Mateu 5:39 - ꞌRe Ihâimana Uꞌâsi Mono Zadawa Wasuꞌu

³⁹ Tane nherẽ, wa za duré wa hã aimawi aima waihu'u za'ra wa'wa, tô õhõ na rotizém na hã. Da te aima 're rob'manharĩ wasété za'ra wa'aba mono nherẽ, asa dama ãma 're wa'rãmi za'ra wa'aba mono õ di za. Atob'rata nhimire niwĩ da te 're aihâ za'ra wa'aba mono wamhã, dama ãma 're wa'rãmi za'ra wa'aba mono õ di za. Taré te za 're aipizari za'ra wa'aba mo, atob'rata amo niwĩ, da te duré 're aihâ za'ra wa'aba mono da.

Mateu 5:39 ပူးပေါင်းရင်းမြစ်များ

Provébiu 20:22

Ãne hã nharĩ tõ: “Ĩma rob'manharĩ wasété 'wai ma, wa za ãma tãma wa'rã, ĩsi'ruiwa'âbâ da!” Uburé Danhib'apito si 'madâ'â, niha hã taha si te te aima hiri wẽ da, aihâimanazé hã.

Provébiu 24:29

Niwamhã ãne hã nharĩ tõ: “Aiwab da, wa za ãma tãma wa'rã, taha na te te ĩma wa'âbâ da hã, asa!”

Mateu 5:40

Ãté ni'wa hã te za ai'ãma wa'aba sima rosa'rata, dawasété na dawaihu'u'wa norĩ u te te ai'mazaprõni aba da, marĩ tiwi i'mai'manharĩ wasété aba zém na te te tãma ai'maiwasu'u wa'aba da. Tawamhã ãté te za tãma ai'maiwasu'u wa'wa, ta norĩ hã te te aima 'maipisutu aba da, asõ'utu'u iwa'âbâ surure hã iwa'rãmi tãma 'manhomri aba da, tiwi i'mai'manharĩ wasété aba wa'rãmimhã. Ãne wamhã, te te aiwi 'mai'âri aba wamhã, asi'ubuzéb zama te za tãma hã i'mai'manhomri 'wa, wa'âbâ za'ẽtẽ nherẽ, te te aiwi 'maiwaptẽrẽ aba õ nherẽ.

Luca 22:64

Zazahâ na ma duré siwi 'rã ubu. Tahawa, te tãma nharĩ za'ra, ãne: — Ma'ãpé wama waihu'u zara na, ni'wa ai'azâri'wa hã. E niha isisi hã. — Ãne te nasi tãma nharĩ za'ra, te te nasi siwi ahâri sina.

Luca 6:7

Tawamhã 'Re ihâimana u'âsi mono nhimiroti 'rata na rob'ui'éré na dama rowahutu'wa norĩ hã ma tô siwi 'madâ Zezusi hã, sabadu na te te pese zô, romhuri zahârizém na. Farizeu norĩ me, te simiza'rese sina 'madâ'â za'ra. Mozésihi nhimiroti te te 'madâ'â õ wa, te te siwi wẽ'õ da, te 'madâ'â pese za'ra.

Zuwã 18:23

Tahawa, te Zezusi hã asa tãma tinha, ãne: — Ĩmreme na te ãma upai wamhã, ma'ãpé we ĩma waihu'u. E marĩ da, ma ĩ'rãime, ĩmreme wẽ nherẽ. Tawamhã Anasi hã ma tô Zezusi hã dama ti'ru, Caifasihi u da te dasiwi saprõni da. Tawamhã pawasisi ré, ma tô itẽme dasiwi saprõni ni, sasedoti ipire uptabi u.

1 Corĩtu 6:7

Ãne zarina, asisada 're aihâimana za'ra wa'aba mono wa, da'ãma rowairébé'wa norĩ u, 're asisimroi wa'aba mono wamhã, isazei'wai hâimanazém na asima 're uwaimrami za'ra wa'aba mono õ di za. Ni'wam norĩ hã asiré isazei'wa nherẽ, te te aima 're rob'manharĩ wasété za'ra wa'aba mono wamhã, tãma ãma 're wa'rãmi za'ra wa'aba mono ãna, te za tô õne haré 're aihâimana za'ra wa'aba mo. Ni'wam norĩ hã asibrom na aiwi 're sipsaihuri za'ra wa'aba mono wamhã, tãma ãma 're wa'rãmi za'ra wa'aba mono õ di za duré. Tawapsi, te za asina ãma 're i'uwaimrami za'ra wa'aba mo, isazei'wai hâimanazém na hã.

1 Tesalonita 5:15

Ni'wai ma iwẽ'õ hã da te 'manharĩ wamhã, te za 're asipawaptob za'ra wa'aba mo, asa marĩ iwẽ'õ hã dama 're 'manharĩ za'ra wa'aba mono tõ da. Marĩ iwẽ'õ hã da te aima 're 'manharĩ za'ra wa'aba mono nherẽ, iwẽ na si te za 're asipawaptob za'ra wa'aba mo, asa tãma ãma 're wa'rãmi za'ra wa'aba mono tõ da. Iwẽ na si te za asima 're i'manharĩ u'âsi za'ra wa'aba mo, asiré isazei'wa norĩ ma. Uburé te za dama 're i'manharĩ wẽ u'âsi za'ra wa'aba mo, a'uwẽ mono bâ.

Hebreu 12:4

Dawasété nhiptete da, asiptete sina 're aihâimana za'ra wa'aba mono nherẽ, zahadu ai'matâ'â aba õ di, da te aima i'mairob'manharĩ za'ẽtẽ aba na hã, Zezusi, ãma idâ'â ne hã.

Tiagu 5:6

Ni'wam norĩ hã marĩ hã te te 're 'manharĩ wasété za'ra mono õ nherẽ, ma tô a norĩ wa'wa hã taré dama 're i'ru za'ra wa'aba mo, da te 're simroi mono da. Ta norĩ ma, waihu'u za'ra õ di, 're isisõ'reptu za'ra mono zéb da hã.

1 Pedru 3:9

Duré asada 're dahâimana wasété za'ra wa'aba mono wamhã, asa dama ãma 're wa'rãmi za'ra wa'aba mono õ di za, aihâimana wasété na. Duré dapẽ'ẽ na taré da te 're ai'ruiwapari za'ra wa'aba mono wa, da te aima 're nharĩ za'ra wa'aba mono nherẽ, asa dama ãma 're wa'rãmi za'ra wa'aba mono õ di za, aimreme wasété na hã. Wamama wi si, te za ta norĩ ma 're iwaptẽrẽ za'ra wa'aba mo, iwẽ si te te tãma 're sõmri za'ra mono da, ta norĩ ma hã. Ãne da, ma tô Wamama hã sitẽme asô tihârâ za'ra wa'wa, iwẽ na si aima 're sõprub za'ra wa'aba mono da.