa. E isimirob'manharĩzé ma, 're aipahi za'ra wa'aba mono sina, tãma 're romhuri za'ra wa'aba mono da, ma tô te te aima 're sõmri za'ra wa'wa. Mare di. Taha dai õ di. 'Re ihâimana u'âsi mono hã ai'ãma 're 'ra za'ra wa'aba mono da si, ma tô te te aima 're sõmri za'ra wa'wa, Tipẽ'ẽzani hã. Taha nhimipawaptobzéb zarina, wa 'Re ihâimana u'âsi mono hã wa te 're 'mahârâ za'ra, ãne: “Wamama, Wamama.” Ãne wa te 're i'mahârâ za'ra mono zé hã.

Galata 1:1

Wanhib'apito nhib'a'uwẽ norĩ, daza'rui mono bâ Galasia na danhipti'a nho'õmo nhisi 'remhã 're aihâimana za'ra wa'aba mono norĩ, wa hã Paulu, wa ãma asawi za'ra wa'wa. Uburé wasiré isazei'wa norĩ hã te duré timreme na ãma asawi za'ra wa'wa, ĩ'rata isi'ubumro norĩ hã. Ãne wa za ãma aima rob'ui'éré za'ra wa'wa. Wa hã Zezu Cristuhu zadawa wasu'u'wa, wa 're mo, isadawa para. Ni'wam norĩ hã te te siwi ĩpisutu õ di, isadawa wasu'u'wa na 're ĩhâimana mono da hã. Ãne da hã da te dasiwi ĩpisutu õ uptabi di. Zezu Cristuhu si ma tô Wamama me si sima ĩpisutu zahuré, ab're hawi ti'ra te te ihâiwa'utu me si.

Galata 4:6

Tawamhã i'ra oto 're iwanomro mono na 'râwi 're wasiwaihu'u za'ra mono da, ma tô we ti'ra pẽ'ẽzani hã te te wama 're anhomri, wapẽ'ẽ mono bâ wama 're hâimana za'ra mono da, 'Re ihâimana u'âsi mono hã Wamama na, wa te 're sisi za'ra mono da oto.

1 Timotiu 6:16

Õhõ si siwaprosi 're imorĩ u'â hã. Ta hã, rowa'a za'ẽtẽ na te 're hâimana u'âsi. Tahawa, ni'wa itẽme isébré da hã, mare di. Da te dasiwi ihâiba pibu da hã, mare di duré. Ta hã wẽ uptabi di. Waihu'u pese uptabi di duré. Tahawa, wa za ãma 're wawata u'âsi za'ra.

1 Pedru 1:17

A norĩ wa'wa hã, 'Re ihâimana u'âsi mono ma 're aimreme zusi aba mono wamhã, Wamama na te 're isisi za'ra wa'aba mo. Ta hã dahâimanazéb zarina da'ãma rowairébé'wa, te 're hâimana. Ãhã wa, 're idahâimana za'ra mono zéb zarina, te za dahâiba mono bâ te te dama ãma 're a'uwaimrami, dahâimana wẽ zarina, duré dahâimana wasété zarina zama. Tahawa, te za 're ihâimana mono zém na asiwi 're iwazéb za'ra wa'aba mo, Wamama hã, ti'ai ãma 're anomro aba mono ré.

Apocalipsi 4:11

Ãne te nasi ãma tiwata za'ra: “Wanhib'apito, 'Re ihâimana u'âsi mono, a hã aiwẽ uptabi di. Aiwaihu'u pese di. Aiwaihu'u pese na ma tô i'aropoto mo. Asima iwẽ zarina ma tô uburé pese i'aropoto mo. Asima iwẽ zarina te oto uburé marĩ hã 're hâimana za'ra, asimipoto mono bâ. Tahawa, uburé i'aropoto mono zéb zarina tô ibâre, wa ai'ãma si 're wawata u'âsi za'ra.”

Apocalipsi 5:12

Ãne te sõ're 'rãihâ na ta norĩ hã tizadawa'a'a: “Pone'ẽrebâ hã da te dasiwi iwĩrĩ hã, õ hã danhipai u wẽ uptabi di. Õhõ si wẽ uptabi wa, õhõ ãma si 're wawata u'âsi za'ra wa'aba mono. Õ hã uburé Roptede'wa. Tô sena waihu'u pese uptabi di. Waihu'u pese uptabi wa, ãma 're wawata u'âsi za'ra wa'aba mono. Wama pire uptabi wab zama, ãma 're wawata u'âsi za'ra wa'aba mono.”