Mateu 21:26 - ꞌRe Ihâimana Uꞌâsi Mono Zadawa Wasuꞌu

²⁶ Tane nherẽ, taré dazadawa parap si â dawabzuri te te dama 're i'ab'manharĩ mono na wa te tãma waihu'u za'ra wamhã, wa za wasina hã wapahi za'ra ni dama, niha da te wama rob'manharĩ za'ra õ'umnhasite. E marĩ wa. Zuwã Batista hã 'Re ihâimana u'âsi mono zadawa 'mahârâ'wa 're imorĩ na, da te 're saze za'ra mono wa.

Mateu 21:26 ပူးပေါင်းရင်းမြစ်များ

Mateu 11:9

Ma'ãpé, ĩma wasu'u za'ra wa'aba za. E 'Re ihâimana u'âsi mono zadawa wasu'u'wai wa, te itẽme 're anomro aba mo, 're sabu za'ra wa'aba mono da. Tane tô. Õ hã uburé iwana 'Re ihâimana u'âsi mono zadawa 'mahârâ'wa norĩ nhipai u te pire na 're hâimana, Zuwã hã.

Mateu 14:5

Apito Erodi hã ma tô sima wẽ aré, te te dama 'ru da, Zuwã Batista da te wĩrĩ da. Tane nherẽ, pahi di zudeu norĩ ma hã, Zuwã Batista hã 'Re ihâimana u'âsi mono zadawa 'mahârâ'wa na da te waihu'u za'ra wa.

Mateu 21:11

Tawamhã Zezusihi zarina idasi'aba'ré norĩ hã ma tô dama nharĩ za'ra, Zeruzalẽ ãma 're idasi'ubumroi mono norĩ ma, ãne: — Ã hã Zezusi, 'Re ihâimana u'âsi mono zadawa 'mahârâ'wa, Nazaré na 'ri wa'õtõ nhisi hawi we imorĩ, Galiléa hawi.

Mateu 21:25

Ãne wa za asadanharĩ za'ra wa'wa: E 'wa sadawa para, ma tô Zuwã hã â dawabzuri hã te te dama 're ab'manharĩ bété. E 'Re ihâimana u'âsi mono zadawa para. E dazadawa para. Tawamhã 'râwi te sima nharĩ za'ra, ãne dama rowahutu'wa norĩ hã: — E niha, wa za tãma waihu'u za'ra ni, õne wamhã. 'Re ihâimana u'âsi mono zadawa para, â dawabzuri te te dama 're i'ab'manharĩ mono na wa te tãma waihu'u za'ra wamhã, te za wazadanharĩ na sahu za'ra, ãne: “E niha bété, Zuwã Batistaha nhimirowasu'u hã saze za'ra wa'aba õ di, dame.”

Mateu 21:27

Tawamhã Zezusihi ma, te oto asa nharĩ za'ra, ãne: — Wa norĩ hã wa te waihu'u za'ra õ di, ni'wa sadawa para, Zuwã Batista hã â dawabzuri te te dama 're i'ab'manharĩ mono zé hã. Tawamhã Zezusi hã asa ma tizadawa na tãma ãma wa'rãmi za'ra, ãne: — Tane tô. A norĩ wa'wa hã ĩma waihu'u za'ra wa'aba õ nherẽ, wa hã te duré aima waihu'u za'ra wa'aba õ di za, ni'wa sadawa para marĩ hã te dama 're i'ab'manharĩ mono na hã.

Mateu 21:46

Tahawa, ma tô aré sima hâiba 'ru za'ra, te te dama 'ru za'ra da, dazazéb 're da te dasiwi sẽrẽ da, Zezusi hã. Tane nherẽ, ma tô dama tipahi za'ra aibâ norĩ hã, Zezusi hã 'Re ihâimana u'âsi mono zadawa 'mahârâ'wa, oto 're imorĩ na da te 're saze za'ra mono wa, da'ahâ na.

Marcu 11:32

Tazahã dazadawa parap si, â dawabzuri te te dama 're i'ab'manharĩ mono na, wa te tãma waihu'u za'ra wamhã, te za wazada tazahi za'ra ni za. Ãne te 'râwi sima nharĩ za'ra, dapipa te, Zuwã Batista hã tô sena 'Re ihâimana u'âsi mono zadawa 'mahârâ'wa 're imorĩ na, da te 're saze za'ra mono wa.

Marcu 12:12

Buru na romhuri'wa norĩ wasu'u hã te te dama wasu'u wamhã, tisiré zudeu norĩ ma, pire na 're ihâimana za'ra mono norĩ, te wasu'u, Zezusi hã, 'Re ihâimana u'âsi mono ma, da'ãma romhuri'wa norĩ hã, duré dama rowahutu'wa norĩ hã, duré dama roti'wa norĩ hã. Ãne na ma tô sina waihu'u za'ra. Taha 'ru te, te aré siwi ti'â. Tane nherẽ, da'ahâ nhimimnhasi te, te õne haré ai'aba'ré, isiti.

Luca 20:19

Buru 'madâ'â'wa norĩ wasu'u te te dama wasu'u wamhã, ma tô sina waihu'u za'ra, dama rowahutu'wa norĩ hã. Sasedoti norĩ hã sima ipire za'ra norĩ me, ma tô sina waihu'u za'ra. Taha 'ru te, te aré sima wẽ za'ra, te te siwi âri da, Zezusi hã, awa'awi. Tane nherẽ, dama pahi za'ra wa, ma tô siwi ãma rosazâ a'â.

Luca 20:6

Ma tô da te 're saze za'ra Zuwã hã, 'Re ihâimana u'âsi mono zadawa 'mahârâ'wa 're imorĩ na. Tawamhã dazadawa parap si, â dawabzuri te te dama 're i'ab'manharĩ mono na, wa te tãma nharĩ za'ra wamhã, ãté te za ẽtẽ na dasiwi wa'uprosi ni.

Luca 22:2

'Re ihâimana u'âsi mono ma, da'ãma romhuri'wa ipire norĩ hã, te rowahutu'wa norĩ me sima ãma rosa'rata za'ra, pi'uriwi te te siwi wĩrĩ da, Zezusi hã. Dama pahi za'ra wa, te ãne sima ãma rosa'rata za'ra.

Zuwã 9:22

Ãne ma tô imama hã ina me tãma nharĩ za'ra. E marĩ wa. Dama ipire norĩ mreme pipa te. Ãne ma tô da'ãma sima hã te te 're roti za'ra: “Ni'wam norĩ hã Zezusi, Danho'reptui'wa da, 'Re ihâimana u'âsi mono te te ipisutu na te te saze za'ra wamhã, wa za wa te tiwi 're rosawi za'ra, rowahutuzéb u dame 're sisisi tõ mono da.” Ãne na ma tô te te sima 're roti za'ra.

Zezusihi zadawa wasuꞌuꞌwa norĩ nhimiromhuri na robꞌuiꞌéré 5:26

Tawamhã 'Re ihâimana u'âsi mono nhorõwa 'ri 'madâ'â'wa norĩ hã ma tô sô ai'aba'ré tinhib'apito norĩ me, apâ te te simroi mono da. Isimroi mono 'wa norĩ hã ẽtẽ na da te hâ za'ra mono õ'umnhasite, ma tô pawasisi ãna te te simro.