Mateu 24:24 - ꞌRe Ihâimana Uꞌâsi Mono Zadawa Wasuꞌu

²⁴ E marĩ wa, wa ãne aima waihu'u za'ra wa'wa. Ni'wam norĩ hã te za datẽme 're nomro, danho'reptui'wa na, niha wamhã, 'Re ihâimana u'âsi mono zadawa 'mahârâ'wa na dama 're siwasu'u za'ra mono da, sadawa nhipese sina. Ta norĩ hã marĩ dama i'manharĩ waihu'u'õ hã te za duré te te dama 're 'manharĩ za'ra, 'Re ihâimana u'âsi mono zadawa param newa, da te ãma 're sasõmri za'ra mono da. Isazei'wa norĩ zama te te dame ãma 're saze za'ra mono da, te za ãne na te te dama 're romhõsi za'ra. Tane nherẽ, te te dame 're sazei waihu'u za'ra mono õ di za ta norĩ hã, 'Re ihâimana u'âsi mono te te sima 're apisutu siromo mono wa, ãma 're sib'a'uwẽ za'ra mono da hã.

Mateu 24:24 ပူးပေါင်းရင်းမြစ်များ

Mateu 22:14

Tawamhã Zezusi hã ma tô ãne na timreme na 'rãsutu: — 'Re ihâimana u'âsi mono hã da'ahâ uptabi na dazô 're hârâ mono nherẽ, da'umro na si te za da'ãma 're sib'a'uwẽ.

Mateu 24:11

'Re ihâimana u'âsi mono zadawa 'mahârâ'wa newa, roti tô senai'õ na te te dama 're iroti za'ra mono norĩ hã te za datẽme 're nomro, sadawa nhipese na te te dama 're rowasu'u za'ra mono da, taré. Tawamhã isimiroti hã te za tô da te 're saze za'ra, tô sena newa, ta norĩ hã sadawa nhipese na taré dama 're siwasu'u za'ra mono nherẽ.

Mateu 24:22

'Re ihâimana u'âsi mono hã bâdâ ma tô sima pisutu, za da te 're irobzépata za'ra mono zé, te te dama wãtari da, rowasété ré da'ãma romhâimana pahâ tõ da. Ãne hã te te sima pisutu õ 'wa'âhã, te aré uburé dasi'utõrĩ pese, za daré irob'rãsutuzém na hã. 'Re ihâimana u'âsi mono hã ãma 're sib'a'uwẽ za'ra mono da, te te sima 're i'apisutu mono norĩ zawi te, te za ãne hã tô 'manha.

Mateu 24:25

Ãne hã wa aima waihu'u siromo za'ra wa'wa, zahadu romhâimana õ ré. Tahawa, ma'ãpé ãma 're asõpré u'âsi aba mono za, ãne na hã.

Mateu 24:31

Tawamhã hâiwa ãma tãma romhuri'wa hã tinhimnhihârâzém na te za oto amnhihâ, hârâ 'rãihâ uptabi na, daro mono bâ da te iwapari za'ra da hã. Simnhihârâ wi, hâiwa hawi tãma romhuri'wa norĩ hã te za we dazô satõrĩ za'ra, ti'ai u. Tawamhã 'Re ihâimana u'âsi mono hã ãma 're sib'a'uwẽ za'ra mono da, te te sima 're i'apisutu mono norĩ hã te za we daro mono bâ te te simro, itẽme.

Mateu 7:15

— Duré, 'Re ihâimana u'âsi mono zadawa wasu'u uptabi õ 'wa norĩ wi, te za 're asi'madâ'â pese za'ra wa'aba mo. Ta norĩ hã tô sena dasiré 're hâimana wẽ za'ra mono newa, te za te te dama 're roti za'ra taré. Ta norĩ hã te abaze zahi ne 're hâimana u'âsi za'ra, isazei'wa norĩ zada hã.

Marcu 13:22

E marĩ wa, wa ãne aima waihu'u za'ra wa'wa. Ni'wam norĩ hã te za datẽme 're nomro, danho'reptui'wa na, niha wamhã, 'Re ihâimana u'âsi mono zadawa 'mahârâ'wa na dama 're siwasu'u za'ra mono da, sadawa nhipese na. Ta norĩ hã marĩ dama i'manharĩ waihu'u'õ hã te za te te dama 're 'manharĩ za'ra, 'Re ihâimana u'âsi mono zadawa para newa, da te ãma 're sasõmri za'ra mono da. Isazei'wa norĩ zama te te dame ãma 're saze za'ra mono da, te za ãne na te te dama 're romhõsi za'ra. Tane nherẽ, te te dame 're sazei waihu'u za'ra mono õ di za ta norĩ hã, 'Re ihâimana u'âsi mono te te sima 're apisutu siromo mono wa, ãma 're sib'a'uwẽ za'ra mono da.

Luca 18:7

Wẽ prã zahã, te za, u, imrotõ hã pawapto. E bété tinhib'a'uwẽ hã te te 're pawaptob za'ra mono õ di za, 'Re ihâimana u'âsi mono hã. Ãté rowa'a na, ãté bara na te za sô 're hãsi, te te 're pawaptob za'ra mono da. E bété te te 're pawaptop su'u za'ra mono õ di za.

Zuwã 4:48

Tawamhã Zezusi te asa tãma tinha, ãne: — E niha te za marĩ dama i'manharĩ waihu'u'õ hã te dama 're i'ab'manharĩ mono zéb zarina si 're ĩzaze za'ra wa'aba mo.

Zuwã 6:37

Ĩmama ma tô da'apisutu, ĩnhib'a'uwẽ si 're danomro mono da. Ta norĩ si te za te te 're ĩzaze za'ra, te te ipisutu za'ra norĩ hã. Te te 're ĩzaze za'ra mono nherẽ, e wa za ĩsiwi te 're awẽ'õ. Mare di. Te ĩsiwi 're awẽ'õ mono õ di za.

Zuwã 6:39

E marĩ, ma tô te te sima 're wẽ, Ĩmama hã. Ĩzazei'wa norĩ te 're ab'madâ'â pese u'âsi mono wa, ĩte u'âsi 're nomro mono da, ma tô te te sima 're wẽ, ĩte da, te te ĩma 're apisutu siromo mono wa. Ma tô duré te te sima 're ĩwẽ, ĩzazei'wa norĩ na hã 're dâ'â za'ra mono wa, bâtâ na te ahâiwa'utu da, apâ 're hâimana u'âsi za'ra mono da oto, ti'a isi'utõrĩzéb ãma.

Zezusihi zadawa wasuꞌuꞌwa norĩ nhimiromhuri na robꞌuiꞌéré 20:16

Paulu hã ma tô aré sima rosa'rata, Éfézu u hã sipa tõ da, Zeruzalẽ u wisi su'u da. Tahawa, Azia na danhipti'a nho'õmo nhisi ãma sãmra zei õ di oto. Pẽtécosti na bâtâ wana, Zeruzalẽ u iwisi su'u da si, ma tô sima wẽ pese, Paulu hã.

Roma 12:18

Asada 're dahâimana za'ra wa'aba mono nherẽ, rowẽ na si dasiré 're aihâimana u'âsi za'ra wa'aba mono da, te za asina 're irosa'rata wẽ u'âsi za'ra wa'aba mo.

Galata 4:15

E niha bété oto ãhã na hã. Aré aima 're rowẽ za'ra wa'aba mono di, ai'rata ĩnhamra aba wa. Ãhã wa, duré aima waihu'u pese za'ra wa'aba 'wa'âhã, te aré ato hã isani za'ra wa'wa, ĩma sõmri za'ra wa'aba da, ato hã.

2 Timotiu 2:19

Tane nherẽ, ẽtẽ 'manharĩ na 'ri na'rada hã, siptete na 're ihâimana mono ne, te za 'Re ihâimana u'âsi mono nhimiroti hã pire na 're hâimana u'âsi. Ãne isimiroti na rob'ui'éré hã: “Wanhib'apito hã te za tinhib'a'uwẽ norĩ hã tite na te te 're awaihu'u.” Ãne duré ãma irob'ui'éré hâiba amo hã: “Ni'wam norĩ hã Wanhib'apito nhib'a'uwẽ na dama 're siwasu'u za'ra mono wamhã, te za tiwasédé hã rẽme pese za'ra, 're nomro wẽ mono da oto.” Ãne isimiroti na rob'ui'éré hã.

1 Pedru 1:5

Ate za'ra wa'aba da, te iwẽ hã asô 're hâimana u'âsi za'ra wa'wa. A norĩ wa'wa hã iwaihu'u pese na te oto asina 're i'umnhasi za'ra wa'aba mo. Tahawa, te za iwasété wi te te 're ai'madâ'â pese za'ra wa'wa, asõ'reptui wa'aba zé hã asina uwaimrami za'ra wa'aba da, ro isi'utõrĩzéb ãma.

2 Pedru 3:17

Ĩsiwadi norĩ, ĩma asawi pese za'ra wa'aba norĩ hã, ãne hã aima waihu'u pese za'ra wa'aba wa, ma'ãpé 'râwi 're asi'madâ'â pese za'ra wa'aba mono, 'Re ihâimana u'âsi mono nhimiroti wẽ'õ'wa norĩ nhimirowasu'u hã 're wapari za'ra wa'aba mono tõ da, Wanhib'apito ãma asiptete sina 're aihâimana u'âsi za'ra wa'aba mono da.

1 Zuwã 2:18

Ĩ'ra norĩ, ĩma asawi pese za'ra wa'aba norĩ, ropsi'utõrĩzéb u hã romhuture di oto. Tame te za oto aibâ iwasédé hã dama sihâi'ré sõ'awi, Cristuhu zada 're ihâimana mono hã. Cristuhu newa te za isimiroti hã da te 're wapari za'ra. Taha wasu'u hã ma tô 're iwapari u'âsi za'ra wa'aba mo. Tane nherẽ, te duré ãhã na wanho'a 're hâimana za'ra ahâ uptabi na, za Cristuhu zada 're ihâimana mono ne. Tahawa, wama waihu'u pese za'ra di oto, ropsi'utõrĩzéb u iromhuture na hã.

1 Zuwã 2:22

E 'wam norĩ hã bété 're isadawa nhipese za'ra mono hã. Ta norĩ hã te ãne Zezusi hã te te dawi 're udâ za'ra: “Zezusi hã Danho'reptui'wa da, 'Re ihâimana u'âsi mono te te ipisutu õ di.” Ta norĩ hã sadawa nhipese uptabi na 're ihâimana za'ra mono. Ta norĩ hã te Cristuhu zada 're hâimana za'ra, te te dawi 're udâ za'ra mono wa. Imama zada zama te duré 're hâimana za'ra, ta norĩ hã.

1 Zuwã 5:18

Ni'wam norĩ hã 'Re ihâimana u'âsi mono hã ãma 're 'ra za'ra mono wa, isib'a'uwẽ na oto 're nomro wẽ mono wamhã, tiwasédé hã te te oto duré 're i'manharĩ u'âsi za'ra mono da hã mare di za. 'Re ihâimana u'âsi mono 'ra hã, Zezusi hã oto ãma 're sisaprĩ u'âsi za'ra mono wa, tiwasédé hã te te 're 'manharĩ waihu'u za'ra mono õ di za tô oto duré. Tahawa, iwasété uptabi hã te te oto 're upi waihu'u za'ra mono õ di za, Wa'uburé hã. Ãne hã wama waihu'u pese za'ra di oto.

Apocalipsi 19:20

Tawamhã â hawi ropoto siwamnarĩ hã ma tô âri ni. Awaru irã 'mapraba'wa ma tô ti'â. 'Re ihâimana u'âsi mono zadawa wasu'u uptabi õ 'wa, 'Re ihâimana u'âsi mono nhimipisutu newa, romhõsi na dama 're isadawa nhipese mono, ma tô duré isiré hã ti'â. Ta hã ma tô aré â hawi ropoto siwamnarĩ nho'a te te 're romhõsi, dama isa'rese'õ na. Te te 're iromhõsi mono zém na ma tô dama 're sadawa nhipese aré, â hawi ropoto siwamnarĩ nhisi na ihâiba ui'éré mono hã, ihâiba 'manharĩ na romhâiba ãma 're idawata za'ra mono hã. Tawamhã awaru irã 'mapraba'wa hã ma tô â hawi ropoto siwamnarĩ norĩ hã, dama 're isadawa nhipese mono me wabzu. Unhama ro'o u'âsi u, ma tô hâiba ré wabzu, ẽtẽ ro'o nhizédé uzé pire u.