Mateu 4:4 - ꞌRe Ihâimana Uꞌâsi Mono Zadawa Wasuꞌu

⁴ Tawamhã Zezusi asa te tãma tinha, ãne: — 'Re ihâimana u'âsi mono mreme na rob'ui'éré hã ãne: “Dasa na si 're danhiptete za'ra mono õ di za. 'Re ihâimana u'âsi mono te te dama 're i'awaihu'u mono zém na zama, te za duré 're danhiptete za'ra.”

Mateu 4:4 ပူးပေါင်းရင်းမြစ်များ

Ezodu 16:15

Izaraéu nhihudu norĩ ã hã te te 'madâ'â za'ra wamhã, te te waihu'u za'ra õ di marĩ hã. Tahawa, te ãma sisada nharĩ za'ra ãne: — E marĩ. Tawamhã Mozési te ãma tãma rowasu'u za'ra ãne: — Ã hã dasa huri aba da, Uburé Danhib'apito we te te aima isõmri za'ra wa'wa.

Ezodu 16:35

Izaraéu nhihudu norĩ hã 40 na wahub 're, ma tô mana hã te te 're huri, ti'ai wa, 're idahâimana siromo za'ra mono 're isihutuzéb u, Cana'ã ti'a zada'ré ãma u.

Ezodu 16:8

Tawamhã te zahadu Mozési dama tinha ãne: — Uburé Danhib'apito, te za hâiwahâ sidâpâsi romnhi 're ihuri aba mono da hã te te aima 're sõmri za'ra wa'wa, duré mararé sidâpâsi i'u'ẽtẽ wapu asima iwẽ na 're ihuri aba mono da zama. E marĩ wa. Uburé Danhib'apito zada, aihâimana za'ra wa'aba wa, i'aiwapsari za'ra wa'aba zé hã te te wapari wa. Wazada hã aihâimana za'ra wa'aba õ di. Õhõ zada aihâimana za'ra wa'aba wa, ma tô tãma aiwapsari za'ra wa'wa. E marĩ 'manharĩ'wa pâ bété wa norĩ hã wama i'aiwapsari za'ra wa'aba da hã.

Mateu 15:11

Uburé marĩ na 're dasaihuri mono wa, dapẽ'ẽ 're, 're isisisi mono na 'râwi dapẽ'ẽ 'remhã 're dasiwasété za'ra mono õ di za. Dapẽ'ẽ hawim na danhimirosa'rata wasété zarina, da te dasima 're nharĩ wasété za'ra mono wapsi, te za 'râwi dapẽ'ẽ 'remhã 're dasiwasété za'ra.

Mateu 4:10

Tawamhã Zezusi te asa tãma tinha ãne: — Satanasi, mo oto ĩnhiti aimorĩ. 'Re ihâimana u'âsi mono zadawa 'mahârâ'wa, ma tô ãne rob'ui'éré: “Uburé Danhib'apito uptabi ãma si, te za 're aiwata za'ra wa'aba mo, 'Re ihâimana u'âsi mono ãma si. Taha ma si te za 're iromhuri za'ra wa'aba mo, Asib'apito za'ra wa'aba ma si.” Ãne imreme na rob'ui'éré, ibaihâ na hã. — Ãne te rob'ui'éré 'rada hã tãma 'rãzarõtõ Zezusi hã, Satanasihi ma.

Mateu 4:7

Tawamhã Zezusi hã te asa tãma tinha: — Mare di. “Asib'apito za'ra wa'wa hã, 'Re ihâimana u'âsi mono hã marĩ hã te te aima 're pisutu za'ra wa'aba mono õ nherẽ, 're pibu za'ra wa'aba mono õ di za, te te 're aipawaptob za'ra wa'aba mono zô.” Ãne duré imreme na rob'ui'éré, ibaihâ na hã.

Marcu 7:20

Ãne ma duré tãma waihu'u za'ra: — Dapẽ'ẽ hawi, da te 're isani za'ra mono na si, te za 'râwi 're dasiwasété za'ra. Dapẽ'ẽ 're, danhimirosa'rata wasété hawim na si, te dawasédé hã uburé da te 're 'manharĩ za'ra, marĩ na danhipsaihuri hã, duré dasipãrĩ hã, duré dasina danhipsaihuri hã, duré danhibrom na da'ruiwapari hã, duré dawasété 'manharĩ hã, duré dazadawa nhipe hã, duré marĩ na danhiminho'ru hã, duré danhisi wasédé hã, duré marĩ na 'râwi dasina dawada hã, duré 'râwi dawasété na 're idasisãmri za'ra mono õ zém na hã.

Luca 4:12

Tawamhã Zezusi te asa tãma tinha, ãne: — Mare di. “Asib'apito za'ra wa'wa hã 'Re ihâimana u'âsi mono hã, marĩ hã te te aima 're pisutu za'ra wa'aba mono õ nherẽ, 're pibu za'ra wa'aba mono õ di za, ta hã te te 're aipawaptob za'ra wa'aba mono zô.” Ãne imreme na rob'ui'éré hã.

Luca 4:4

Tawamhã Zezusi te asa tãma tinha, ãne: — 'Re ihâimana u'âsi mono mreme na rob'ui'éré, ãne: “Dasa na si 're danhiptete za'ra mono õ di za.”

Luca 4:8

Tahawa, te Zezusi hã asa tãma tinha, ãne: — Mare di. 'Re ihâimana u'âsi mono zadawa 'mahârâ'wa, ma tô ãne rob'ui'éré, ibaihâ na hã: “Uburé Danhib'apito uptabi ãma si, te za 're aiwata za'ra wa'aba mo, 'Re ihâimana u'âsi mono ãma si. Taha ma si, te za 're iromhuri za'ra wa'aba mo, Asib'apito za'ra wa'aba ma si.” Ãne imreme na rob'ui'éré hã.

Zuwã 15:26

— Zahadu wapsi wa za we atẽme satõrĩ za'ra wa'wa, Ĩmama pẽ'ẽzani hã, aipawaptob za'ra wa'aba 'wa da hã. Tô sena uptabi isimirowasu'u hã. Ĩmama hawi te za we atẽme timorĩ za'ra wa'wa, ĩnhimiroti na te te 're aipawaptob u'âsi za'ra wa'aba mono da.

Zuwã 6:63

'Re ihâimana u'âsi mono pẽ'ẽzani si te za te te dama 're anhomri, dadâ'â ãna 're idahâimana u'âsi za'ra mono zé hã. Dasi'uihâ na da te dasina 're uwaimrami za'ra mono õ di za. Marĩ na te aima 're irowasu'u za'ra wa'aba mono zéb zarina, te za Ipẽ'ẽzani hã te te dama 're anhomri, 're idahâimana u'âsi za'ra mono zéb da hã.

Roma 15:4

Uburé 'Re ihâimana u'âsi mono nhimiroti 'rata na rob'ui'éré hã, e taré ma tô tinhimiroti hã te te dama 're apisutu, da te ãma 're irob'ui'éré za'ra mono zéb da hã. Mare di. Taré te te dama 're apisutu mono õ di. Isimiroti hã wa te 're waihu'u pese za'ra mono da, ma tô ãne hã te te dama 're apisutu. 'Re ihâimana u'âsi mono nhimiroti 'rata na rob'ui'éré hã wa te 're sõré u'âsi za'ra mono wamhã, wanhiptete sina wa za ãma 're wahâimana u'âsi za'ra, marĩ na uburé wa te 're robzépata za'ra mono nherẽ. Wa te 're sõré u'âsi za'ra mono wamhã, te za wama 're rowẽ za'ra, wawi 're robzei'õ za'ra mono ãna, 're iwahâimana za'ra mono zéb da hã. Õhõ umnhasi sina, wa za tô ãhã zarina si 're wahâimana za'ra, 'Re ihâimana u'âsi mono 'rata 're iwahâimana u'âsi za'ra mono zéb zô, wasina 're wanhimipari za'ra mono sina.

Éfézu 6:17

Da'rãzaza itete na te za 're asi'rãzaza za'ra wa'aba mo. Da'rãzaza itede hã wanho'reptuzé, te duré ta hã wasu'u. Duré sib'ézé 'wa pa hã te za asiré 're i'wasari u'âsi aba mo. Sib'ézé 'wa pa hã 'Re ihâimana u'âsi mono zadawa wasu'u, te duré ta hã wasu'u, Ipẽ'ẽzani te te wama 're awaihu'u mono da, isimiroti hã.