Mateu 5:12 - ꞌRe Ihâimana Uꞌâsi Mono Zadawa Wasuꞌu12 Tahawa, ma'ãpé atoi u'âsi, ãma 're anomro aba mono za. 'Re ihâimana u'âsi mono hã te za marĩ iwẽ hã sa'ẽtẽ na te te aima 're sõmri za'ra wa'wa, hâiwa ãma asô 're isimi'wara aba mono hã. Duréihã 'Re ihâimana u'âsi mono zadawa 'mahârâ 'rata 'wa norĩ ma, ma tô da te tãma 're rob'manharĩ u'âsi za'ra, da te aima 're irob'manharĩ wasété za'ra wa'aba mono ne. — Ãne na ma tô Zezusi hã tãma waihu'u siromo za'ra romhâ ré, te te waihu'u zara da. အခန်းကိုကြည့်ပါ။ |
Mateu 5:12
51 ပူးပေါင်းရင်းမြစ်များ
“Tane nherẽ, tipo're'õ zarina ma tô duré apâ asib'a'uwẽ norĩ hã aiwi 're sipizari za'ra. Ma tô duré asimiroti na rob'ui'éré wi, ba niwĩmhã tiwi 're sipizari za'ra. Ma tô duré asadawa 'mahârâ'wa norĩ hã te te siwi 're simro, apâ atẽme 're sipizari za'ra mono da, te te ãma 're ipo're pu'u za'ra mono hã. Ma tô duré asib'a'uwẽ norĩ hã te te ai'ãma 're wasété zahu ahâ za'ra.
— 'Re ihâimana u'âsi mono ma, 're aimreme zusi aba mono da, asai ãna a'â 're aihâimana za'ra wa'aba mono wamhã, ai'ubu zei õre na hã 're aihâimana za'ra wa'aba mono õ di za. Ni'wam norĩ si te za ubu toi ãna sai ãna 're mreme zusi, 're nomro wẽ mono newa, da te 're 'madâ'â wẽ za'ra mono da. Tawamhã da te 're 'madâ'â wẽ za'ra mono wa, ãma 're dawata za'ra mono wamhã, taha si te za tô tãma 're hâimana za'ra. Nimahã na 'Re ihâimana u'âsi mono nhoprubzé hã tãma 're hâimana za'ra mono õ di za, ta norĩ ma hã. Tô sena wa ãne na hã aima waihu'u siromo za'ra wa'wa.
— Zeruzalẽ ãma 're ai'ubumroi wa'aba mono norĩ ãma, ai'ãma ĩpẽ'ẽzé za'ra wa'aba di. Aihi'rata norĩ wa'wa hã ma tô 'Re ihâimana u'âsi mono zadawa 'mahârâ 'rata 'wa norĩ hã te te 're simroi u'âsi, ẽtẽ na. Datẽme te te 're isatõrĩ za'ra mono norĩ zama, ma tô duré te te 're simroi u'âsi, ẽtẽ na. Si'a hã ti'ra zawi te, 're ipapo za'ra mono ne, wa aré te ĩsima 're aiwẽ u'âsi za'ra wa'wa, ĩsitẽme te 're ai'awaibui wa'aba mono da. Tane nherẽ, asima 're ĩwẽ za'ra wa'aba mono õ di asa.
Rowẽ te, te za 're asarõtõ za'ra wa'aba mo. A norĩ wa'aba ma si, rowasédé hã da te aima 're 'manharĩ za'ra wa'aba mono õ di za. E marĩ wa. Ihi'rata za'ra norĩ hã ma tô ãne hã rowasédé hã, 'Re ihâimana u'âsi mono zadawa 'mahârâ 'rata 'wa norĩ ma hã te te 're 'manharĩ za'ra. Tahawa, da te 're ai'ruiwapari za'ra wa'aba mono nherẽ, aima 're rowẽ za'ra wa'aba mono di za. Niwapsi, 'Re ihâimana u'âsi mono, te za marĩ iwẽ hã te te aima 're sõmri za'ra wa'wa, hâiwa ãma asô 're isimi'wara aba mono hã. Tahawa, aima 're rowẽ za'ra wa'aba mono di za. — Ãne romhâ ré ma tô tãma waihu'u siromo za'ra, tisiré 're inomro mono norĩ ma hã.
Dawasété na 're idanomro mono ne, 're anomro aba mono õ di za. Uburé te za 're idazawi pese za'ra wa'aba mo. Asitob'ru norĩ zama, te za 're isawi pese za'ra wa'aba mo. Uburé te za marĩ hã tãma 're i'manharĩ wẽ za'ra wa'aba mo. Ãté marĩ hã te za da te aiwi 're waptẽrẽ za'ra wa'wa, suru na a'â dama 're sõmri za'ra wa'aba mono da. Tawamhã te za dama 're isõmri za'ra wa'aba mo. Iwa'rãmib zô 're asimnhasi za'ra wa'aba mono õ di za. Ãne wamhã, te za iwẽ na te te 're asawi za'ra wa'wa, 'Re ihâimana u'âsi mono hã. I'ra te za 're aihâimana za'ra wa'aba mo, danhipai u ipire uptabi 'ra na. Marĩ wẽ na, uburé te dama 're sõpru. Isõprum na ãma 're idawata za'ra mono õ norĩ ma zama, te dama 're sõpru. Dawasété na 're idanomro mono ma zama, te uburé 're sõpru.
Duré Cristuhu zazei'wa, 're wanomro mono 'ru te, da te wama 're rob'manharĩ za'ra mono wa, wa te 're robzépata za'ra mono ré, wa za watoi u'âsi 're wahâimana za'ra, wa te 're irobzépata za'ra mono zéb zarina, õhõ ãma si wanhiptete sina 're iwahâimana za'ra mono zéb da hã, wa te wasima ãma 're sa'ẽtẽ za'ra mono wa. Ãne hã wa te wasina 're waihu'u pese za'ra mono wa, wa za watoi u'âsi 're wahâimana za'ra.
Robzuri'wa norĩ hã robdi'i'wa norĩ me, tãma 're iro'wanhipré za'ra mono da si, te aiwa misi haré siré te te 're romhuri za'ra. Tane duré, wa hã iwasu'uwẽ na te aima 're rowasu'u 'rata za'ra wa'aba mono wamhã, duré Apolu hã ĩza'u te te aima ãma 're rowasu'u za'ra wa'aba mono wamhã, aiwa wa tô wa zahuré, wa te wasima 're aiwẽ za'ra wa'wa, iwasu'uwẽ hã 're waihu'u pese za'ra wa'aba mono da. 'Re ihâimana u'âsi mono ma si, wa wa zahuré, wa te tãma 're romhuri, aiwa. Tahawa, wa te tãma 're iromhuri mono zéb zarina, te za 'Re ihâimana u'âsi mono hã wapawa'â, iwẽ uptabi na. Duré daburu hã, e 'wa te hã. E ãma iromhuri'wa norĩ te hã, buru hã. Mare di. Misire te itede'wa na 're hâimana, buru tede'wa hã. Tane duré, a norĩ wa'wa hã ĩnhib'a'uwẽ, 're anomro aba mono õ di. Duré Apoluhu nhib'a'uwẽ, 're anomro aba mono õ di. Mare di. 'Re ihâimana u'âsi mono nhib'a'uwẽ si, te oto 're aihâimana za'ra wa'aba mo. Ãne wa za duré aima ãma romnhimiré'é za'ra wa'wa, 'ri na. 'Ri hã 'ri'wa norĩ tei õ di. 'Ri tede'wa te, 'ri hã. Tane, a norĩ wa'wa hã wanhib'a'uwẽ, 're anomro aba mono õ di, iwasu'uwẽ na, wa te aima 're rowasu'u za'ra wa'aba mono nherẽ. E marĩ wa. 'Re ihâimana u'âsi mono nhib'a'uwẽ si, oto 're anomro aba mono wa.
Ti'ab ré, wa za tô wa te 're robzépata a'â. Tane nherẽ, ta hã wama wapure di. E marĩ wa. Taha wa'rãmi, te za 'Re ihâimana u'âsi mono iwẽ uptabi na hã duré ipire uptabi na hã te te wama 're wa'âbâ, isi'utõrĩ'õ na. Ti'ab ré, wa te 're robzépata za'ẽtẽ mono nherẽ, taha nhipai u wẽ uptabi di za, iwẽ na te te wama iropisutu siromo zé hã.
Sasedoti norĩ hã 'Re ihâimana u'âsi mono ma, da'ãma romhuri'wa norĩ hã danhimizama na tãma danhoprubzé te te tãma 're izata za'ra mono ne, ma tô a norĩ wa'wa hã tãma 're asisõmri u'âsi za'ra wa'aba mo, tiwi 're asisawi za'ra wa'aba mono ãna, asina 're i'umnhasi za'ra wa'aba mono zéb zarina. Duré sasedoti norĩ hã uwa 'rãi wa'u isé hã, 'Re ihâimana u'âsi mono ma danhoprubzé, danhimizama te te tãma 're izata za'ra mono nhisiwi, te te 're isa'wari za'ra mono ne, ãté ĩwapru hã wa za sa'wa, sena na za da te dasiwi ĩwĩrĩ wamhã, ĩdâ'âzém na 'Re ihâimana u'âsi mono ma, ĩsina ĩnhoprubzéb da. Ãne na za ĩma romhâimana nherẽ, ĩma rowẽ uptabi di za. Duré aima ĩtoi uptabi za'ra wa'aba di za, ãne na ĩma romhâimana nherẽ.
Wa hã ai'udâna za'ra wa'aba, te ai'ãma 're robzépata za'ra wa'aba mono nherẽ, wa ĩto sina 're ĩhâimana. Cristuhu ma si, te 're romhuri mono wa, wa tô te 're robzépata za'ẽtẽ tô, ta hã ti'ai ãma 're morĩ ré, dazada te te irobzépata ne. Tane nherẽ, Cristuhu nhib'a'uwẽ norĩ ma, ĩnhimiromhuri na te tãma ãma 're uwaimrami mono da, wa za tô taha na te 're robzépata u'âsi.
Aipawa'âbâ aba zé hã hâiwa ãma asô 're isimi'wara aba mono hã, Wanhib'apito hã za te te aima isõmri za'ra wa'aba na asina waihu'u siromo za'ra wa'aba wa, te za ãne hã tô sena ti'ai ãma asib'apito norĩ ma 're iromhuri wẽ u'âsi za'ra wa'aba mo. Tane nherẽ, ta norĩ ma si 're romhuri za'ra wa'aba mono õ di. Ta norĩ u'âbâ, te Wanhib'apito Cristuhu ma zama 're iromhuri za'ra wa'aba mo, ta hã Wanhib'apito uptabi wama 're hâimana mono wa.
Duréihã, zudeu norĩ hã ma tô te te 're simro, 'Re ihâimana u'âsi mono zadawa 'mahârâ 'rata 'wa norĩ hã. Duré, ãhã na zama isihudu norĩ hã ihi'rata norĩ hã te te 're irob'manharĩ za'ra mono zéb zarina, ma tô siwi tiwĩ, Wanhib'apito Zezusi hã. Ma tô duré te te wa'ãma 're rowasété za'ra, iwasu'uwẽ hã wa te dama 're wasu'u za'ra mono tõ da. Ma tô sisiti siwi wazatõrĩ za'ra, isiti wasi'aba'ré da. Ma tô duré uburé da'ãma tinhitob'ru za'ra. Tahawa, 'Re ihâimana u'âsi mono ma, wẽ õ di, 're ihâimana za'ra mono zé hã.
Dazazéb 're, 're ihâimana za'ra mono norĩ ãma 're aipẽ'ẽzé za'ra wa'aba mono zéb zarina, ma tô ta norĩ me aipẽ'ẽ na 're irobzépata za'ra wa'aba mo, ihâiba zu. Duré asibro hã da te aiwi 're waibui wa'aba mono nherẽ, ma tô ato sina 're aihâimana za'ra wa'aba mo. Aiwi 're robzei'õ za'ra wa'aba mono õ di, taha na hã. E marĩ wa. Ti'ai ãma asibrom nhipai u, hâiwa ãma iwẽ uptabi hã isi'utõrĩ'õ hã za aima 're ihâimana za'ra wa'aba mono na hã aima waihu'u pese za'ra wa'aba wa.
Apito Fara'oho nhorõwa ãma 're sãmra u'âsi mono 'wa'âhã, te aré marĩ iwa'âbâ za'ẽtẽ na tinhibro pese, Ezitu ãma uburé marĩ hã iwa'âbâ za'ẽne hã 're isimi'wara mono na. Ta hã marĩ wa'âbâ za'ẽtẽ mono hã wẽ nherẽ, taha upana marĩ iwẽ uptabi si ma tô sima wẽ, Mozési hã. Danho'reptui'wa da, 'Re ihâimana u'âsi mono te te ipisutu ma si, te te 're robzépata mono da si, ma tô sima wẽ pese. Iwẽ hã 'Re ihâimana u'âsi mono, niwa za te te tãma isõmri na si, ma tô te te ãma 're rosa'rata u'âsi, Mozési hã.
Ta norĩ hã 'Re ihâimana u'âsi mono si te te sina 're i'umnhasi za'ra mono zéb zarina, ma tô te te da'ãma 're ai'uté za'ra, 'Re ihâimana u'âsi mono zadawa para, daro hã te te dawi 're waibui mono da. Ta norĩ hã iwẽ si te te 're 'manharĩ u'âsi za'ra mono wa, ma tô iwẽ uptabi hã te te sima 're waibu, 'Re ihâimana u'âsi mono te te tãma iropisutu za'ra zéb zarina. Duré hu'u zérépa hã ma tô te te 're sadai'ré nhitob za'ra tinhib'rata na, te te 're simro tõ mono da.
Ni'wam norĩ hã 'Re ihâimana u'âsi mono te te sina 're umnhasi za'ra mono õ nherẽ, ta norĩ ma hã, 're toi mono õ di za, 'Re ihâimana u'âsi mono hã. Duré ni'wam norĩ hã 'Re ihâimana u'âsi mono ãma 're wata za'ra mono da, tipẽ'ẽ na 'râwi itẽme 're sihutu mono da, te te sima 're wẽ za'ra mono wamhã, tô sena 're ihâimana mono na, te za te te 're saze za'ra a'â. Duré 'Re ihâimana u'âsi mono zô si 're isõpré mono norĩ ma, iwẽ na za te te ta norĩ ma iwa'âbâ za'ra na, te za ta norĩ hã te te sina 're umnhasi u'âsi za'ra.
ကြော်ငြာတွေ