Mateu 5:22 - ꞌRe Ihâimana Uꞌâsi Mono Zadawa Wasuꞌu

²² Ãne na roti hã tô sena nherẽ, wa za oto wa hã aimawi na aima waihu'u za'ra wa'wa, ãne na roti na hã. Ni'wam norĩ hã tisiré 're ihâimana za'ra mono norĩ da, 're siti'ru za'ra mono wamhã, ta norĩ hã te za 'Re ihâimana u'âsi mono hã te te siwi 're awẽ'õ, iwasété na te te 're i'awaihu'u mono zéb zarina. Duré ãté ni'wa hã te za tisiré ma tinha, ãne: “A hã, marĩ da, 're aihâimana mono õ.” Ãne ni'wam norĩ hã te te dama 're nharĩ za'ra mono wamhã, te za da te 're simro, zudeu norĩ ma roti'wa norĩ u, dawasété na dawaihu'u'wa norĩ tẽme, ta norĩ hã te te siwi 're wẽ'õ za'ra mono da, iwasété na te te siwi 're waihu'u za'ra mono wa. Duré ni'wa hã ãté ãne te za tisiré ma tinha: “E niha asimiza'rese'õ a hã, 'Re ihâimana u'âsi mono wasu'u na hã.” Ãne ni'wam norĩ hã tisiré ma, te te 're nharĩ za'ra mono wamhã, ãté ta norĩ hã te za ropipa u 're sisisi, unhama ro'o u'âsi u.

Mateu 5:22 ပူးပေါင်းရင်းမြစ်များ

Zenezi 37:4

Tawamhã Zuzéhé si, imama isipai u za'ra te te 're isawi pese mono na, ma tô isisãnawã norĩ hã ãma siwi waihu'u. Tahawa te tino hã te te siwi 're 'ru 'manharĩ. Te duré timreme tete na si te te tãma 're nharĩ za'ra.

Zenezi 37:8

Tawamhã isisãnawã norĩ ma te ãma sada'âbâ za'ra ãne: — E a hã wanhib'apito na wama 're aihâimana za'ra mono da bâ. E duré 're wa'awada'uri mono da bâ. Tawamhã ma tô oto tame sima 'rui poto pese za'ra, tinhimirosawẽrẽ te te tãma iwasu'u za'ra zéb ãma, ãne na hã.

Neemia 5:8

Tawamhã wa tô duré ãne tãma nharĩ za'ra: — Wa norĩ hã wanhimarĩ wama 're ihâimana za'ra mono zarina, wa tô wasiré a'uwẽ zudeu norĩ, wasiré a'uwẽ'õ norĩ wi hã apâ wa te 're uipra za'ra, aré 'râwi dama 're isiwede za'ra mono norĩ hã. Ãne nherẽ, te duré oto ãhã na awa'awi na a norĩ wa'wa hã asiré a'uwẽ norĩ zada, asiptede hã sada 're i'manharĩ za'ra wa'aba mo, 'râwi aima 're siwede za'ra wa'aba mono da hã! Tawamhã dama ipire norĩ hã ma tô ari'iwi pese tihâimana za'ra, te te ãma ĩzada'âbâ za'ra ãna, niha na.

Salmu 14:1

Isimiza'rese'õ norĩ te tipẽ'ẽ na te te sima 're nharĩ za'ra ãne: “Ĩma hã, 'Re ihâimana u'âsi mono hã hâimana õ di.” Ta norĩ hã te iwasété si 're hâimana za'ra. Tahawa, te marĩ iwasété si te te 're 'manharĩ za'ra. Ni'wa hã iwẽ te te 're i'manharĩ mono hã ihâimana'õ uptabi.

Salmu 69:4

Taré nherẽ, ĩzada isiti'ru za'ra norĩ hã ahâ uptabi di, ĩ'rã na ĩzéré 're ihâimana za'ra mono nhipai u. Ĩnhitob'ru norĩ hã te ĩhâiba na sadawa nhipese na te te 're rowasu'u za'ra. Ta norĩ hã siptete di. Te te sima 're wẽ u'âsi za'ra, te te siwi ĩwĩrĩ da hã. Duré marĩ te simi'uri õ nherẽ, te ta norĩ hã te te ĩwi 're waptẽrẽ zadawa za'réi'õ za'ra, te tãma sõmri za'ra da hã.

Provébiu 14:16

I'rãi waihu'u wẽ norĩ hã te za ropire tãma 're hâimana za'ra mono tõ da, 're si'madâ'â pese za'ra. Tanei õ di, isimiza'rese'õ norĩ hã. Te rosa'rata ãna si'aba'ré na marĩ hã te te 're 'manharĩ za'ra.

Provébiu 18:6

Isimiza'rese'õ, timreme zahi zarina, te za dasi'wapé hã te te 're azani. Te za duré ti'ahârizé hã te te sisada ãma 're azani.

Daniéu 3:13

Tawamhã Nabucodonozo ãne hã te te wapari wa, ma tô ab'rui pese. Tahawa, ma tô 'ru za'ra, sô dahãsi da hã, Sadraqui norĩ zô, Mezaqui, Abide-Negu. Tahawa, apito hâimanazéb u ma tô da te dasiwi simro.

Daniéu 3:19

Tawamhã Nabucodonozo ãne te te wapari wamhã, ma tô, si'ubdatõ aibâ ipréduptém norĩ zada hã ab'rui pese. Sada sahi za'ra wa, ma siwapré nhizuri pese. Tahawa, ma tô unhama ro'o na 'ri're wa'wa hã, da te sada wa'ro pese za'ra da hã dama ti'ru, 7 na ãma isahuzém na da te 're iwa'ro u'âsi za'ra mono zém nhipai u.

Mateu 10:17

Tahawa, te za 're asipibui pese za'ra wa'aba mo, dawi. Ãté ni'wam norĩ hã te za te te sima 're aiwẽ za'ra wa'wa, te te 're aiwaibui wa'aba mono da, zudeu norĩ ma roti'wa norĩ u, te te 're asimroi wa'aba mono da. Tawamhã ta norĩ hã te te siwi 're aiwẽ'õ za'ra wa'aba mono zéb zarina, te za duré isimirowahutuzéb ãma da te 're ai'maipré'é 'wa, romhâ nhorõ na.

Mateu 10:28

Dahâiba te te dawi 're isimroi mono norĩ ma hã, tãma 're aipahi za'ra wa'aba mono õ di za, dapẽ'ẽzani hã te te dawi 're simroi waihu'u mono dai õ wa. 'Re ihâimana u'âsi mono si te za asima 're ipipa za'ra wa'aba mo. Taha ma si waihu'u pese di, dahâiba hã duré dapẽ'ẽzani zama, te te dawi 're i'a'uprosi mono zéb da hã.

Mateu 12:24

Tawamhã ãne na farizeu norĩ te te dawapari za'ra wamhã, ma tô sima nharĩ za'ra, ãne, ta norĩ hã: — Õ hã Bezebuhu zadawa para, ma tô wa'uburé hã te te dama 're anhamra, wa'uburé norĩ nhib'apito zadawa para. Bezebu hã tiwaihu'u pe hã te te tãma 're sõmri mono õ 'wa'âhã, aré te te dama 're anhamra waihu'u mono õ di, wa'uburé hã.

Mateu 17:5

Tawamhã ãne Pedru te te tãma nharĩ ré, ma tô hâiwa nhirõno hã we hâiba zuwa za'ra, Zezusi norĩ hã. Tawamhã hâiwa nhirõtõ zarob'a hawi, ma tô 'Re ihâimana u'âsi mono hã mre, ãne: — Ã hã ĩ'ra, te 're isawi pese mono. Tãma 're ĩto za'ẽtẽ mono di. Ma'ãpé isimiroti hã 're wapari pese za'ra wa'aba mono za.

Mateu 18:21

Tawamhã Pedru hã ma tô Zezusihi u ai'ré, te te sadanharĩ da. Ãne te taha wamhã sadanha: — Wanhib'apito, wasiré isazei'wa nherẽ, ĩzada 're iwasété u'âsi mono zé hã e mame isa'ratazém nhitõ ãma wa za ĩsina hã 'madâ'â zazâ, iwasédé te ĩsina i'madâ'â'õzém na hã za oto. E 7 ãma.

Mateu 18:35

Tawamhã ãne ma tô timreme hã tãma 'rãsutu za'ra, Zezusi hã: — Ãne hã asiré isazei'wa hã asada 're iwasété za'ra wa'aba mono zém na sena na asina 're 'madâ'â zahâri za'ra wa'aba mono õ wamhã, te za Ĩmama hã te te aima 're rob'manharĩ wasété za'ra wa'wa aihâiba mono bâ wa'aba, hâiwa ãma 're isãmra mono hã.

Mateu 23:15

— Farizeu norĩ, duré dama rowahutu'wa norĩ, a norĩ wa'aba ma, aima 're ropipa uptabi za'ra wa'aba mono di za. Ma tô datẽme 're iropéi wa'aba mo daro mono bâ, dama 're rowasu'u za'ra wa'aba mono da, asimirowasu'u na da te 're asaze za'ra wa'aba mono da. Tawamhã ni'wam norĩ hã asiniwĩ 're isipizari za'ra mono hã, 're anomro wasété aba mono zéb zarina, ma tô 're hâimana wasété uptabi za'ra, asimiroti wasété aba zarina. Tahawa, ropipa ãma 'Re ihâimana u'âsi mono te te 're aihâ za'ra wa'aba mono zém nhipai u, te za te te 're ahâ za'ra za'ẽtẽ za, ta norĩ hã.

Mateu 23:33

Farizeu norĩ, a norĩ wa'wa hã wahi nhipãrĩ pese ne, te tô 're anomro aba mo. E ropipa u, 'Re ihâimana u'âsi mono te te 're asatõrĩ za'ra wa'aba mono wa isimihâzé wi, tiwi 're aiwairébé aba mono da bâ.

Mateu 25:41

— Tawamhã isimi'e niwĩ isimasam norĩ ma, te za oto nharĩ za'ra, ãne: “A norĩ wa'wa hã ma tô 'Re ihâimana u'âsi mono hã te te siwi 're aiwẽ'õ pese za'ra wa'wa. Mo oto ĩnhiti ai'aba'réi wa'aba, unhama ro'o u'âsi u, wa'uburé norĩ zô 'Re ihâimana u'âsi mono te te ipisutuzéb u, duré ta norĩ nhib'apito zô zama.

Mateu 26:59

Tawamhã sasedoti ipire norĩ hã, duré uburé zudeu norĩ ma roti'wa norĩ hã, te ni'wam norĩ zô tinhopré, Zezusi hã marĩ te te 're i'ab'manharĩ wasété mono zém na, sadawa nhipese na te te siwi ãma hiri da, tawapsi romanu norĩ hã te te siwi wĩrĩ da.

Mateu 3:17

Tawamhã hâiwa hawi te we tinha ãne: — Ã hã ĩ'ra. Ĩma sawi uptabi di. Tãma ĩto za'ẽtẽ uptabi di. — Ãne te we tinha, Imama hã.

Mateu 5:34

Ãne na roti hã tô sena nherẽ, wa za oto wa hã aimawi aima waihu'u za'ra wa'wa, tô õhõ rotizém na hã. Marĩ pire na taré dama 're ropisutu za'ra wa'aba mono õ di za oto, 'Re ihâimana u'âsi mono nho'a. Mare di. Duré ãne na dama 're ropisutu za'ra wa'aba mono õ di za: “Hâiwa hã tô sena wahuré 're isa'wari mono ne, wa duré wa hã tô sena aima ropisutu.” Ãne wasu'u zarina taré dama 're ropisutu za'ra wa'aba mono õ di za. E marĩ wa. Hâiwa hã taré hã 're ihâimana mono õ wa, tame 'Re ihâimana u'âsi mono hã 're sãmra u'âsi mono wa, ta hawi te te we duré 're da'ab'madâ'â mono wa. Duré ãne na dama 're ropisutu za'ra wa'aba mono õ di za: “Ti'a hã tô sena wahuré 're isa'wari mono ne, wa duré wa hã tô sena aima ropisutu.” Ãne wasu'u zarina taré dama 're ropisutu za'ra wa'aba mono õ di za. E marĩ wa. Ti'a zama pire wa, 'Re ihâimana u'âsi mono te si wa. Duré ãne na dama 're ropisutu za'ra wa'aba mono õ di za: “Zeruzalẽ na 'ri nho'õmo nhisi hã tô sena 're isa'wari mono ne, wa duré wa hã tô sena aima ropisutu.” Ãne wasu'u zarina taré dama 're ropisutu za'ra wa'aba mono õ di za. E marĩ wa. Ta hã 'Re ihâimana u'âsi mono, uburé Danhib'apito uptabi te si wa.

Mateu 5:44

Tane nherẽ, wa za duré wa hã aimawi aima waihu'u za'ra wa'wa, tô õhõ na rotizém na hã. Ai'ruiwapari'wa norĩ hã te za 're isawi pese za'ra wa'aba mo. Duré te te aima 're irob'manharĩ wasété za'ra wa'aba mono norĩ ãma, te za 're aimreme zusi aba mo, 'Re ihâimana u'âsi mono ma, iwẽ si te te tãma 're apisutu mono da, ta norĩ ma.

Marcu 14:55

Tawamhã sasedoti ipire norĩ hã duré uburé zudeu norĩ ma roti'wa norĩ hã, te ni'wam norĩ zô tinhopré za'ra, Zezusi hã marĩ te te 're i'ab'manharĩ wasété mono zém na, sadawa nhipese na te te siwi ãma hiri da, tawapsi romanu norĩ hã te te siwi wĩrĩ da. Tawamhã da'ahâ na dazadawa nhipese na, Zezusihi ãma isimiroti wasété na da te ãma sa'ra za'ra nherẽ, ãma dasisaze za'ra õ di.

Marcu 15:1

Tawamhã awẽm na mararé, ma duré si'rã'õtõ, sasedoti ipire norĩ hã, duré zudeu norĩ ma roti'wa norĩ hã, duré 'Re ihâimana u'âsi mono nhimiroti 'rata na rob'ui'éré na dama rowahutu'wa norĩ hã. Zezusihi ãma te te sima roti za'ra da, ma si'rã'õtõ, dama roti'wa ipire norĩ me. Taha pari, ma oto siwi pawasisi Zezusi hã, Pilatuhu u te te siwi saprõni da. Tawamhã itẽme te te siwi ãwisi wamhã, Pilatu te Zezusi sadanha, ãne: — E a hã, zudeu norĩ nhib'apito. Tawamhã Zezusi te asa tãma tinha, ãne: — Tahata ma te tô tane hã isarina ĩ'ãma iwaihu.

Luca 22:66

Tawamhã mararé ma tô zudeu norĩ ma roti'wa norĩ hã si'rã'õtõ, duré sasedoti ipire norĩ hã, duré 'Re ihâimana u'âsi mono nhimiroti 'rata na rob'ui'éré na dama rowahutu'wa norĩ hã. Si'rã'õtõ wamhã, ma tô dama 'ru za'ra, Zezusi hã da te we dasiwi saprõni da, itẽmeb za'ra.

Zuwã 11:47

Tawamhã isimirowasu'u hã te te wapari za'ra wamhã, tisiré norĩ zô te sitẽme tihârâ za'ra, dama ipire norĩ zô. Tahawa, ma sitẽme si'rã'õtõ, sasedoti ipire norĩ hã, duré farizeu norĩ hã duré uburé zudeu norĩ ma roti'wa norĩ zama. Sitẽme si'rã'õtõ wamhã, ãne te sima rowasu'u za'ra: — E marĩ, wa za bété wa norĩ hã wasiwi 'manharĩ ni. Õ hã te marĩ hã dama i'manharĩ waihu'u'õ hã te te dama 're ab'manharĩ u'âsi, tiwaihu'u pese na.

Zuwã 15:25

“Marĩ hã te dama 're ab'manharĩ wasété mono õ nherẽ, ma tô taré da te dasiwi 're ĩ'ruiwapari.” Ãne duréihã ma tô wahi'rada hã ĩ'ãma rob'ui'éré siro, romhâ ré. Ĩzazei'õ'wa norĩ hã ma tô oto sina uwaimrami za'ra, te te siwi 're ĩ'ruiwapari mono zém na hã.

Zuwã 7:20

Tawamhã ãne hã da te wapari za'ra wamhã, te asa tãma nharĩ za'ra ni, ãne: — E 'wam norĩ hã ma tô sima aiwẽ za'ra, te te siwi aiwĩrĩ da hã. Wa'uburé te te aima nharĩ wa, te asimiza'rese ãna wama inharĩ za'ra.

Zuwã 8:48

Tawamhã dama ipire norĩ hã ma tô asa tãma nharĩ za'ra, ãne: — A hã, samaritanu. Wa'uburé ré, 're aimorĩ wa, te asimiza'rese ãna ãne na hã wama asiwasu'u za'ra. Tô sena, wa tô nasi ãne na aima nharĩ za'ra ni.

Zezusihi zadawa wasuꞌuꞌwa norĩ nhimiromhuri na robꞌuiꞌéré 17:18

Zezusihi wasu'uwẽ na ma tô dama rowasu'u. Dâ'â nherẽ, apâ ihâiwa'utuzém na ma tô duré dama rowasu'u. Tahawa, Epiturezuhu nhimirowahutu zarina, duré etozitu norĩ nhimirowahutu zarina dama rowahutu'wa norĩ hã ma tô duré ãma sada'âbâ za'ra, Paulu hã. Tawamhã nima norĩ hã ma tô ãne sisadanharĩ za'ra ãma: — E marĩ na te wama rowasu'u za'ra. Simiza'rese bâ. Nima norĩ hã te duré ãne sima nharĩ za'ra: — Ãté ihâiba'õ norĩ wasu'u na te wama rowasu'u, iwaihu'upese hâiba amoi wasu'u na, wa te ãma 're saze za'ra mono da.

Zezusihi zadawa wasuꞌuꞌwa norĩ nhimiromhuri na robꞌuiꞌéré 22:30

Tawamhã da'wapéi'wa norĩ nhib'apito hã ma tô sima wẽ, zudeu norĩ hã Pauluhu ãma iwasédé hã te te siwi ãma ihirizé hã sena na te te waihu'u da. Tahawa, awẽm na si ma tô 'Re ihâimana u'âsi mono ma, da'ãma romhuri'wa ipire norĩ ma 'ru za'ra, uburé zudeu norĩ ma roti'wa norĩ ma zama, Pauluhu zada si'rã'õtõ da. Da'wapéi'wa norĩ ma, ma tô duré 'ru za'ra, Pauluhu pawasisizé hã te te tãma wasihu za'ra da, dama ipire norĩ nho're sab da.

Zezusihi zadawa wasuꞌuꞌwa norĩ nhimiromhuri na robꞌuiꞌéré 23:1

Tawamhã zudeu norĩ ma roti'wa norĩ tẽme, te rob'madâ'â pese, Paulu hã. Tahawa te tãma nharĩ za'ra, ãne: — Wasiré Izaraéu nhihudu norĩ, wa hã wa tô 're ĩsi'madâ'â u'âsi, 're ĩmorĩ wẽ u'âsi da, 'Re ihâimana u'âsi mono nho'a. Tahawa, ĩpẽ'ẽ wapu na wa 'râwi ĩsi'remhã 're ĩsi'madâ'â u'âsi.

Zezusihi zadawa wasuꞌuꞌwa norĩ nhimiromhuri na robꞌuiꞌéré 24:20

Ta norĩ hã we si'aba'réi õ wamhã, ãté asõ'a isimasam norĩ si te za aima ĩwasu'u za'ra. Dama roti'wa norĩ nho're ĩzab ré, marĩ iwasédé hã te te ĩ'ãma iwaihu'u za'ra zém na, te za ĩwasu'u za'ra, ãme ĩzab ré.

Zezusihi zadawa wasuꞌuꞌwa norĩ nhimiromhuri na robꞌuiꞌéré 4:15

Tawamhã ma tô tãma rob'ru za'ra, dasi'rã'õtõzém hawi pusi da. Pusi za'u si, ma tô ãma sisadawa pibu za'ra, dama roti'wa norĩ hã.

Zezusihi zadawa wasuꞌuꞌwa norĩ nhimiromhuri na robꞌuiꞌéré 5:21

Tawamhã ãne hã te te wapari za'ra wamhã, bâdâ 'rãiwatobro wi, ma tô asisi, 'Re ihâimana u'âsi mono nhorõwa ãma. 'ri 'wawi wa'ra u. Tame ma tô rowahutu na dama ãma sãna'rata za'ra. Tawamhã sasedoti tisiré norĩ nhipai u ipire uptabi hã, isiré 're inomro mono norĩ zama ma tô zudeu norĩ ma ipire za'ra norĩ zô da'mazatõ, Zeruzalẽ ãma 're isi'ubumroi mono norĩ zô. Tawamhã ma tô itẽme ubumro uburé. Tawamhã dazazéb u ma tô Zezusihi zadawa wasu'u'wa norĩ zô tihârâ za'ra, da te itẽme simroi mono da.

Zezusihi zadawa wasuꞌuꞌwa norĩ nhimiromhuri na robꞌuiꞌéré 5:27

Te te simroi mono wamhã, te tãma nharĩ za'ra, dama roti'wa norĩ nho're simasab da. Tawamhã 'Re ihâimana u'âsi mono ma da'ãma romhuri'wa, tisiré norĩ nhipai u ipire uptabi hã te tãma nharĩ za'ra, Zezusihi zadawa wasu'u'wa norĩ ma, ãne:

Zezusihi zadawa wasuꞌuꞌwa norĩ nhimiromhuri na robꞌuiꞌéré 6:12

Tahawa, ma tô ãne hã dama wasu'u wasété za'ra, Estewã hã. Duré 'Re ihâimana u'âsi mono nhimiroti 'rata na rob'ui'éré na dama rowahutu'wa norĩ ma zama, duré dama roti'wa norĩ ma zama, ma tô ãne wasu'u wasété za'ra. Aihĩni sada danhiti'rui wairébé da, ma tô ãne dama wasu'u wasété za'ra. Tawamhã ma tô oto sô ai'aba'ré, Estewãhã zô. Tahawa, ma tô siwi ti'â. Te te siwi âri wamhã, ma tô siwi saprõ, zudeu norĩ ma, ipire za'ra norĩ u.

Zezusihi zadawa wasuꞌuꞌwa norĩ nhimiromhuri na robꞌuiꞌéré 6:15

Tawamhã zudeu norĩ ma roti'wa norĩ hã, duré aihĩni isi'ubumrozéb ãma ihâimana za'ra norĩ hã te ãma tinhopré, Estewãhã ubu ãma hã. 'Re ihâimana u'âsi mono ma, hâiwa ãma romhuri'wai ubu ne, Estewãhã ubu hã.

Zezusihi zadawa wasuꞌuꞌwa norĩ nhimiromhuri na robꞌuiꞌéré 7:37

Ta hã ma tô tisiré Izaraéu nhihudu norĩ ma rowasu'u, ãne: “'Re ihâimana u'âsi mono hã te za ni'wa hã asiré wa'wa hã we aima pisutu za'ra wa'wa, ĩsine, te te aima 're isadawa wasu'u za'ra wa'aba mono 'wa da hã.”

Roma 12:10

Dasisãnawãi uptabi 're idasisawi pese za'ra mono ne, te za a norĩ wa'wa hã 're asisawi pese za'ra wa'aba mo, Cristuhu ãma asisãnawã oto asiré 're aihâimana za'ra wa'aba mono wa. Te za duré 're asiwazé pese za'ra wa'aba mo.

1 Corĩtu 6:6

E ãne hã i'uwaibaba bâ, te asiré isazei'wa 're aihâimana za'ra wa'aba mono nherẽ, asisada 're aihâimana za'ra wa'aba mo, isazei'õ'wa norĩ u si 're asisimroi wa'aba mono da, ta norĩ si te te 're aiwaihu'u za'ra wa'aba mono da, aiwasété aba na. E ãne hã i'uwaibaba, aima za'ra wa'aba hã.

1 Tesalonita 4:6

Tane 're anomro aba mono õ di za. Isazei'wa norĩ hã, asisãnawã te 're anomro aba mo. Tahawa, asisãnawãi mro nherẽ, asiwi 're upi za'ra wa'aba mono õ di za, asiwi 're asimisaihuri za'ra wa'aba mono tõ da, aiwasédé hã duré asi'ãma 're 'manharĩ za'ra wa'aba mono tõ da. Tane, ni'wa hã tiwasédé te te 're 'manharĩ mono wamhã, 'Re ihâimana u'âsi mono hã te za niha tãma rob'manha. Ãne tô sena, wa tô aima waihu'u za'ra wa'aba ni, waihu'u pese za'ra wa'aba da. Tane nherẽ, wa duré ãma aima sahu za'ra wa'aba ni.

Titu 3:2

Duré te te 're dabâsi wasété za'ra mono õ di za. Te te duré 're dazada'âbâ za'ra mono õ di za. Simizawi pese na si, te za 're hâimana za'ra. Duré waimri na te za uburé dama 're hâimana za'ra, hâimana wẽ na.

Hebreu 12:25

Tahawa, te za 're asi'madâ'â pese za'ra wa'aba mo, 'Re ihâimana u'âsi mono hã te te aima 're rowasu'u za'ra wa'aba mono wamhã, tiwi 're asipo're nhitob za'ra wa'aba mono tõ da. Duréihã Sina'i na ẽtẽ 'rãihâ nhisi ãma, 'Re ihâimana u'âsi mono ti'ai u te te we dama rowasu'u wamhã, isimiroti wapari'õ'wa norĩ hã wairébé õ di, te te idahâ za'ra zé wi hã. Wa norĩ hã bété. E 'Re ihâimana u'âsi mono hã hâiwa hawi te te wei wama 're aroti wẽ mono nherẽ, tiwi 're wasipizari za'ra mono wamhã, e isimihâzé wi wasi'uihâ na 're wawairébé mono da bâ, wa za bété wanhimipari ãna hã 're wanomro u'âsi.

Hebreu 5:9

Tawamhã Zezusi hã ti'ab ré, te te 're robzépata mono nherẽ, Imama te te tãma iwẽzéb zarina si te te 're ab'manharĩ mono wa, ma tô sina uwaimra, uburé isimiroti te te 're i'madâ'â pese za'ra mono norĩ hã te te 're sõ'reptu za'ra mono da, hâiwa ãma dâ'â ãna 're hâimana u'âsi za'ra mono da.

Tiagu 2:20

E niha te rosa'rata ãna 're aihâimana mo. Ãté ni'wa hã te za dama 're siwasu'u, Zezu Cristuhu zazei'wa 're imorĩ na. Tane nherẽ, marĩ iwẽ na te te 're da'apawapto mono õ wamhã, marĩ dai õ di za, dama 're isiwasu'u mono zé hã. Ma'ãpé, ãne hã waihu'u.

Tiagu 3:6

Tane danhoto hã unhama ro'o ne, te aiwa dama 're hâimana za'ra. Danhoto hawi, te za sipu'u pese na damreme wasédé hã te te 're ropé. Ta hawi te za 'râwi 're dasiwasété za'ra. Unhama ro hã te za danhimarĩ hã te te dawi 're uprosi. Tane danhoto wasété na, te za dahâimana wẽ hã da te dasiwi 're uprosi za'ra. Ropipa hawimhã te za damreme wasédé hã te te dama ãma 're sãna'rata, wa'uburé hã.

1 Pedru 2:23

Da te tãma 're nharĩ wasété za'ra mono nherẽ, asa te te dama 're nharĩ wasété mono õ di. Duré da te tãma irob'manharĩ wasété mono na te te robzépata nherẽ, te te dama ropipa õ di asa hã. 'Re ihâimana u'âsi mono ma si, ma tô sisõ, taha si dahâimanazéb zarina da'ãma rowairébé'wai wa, te te ãma dama 're a'upai mono õ wa.

1 Pedru 3:9

Duré asada 're dahâimana wasété za'ra wa'aba mono wamhã, asa dama ãma 're wa'rãmi za'ra wa'aba mono õ di za, aihâimana wasété na. Duré dapẽ'ẽ na taré da te 're ai'ruiwapari za'ra wa'aba mono wa, da te aima 're nharĩ za'ra wa'aba mono nherẽ, asa dama ãma 're wa'rãmi za'ra wa'aba mono õ di za, aimreme wasété na hã. Wamama wi si, te za ta norĩ ma 're iwaptẽrẽ za'ra wa'aba mo, iwẽ si te te tãma 're sõmri za'ra mono da, ta norĩ ma hã. Ãne da, ma tô Wamama hã sitẽme asô tihârâ za'ra wa'wa, iwẽ na si aima 're sõprub za'ra wa'aba mono da.

1 Zuwã 2:9

Ãté ni'wa hã dasiré isazei'wa newa te za taré ãne dama 're siwasu'u: “Wa hã, 're ĩmorĩ wẽ di. Rowa'a na si wa 're ĩhâimana, 'Re ihâimana u'âsi mono nhimiroti zarina.” Ãne ni'wa hã dama 're siwasu'u mono nherẽ, isazei'wa norĩ te te 're a'ruiwapari mono wamhã, ta hã te zahadu robra na 're hâimana.

1 Zuwã 3:10

E niha wa za bété waihu'u za'ra ni, 'Re ihâimana u'âsi mono 'ra norĩ hã, duré Wa'uburé 'ra norĩ hã. Ni'wam norĩ hã 're hâimana wẽ za'ra mono õ wamhã, duré te te 're dazawi pese za'ra mono õ wamhã, ta norĩ hã 'Re ihâimana u'âsi mono 'ra, 're nomro mono õ di za. Ãne na wa za ta norĩ hã Wa'uburé 'ra na wa te 're waihu'u za'ra.

1 Zuwã 5:16

Uburé da te 're i'manharĩ wasété za'ra mono zé hã, dawasédé tô, simisutu. Tane nherẽ, ni'wam norĩ hã tiwasédé hã te te 're 'manharĩ za'ra mono nherẽ, 'Re ihâimana u'âsi mono nhimiroti u tiwasété wi oto 're sipizari za'ra mono wamhã, õ hã te te ãma 're ab'madâ'â mono õ di za tô oto. Tawamhã 'Re ihâimana u'âsi mono 'rata 're idanomro u'âsi mono zé hã, tiwi 're simani za'ra mono õ di za tô oto duré. Tawamhã ni'wam norĩ hã iwasédé te te 're 'manharĩ za'ra mono wamhã, duré iwasété na 're waihu'u za'ra wa'aba mono wamhã, te za ãma 're aimreme zusi aba mo, 'Re ihâimana u'âsi mono ma, ipẽ'ẽ 're, dâ'â ãna 're ihâimana u'âsi za'ra mono zé hã te te tãma 're apisutu mono da oto. Tane nherẽ, ni'wam norĩ hã tiwasété wi 're isipizari za'ra mono zéb zô, 'Re ihâimana u'âsi mono pẽ'ẽzani te te tãma 're iroti za'ra mono zé hã te te 're wapari za'ra mono õ wamhã, 'Re ihâimana u'âsi mono hã te za iwasédé hã te te ãma 're ab'madâ'â u'âsi. 'Re ihâimana u'âsi mono 'rata 're idanomro u'âsi mono zé hã, tahawa, te te sina 're uwaimrami za'ra mono õ di za. Tiwasété wi 're sipizari za'ra mono õ nherẽ, e niha te za 'Re ihâimana u'âsi mono hã ãma 're siwamri za'ra, te te 're isõ'reptu za'ra mono zéb da hã. Tahawa, ta norĩ ãma hã te ãma aima roti za'ra wa'aba õ di za, ãma 're i'aimreme zusi aba mono zéb da hã.

Apocalipsi 20:14

Tawamhã ni'wam norĩ hã ibaihâ na 're ihâimana u'âsi za'ra mono norĩ nhisi, 're isimi'wara mono zém na isisi isimi'wara õ norĩ hã ma tô sãmra ni, unhama ro'o u'âsi u. (Ã hã unhama ro'o u'â hã maparane ãma 're idadâ'â zahu za'ra mono zé, te wasu'u.) 'Re idadâ'â za'ra mono zé hã tâibâ oto. Duré adâ hã aré 're ihâimana za'ra mono zé hã, tâibâ duré oto. Ma tô ab're 're sãmra ni, uburé adâ'â norĩ hã, unhama ro'o u'âsi u. Tahawa, tâibâ oto, adâ 're ihâimana za'ra mono zé hã.