Mateu 4:25 - ꞌRe Ihâimana Uꞌâsi Mono Zadawa Wasuꞌu

²⁵ Tahawa, ma tô da'ahâ uptabi na isarina dasi'ré, Galiléa hawimhã, duré Decapori hawimhã, duré Zeruzalẽ hawimhã, duré Zudéa na danhipti'a nho'õmo nhisi hawimhã. Duré Zodã pa zara niwĩ 're idasi'ubumroi mono norĩ zama ma tô itẽme hã dasito.

Mateu 4:25 ပူးပေါင်းရင်းမြစ်များ

Mateu 12:15

Tawamhã Zezusi hã ma tô sina waihu'u, farizeu norĩ te te sima ãma iroti za'ra zé hã te te siwi wĩrĩ da. Tahawa, ma tô ihawi timorĩ za'ra. Ihawi morĩ za'ra wamhã, da'ahâ na ma tô isarina ai'aba'ré ni. Tawamhã daro mono bâ 're morĩ ré, ma tô uburé dahâzé ré idahâimana za'ra hã da'apese, Zezusi hã.

Mateu 19:2

Taha wamhã, da'ahâ uptabi na te isarina hã ai'aba'ré ni. Tawamhã Zudéa u wisi wamhã, ma tô tame ihâzé ré norĩ hã apese.

Mateu 4:15

“Zébulõhõ nhihudu norĩ nhipti'ai ãma 're idahâimana za'ra mono norĩ hã, duré Naftalihi nhihudu norĩ nhipti'ai ãma zama, isõ'u tẽme bâdâdi wa, 're idahâimana za'ra mono norĩ hã, Zodã na pa nhisi zara niwĩ 're idahâimana za'ra mono hã, Galiléa ãma zudeu'õ norĩ dawazari 're ihâimana za'ra mono norĩ hã,

Mateu 5:1

Tawamhã Zezusi hã da'ahâ uptabi na te te da'madâ'â wamhã, ẽtẽ 'rãihâ na ma tô sai'u, tame a'â sãmra da. Tawamhã isiré 're inomro mono norĩ hã ma tô 'râwi itẽme ubumro.

Mateu 8:1

Tawamhã Zezusi hã ma tô ẽtẽ 'rãihâ hawi si'ra. Te te si'rai wamhã, da'ahâ uptabi na ma tô isarina ai'aba'ré ni.

Marcu 5:20

Tawamhã te oto mo, aibâ hã. Zezusi, iwẽ na te te ipawaptobzém na, ma tô te te dama 're rowasu'u, Decapori na danhipti'a nho'õmo nhisi 're. Tawamhã isimirowasu'u na da te 're wapari za'ra mono wamhã, ma tô ãma 're datob'uzu za'ra.

Marcu 6:2

Tawamhã datẽme sihutu wamhã, zudeu norĩ te, romhuri zahârizém na te oto dama rowahutu, sabadu na, rowahutuzéb ãma. Da'ahâ na da te wapari za'ra wamhã, ma tô ãma tatob'uzu za'ra ni, isimirowasu'u na hã. Ãne te duré ãma tasisadanharĩ za'ra ni: — Pra. E ma hawimhã, ma uburé marĩ hã awaihu'u, waihu'u pese na, te te dama 're irowasu'u mono da hã. E niha bété õhõ ma si waihu'u pese di, marĩ dama i'manharĩ waihu'u'õ te te dama 're i'ab'manharĩ wẽ mono zéb da hã. Õ hã wede'é na romhuri'wa, Mariaha 'ra. Ino norĩ hã Tiagu, duré Zuzé, duré Zuda, duré Sima. Ihidiba norĩ hã te duré wa'rata 're hâimana za'ra. Ãne wa, Zezusihi zô datob'uzu za'ra õ di, dama waihu'u pese wa, ãne na hã. Tahawa, ma ãne dama waihu'u, Zezusi hã: — 'Re ihâimana u'âsi mono zadawa 'mahârâ'wa norĩ hã daro mono bâ datẽme 're nomro mono wamhã, isimiroti na wazép sina, te za sô 're datob'uzu za'ra. Isipti'ai ãma si sô 're datob'uzu za'ra mono õ di za, isipti'ai ãma wa. Isisãnawã norĩ zama, sô 're tob'uzu za'ra mono õ di za, isõrõwa ãma isiré 're idahâimana za'ra mono norĩ zama.

Marcu 7:31

Tawamhã Zezusi norĩ hã Tiru 'rata, hâimana za'ra pari, ma tô ai'aba'ré. Sidõ na daza'ru nhisi wa'wai baba, ma tô ro'rahâri za'ra. Duré Decapori na danhipti'a nho'õmo nhisi wa'wai baba, ma tô ro'rahâri za'ra, 10 na daza'ru wa'wai baba. Tawamhã Galiléa ãma â zaihâ u, ma tô aihutu, isõ'ui u.

Luca 6:17

Tawamhã Zezusi norĩ hã ma tô sa'a hawi si'ra za'ra. Tawamhã ti'ai haré u sihutu õ ré, te a'â nhamra, sõnhihâpâ ãma, tizazei'wa norĩ me. Isazei'wa norĩ hã ahâ di. Tame duré da'ahâ uptabi na, te sô ai'ubumro ni. Daro mono bâ, ma tô iwana sô tasi'rã'õtõ ni, Zudéa na danhipti'a nho'õmo nhisi hawi, duré Zeruzalẽ hawi, duré Tiru na 'ri nho'õmo nhisi hawi, duré Sidõ hawib zama. Â zaihâ na Tiru hã, duré Sidõ, 'ri nho'u hã.

Luca 6:19

Simipese waihu'u pese wa, ma tô dasima wẽ za'ra ni, danhib'rata na da te upi za'ra da, rowẽ na oto 're dasi'ubumroi mono da.