Mateu 20:15 - ꞌRe Ihâimana Uꞌâsi Mono Zadawa Wasuꞌu

¹⁵ Te ĩsima iwẽzéb zarina, ĩte rob'uiprazém na te da'apawa'âbâ wamhã, e ĩwasédé wa tô 'manha. Mare di. Ĩwasédé hã te 'manharĩ õ di. Ãté taré dama ĩnhopru wa, ma tô ĩzada asahi, bâtâ bâ te te ĩma romhuri za'ra õ nherẽ, bâtâ na dapawa'âbâzém na te pawa'âbâ za'ra 'ru te.” Ãne ma tô buru tede'wa hã tãma siwaihu'u, tãma iromhuri'wai ma.

Mateu 20:15 ပူးပေါင်းရင်းမြစ်များ

Ezodu 33:19

Tawamhã 'Re ihâimana u'âsi mono, ma te ãma sada'â ãne: — Uburé ĩhâiba na rowa'a, ĩma 're ihâimana mono hã asõ're te te ro'razâri da hã wa za tô aima 'manha. Duré ĩnhisi iwazéb zahi na wa za aima wasu'u. Wa hã, Uburé Danhib'apito, te ĩsima 're i'awẽ mono hã wa za te 're azawi pese. Duré te ĩsima 're i'awẽ mono ãma hã, wa za 're ĩsiwãrĩ wẽ za'ra.

Provébiu 23:6

Aibâ isõti nhorõwa ãma hã 're asai mono tõ. Tô'ã! Duré dasa iwẽ te te aima i'a'âri hã waptu na sa'ẽtẽ hã 'rẽne tõ.

Provébiu 28:22

Isõti hã te waptu na 're isisimarĩ pese za'ra mono da si, tinhimarĩ zô sima 're sõpré. Tane nherẽ, sisõwamhã te te rob'madâ'â waihu'u õ di, za isimarĩ'õzé bâdâ ipire, sô iwisizé hã.

Mateu 11:25

Tawamhã Zezusi hã te duré ãne Timama ma hã mre: — Ĩmama, a hã Danhib'apito uptabi, hâiwa ãma hã, duré ti'ai ãma zama. A hã ma tô rowaihu'u pese 'wa norĩ wi roti iwẽ hã 're i'anhito mo, te te 're waihu'u za'ra mono tõ da hã. Rowaihu'u prãi 'wa na 're ihâimana za'ra mono norĩ ma si, ma tô marĩ iwẽ hã 're i'awaihu'u mo. Tahawa, wa ai'ãma ĩwata, asõpru wa.

Mateu 20:14

Ma tô dame asima i'âri pa. Tahawa, te za oto aimo. Wa tô ĩsima wẽ, aiwa aipawa'âbâ za'ra wa'aba ne te pawa'âbâ za'ra da, asa'u wa'aba romhuri na te te isãna'rata za'ra norĩ hã.

Zuwã 17:2

A hã ma tô ĩma 're ida'apisutu mo, ĩzazei'wa 're danomro mono da. Wa hã ma tô duré ĩpisu, uburé dama ĩpire uptabi da. E marĩ da. Ĩzazei'wa norĩ ma, te 're apisutu mono da, robzei u'âsi ĩ'ãma 're nomro u'âsi mono da, duré 're dâ'â za'ra mono ãna, ai'rata 're hâimana u'âsi za'ra mono da, hâiwa ãma.

Zezusihi zadawa wasuꞌuꞌwa norĩ nhimiromhuri na robꞌuiꞌéré 13:45

Tane nherẽ, da'ahâ na idasi'rã'õno hã zudeu norĩ hã te te da'madâ'â za'ra wamhã, ma tô da'ruiwapari za'ra. Tawamhã Pauluhu mreme hã ma tô dawi wẽ'õ za'ra, zudeu norĩ hã. Tahawa, timreme na ma tô nasi ãma tãma wa'rãmi za'ra, Pauluhu mreme wa'rãmi. Ma tô duré ãma tiwa'ẽ za'ra.

1 Corĩtu 4:7

E asiré norĩ nhipai u 're aihâimana pire za'ra wa'aba mono bâ, te bété ãne na 're asi'madâ'â ze za'ra wa'aba mo. E marĩ te aré aima 're hâimana za'ra wa'wa, 'Re ihâimana u'âsi mono te te aima 're sõmri za'ra wa'aba mono õ 'wa'âhã. Marĩ iwẽ hã aima 're hâimana za'ra wa'aba mono õ di aré. Uburé iwẽ hã 'Re ihâimana u'âsi mono nhoprubzéb si, te oto aima 're hâimana za'ra wa'wa. E marĩ wa, te bété asina 're aiwata za'ra wa'aba mo, uburé marĩ iwẽ hã aima 're ihâimana za'ra wa'aba mono hã, 'Re ihâimana u'âsi mono nhoprubzéb õ newa, aihawim na aima 're wairébé aba mono newa.

Éfézu 1:11

'Re ihâimana u'âsi mono hã marĩ na te te sima 're aroti mono wamhã, te za tô te te ãma 're a'uwaimrami. Ta hã ma tô wa'apisutu siro, isib'a'uwẽ 're wanomro mono da, Cristuhu ãma za 're wanomro mono wa. Ãne duréihã te te wa'ãma sima irotizéb zarina, ma tô wa'ãma uwaimrami za'ra, danho'reptui'wa zô 're iwanhimipari 'rata za'ra mono norĩ ma, ãma 're iwawata u'âsi za'ra mono zéb da hã.

Éfézu 2:1

Duréihã a norĩ wa'wa hã aipẽ'ẽ 're, 're atâ'â za'ra wa'aba mono na, te aré tô 're anomro aba mo, 'Re ihâimana u'âsi mono nhimiroti na 're anomro aba mono õ wa, duré aiwasédé hã 're 'manharĩ za'ra wa'aba mono wab zama.

Tiagu 1:18

Te te sima 're ida'awẽ mono zéb uwaibaba, ma tô timreme na te te 're wa'apoto té, wapẽ'ẽ 're, uburé isimipoto norĩ nhipai u, isib'a'uwẽ tãma 're wahâimana za'ra mono da oto. Ma tô, tô sena na timreme na te te 're wa'apoto té, wapẽ'ẽ 'remhã.

Tiagu 5:9

Ĩsisãnawã norĩ, asima 're aiwapsari za'ra wa'aba mono õ di za, 'Re ihâimana u'âsi mono hã aiwasédé hã te te ai'ãma 're sa'ra za'ra wa'aba mono tõ da. Dahâimanazéb zarina da'ãma rowairébé'wa hã we imorĩzéb u hã romhuture di oto. Ãne wa, asima 're aiwapsari za'ra wa'aba mono õ di za.