Mateu 6:31 - ꞌRe Ihâimana Uꞌâsi Mono Zadawa Wasuꞌu

^31-32 Aimama 'wa hã hâiwa ãma 're isãmra mono ma hã, tãma aiwaihu'u pese za'ra wa'aba di, marĩ zô aiwi 're irowaptâ'â za'ra wa'aba mono zém na hã. Tahawa, marĩ na asina 're aihâtâ'â za'ra wa'aba mono õ di za. Ãté asina 're aihâtâ'â za'ra wa'aba mono wa, te za ãne asima 're irosa'rata za'ra wa'aba mono zéb zarina, ãne asima 're inharĩ za'ra wa'aba mo: “E ma hawi te za mra hã wama 're wairébé, duré wa te 're i'âhuri mono zéb da hã, duré wa'uzazéb da hã.” Ãne na asima 're rosa'rata za'ra wa'aba mono õ di za. 'Re ihâimana u'âsi mono waihu'u'õ'wa norĩ hã, taha zô si te sima 're sõpré, sina 're hâtâ'â za'ra mono na 're hâimana za'ra mono wa, ta norĩ hã.

Mateu 6:31 ပူးပေါင်းရင်းမြစ်များ

Mateu 15:33

Tawamhã isiré 're inomro mono norĩ hã ma tô siwi sadanha, ãne Zezusi hã: — E niha wa za i'u'ẽtẽ wapu hã wasiwi 'masãmri ni, a'ubuni wi wasi'ubumro nherẽ, dahâiba mono bâ wa te dama i'a za'ra da hã. Da'ahâ uptabi di.

Mateu 4:4

Tawamhã Zezusi asa te tãma tinha, ãne: — 'Re ihâimana u'âsi mono mreme na rob'ui'éré hã ãne: “Dasa na si 're danhiptete za'ra mono õ di za. 'Re ihâimana u'âsi mono te te dama 're i'awaihu'u mono zém na zama, te za duré 're danhiptete za'ra.”

Mateu 6:25

— Tahawa, wa za duré ãne aima waihu'u za'ra wa'wa. Marĩ na 're aihâtâ'â za'ra wa'aba mono õ di za, asazé wa'aba na, duré 're i'âhuri wa'aba mono õ na zama. Duré ai'uzazém na zama, asina 're aihâtâ'â za'ra wa'aba mono õ di za. E taré wasa zô si wa za 're wahâimana za'ra. Mare di. Wasazé nhipai u pire uptabi di, wahâimanazé hã. E taré 're iwasi'uza za'ra mono zép si, te wahâiba hã wama 're hâimana za'ra. Mare di. Marĩ iwẽ uptabi da, te wahâiba hã wama 're hâimana za'ra.

Mateu 6:27

Sire zawi nhipai u, tãma asawi uptabi za'ra wa'aba di. Tahawa, sire te te 're i'ab'madâ'â mono zém nhipai u, te za te te 're ai'madâ'â pese za'ra wa'wa, Aimama 'wa hã, asina 're aihâtâ'â za'ra wa'aba mono ãna 're aihâimana za'ra wa'aba mono da. Duré asina 're aihâtâ'â za'ra wa'aba mono wamhã, e asibâtâ na 're atâ'â za'ra wa'aba mono õ di za. E asibâtâ nhipai u, te za 're aihâimana siroptub za'ra wa'aba mo. Mare di. Asina 're aihâtâ'â za'ra wa'aba mono zéb zarina, asibâtâ nhipai u 're aihâimana siroptub za'ra wa'aba mono õ di za.

Luca 10:41

Tahawa, ma tô Wanhib'apito hã asa tãma tinha, ãne: — Marta, marĩ hã ahâ wamhã, tô asi'wa'rutu di.

Luca 12:11

— Ãté isazei'wai wa, te za taré da te 're aiwẽ'õ za'ra wa'wa. Tahawa, ãté te za rowahutuzéb u, da te 're asimroi wa'wa, ĩzazei'wa na, da te 're aiwaihu'u za'ra wa'aba mono da. Ãté roti'wa norĩ u, te za da te 're asimroi wa'wa, ãté danhib'apito norĩ u. Tane nherẽ, asina 're aihâtâ'â za'ra wa'aba mono õ di za. Ãhã wamhã, tãma 're asiwasu'u za'ra wa'aba mono zéb zô hã, 're rosa'rata za'ra wa'aba mono õ di za.

Luca 12:22

Tawamhã Zezusi te tinha, tisiré 're inomro mono norĩ ma, ãne: — Tahawa, wa za duré ãne aima waihu'u za'ra wa'wa. Marĩ na 're aihâtâ'â za'ra wa'aba mono õ di za. Asazéb za'ra wa'aba na asina 're aihâtâ'â za'ra wa'aba mono õ di za. Duré, ai'uza õ na zama asina 're aihâtâ'â za'ra wa'aba mono õ di za.

Luca 12:29

Tahawa, marĩ na asina 're aihâtâ'â za'ra wa'aba mono õ di za. Asazéb zô si, duré â zô si, 're asõpré wa'aba mono õ di za. Taha zô si, te za isazei'õ'wa norĩ hã 're sõpré. Aimama 'wa hã ma tô aiwaihu'u za'ra wa'wa, marĩ hã aiwi sô 're irowaptâ'â za'ra wa'aba mono na. Aimama 'wa hã, 'Re ihâimana u'âsi mono, Danhib'apito uptabi. Tahawa, õhõ si, te za 're ipisutu za'ra wa'aba mo, õhõ ãma si 're anomro aba mono da. Tawamhã marĩ hã aiwi sô 're irowaptâ'â za'ra wa'aba mono zéb uwaibaba, te za te te aima 're anhomri 'wa, Aimama 'wa hã.

Filipu 4:6

Marĩ na 're aihâtâ'â za'ra wa'aba mono ãna, te za oto 're aihâimana za'ra wa'aba mo. 'Re ihâimana u'âsi mono ma, 're aimreme zusi aba mono zép sidâpâsi, te za duré tiwi 're irowaptẽrẽ za'ra wa'aba mo, uburé marĩ zô aiwi 're irowaptâ'â za'ra wa'aba mono zém na hã. Aipẽ'ẽ 're, ãma 're aiwata za'ra wa'aba mono sina, te za asi'ãma duré tãma 're aimreme zusi aba mo.

1 Pedru 5:7

'Re ihâimana u'âsi mono hã te te 're ai'madâ'â wẽ za'ra wa'wa. Tahawa, marĩ na 're aihâtâ'â za'ra wa'aba mono wamhã, te za tãma 're asiwasu'u za'ra wa'aba mo, 're i'aihâtâ'â za'ra wa'aba mono zém na. Taha parimhã, ãma 're rosa'rata za'ra wa'aba mono õ di za oto.