Mateu 26:34 - ꞌRe Ihâimana Uꞌâsi Mono Zadawa Wasuꞌu

³⁴ Tawamhã Zezusi te asa tãma tinha, Pedruhu ma, ãne: — Tô sena wa za ãhã na hã aima rowasu'u. Ãma aipo're pu'u za duré ĩmreme na hã. Ã bara na si'a hârâ õ ré, te za si'ubdatõ dawi ĩ'udâ, aima ĩza'rese õ na hã.

Mateu 26:34 ပူးပေါင်းရင်းမြစ်များ

Mateu 26:33

Tawamhã Pedru, te Zezusihi ma tinha, ãne: — Asiré 're iwanomro mono norĩ hã aihĩni za te te airẽme za'ra nherẽ, wa hã te dame i'airẽme da hã mare di za.

Mateu 26:75

Tawamhã Zezusi te te tãma iwaihu'uzém na ma sina po're puru, Pedru hã. Ãne Zezusi te te tãma iwaihu'u siromo zé hã, isõwa: “Si'a hã hârâ õ ré, si'ubdatõ te za dawi ĩ'udâ, ĩzadawa para õ nherẽ.” Tawamhã ãne na oto imreme na sina po're pu'u wamhã, ma tô watobro rob u, Pedru hã. Tahawa, te oto aiwa'õ, sina pẽ'ẽzé uptabi wa.

Marcu 14:72

Tawamhã si'a hã awa'awi ma tihârâ na sahu. Tawamhã Zezusi te te tãma iwaihu'uzém na, ma oto sina po're puru, Pedru hã. Ãne ma tô Zezusi hã aré tãma waihu'u siro: “Si'a hã tihârâ na te te sahu õ ré, te za si'ubdatõ dawi ĩ'udâ, ĩzadawa para õ nherẽ.” Tawamhã Zezusihi mreme na sina po're pu'u wa, te oto aiwa'õ, Pedru hã.

Luca 22:34

Tahawa, te Zezusi hã asa tãma tinha, ãne: — Pedru, ĩwapari pese. Ĩzadawa para õ nherẽ, ã bâtâ na si'a hârâ õ ré, te za si'ubdatõ dawi ĩ'udâ, aima ĩza'rese õ na.

Luca 22:61

Tahawa, ma tô Wanhib'apito hã aipi'ra. Sipi'rai wamhã, te Pedru hã 'madâ'â pese. Te te 'madâ'â wamhã, ma Wanhib'apito mreme na po're puru oto, Pedru hã. Romhâ ré, ma tô tãma waihu'u siro, te te dawi i'udâzém na, Zezusi hã. Ãne ma tô tãma tinha: “Ã bâtâ na si'a hã hârâ õ ré, te za si'ubdatõ dawi ĩ'udâ, ĩzadawa para õ nherẽ.” Ãne ma tô romhâ ré, Pedruhu ma waihu'u siro.

Zuwã 13:38

Tawamhã Zezusi, ma tô duré asa hã tãma tinha, ãne: — E tô sena asiwasu'uzé hã. Tô sena wa aima rowasu'u. Ĩzadawa para õ nherẽ, si'a hârâ õ ré, te za si'ubdatõ dawi ĩ'udâ, aima ĩza'rese õ na hã.