Mateu 20:21 - ꞌRe Ihâimana Uꞌâsi Mono Zadawa Wasuꞌu

²¹ Tawamhã Zezusi hã te pi'õ sadanha, ãne: — E marĩ ma tô asima ĩwẽ, te aima ãma i'uwaimrami da hã. Tawamhã pi'õ te asa tãma tinha: — Ma'ãpé, ĩ'ra norĩ ma, ropisutu siromo zahuré na, danhib'apito simasisizém na asimire niwĩ duré asimi'e niwĩ dama pire na 're simasisi u'âsi zahuré mono da, za 'Re ihâimana u'âsi mono hã da'ãma isib'a'uwẽzéb ãma hã.

Mateu 20:21 ပူးပေါင်းရင်းမြစ်များ

Salmu 110:1

Uburé Danhib'apito, ma tô ĩnhib'apito ma tinha ãne: “Ma'ãpé ĩnhimire niwĩ ĩzababamhã asãmra, aipara zahâpâ asitob'ru norĩ za te isõrézéb u.”

Salmu 45:9

Asipi'õ norĩ 'remhã te darob amoi ãma apito norĩ 'ra sipi'õ hã 're si'ubumro. Duré ate apito simasisizém nhimire niwĩ, te duré aimro dama ipire i'rãnho'u hã 're sãmra, ẽtẽ waipo pré oru uptabi na i'uza 'manharĩ ré.

Mateu 18:1

Tawamhã Zezusihi siré 're inomro mono norĩ hã ma tô itẽme ubumro, te te siwi sadanharĩ da, ãne: — E 'wa hã 'Re ihâimana u'âsi mono nhib'a'uwẽ, siré 're ihâimana za'ra mono norĩ hã danhipai u dama ipire.

Mateu 19:28

Tawamhã Zezusi te asa tãma nharĩ za'ra, ãne: — Ãne, sena na wa za duré aima waihu'u za'ra wa'wa. Niwapsi ti'ai ãma Dasiré Ipodo hã te za ro itéb ãma danhib'apito simasisizém na 're sãmra. Isimasisizé iwẽ uptabi ãma hã te za 're sãmra, te te 're da'ab'madâ'â u'âsi mono da oto. Tame te za duré a norĩ wa'wa hã isiré 're anomro aba mono norĩ hã 12 na danhib'apito simasisizém na 're asimroi wa'aba mo, aipire na Izaraéu 'ra nhihudu mono bâ 're 'madâ'â za'ra wa'aba mono da.

Mateu 20:22

Tawamhã Zezusi hã te i'ra norĩ ma oto rowasu'u zahuré, ãne: — E marĩ da, te rosa'rata ãna asina ĩzadanharĩ 'wa. Wa hã wa za robzépata za'ẽtẽ, dawi ĩsisawi ãna. E tawamhã sada asiptete aba di, za te irobzépata za'ẽtẽ ne, irobzépata aba da hã. Tawamhã asa te tãma nharĩ zahuré, Zebedehe 'ra norĩ hã: — Ĩhe. Sada wanhiptete di za, asine wa te irobzépata da hã.

Mateu 20:32

Tawamhã ma Zezusi hã i'rata mazazâri zahuré, bâdâdi wa. Tahawa, te 'mahârâ zahuré, itob'a norĩ hã: — E marĩ te asima iwẽ wa'wa, te aima i'manharĩ aba da hã.

Marcu 10:51

Itẽme wisi wamhã, Zezusi te ãne sadanha: — E marĩ te asima iwẽ, te ãma aima i'uwaimrami da hã. — Rowahutu'wa, ĩto pese da, wa ĩsima wẽ, apâ te 're rob'madâ'â mono da. — Ãne te asa tãma si'ru.

Marcu 16:19

Wanhib'apito Zezusi hã te te tãma rowasu'u za'ra pari, ma tô hâiwa u tiwi âri za'ra, 'Re ihâimana u'âsi mono nhimire niwĩ oto 're sãmra mono da, pire uptabi na.

Marcu 6:22

Tahawa, dasaihuri ré, ma Erodizaha 'ra sipi'õ hã ãzé 'ri para u, dama sipese da. Tawamhã Erodi norĩ hã ma tô ãma uze za'ra, tãma sipese za'ra wẽ te. Tahawa, te apito hã azarutu ma tinha, ãne: — Marĩ ĩwi waptẽrẽ, asima iwẽzéb uwaibaba. Tawamhã wa za aima tisõ.

Luca 18:41

— E marĩ te asima ĩwẽ, te aima 'manharĩ da hã. — Apito, ĩto pese da, wa ĩsima aiwẽ, apâ te 're rob'madâ'â mono da. — Ãne te asa tãma tinha, itob'a hã.

Luca 19:11

Tawamhã ma tô wapari za'ra ni, Zezusihi mreme hã. Tahawa, te za duré tãma ãma romnhimiré'é za'ra. E marĩ wa. Zeruzalẽ u, iwisizéb u hã, romhuture di oto. Ãne wa, te dasina rosa'rata za'ra ni: — Ãté, bâdâ te za oto iwa waptãrã, 'Re ihâimana u'âsi mono, da'ãma 're isib'a'uwẽ mono zéb da hã.

Luca 22:24

Tawamhã sima i'maipire zô sima isõpré na ãma sisaze za'ra õ wa, te timreme na 'râwi si'wapé za'ra, isiré 're inomro mono norĩ hã.

Zuwã 15:7

A norĩ wa'wa hã te za ĩ'ãma 're aihâimana u'âsi za'ra wa'aba mo, 're anomro wẽ wa'aba mono da. Tawamhã Ĩmama hã te za te te 're aiwapari u'âsi za'ra wa'wa, tiwi 're irowaptẽrẽ za'ra wa'aba mono zém na hã. Tawamhã tiwi 're iwaptẽrẽ za'ra wa'aba mono zéb uwaibaba, te za tô te te aima ãma 're a'uwaimrami 'wa.

Zezusihi zadawa wasuꞌuꞌwa norĩ nhimiromhuri na robꞌuiꞌéré 1:6

Tawamhã siré si'ubumroi ré, te siwi sadanha, isadawa wasu'u'wa norĩ hã: — Wanhib'apito, e tawamhã, ãhã na te za wama asi'apito za'ra, Izaraéu nhihudu norĩ ma hã warob 're duré wama 're roti mono da, wahi'rada Dawi hã te te dama 're iroti mono ne hã, romanu norĩ te te 're wawada'uri za'ra mono tõ da.

Roma 12:10

Dasisãnawãi uptabi 're idasisawi pese za'ra mono ne, te za a norĩ wa'wa hã 're asisawi pese za'ra wa'aba mo, Cristuhu ãma asisãnawã oto asiré 're aihâimana za'ra wa'aba mono wa. Te za duré 're asiwazé pese za'ra wa'aba mo.

Colosu 3:1

Cristu hã dâ'â uptabi nherẽ, 'Re ihâimana u'âsi mono te te apâ ihâiwa'utu ne, ma tô a norĩ wa'aba zama aihâiwa'utu za'ra wa'wa, aipẽ'ẽ 're atâ'â u'âsi za'ra wa'aba ne 're i'aihâimana za'ra wa'aba mono zém hawi, 're anomro aba mono zép tém na si, oto 're aihâimana za'ra wa'aba mono da. Tahawa, ma'ãpé iwẽ uptabi hã hâiwa ãma asô 're isimi'wara aba mono zô si, 're rob'ruiwapari u'âsi za'ra wa'aba mono za. Tame te oto Cristu hã danhib'apito simasisizéb ãma 're sãmra u'âsi pire na, Timama 'Re ihâimana u'âsi mono nhimire niwĩ.