Mateu 2:9 - ꞌRe Ihâimana Uꞌâsi Mono Zadawa Wasuꞌu

⁹ Tawamhã apito mreme te te wapari za'ra parimhã, te oto robzabui'wa norĩ hã ai'aba'ré, Belẽ u. Tawamhã bâdâdi na si'aba'réi ré, ma tô wasi hã 'madâ'â za'ra, tô õ tirob ãma ré te te i'madâ'â za'ra hã. Ta hã te isõwab za'ra hã mo. Tawamhã 'watébrémi isãmrazém nho'õmoi baba ma tô oto wasi hã mazazâ.

Mateu 2:9 ပူးပေါင်းရင်းမြစ်များ

Provébiu 8:17

“Ĩzawi pese 'wa norĩ hã ĩma sawi pese di. Ni'wa ĩzô rĩtĩ wamhã, te za ĩnhopẽtẽ.

Mateu 2:10

Tawamhã aibâ norĩ hã wasi te te 'madâ'â za'ra wamhã, toi uptabi za'ra di. Tahawa, te duré tipẽ'ẽ 'remhã 're to za'ra.

Mateu 2:2

Tawamhã ta norĩ hã te sô anharĩ za'ra, ãne Zezusihi zô hã: — E mahãta 'watébrémi, zudeu norĩ nhib'apito da, ipodo hã. Wasi, wa norĩ hã wa tô 'madâ'â za'ra ni, bâtâ pusizém niwĩmhã, zudeu norĩ nhib'apito da, ipotozé te te iwasu'u hã. Tahawa, wa tô we ai'aba'ré ni, ãma wawata za'ra da.

Mateu 2:8

Te te sadanharĩ za'ra pari, ma tô tãma rob'ru za'ra, Belẽ u si'aba'ré da. Ãne te duré tãma rob'ru za'ra: — Mo oto ai'aba'réi wa'aba, 'watébrémi zô asinharĩ pese za'ra wa'aba da. Sõpẽtẽ za'ra wa'aba wamhã, ma'ãpé apâ we asiwi ĩpo're pu'u aba za, te waihu'u da, wa hã duré itẽmemhã ĩmorĩ da, ãma ĩwata da, ĩzama. — Ãne ma tô tãma waihu'u za'ra, apito Erodi hã.

2 Pedru 1:19

Marĩ, wa te isabu za'ra zéb zarina, wa tô waihu'u za'ra ni, tô sena na Danho'reptui'wa na 'Re ihâimana u'âsi mono zadawa 'mahârâ 'rata 'wa norĩ te te dama 're irowasu'u za'ra mono zém na hã. Awẽ u te za wasi wawẽ hã 're pusi, dama rowa'a'wa da, isimirowa'a zarina ãma 're danomro wẽ mono da. Tane wapawapto'wa da, te wama 're hâimana, isadawa 'mahârâ'wa norĩ nhimirowasu'u hã, ãma 're iwanomro wẽ mono zéb da hã. Ãne wamhã, te za ãma 're irosa'rata u'âsi za'ra wa'aba mo.