Mateu 20:19 - ꞌRe Ihâimana Uꞌâsi Mono Zadawa Wasuꞌu

¹⁹ Taha zarina te za oto zudeu'õ norĩ ma siwi hâiba nho. Tawamhã te za ãma tiwa'ẽ za'ra, zudeu'õ norĩ hã. Te za ãma wasété za'ra ni duré. Te za duré da te dasiwi 're pré'é. Taha parip si, te za wedepo'o nhonhi'rãmi na dasiwi sasõmri ni hâiwi, dâ'â da. Tane nherẽ, bâdâ maparane ãma si'utõrĩ õ ré, te za apâ hâiwa'udu.

Mateu 20:19 ပူးပေါင်းရင်းမြစ်များ

Mateu 16:21

Tawamhã ta hawim haré te oto Zezusi hã tidâ'âzém na, duré tihâiwa'utuzém na zama tãma 're siwasu'u u'âsi za'ra sõ'awi, tisiré 're inomro mono norĩ ma. Ãne ma tô tãma 're siwasu'u za'ra: — Ĩmama te te ĩma ipisutuzéb zarina wa za mo, Zeruzalẽ u. Tamemhã zudeu norĩ ma roti'wa norĩ hã, duré 'Re ihâimana u'âsi mono ma da'ãma romhuri'wa ipire norĩ hã, duré isimiroti na rob'ui'éré 'rata na dama rowahutu'wa norĩ hã te za ĩma rob'manharĩ wasété za'ra. Taha zarina, wa za robzépata za'ẽtẽ. Te za duré dasiwi ĩwĩrĩ ni. Taha wamhã, maparane bâdâ ĩ'ãma si'utõrĩ õ ré, wa za duré apâ hã hâiwa'udu.

Mateu 17:23

Te za duré dasiwi hã wĩrĩ ni. Tane nherẽ, bâdâ maparane ãma si'utõrĩ õ ré, te za Imama hã apâ hâiwa'utu. Tawamhã te te wapari za'ra wamhã, ma tô tiwi tirobzei'õ pese za'ra, isiré 're inomro mono norĩ wi hã.

Mateu 27:26

Tawamhã da te tiwi ihâiba waptẽrẽ za'ra zéb uwaibaba, ma tô Pilatu hã da'wapéi'wa norĩ ma 'ru za'ra oto, Barabasihi ma si te te tãma rob'ru da, dazazém hawi dama watobro da. Ma tô duré tãma 'ru za'ra, Zezusi hã powawẽ hâiwaré na te te siwi 're pré'é mono da, taha pari te te duré siwi sasõmri da, wedepo'o nhonhi'rãmi na dâ'â da oto.

Mateu 27:63

Itẽme si'rã'õtõ wamhã, ãne te tãma nharĩ za'ra: — Apito, õ hã isadawa nhipe hã zahadu 're morĩ ré, dama 're isiwasu'u mono zém na wa tô ãma wapo're pu'u za'ra ni, ãhã na hã. Ãne te dama 're siwasu'u: “Bâdâ si'ubdatõ ĩ'ãma si'utõrĩ õ ré, wa za apâ hâiwa'udu.” Ãne dama 're isiwasu'u mono zé hã.

Marcu 14:65

Tawamhã te te siwi wẽ'õ wa, ma tô nasi ni'wam norĩ hã siwi ubu upto, tizadaipro na. Zazahâ na ma duré siwi ubu ubu. Taha pari, ma tô duré nasi siwi ahâ. Ãne ré, te nasi siwi 'mahâ: — E 'wa hã ai'azâri'wa. Ma'ãpé, waihu'u. 'Re ihâimana u'âsi mono nhorõwa 'ri 'madâ'â'wa norĩ zama, ma tô siwi ti'â, te te nasi siwi ahâri da.

Marcu 15:1

Tawamhã awẽm na mararé, ma duré si'rã'õtõ, sasedoti ipire norĩ hã, duré zudeu norĩ ma roti'wa norĩ hã, duré 'Re ihâimana u'âsi mono nhimiroti 'rata na rob'ui'éré na dama rowahutu'wa norĩ hã. Zezusihi ãma te te sima roti za'ra da, ma si'rã'õtõ, dama roti'wa ipire norĩ me. Taha pari, ma oto siwi pawasisi Zezusi hã, Pilatuhu u te te siwi saprõni da. Tawamhã itẽme te te siwi ãwisi wamhã, Pilatu te Zezusi sadanha, ãne: — E a hã, zudeu norĩ nhib'apito. Tawamhã Zezusi te asa tãma tinha, ãne: — Tahata ma te tô tane hã isarina ĩ'ãma iwaihu.

Marcu 15:15

Tawamhã Pilatu hã dama rowẽ za'ra da, ma tô da'wapéi'wa norĩ ma 'ru za'ra, Barabasihi ma si te te tãma rob'ru za'ra da, dazazém hawi watobro da, apâ 're morĩ da sõ'awi. Taha pari, te Zezusi tãma 'ru za'ra, da'wapéi'wa norĩ ma, powawẽ hâi waré na te te siwi 're pré'é mono da, taha pari, te te duré siwi sasõmri da, wedepo'o nhonhi'rãmi na dâ'â da oto.

Luca 18:32

Te za, u, dasiwi ĩ'âri ni, zudeu'õ norĩ ma, da te dasiwi ĩhâiba nhomri da. Te za, u, ĩ'ãma tawa'ẽ za'ra ni duré, zudeu'õ norĩ hã. Te za, u, ĩ'ãma wasété za'ra. Tizadaipro na te za, u, nasi siwi ĩ'uptob za'ra.

Luca 23:11

Tawamhã Erodi norĩ hã ma tô Zezusihi ãma tiwa'ẽ za'ra, taré. Tinhib'a'uwẽ norĩ me, ma ãma tiwa'ẽ za'ra, da'wapéi'wa norĩ me. Ma tô ãma tito za'ra. Dasi'ubuzém na ma tô siwi ãma hâiba ubu, iwẽ na. Tawamhã Erodi hã te oto dama ti'ru, apâ da te dasiwi saprõni da, Pilatuhu u. Tahawa, te apâ siwi saprõ.

Zezusihi zadawa wasuꞌuꞌwa norĩ nhimiromhuri na robꞌuiꞌéré 2:23

'Re ihâimana u'âsi mono hã ma tô tiwaihu'u pese na waihu'u siro romhâ ré, Zezusihi dâ'âzé hã. Te te iwaihu'u siromo zéb uwaibaba, duré te te sima iwẽzéb uwaibaba, ma tô aima pisutu za'ra wa'wa, Zezusi hã dama 'ru za'ra wa'aba da, 'Re ihâimana u'âsi mono nhimiroti waihu'u'õ'wa norĩ ma, ai'upana za'ra wa'aba, te te siwi wĩrĩ da. Tahawa, ma tô siwi sasõ, wedepo'o nhonhi'rãmi na. Taha na ma siwi tiwĩ.

Zezusihi zadawa wasuꞌuꞌwa norĩ nhimiromhuri na robꞌuiꞌéré 21:11

Watẽme wisi wi, ma tô Pauluhu usisizé hã tiwi waze. Taha wamhã, ma tô ãma sipara'õtõ wasisi. Ma tô duré ãma sipawasisi. Taha pari, ma tô wama rowasu'u za'ra, ãne: — 'Re ihâimana u'âsi mono pẽ'ẽzani hã ãne ma tô ĩma waihu'u: “Ã da'usisizép tede'wai ma, te za zudeu norĩ hã ãne 'manharĩ za'ra, Zeruzalẽ ãma 're isi'ubumroi mono hã. Zudeu'õ norĩ ma, te za hâiba nhomri za'ra.”

Zezusihi zadawa wasuꞌuꞌwa norĩ nhimiromhuri na robꞌuiꞌéré 4:27

— Ãhã na, tô sena Zeruzalẽ ãma ma tô tasi'rã'õtõ ni, aima romhuri wẽ 'wa zada, Zezusihi zada, Danho'reptui'wa da ipisutu zada. Erodi norĩ hã ma tô sitẽme ubumro, Põsiu Pilatuhu me. Ta norĩ hã zudeu'õ norĩ me duré Izaraéu nhihudu norĩ me, ma tô sada si'rã'õtõ, te te siwi wĩrĩ da.