Mateu 26:55 - ꞌRe Ihâimana Uꞌâsi Mono Zadawa Wasuꞌu

⁵⁵ Tawamhã Zezusi hã te oto dama rowasu'u, ãne: — E wa hã danhibrob zô dapãrĩ'wa pâ, ma te bété we ĩzô aihutu 'wa, sib'ézé 'wapa ré, duré uibroi ré zama. Bâtâ sidâpâsi wa tô asõ'a za'ra wa'aba 're ĩsimasisi, 'Re ihâimana u'âsi mono nhorõwa ãma 'ri 'wawi wa'ra 're, te dama 're rowahutu mono da. Oro zapre bété, tameb ré asiwi ĩ'âri aba õ di.

Mateu 26:55 ပူးပေါင်းရင်းမြစ်များ

Mateu 21:23

Tawamhã Zezusi hã ma tô apâ mo, 'Re ihâimana u'âsi mono nhorõwa 'ri u. Tame te oto dama rowahutu, 'ri 'wawi wa'ra 're. Tawamhã sasedoti ipire norĩ hã ma tô itẽme aimasa, zudeu norĩ ma roti'wa norĩ zama. Tawamhã Zezusi hã te siwi sadanha, ãne: — E 'wa sadawa para, te bété ãne hã marĩ hã dama 're i'ab'manharĩ mo. E 'wa hã, aipisutu'wa.

Mateu 26:47

Tawamhã Zezusi hã zahadu te te rowasu'u ré, ma we Zuda hã sô wi, aré Zezusihi siré 're inomro mono norĩ me 're imorĩ, 12 na ihâiba za'ra siré hã. Da'ahâ na te duré we isiré ai'aba'ré ni, sib'ézé 'wa pa ré, duré uibroi ré zama. Sasedoti ipire norĩ zadawa para te we ai'aba'ré, zudeu norĩ ma roti'wa norĩ zadawa para zama.

Marcu 10:1

Tawamhã Zezusi hã Cafanau hawi te oto mo, Zudéa na danhipti'a nho'õmo nhisi u, morĩ da. Tawamhã Zodã pa zara u, ma tô saprĩ. Te te saprĩ wamhã, da'ahâ uptabi na ma tô duré itẽme dasito. Tahawa, te duré dama rowahutu, te te dama 're irowahutu u'âsi mono zém na, Zezusi hã.

Marcu 12:35

Tawamhã bâtâ na te Zezusi hã dama rowahutu, 'Re ihâimana u'âsi mono nhorõwa 'ri 'wawi, wa'ra 're. Tawamhã te te dama rowahutu ré, te da'mahâ: — E niha rowahutu'wa norĩ hã te te dama 're rowasu'u za'ra, Dawihi nhihudu 're imorĩ na hã, 'Re ihâimana u'âsi mono te te ipisutu na hã Danho'reptui'wa da.

Luca 19:47

Tawamhã bâtâ sidâpâsi, te nasi dama rowasu'u Zezusi hã, 'ri 'wawi wa'ra 're. Ni'wam norĩ hã ma tô Zezusi hã sima 'ru za'ra, te te siwi wĩrĩ da. Ta norĩ hã 'Re ihâimana u'âsi mono ma, da'ãma romhuri'wa ipire norĩ hã, duré isimiroti na rob'ui'éré 'rata na dama rowahutu'wa norĩ hã, duré roti'wa norĩ hã.

Luca 20:1

Nimahã bâtâ na te Zezusi hã nhamra, 'Re ihâimana u'âsi mono nhorõwa 'ri ãma. 'Ri 'wawi wa'ra 're, te nhamra, te te dama rowahutu da, duré iwasu'uwẽ na te te da'apo're pu'u da. Tawamhã aibâ norĩ hã ma itẽme aimasa. Ta norĩ hã sasedoti ipire norĩ hã, duré 'Re ihâimana u'âsi mono nhimiroti 'rata na rob'ui'éré na dama rowahutu'wa norĩ, duré zudeu norĩ ma roti'wa norĩ.

Luca 4:20

Tawamhã te te sõré pari, ma tô apâ sito, ibaihâ hã. Tawamhã apâ ma tô tãma tisõ, dapawapto'wai ma. Taha pari ma tô oto nhamra, te te dama rowasu'u da. Taha wamhã, uburé rowahutuzéb ãma isi'ubumro norĩ hã tãma rĩtĩ si'ré za'ra ãna, ma tô Zezusi hã siwi 'madâ'â pese.

Zuwã 7:14

Tawamhã dasi'rã'õtõ ré, ma tô Zezusi hã wi, 'ri u, 'Re ihâimana u'âsi mono nhorõwa u. 'Ri 'wawi wa'ra 're, te dama rowahutu.

Zuwã 7:28

Tawamhã ma tô sina damreme waihu'u, Zezusi hã. Tahawa, 'ri za'ẽtẽ 'wawi wa'ra 're, zahadu te te dama rowahutu ré, te ãne da'mahâ, mreme 'rãihâ na: — Oro asiwi ĩwaihu'u za'ra wa'aba za. Oro duré ĩza'ru hã aima waihu'u pese za'ra wa'aba za. Tô sena ĩwaihu'u za'ra wa'aba õ di. Ĩza'ru uptabi hã waihu'u za'ra wa'aba õ di duré. Ĩsi'uihâ na we ĩmorĩ õ di. 'Re ihâimana u'âsi mono zadawa para, wa wei mo. Tô sena we ĩzatõrĩ'wa nhimiroti hã te 're hâimana. Tane nherẽ, ta hã asiwi waihu'u za'ra wa'aba õ di.

Zuwã 8:2

Awẽm na hã mararé, ma tô apâ mo 'ri u, 'Re ihâimana u'âsi mono nhorõwa u. Wisi wamhã, 'ri 'wawi wa'ra u, ma tô ãzé. Tamomo da'ahâ na ma tô Zezusihi u ubumro ni. Tawamhã ma tô nhamra, te te dama rowahutu da, Zezusi hã.

Zuwã 8:20

Ãne te tãma rowasu'u za'ra, 'Re ihâimana u'âsi mono nhorõwa ãma, 'ri 'wawi wa'ra 're, te te dama rowahutu ré. Rob'uiprazé, da te 're iséme mono zéb 'rata sab ré, te ãne tãma rowasu'u za'ra. Tahawa, te te siwi âri ze za'ra nherẽ, te te siwi âri õ di, dama ipire norĩ hã. E marĩ wa. Zahadu bâdâ hã iwa waptã'ã õ wa, te te sima ãma irotizé hã, 'Re ihâimana u'âsi mono hã.