Mateu 5:19 - ꞌRe Ihâimana Uꞌâsi Mono Zadawa Wasuꞌu

¹⁹ Duré, ni'wam norĩ hã 'Re ihâimana u'âsi mono nhimiroti 'rata na rob'ui'éré hã nima hã roti hã taré dama 're 'maihâimana mono newa, te te 're 'madâ'â za'ra mono õ wamhã, duré isine da te 're 'madâ'â tõ za'ra mono da, te te dama ãma 're roti za'ra mono wamhã, ta norĩ si te za dama wapu na 're hâimana za'ra, 'Re ihâimana u'âsi mono, da'ãma 're isib'a'uwẽ mono zéb ãma hã. Tane nherẽ, ni'wam norĩ si isimiroti na rob'ui'éré 'rada hã te te 're 'madâ'â pese za'ra mono wamhã, duré isine da te 're 'madâ'â pese za'ra mono da, te te dama ãma 're roti za'ra mono wamhã, ta norĩ si te za dama pire na 're hâimana za'ra, da'ãma 're isib'a'uwẽ mono zéb ãma hã.

Mateu 5:19 ပူးပေါင်းရင်းမြစ်များ

Salmu 119:128

Tahawa, wa wa hã asimiroti zarina si 're mo. Wa duré uburé dazadawa nhipese na si 're idanomro mono zé bâdâdi hã ĩsiwi te 're wẽ'õ pese.

Salmu 119:6

'Re ĩnhimipari pese mono na, uburé asimiroti te 're wapari pese mono wamhã, niwamhã 're ĩnhisé mono da hã mare di.

Daniéu 12:3

'Rãiwaihu'u wẽ na 're ihâimana za'ra mono norĩ hã te za tihâiba na te te sina 're rob'uiwẽ za'ra, hâiwa na 're isimasa mono norĩ te te 're irob'uiwẽ za'ra mono ne. Duré i'uwaibaba na si te te dama 're irowasu'u za'ra mono norĩ hã te za hâiwa na wasi te te 're irob'uiwẽ za'ra mono ne, te te 're rob'uiwẽ u'âsi za'ra, sina.

Mateu 11:11

Tô sena wa aima waihu'u za'ra wa'wa. Uburé iwana 're inomro mono norĩ hã te te siwi ãma wabzu za'ra õ di Zuwã Batista hã, isimiromhuri pire na hã. Tane nherẽ, 'Re ihâimana u'âsi mono te te 're ida'azawi mono zéb zarina te te 're ida'apawapto mono zé hã, hâiba ré, te te waihu'u õ di za, Zuwã Batista hã. Ni'wam norĩ si, 'Re ihâimana u'âsi mono nhib'a'uwẽ norĩ si te za te te sina 're waihu'u za'ra, i'uirĩ na. Tahawa, ta norĩ hã te za pire na 're hâimana za'ra, Zuwã Batistaha nhipai u. Duré ni'wam norĩ hã 'Re ihâimana u'âsi mono nhib'a'uwẽ norĩ hã, tisiré norĩ ma, wapu na 're hâimana za'ra mono nherẽ, te za pire na 're hâimana za'ra, Zuwã Batistaha nhipai u, ta norĩ si i'uirĩ na te te sina 're waihu'u za'ra mono wa za, 'Re ihâimana u'âsi mono te te 're ida'apawapto mono zé hã.

Mateu 19:28

Tawamhã Zezusi te asa tãma nharĩ za'ra, ãne: — Ãne, sena na wa za duré aima waihu'u za'ra wa'wa. Niwapsi ti'ai ãma Dasiré Ipodo hã te za ro itéb ãma danhib'apito simasisizém na 're sãmra. Isimasisizé iwẽ uptabi ãma hã te za 're sãmra, te te 're da'ab'madâ'â u'âsi mono da oto. Tame te za duré a norĩ wa'wa hã isiré 're anomro aba mono norĩ hã 12 na danhib'apito simasisizém na 're asimroi wa'aba mo, aipire na Izaraéu 'ra nhihudu mono bâ 're 'madâ'â za'ra wa'aba mono da.

Mateu 20:26

Tane asima 're aihâimana za'ra wa'aba mono õ di za, a norĩ wa'wa hã. Asiré norĩ ma, ai'maipire wa'aba da, asina 're 'mairob'ruiwapari aba mono wamhã, te za asiré hã 're i'maipawaptob u'âsi aba mo, marĩ zô 're ai'manhimnhasi aba mono ãna.

Mateu 28:20

Te za duré dama 're iroti za'ra wa'aba mo, uburé te aima 're iroti za'ra wa'aba mono zéb zarina, ĩnhimiroti si da te 're 'madâ'â u'âsi za'ra mono da. Õne u'âsi, wa za asiré 're ĩmorĩ u'âsi za'ra wa'wa, ro isi'utõrĩzéb u. Ãne na aipo're si'âri za'ra wa'aba õ di za.

Luca 1:15

Prédu wapsi, isimiroti hã pire di za. Tahawa, te za isimiroti pire na waihu'u, 'Re ihâimana u'âsi mono hã. Uwa 'rãi wa'u isé hã te te 're hâsi mono õ di za, duré âzé hã. Waptã'ã hawim haré, te za 'Re ihâimana u'âsi mono pẽ'ẽzani ré 're mo. Taha si, te za te te 're wapari pese. Tahawa, te za tisiré Izaraéu nhihudu norĩ hã te te 're apawapto tinhimiroti na, 'Re ihâimana u'âsi mono nhimiroti si, da te 're 'madâ'â pese za'ra mono da oto.

Luca 11:42

— Farizeu norĩ, a norĩ wa'aba ma, aima 're ropipa uptabi za'ra wa'aba mono di za. Ma tô asimiromhuri wa'â hã 'Re ihâimana u'âsi mono ma, 're ipo'o u'âsi za'ra wa'aba mo, wesuirã zapore wa'â hã, suru na tãma 're sõmri za'ra wa'aba mono da. Uburé danhipi wazarizé wa'â hã tãma 're po'o nhimini za'ra wa'aba mono õ di. Ta hã, wẽ di. Tazahã, isimarĩ'õ norĩ ma, 're asõprub za'ra wa'aba mono õ di. Duré 'Re ihâimana u'âsi mono, 're sawi pese za'ra wa'aba mono õ di. Ma tô tãma 're asõprub za'ra wa'aba mo. Ibâre aré isimarĩ'õ norĩ ma, 're asõprub za'ra wa'aba mono 'wa'âhã. Tazahã, ma tô 're i'mararé za'ra wa'aba mo. Tahawa, niwapsi aima 're robze za'ra wa'aba mono õ di za.

Luca 9:48

Te duré tãma nharĩ za'ra, ãne: — Ni'wam norĩ hã te te 're ĩzawi pese za'ra mono wa, ai'uté zô 're tob'uzu za'ra mono wamhã, ta norĩ u'âbâ te duré ĩzô 're tob'uzu za'ra. Tawamhã e ĩzô si te 're tob'uzu za'ra. Mare di. We ĩzatõrĩ'wa zô zama te duré sô 're tob'uzu za'ra. Dama iwapu norĩ hã 're sawi pese za'ra wa'aba mono wamhã, asima ai'maipire zô asõpré wa'aba ãna, wa za aipire na te 're ai'awaihu'u 'wa.

Zezusihi zadawa wasuꞌuꞌwa norĩ nhimiromhuri na robꞌuiꞌéré 1:1

Teofilu, wa hã Luca, ĩnhimi'ui'éré 'rata na wa tô aima rob'ui'éré pa, Zezusi 're imorĩzém na. Ti'ai ãma 're morĩ ré hã ma tô te te 're da'apawapto. Ma tô duré te te dama 're arowahutu. Isãna'rata hawimhã, i'rãsutu u wa tô aima ãma rob'ui'éré. Hâiwa u imorĩzé wasu'u na wa tô duré ãma aima rob'ui'éré pa. Tawamhã hâiwa u morĩ õ ré, ma tô tizadawa wasu'u'wa norĩ ma rob'ru za'ra, te te sima iwẽ za'ra zéb uwaibaba, sô ihârâ za'ra norĩ ma. 'Re ihâimana u'âsi mono pẽ'ẽzani ré, 're morĩ wa, ma tô isadawa para tãma rob'ru za'ra, te te duré ãma 're dapawaptob za'ra mono da, duré iwasu'uwẽ te te dama 're wasu'u za'ra mono da, isine. Ãhã na wa za duré aima rob'ui'éré, hâiwa u morĩ za'u si, te te 're ipawaptob za'ra mono zé wasu'u na hã.

Roma 3:8

Taha zarina te duré te te sima 're nharĩ za'ra: “Wawasété si, wa za tô wa te 're 'manharĩ u'âsi za'ra, 'Re ihâimana u'âsi mono si iwẽ uptabi na, da te dasiwi 're waihu'u za'ra mono da.” Ni'wam norĩ hã ma tô ãne na ĩnhimiroti wasédé hã ĩ'ãma sa'ra, ĩsi'uihâ na ãne hã te ãma waihu'u za'ra newa. Ma tô ĩ'ãma wasété za'ra. Tahawa, te za 'Re ihâimana u'âsi mono hã ta norĩ si siwi wẽ'õ pese za'ra, i'uwaibaba.

Roma 6:1

'Re ihâimana u'âsi mono hã, simizawi pese uptabi di. Te wa'ãma 're pẽ'ẽzé u'âsi. Tahawa, wawasédé hã wa te 're 'manharĩ za'ra mono nherẽ, tinhimizawizé hã te te wawi 're azawi mono õ di. Wawasédé, wa te 're i'manharĩ za'ra mono zé hã, te duré te te wama 're apari. E tawamhã, wawasédé, wa te 're i'manharĩ za'ra mono zé hã te te wama 're apari mono nherẽ, wa za bété wawasédé hã duré apâ wa te 're 'manharĩ u'âsi za'ra, apâ te te duré wama 're apari zahu mono da. E taha da, wa za wawasété u'âsi 're wahâimana za'ra.

Roma 6:15

Tawamhã ãté ãne te za asima 're inharĩ za'ra wa'aba mo: “'Re ihâimana u'âsi mono nhimiroti na Mozési te te irob'ui'érézé hã wa te 're i'madâ'â pese za'ra mono zéb zarina, te te sima wa'ãma 're aroti mono õ di, taha zarina wawasédé hã te te oto wa'ãma 're ab'madâ'â tõ mono da, taha zarina te te 're wa'awẽsãmri mono da. Tinhimizawi pese zéb zarina si, ma tô te te 're wa'awẽsãmri, wawasété na 're wahâimana za'ra mono nherẽ, wa'ãma 're pẽ'ẽzé za'ra mono wa. Tahawa, wa za wawasédé hã duré apâ wa te 're 'manharĩ u'âsi za'ra õne u'â, 'Re ihâimana u'âsi mono hã dawasété nherẽ, simizawi pese wa.” Ãne na asima 're rosa'rata za'ra wa'aba mono õ di za. Tô'ã.

1 Timotiu 6:11

A hã 'Re ihâimana u'âsi mono ma romhuri'wa. Tahawa, ta norĩ ne 're aimorĩ õ di za. Te za 're aihâimana wẽ u'âsi mo, 'Re ihâimana u'âsi mono nhimiroti zarina si. Õhõ si te za 're i'madâ'â pese mo, 'Re ihâimana u'âsi mono si, ai'ãma 're siwãrĩ u'âsi mono da. Te za duré 're ida'azawi pese mo. Rowasédé hã taré da te aima 're 'manharĩ za'ra mono nherẽ, asiptete sina te za Wanhib'apito ãma 're aimorĩ u'â. Atoi u'âsi te za duré 're aimo. Taha na si 're aimorĩ da, te za asina 're i'madâ'â u'âsi mo.

Titu 3:8

Te aima irowasu'uzé hã tô sena. Tahawa, te za isazei'wa norĩ ma 're i'aroti mo, marĩ wẽ na te te 're dapawaptob u'âsi za'ra mono da. Te aima 're irowasu'u mono zé hã wẽ uptabi di, dama 're irowẽ za'ra mono zéb da hã.

1 Pedru 5:4

Tawamhã Da'madâ'â'wai uptabi hã apâ wei morĩ wapsi, tãma 're idapawapto wẽ za'ra wa'aba mono zé wa'rãmi, te za oto aima wa'âbâ za'ra wa'wa, iwẽ uptabi na, si'utõrĩ'õ na oto aima 're hâimana u'âsi za'ra wa'aba mono da.

1 Zuwã 3:4

E marĩ na tawamhã, 're idawasété za'ra mono zé hã. 'Re ihâimana u'âsi mono nhimiroti, da te dasiwi 're wẽ'õ pese za'ra mono wamhã, ta hã dawasédé. Tahawa, ni'wam norĩ hã 're wasété za'ra mono wamhã, ta norĩ te 'Re ihâimana u'âsi mono nhimiroti te te siwi 're wẽ'õ za'ra, 'râwi.

Apocalipsi 2:20

Tane nherẽ, marĩ hã misi te ĩwi ro'wa'ré, te ai'ãma iwaihu'u za'ra wa'wa hã. Pi'õ iwasédé hã te ai'rata 're hâimana za'ra wa'wa, Zézabéu na isisi hã. Ta hã 'Re ihâimana u'âsi mono zadawa 'mahârâ'wa na te dama 're siwasu'u, taré. Ãne dama 're siwasu'u mono nherẽ, te ĩzazei'wa norĩ ma, simiroti wasété na te te 're roti. Taha zarina, te ta norĩ hã pi'õ aimawi na mro ré nherẽ, ãma dawi 're simisaihuri za'ra. Duré pi'õ, mro ré nherẽ, aibâ aimawi na te ãma dawi 're simisaihuri za'ra. Duré romhâiba 'manharĩ ãma 'Re ihâimana u'âsi mono upana 're dawata za'ra mono da, danhimizama da te tãma 're isõmri za'ra mono hã te duré te te 're huri. Ta hã, pi'õ hã e niha te simiroti wasété nherẽ, ai'rata 're hâimana za'ra wa'wa. E asiwi wẽ'õ za'ra wa'aba ãna.

1 Samuéu 2:30

Wa hã Izaraéu nhihudu norĩ te, 'Re ihâimana u'âsi mono Uburé Danhib'apito hã wa tô ropisutu duréihã aihi'rata norĩ ma hã za isihudu norĩ hã õne u'â te te ĩma 're iromhuri za'ra mono na hã sasedoti na. Tane nherẽ, ãhã na hã wa za tinha, õne u'â 're ihâimana mono õ na hã za oto. E marĩ wa. Wa hã za oto te 're da'awazé mono dâ'âsina, da te 're ĩwazéb za'ra mono norĩ hã, duré za oto te 're da'awazé mono õ dâ'âsina, da te 're ĩwazéb za'ra mono õ norĩ hã.