Mateu 6:10 - ꞌRe Ihâimana Uꞌâsi Mono Zadawa Wasuꞌu

¹⁰ Uburé da'ãma 're asib'a'uwẽ mono da, wa duré da'ãma 're ĩmreme. Hâiwa ãma aima romhuri'wa norĩ hã, asima 're iwẽ mono zéb zarina si, te te 're i'aiwapari pese za'ra mono ne, ti'ai ãma uburé da te duré 're aiwapari pese za'ra mono da hã, wa da'ãma 're ĩmreme.

Mateu 6:10 ပူးပေါင်းရင်းမြစ်များ

Neemia 9:6

Tawamhã Izaraéu nhihudu norĩ, ma tô ãne mreme zu: “'Re ihâimana u'âsi mono, aiwétési Uburé Danhib'apito! A hã ma tô hâiwa i'manha. Wasi norĩ hã ma tô duré i'apoto mo. Ti'a hã, âporé hã, duré iwa 're ihâimana za'ra mono hã ma tô i'apoto mo. A hã ma tô uburé asimipoto mono bâ hâiba ré, 're ihâimana za'ra mono da hã tãma i'manharĩ za'ra. Duré hâiwa ãma ihâiba ré norĩ hã te hi'rãtitõ aima 're si'ubumroi mono sina ai'ãma 're wata u'âsi za'ra.

Salmu 2:6

Tawamhã te ãne tinha: “Apito da, te ipisudu hã wa tô dasimasisizé ipire na hã tisã, Siã ẽtẽ 'rãihâ nhisi ĩte iwazéb zahi ãmamhã.”

Salmu 40:8

Ĩte 'Re ihâimana u'âsi mono, ĩma 're i'apisutu mono zéb zarina, marĩ te 're i'a'manharĩ mono da hã ĩma sei uptabi di! Asimiroti wa tô ĩpẽ'ẽ 'remhã te ĩsima 're tété u'âsi.”

Daniéu 2:44

Tawamhã apito norĩ ãne na 're hâimana za'ra mono ré, 'Re ihâimana u'âsi mono hâiwa ãma 're isãmra mono hã te za danhib'ihâ'a nhimi'madâ'âzé niwa za da te ipru waihu'u'õ hã pisutu, aimawi danhib'ihâ'a norĩ te te ãma i'ai'uté za'ra õ hã. Tawamhã ã hã te za aimawi ihâiba amo norĩ danhib'ihâ'a nhimi'madâ'âzé hã uburé pese uprosi pese. Tahawa, te za õhõ si oto 're hâimana u'âsi, pire na apito nhimi'madâ'âzém na hã.

Daniéu 4:35

Õhõ nhiptetezé ma hã tarére marĩ dai õ di, daro mono bâ 're idahâimana za'ra mono hã. Ta hã te duré uburé hâiwa ãma romhuri'wa norĩ hã, duré ti'ai ãma 're idahâimana za'ra mono norĩ hã pire na te te 're ab'madâ'â. Ni'wa hã te te duré tiwi 're rosawi waihu'u mono õ di, te te sima iwẽzéb zarina marĩ te te 're i'a'manharĩ mono da hã. Duré ni'wa hã te te tãma 're a'rui waihu'u mono õ di, marĩ te te 're i'ab'manharĩ mono zé hã te te ãma dama 're i'arowasu'u mono da hã.”

Daniéu 7:13

Tawamhã tô taha mara na ĩnhotõ 'rowim na, wa tô duré ni'wa hã 'madâ, a'uwẽ hâiba ne hâiwa nhirõtõ na we imorĩ hã. Ta hã ma tô Duréi 're Ihâimana mono u we sina rotété. Tahawa, ma tô ta hã dasiwi saprõni ni, Duréi 're Ihâimana mono nho're u.

Daniéu 7:27

Tawamhã ti'ai ãma da'madâ'âzé hã duré danhimiroti nhiptetezé hã te za uburé danhipai u Isiptede 'Re ihâimana u'âsi mono nhib'a'uwẽ ma hã tãma sõmri za'ra ni. Ta norĩ hã te za ti'ai mono bâ uburé pese õne u'â te te 're da'madâ'â za'ra. Tahawa, uburé pese dapoto mono bâ te za tãma 're dahâimana za'ra. Te za duré isimiroti hã uburé da te 're wapari pese za'ra.

Mateu 12:50

Ni'wam norĩ hã Ĩmama, hâiwa ãma 're isãmra mono te te sima 're iwẽ za'ra mono zéb zarina, te te tãma ãma 're i'uwaimrami za'ra mono norĩ si, te za ĩsisãnawã na hã, duré ĩna na hã 're hâimana za'ra.

Mateu 16:28

Tô sena wa aima rowasu'u za'ra wa'wa. A norĩ wa'wa hã ni'wam norĩ si ai'matâ'â aba õ ré, te za i'madâ'â za'ra wa'wa ti'ai ãma Dasiré Ipodo hã, uburé Danhib'apito uptabi na apâ we morĩ wamhã.

Mateu 26:42

Tawamhã te duré romhâ prã na isiti timorĩ za'ra, Timama ma mreme da. Ãne te tãma mre: — Ĩmama, ĩdâ'âzé hã te sépata da, asima wẽ wamhã, ĩma wẽ di duré, asima iwẽzéb uwaibaba, ĩma pisutu da.

Mateu 3:2

Taha wamhã, te ãne dama rowasu'u: — Ma'ãpé, aiwasété wi aipizari za'ra wa'aba. 'Re ihâimana u'âsi mono, da'ãma 're isib'a'uwẽ mono zéb u hã romhuture di oto. — Ãne te dama rowahutu, Zuwã Batista hã.

Mateu 4:17

Tawamhã ta hawim haré ma oto romhuri na sãna'rata Zezusi hã, Timama zadawa wasu'u na. Ãne ma tinhimirowasu'u na dama ãma sãna'rata: — Aiwasété wi te za oto 're aipizari za'ra wa'aba mo. Ãhã na bâdâ hã ma tô oto iwa waptãrã, 'Re ihâimana u'âsi mono da'ãma 're isib'a'uwẽ mono zéb da hã.

Mateu 7:21

— Ãté ni'wam norĩ hã te za dama 're siwasu'u za'ra, ãne: “Zezusi hã ta hã Ĩnhib'apito. Wa hã tãma romhuri'wa na, wa tô 're ĩhâimana u'âsi.” Ãne ni'wam norĩ hã dama 're siwasu'u za'ra mono nherẽ, uburé 're sisisi mono õ di za, 'Re ihâimana u'âsi mono, da'ãma 're isib'a'uwẽ mono zéb u hã. Ni'wam norĩ si te za 'Re ihâimana u'âsi mono nhib'a'uwẽ, 're hâimana za'ra, Ĩmama hã hâiwa ãma 're isãmra mono hã te te sima 're i'awẽ mono zéb zarina, marĩ iwẽ si te te 're i'manharĩ za'ra mono norĩ si hã.

Marcu 11:10

'Re ihâimana u'âsi mono hã tô sena sõprub di.

Marcu 3:35

Ni'wam norĩ hã 'Re ihâimana u'âsi mono te te sima 're iwẽ za'ra mono zéb zarina, te te tãma ãma 're i'uwaimrami za'ra mono norĩ hã, ta norĩ hã ĩno, duré ta norĩ hã ĩhidiba, duré ta norĩ hã ĩna.

Luca 19:11

Tawamhã ma tô wapari za'ra ni, Zezusihi mreme hã. Tahawa, te za duré tãma ãma romnhimiré'é za'ra. E marĩ wa. Zeruzalẽ u, iwisizéb u hã, romhuture di oto. Ãne wa, te dasina rosa'rata za'ra ni: — Ãté, bâdâ te za oto iwa waptãrã, 'Re ihâimana u'âsi mono, da'ãma 're isib'a'uwẽ mono zéb da hã.

Luca 22:42

Ãne te Timama ma mre: — Ĩmama, asima wẽ wamhã, ĩma ba'a ĩdâ'âzé hã, te robzépata tõ da. Tane nherẽ, te ĩsima iwẽzéb uwaibaba, ĩma pisutu õ di za. Aima iwẽzéb uwaibaba, te 'manharĩ da hã ĩma wẽ di.

Zuwã 4:34

Tawamhã te Zezusi hã asa tãma nharĩ za'ra, ãne: — 'Re dasaihuri mono wamhã, dama 're rowẽ za'ra mono di za. Tane, wa hã. We ĩzatõrĩ'wa te te ĩ'ãma irotizé hã te ĩsina uwaimrami wamhã, ĩma rowẽ di za. Ĩnhimiromhuri hã te tãma uprosi wamhã, ĩma rowẽ di za duré.

Zuwã 6:40

Ĩmama ma tô duré te te sima 're da'awẽ, da te dasina 're ĩ'umnhasi za'ra mono wa, rowẽ na 're dahâimana u'âsi za'ra mono da, hâiwa ãma. Tawamhã 're dâ'â za'ra mono wa, wa za bâtâ na hâiwa'utu za'ra, ti'a isi'utõrĩzéb ãma.

Zuwã 7:17

E niha te za da te 're ĩwaihu'u za'ra, 'Re ihâimana u'âsi mono nhimiroti na si te dama 're irowasu'u mono na hã, niha wamhã, ĩsi'uihâ na ĩnhimiroti na si te dama 're irowasu'u mono õ na hã. 'Re ihâimana u'âsi mono nhimiroti si, da te 're 'madâ'â pese za'ra mono wamhã, te za da te ãma 're ĩwaihu'u za'ra.

Zezusihi zadawa wasuꞌuꞌwa norĩ nhimiromhuri na robꞌuiꞌéré 13:22

Tawamhã te te oto 're da'uwati mono tõ da, ma tô waze, 'Re ihâimana u'âsi mono hã. Isa'u hã ma tô Dawi hã dama hâiba nho, da'uwati'wa da oto. Ta hã ma tô duré wẽsã oto. Ãne te te iwẽsãmrizé hã: “Dawi hã Zéséhé 'ra ĩma wẽ di. Ĩnhimiroti te te ãma uwaimrami da, te za te te 're ĩwapari u'âsi.” Ãne ma tô Dawi hã wẽsã, 'Re ihâimana u'âsi mono hã.

Zezusihi zadawa wasuꞌuꞌwa norĩ nhimiromhuri na robꞌuiꞌéré 21:14

Tahawa, Zeruzalẽ u morĩ tõ da, wa te oto tiwi rosawi waihu'u za'ra õ di. Tahawa, wa tô tãma nharĩ za'ra ni oto, ãne: — Wẽ di tô. Mo oto tô aimorĩ. Wanhib'apito te te aima iwẽzéb uwaibaba, te za tô i'manha.

Zezusihi zadawa wasuꞌuꞌwa norĩ nhimiromhuri na robꞌuiꞌéré 22:14

Tawamhã ta hã te duré ĩma tinha, ãne: “'Re ihâimana u'âsi mono hã wahi'rata norĩ nhib'apito hã ma tô sima aipisutu, te te ai'ãma sima 're iroti mono zé hã waihu'u da. Ma tô duré aima pisutu, Wanhib'apito Zezusi hã iwẽ uptabi 'manharĩ'wa hã bâdâdi wa, 'madâ'â da, duré imreme hã wapari da.

Roma 12:2

Ti'ai ãma dahâimana wasété na 're idanomro mono norĩ ãma hã, 're sasõmri za'ra wa'aba mono õ di za. 'Re ihâimana u'âsi mono wi si, te za 're irowaptẽrẽ u'âsi za'ra wa'aba mo, asimirosa'rata wẽ na si, aipẽ'ẽ 're, 're aihâimana za'ra wa'aba mono zé hã te te aima 're pisutu za'ra wa'aba mono da, 're aihâimana za'ra wa'aba mono zép tém na si, oto 're anomro aba mono da. Tawapsi te za 'Re ihâimana u'âsi mono, te te aima 're ipisutu za'ra wa'aba mono hã asina 're iwaihu'u pese za'ra wa'aba mo, marĩ iwẽ si tãma 're i'manharĩ za'ra wa'aba mono zém na hã.

Éfézu 6:6

E asib'apito nho'a si te za romhuri hã tãma 're i'madâ'â pese za'ra wa'aba mo. Mare di. Isa're'ra nherẽ, te za romhuri hã tãma 're i'madâ'â pese za'ra wa'aba mo, te te 're aiwẽsãmri za'ra wa'aba mono da, asimiromhuri na hã. Cristuhu ma 're iromhuri za'ra wa'aba mono ne, te za duré ti'ai ãma asib'apito aba ma zama romhuri hã 're i'madâ'â pese za'ra wa'aba mo, 'Re ihâimana u'âsi mono te te sima 're iwẽ mono zéb zarina.

Colosu 1:13

Ta hã ma tô wa'anho'reptu tô, robra hawi, Satanasihi nhiptetezém hawi. Ta hawi ma tô te te 're wa'awaibu, i'ra nhimi'madâ'â si oto tãma 're wahâimana za'ra mono da, tãma isawi uptabi nhimi'madâ'â si.

Colosu 1:9

Tahawa, aiwasu'u wẽ hã wa te iwapari na'rata za'ra wa'aba zém hawim haré, wa tô õne u'âsi ai'ãma 're wamreme zusi u'âsi 'wa, 'Re ihâimana u'âsi mono ma. Ta hã te te sima 're aiwẽ za'ra wa'aba mono zéb uwaibaba, niha oto ãma 're aihâimana za'ra wa'aba mono da, duré te te aima 're waihu'u za'ra wa'aba mono da, wa tô wa te tiwi aima 're rowaptẽrẽ u'âsi za'ra wa'wa. Ipẽ'ẽzani hã te za tô te te 're aipawaptob u'âsi za'ra wa'wa, hâiwa hawi dahâimanazém na rowaihu iwẽ uptabi hã oto ãma waihu'u za'ra wa'aba da, taha zarina 'Re ihâimana u'âsi mono te te sima 're aiwẽ za'ra wa'aba mono zé hã asina 're waihu'u za'ra wa'aba mono da oto, 'râwi.

1 Tesalonita 4:3

'Re ihâimana u'âsi mono hã ma tô te te sima 're aiwẽ za'ra wa'wa, 're anomro wẽ wa'aba mono da, pi'õ norĩ, duré aibâ norĩ zama aihâiba na asiwi 're asimisaihuri si'uiwa za'ra wa'aba mono zé hã ai'ãma 're hâimana za'ra wa'aba mono tõ da oto.

1 Tesalonita 5:18

Wẽ wa, te za ãma 're aiwata u'âsi za'ra wa'aba mo. Rowẽ na 're anomro aba mono wamhã, duré robzei'õ na 're anomro aba mono nherẽ, wẽ wa, te za tô ãma 're aiwata u'âsi za'ra wa'aba mo. Ãne na 're aihâimana za'ra wa'aba mono da, 'Re ihâimana u'âsi mono, ma tô aima pisutu za'ra wa'wa, Cristu Zezusihi nhib'a'uwẽ 're anomro aba mono wa.

Hebreu 1:14

E niha tawamhã, hâiwa ãma romhuri'wa norĩ 're ihâimana za'ra mono zé hã. Ta norĩ hã ihâiba'õ, 'Re ihâimana u'âsi mono ma, romhuri'wa norĩ. Ta norĩ si ma tô 'Re ihâimana u'âsi mono hã te te 're satõrĩ za'ra ti'ai u, za te te isõ'reptu za'ra norĩ hã te te 're pawaptob za'ra mono da, ti'ab ré. Taha na si, ta norĩ nhimiromhurizé hã te tãma 're hâimana za'ra.

Hebreu 10:36

Marĩ na 're robzépata za'ra wa'aba mono nherẽ, duré Cristuhu zazei'wa 're anomro aba mono wa, da te aima 're rob'manharĩ wasété za'ra wa'aba mono nherẽ, te za tô asiptete sina, asina 're i'umnhasi u'âsi za'ra wa'aba mo, tiwi 're aipizari za'ra wa'aba mono tõ da. Ãne zarina, asina tãma ãma 're uwaimrami za'ra wa'aba mono wamhã, 'Re ihâimana u'âsi mono te te aima 're iwẽ za'ra wa'aba mono zéb zarina, te za tô tãma 're anomro wẽ wa'aba mo. Tawapsi, te za 'Re ihâimana u'âsi mono hã te te aima iropisutu za'ra wa'aba zém na iwẽ uptabi hã oto asina i'uwaimrami za'ra wa'wa.

Hebreu 10:7

Ãne te duré tãma tinha, Timama ma hã: “'Re ihâimana u'âsi mono, wa hã wa wei ãwa mo ti'ai u, ĩma ipisutuzéb zarina, te oto ĩsina uwaimrami da aima, ibaihâ na ĩwasu'u na duréihã da te ĩ'ãma irob'ui'éré za'ra zéb zarina.”

1 Pedru 2:15

'Re ihâimana u'âsi mono hã ma tô sima aiwẽ za'ra wa'wa, aihâimana wẽ na dama 're aihâimana za'ra wa'aba mono da. E marĩ da. Aihâimana wẽ na dama 're aihâimana za'ra wa'aba mono nherẽ, taré da te aima 're nharĩ wasété za'ra wa'aba mono tõ da.

1 Pedru 4:2

Tahawa, ti'ai ãma 're aihâimana za'ra wa'aba mono ré, te za 're aihâimana wẽ za'ra wa'aba mo, 'Re ihâimana u'âsi mono te te sima 're iwẽ mono zéb zarina si, marĩ na asima 're irosa'rata wasété za'ra wa'aba mono zéb zarina, 're aihâimana za'ra wa'aba mono ãna oto.

Apocalipsi 11:15

Tawamhã 7 ãma hâiwa ãma romhuri'wa hã ma tô tinhimnhihârâzém na amnhihârâ. Simnhihârâ wi, hâiwa ãma damreme 'rãihâ hã wa tô wapa. Ãne te nharĩ za'ra: — Satanasihi nhimi'madâ, 're danomro mono da, ma tô da te dasima 're wẽ za'ra aré, daro mono bâ. Tane nherẽ, ropâ te za oto 'Re ihâimana u'âsi mono nhimi'madâ'â si 're danomro, Wanhib'apito nhimi'madâ hã. Danho'reptui'wa da, te te ipisutu nhimi'madâ'â zama te za 're dahâimana za'ra oto. Wanhib'apito hã te za tô te te 're da'ab'madâ'â u'âsi oto, õne u'âsi.

Apocalipsi 12:10

Tawamhã wa tô duré ni'wai mreme hã wapa. Mreme 'rãihâ na te tinha: — 'Re ihâimana u'âsi mono hã ma tô oto wa'anho'reptuzém na wama ãma uwaimra, wanhitob'rui wi. Danhib'apito na siptete na te te 're ida'ab'madâ'â mono zé hã ma tô duré dama hâi'ré oto. Duré Danho'reptui'wa da, te te ipisudu hã te duré isiré te te 're da'ab'madâ'â oto, waihu'u pese na. Wasiré isazei'wai ãma, awẽ sidâpâsi simizazâri ãna iwasédé hã te te ãma 're i'aza'ra mono hã ma tô oto 'Re ihâimana u'âsi mono hã sihawi time hâiwa hawi, ti'ai u, Wa'uburé hã.

Apocalipsi 19:6

Tawamhã wa tô duré wapa, da'ahâ uptabi na 're idamreme zusi mono mreme hã. Â'a'a 'rãihâ ruru'u ne, damreme hã. Duré tãiwapsa'a za'ẽtẽ rãrã'ã ruru'u ne, damreme hã. Ãne te damreme 'rãihâ na nharĩ za'ra ni: — Uburé Danhib'apito uptabi, iwaihu'u pese uptabi hã ta hã danhipai u, pire uptabi na te 're hâimana, 'Re ihâimana u'âsi mono hã. Tahawa, ãma 're wawata u'âsi za'ra wa'aba mono za.

Apocalipsi 20:4

Tawamhã wa tô duré 'madâ danhib'apito simasisizém ne na 're idasi'ubumroi mono zé hã. Ãma isi'ubumroi mono ma, ma tô 'Re ihâimana u'âsi mono hã tãma pisutu za'ra, dahâimanazém na te te 're ida'awaihu'u mono zéb zarina, dama pire na te te dama 're arowairébé mono da, isadawa para. Tawamhã wa tô duré 'madâ'â za'ra, 'Re ihâimana u'âsi mono zadawa wasu'u te te 're sazei pese za'ra mono 'ru te, da te 're i'rãnhihâri za'ra mono norĩ pẽ'ẽzani hã, tô sena na Zezusihi zazei'wa na dama 're siwasu'u za'ra mono 'ru te. Ta norĩ hã â hawi ropoto siwamnarĩ ãma 're iwata za'ra mono õ. Duré ihâiba 'manharĩ na romhâiba ãma 're iwata za'ra mono õ. Duré â hawi ropoto siwamnarĩ nhisi na i'uihâ ui'éré za'ra õ, duré isib'rata ui'éré za'ra õ. Ta norĩ hã ma tô oto hâiba ré apâ 're hâimana za'ra. Ma tô tihâiwa'utu za'ra. Tawamhã Cristuhu siré te oto dama pire na te te dama 're roti za'ra, Satanasi hã pawasisi ré, miu na ãma iwahub u.