Mateu 21:15 - ꞌRe Ihâimana Uꞌâsi Mono Zadawa Wasuꞌu

¹⁵ Tawamhã ai'uté norĩ hã ma tô nasi sima 'mahârâ za'ra, ãne: “Apito Dawihi nhihudu ãma, 're wawata za'ra wa'aba mono.” Ãne te nasi sima 'mahârâ za'ra, 'ri 'wawi wa'ra 're, sãmra ré. Tawamhã 'Re ihâimana u'âsi mono ma, da'ãma romhuri'wa norĩ ma, ipire norĩ hã tisiré ma, duré isimiroti na rob'ui'éré 'rata na dama rowahutu'wa norĩ hã, ai'uté norĩ te te nasi sima i'mahârâ za'ra zé hã te te wapari za'ra wamhã, duré tinhimiromhõsi na Zezusi te te 're ida'apawapto mono zé te te 'madâ'â za'ra wamhã, ma tô sada tizahi za'ra, Zezusihi zada.

Mateu 21:15 ပူးပေါင်းရင်းမြစ်များ

Mateu 20:24

Tawamhã Zezusihi siré 're inomro mono norĩ hã 10 na ihâiba za'ra hã, Zebedehe 'ra norĩ mreme te te wapari za'ra wamhã, ma tô sada tinhiti'ru za'ra.

Mateu 21:23

Tawamhã Zezusi hã ma tô apâ mo, 'Re ihâimana u'âsi mono nhorõwa 'ri u. Tame te oto dama rowahutu, 'ri 'wawi wa'ra 're. Tawamhã sasedoti ipire norĩ hã ma tô itẽme aimasa, zudeu norĩ ma roti'wa norĩ zama. Tawamhã Zezusi hã te siwi sadanha, ãne: — E 'wa sadawa para, te bété ãne hã marĩ hã dama 're i'ab'manharĩ mo. E 'wa hã, aipisutu'wa.

Mateu 21:9

Tawamhã Zezusihi nhowa idasi'aba'ré norĩ hã duré isarina idasi'aba'ré norĩ zama te nasi dasima 'mahârâ za'ra ni, ãne: — Apito Dawihi nhihudu ãma, 're wawata za'ra wa'aba mono. Wanhib'apito zadawa para, te we oto mo. 'Re ihâimana u'âsi mono hã iwẽ si te te tãma 're pisutu u'âsi mono neza. 'Re ihâimana u'âsi mono ãma zama duré 're wawata za'ra wa'aba mono, hâiwa ãma 're isãmra mono ãma, wei watẽme te te satõrĩ wẽ te.

Mateu 22:42

— E niha asimirosa'rata za'ra wa'wa hã Danho'reptui'wa da, 'Re ihâimana u'âsi mono te te ipisudu, we datẽme imorĩ na hã. E 'wa sihudu na ma bété a norĩ wa'wa hã asiwi iwaihu'u za 'wa. Tawamhã asa ma te ãne ãma sada'âbâ za'ra, farizeu norĩ hã: — Apito Dawihi nhihudu te za, u, 're mo.

Mateu 26:3

Tawamhã sasedoti ipire norĩ hã, duré zudeu norĩ ma roti'wa norĩ hã ma tô si'rã'õtõ, Caifasihi nhorõwa u, 'ri za'ẽtẽ u. Ta hã tisiré norĩ nhipai u sasedoti ipire uptabi 're ihâimana mono, 'Re ihâimana u'âsi mono ma, da'ãma romhuri'wa.

Mateu 26:59

Tawamhã sasedoti ipire norĩ hã, duré uburé zudeu norĩ ma roti'wa norĩ hã, te ni'wam norĩ zô tinhopré, Zezusi hã marĩ te te 're i'ab'manharĩ wasété mono zém na, sadawa nhipese na te te siwi ãma hiri da, tawapsi romanu norĩ hã te te siwi wĩrĩ da.

Mateu 27:1

Tawamhã mararé ma uburé sasedoti ipire norĩ hã, duré zudeu norĩ ma roti'wa norĩ hã si'rã'õtõ, te te sima ãma roti za'ra da, Zezusihi ãma, te te dama sõmri za'ra da, da te dasiwi wĩrĩ da. Taha da, te roti hã sima 'manharĩ za'ra, Zezusihi hâiba na.

Mateu 27:20

Ãne ré, ma tô sasedoti ipire norĩ hã duré dama roti'wa norĩ hã da'ahâ norĩ ma 're sadawa si'aba'ré za'ra, Barabasihi si Pilatuhu wi, da te waptẽrẽ za'ra da, dazazém hawi te te tãma rob'ru da, duré Zezusihi si te te dama hâiba nhomri da, taha si da te dasiwi wĩrĩ da, isadawa para.

Mateu 9:27

Tawamhã 'ri para hawi watobro wamhã, morĩ ré, ma tô aibâ norĩ hã isarina tineb zahuré, itob'a zahuré hã. Tawamhã te 'mahârâ zahuré, ãne: — Dawihi nhihudu, ma'ãpé wa'ãma aipẽ'ẽzé na.

Marcu 11:18

Tawamhã aibâ norĩ hã ma tô iwasu'u hã wapari za'ra, sasedoti ipire norĩ hã, rowahutu'wa norĩ zama. Ãne hã te te wapari za'ra wamhã, ma tô ta norĩ hã sima ãma rosa'rata za'ra, te te siwi wĩrĩ da. Tane nherẽ, Zezusihi nhimiroti na, da'ahâ na ãma 're dawata za'ra mono wa, te te sima danhimimnhasi za'ra wa, te te siwi wĩrĩ õ di a'â.

Luca 20:1

Nimahã bâtâ na te Zezusi hã nhamra, 'Re ihâimana u'âsi mono nhorõwa 'ri ãma. 'Ri 'wawi wa'ra 're, te nhamra, te te dama rowahutu da, duré iwasu'uwẽ na te te da'apo're pu'u da. Tawamhã aibâ norĩ hã ma itẽme aimasa. Ta norĩ hã sasedoti ipire norĩ hã, duré 'Re ihâimana u'âsi mono nhimiroti 'rata na rob'ui'éré na dama rowahutu'wa norĩ, duré zudeu norĩ ma roti'wa norĩ.

Luca 22:2

'Re ihâimana u'âsi mono ma, da'ãma romhuri'wa ipire norĩ hã, te rowahutu'wa norĩ me sima ãma rosa'rata za'ra, pi'uriwi te te siwi wĩrĩ da, Zezusi hã. Dama pahi za'ra wa, te ãne sima ãma rosa'rata za'ra.

Luca 22:66

Tawamhã mararé ma tô zudeu norĩ ma roti'wa norĩ hã si'rã'õtõ, duré sasedoti ipire norĩ hã, duré 'Re ihâimana u'âsi mono nhimiroti 'rata na rob'ui'éré na dama rowahutu'wa norĩ hã. Si'rã'õtõ wamhã, ma tô dama 'ru za'ra, Zezusi hã da te we dasiwi saprõni da, itẽmeb za'ra.

Zuwã 11:57

E marĩ wa. Zezusihi ãma te dama roti za'ra aré, dama ipire norĩ hã: — Ma'ãpé nimame isãmra na 'mai'madâ'â aba wamhã, wei wama wasu'u za'ra wa'aba za, wa te waihu'u za'ra da. Te te siwi âri da, ma tô ãne dama ãma nharĩ za'ra.

Zuwã 12:19

Tawamhã da'ahâ na da te uzusi za'ra da, itẽme dasi'aba'réi wamhã, ãne te sima rowasu'u za'ra, farizeu norĩ hã: — Marĩ hã wa te 'manharĩ waihu'u za'ra õ di. Ma'ãpé 'madâ'â za'ra wa'aba. Õhõta te nemo isiré dasi'ré. Taré, wa nasi ãma wasima roti u'âsi za'ra ni.

Zuwã 4:1

Tawamhã farizeu norĩ ma tô Zezusihi wasu'u hã wapari za'ra. Ãne ma tô dasima wasu'u za'ra ni: “Da'umro na si te oto 're dahâimana za'ra, Zuwã Batistaha nhimiroti 'madâ'â'wa hã. Da'umro na si te oto duré â dawabzuri hã te te dama 're ab'manharĩ. Zezusihi nhimiroti 'madâ'â'wa norĩ si te oto da'ahâ na 're dahâimana za'ra.”

Zuwã 7:42

Danho'reptui'wa da hã apito Dawihi nhihudu te za, u, 're mo. Belẽ ãma te za, u, podo, tihi'rata za'ru ãma, Dawihi za'ru ãma. Ãne duréihã ma tô ãma rob'ui'éré siro, 'Re ihâimana u'âsi mono zadawa 'mahârâ'wa hã.