Mateu 16:27 - ꞌRe Ihâimana Uꞌâsi Mono Zadawa Wasuꞌu

²⁷ Ti'ai ãma Dasiré Ipodo, niwapsi te za wei mo apâ, Timama zadawa para, hâiwa ãma tãma iromhuri'wa norĩ siré. Tamep si uburé marĩ hã da te 're i'manharĩ za'ra mono zéb zarina, te za dama hã arowairébé, iwẽ norĩ ma, duré iwasété norĩ ma.

Mateu 16:27 ပူးပေါင်းရင်းမြစ်များ

Provébiu 24:12

Tawamhã a hã ãté te za inha, niha na iromhâimanazé atei õ na hã. Tane nherẽ, 'Re ihâimana u'âsi mono ma hã waihu'u pese di, aipẽ'ẽ 're niha na we asima irosa'rata mono zé hã. Tahawa, te za tô õ hã imono bâ marĩ da te 're i'manharĩ za'ra mono zéb zarina, te te dama 're awa'âbâ.

Daniéu 7:10

Taha nho'remhã ma tô duré unhama na â hã tipraba. Tamemhã te duré da'ahâ uptabi na tahâimana za'ra ni, marĩ, da te tãma i'manharĩ za'ra da hã. Nemo te da'ahâ uptabi na duré daza'rata waihu'u ãna isõ're aimasam ni. Tawamhã da'ãma rowairébézé oto sãna'rata wamhã, ma tô ibaihâ hã sõzi za'ra ni.

Mateu 13:41

Dasiré Ipodo hã hâiwa ãma tãma romhuri'wa norĩ hã te za we satõrĩ za'ra ti'ai u, marĩ iwasédé hã da te 're i'manharĩ u'âsi za'ra mono norĩ hã simisutu aimawi te te ubumro za'ra da, 'Re ihâimana u'âsi mono nhib'a'uwẽ norĩ nhiti. Dawasédé hã da te 're 'manharĩ za'ra mono da, te te dama 're iroti za'ra mono norĩ zama te za ubumro za'ra, hâiwa ãma ĩma romhuri'wa norĩ hã. Wab'ru hã da te 're isano za'ra mono ne, te za da'ubumro za'ra za, õne haré.

Mateu 13:49

Tane te za dama tiromhâiba, rob'rãsutuzéb ãma hã. Hâiwa ãma romhuri'wa norĩ hã te za we dazô ai'aba'ré ti'ai u, dawasété na 're idahâimana u'âsi mono norĩ si te te da'ubumro za'ra da, 'Re ihâimana u'âsi mono nhimiroti te te 're i'madâ'â pese za'ra mono norĩ hawi te te dazani za'ra da hã oto, isiti za'ra 're dahâimana za'ra mono da.

Mateu 24:30

Ãne hã daré romhâimana pari, marĩ hã te za watobro hâiwa na, dama ipibu pese zéb da hã, ti'ai ãma Dasiré ipodo, apâ we imorĩzém na da te ãma waihu'u za'ra da oto. Tawapsi te za oto daro mono bâ dasiwi 'madâ'â ni, hâiwa'a na we morĩ ré. Tiwaihu'u pese na te za wei mo apâ, duré ihâiba na hã rowa'a za'ẽtẽ ré. Da te dasiwi 'madâ'â za'ra wamhã, te za 're dazadari za'ra, robzawi te, danhimiza'rese sô 're danhimipari za'ra mono õ wa.

Mateu 25:31

Tawamhã Zezusi hã ma tô duré romhâ ré tãma rowaihu'u siromo za'ra, ãne: — Ti'ai ãma Dasiré Ipodo hã niwapsi te za wei mo apâ, Timama zadawa para, hâiwa ãma tãma iromhuri'wa norĩ siré. Tawapsi te za danhib'apito simasisizém na hã 're sãmra, pire na te te ãma 're da'ab'madâ'â u'âsi mono da oto.

Mateu 26:64

Tawamhã Zezusi te asa tãma tinha, ãne: — Tahata ma te tô tane hã ãma iwaihu. Ãne wa za duré aima waihu'u za'ra wa'wa. Ti'a ãma Dasiré Ipodo hã te za asiwi 'madâ'â za'ra wa'wa za, iwaihu'u pese uptabi nhimire niwĩ 're isãmra mono na, dama pire na. Duré hâiwa'a na apâ we morĩ wamhã, te za ãne na i'madâ'â za'ra wa'wa.

Mateu 8:20

Tawamhã Zezusi te asa tãma tinha ãne: — Wapsã wawẽre ma, te ab're na isõrõwa hã tãma 're hâimana zara. Duré si norĩ te tizasi hã te te sima 're 'manharĩ za'ra, isõrõwa na tãma 're hâimana za'ra mono da. Tazahã, ti'ai ãma Dasiré Ipodo hã sõrõwa õ di, ãma 're iwa'utu mono zéb da hã. Hâiwi si te datẽmemhã 're morĩ u'â.

Marcu 14:62

Tawamhã Zezusi hã asa te tãma siwasu'u oto: — Ĩhe. Wa hã, Danho'reptui'wa. Wa hã tô duré 'Re ihâimana u'âsi mono 'ra. A norĩ wa'wa hã aihĩni te za i'madâ'â za'ra wa'wa, ti'ai ãma Dasiré Ipodo hã, 'Re ihâimana u'âsi mono nhimire niwĩ, 're isãmra mono na, iwaihu'u pese 'rata. Hâiwa'a na apâ we morĩ wamhã, te za ãne na i'madâ'â za'ra wa'wa za.

Marcu 8:38

Ãhã na da'ahâ na 'Re ihâimana u'âsi mono nhimiroti hã ma tô rẽme za'ra ni. Dawasété na si te oto 're danomro, ã nimosi dapoto té mono hã. Tawamhã ni'wam norĩ hã ĩzazei'wa na, duré ĩmreme wapari pese 'wa na, ãté dama 're siwasu'u za'ra mono õ di za, 're siséb za'ra mono õ'umnhasite. Ãté te za dawi 're si'udâ za'ra, ĩzazei'õ'wa ne. Taha wamhã, ti'ai ãma Dasiré Ipodo hã nimahã na za we apâ morĩ wamhã, Timama te ré rowa'a za'ẽtẽ ré, te za wei mo, hâiwa ãma tãma iromhuri'wa norĩ siré. Tawamhã apâ we morĩ wapsi, i'udâ'wa norĩ hã isazei'wa na te te waihu'u za'ra õ di za.

Luca 21:27

Tawamhã ti'ai ãma Dasiré Ipodo hã hâiwa'a na, te za wei apâ mo, danho'a. Tiwaihu'u pese uptabi na, te za wei mo apâ, duré ihâiba na hã rowa'a sa'ẽtẽ uptabi na.

Luca 22:69

Tane nherẽ, ti'ai ãma Dasiré Ipodo hã te za oto dama pire na 're sãmra, dama ipire uptabi 'rata. Te za oto isimire niwĩ 're sãmra, 'Re ihâimana u'âsi mono 'rata.

Luca 9:26

Ni'wam norĩ hã dapipa te, ĩzazei'wa na, duré ĩmreme 'madâ'â pese 'wa na, ãté dama 're siwasu'u za'ra mono õ di za, 're siséb za'ra mono õ'umnhasite. Ãté te za dawi 're si'udâ za'ra, ĩzazei'õ'wa newa. Ãne wamhã, nimahã na, ti'ai ãma Dasiré Ipodo hã ihâiba na rowa'a za'ẽtẽ na duré Timama te rowa'a za'ẽtẽ na duré hâiwa ãma tãma iromhuri'wa norĩ te rowa'a za'ẽtẽ na za we apâ morĩ wamhã, te za i'udâ'wa norĩ hã asa tizazei'õ'wa na sisi za'ra.

Zuwã 21:22

Tawamhã Zezusi asa te tãma tinha, ãne: — Apâ we ĩmorĩ õ ré, idâ'â'õzé te tãma pisutu wamhã, taha si ãma 're 'madâ'â mono õ di za, 're aimorĩ da, ĩzarina. Asi'ãma si te za 're irosa'rata mo, 're ĩmorĩzém na si 're aimorĩ da.

Zuwã 21:23

Tawamhã Zezusi te te 're isawi pese mono, dâ'â ãna 're ihâimana u'âsi mono na rowasu'u hã ma tô te te ropé, Zezusihi zazei'wa norĩ u. Tane nherẽ, Zezusi hã te te tãma pisutu õ di, idâ'â'õzé hã. Taré ma tô Pedruhu ma waihu'u: “Apâ we ĩmorĩ õ ré, idâ'â'õzé te tãma pisutu wamhã, taha si ãma 're 'madâ'â mono õ di za.” Ãne si ma tô ãma hã tãma tinha.

Zezusihi zadawa wasuꞌuꞌwa norĩ nhimiromhuri na robꞌuiꞌéré 1:11

Tawamhã ãne te tãma nharĩ za'ra: — Galiléa ãma 're aihâimana za'ra wa'aba mono norĩ, e marĩ da, te aimasap sina, hâimo ãma isawẽrẽ za'ra wa'aba mo. Zezusi hã 'Re ihâimana u'âsi mono, hâiwa u te te aiwi i'âri za'ra wa'wa hã, ta hã te za we apâ mo. Hâiwa u ãma morĩ ré, ma tô isawẽrẽ za'ra wa'aba mo. Hâiwa u ãma aiwi imorĩ aba ne, te za we apâ mo.

Roma 14:12

Tamep si, wa za oto wasi'uihâ na tãma wasiwasu'u za'ra ni wahâiba mono bâ, ti'ab ré wahâimanazém na, uburé marĩ hã wa te 're i'manharĩ za'ra mono zém na hã.

Roma 2:6

Marĩ hã da te 're i'manharĩ za'ra mono zéb uwaibaba, te za 'Re ihâimana u'âsi mono hã te te dama 're awa'âbâ, iwẽ na hã duré iwasété na hã.

1 Corĩtu 15:23

Cristu hã ma tô tihâiwa'utu na'rata. Niwa ti'ai u, za we apâ dazô morĩ wapsi, te za isib'a'uwẽ norĩ hã tihâiwa'utu za'ra.

1 Corĩtu 8:8

Tazahã, dasa hã wa te 're ihuri mono zéb zarina, duré wa te 're ihuri mono õ zéb zarina, te te 're wa'awẽsãmri mono õ di za, 'Re ihâimana u'âsi mono hã. Marĩ hã wa te 're huri tõ mono da, wa te wasima 're ipisutu za'ra mono zéb zarina, te te siwi 're wa'awẽ'õ mono õ di za. Duré marĩ hã wa te 're huri mono da, wa te wasima 're ipisutu za'ra mono zéb zarina, te te 're wa'awẽsãmri mono õ di za.

2 Corĩtu 5:10

E marĩ wa, wa za ãhã zô si, wa te 're rob'ruiwapari u'âsi za'ra, ti'ab ré hã. Niwapsi, wa za tô uburé Cristuhu nho're aimasam ni, te te wa'awaihu'u da, wahâimana wẽ na, duré wahâimana wasété na zama. Tame te za oto niha te te wama 're arowairébé, ti'ai ãma uburé marĩ, wa te 're i'manharĩ za'ra mono zéb zarina, iwẽ na, duré iwasété na.

Éfézu 6:8

Wapawa'âbâ ãna wawada'uri zarina si dama romhuri'wa 're iwahâimana za'ra mono norĩ, duré wawada'uri ãna wasi'uihâ na 're iwahâimana za'ra mono norĩ me zama, wa te dama 're i'manharĩ wẽ za'ra mono wa'rãmi, te za Wanhib'apito hã te te wama 're wa'âbâ za'ra. Ãhã wasu'u na te za 're asipo're pu'u u'âsi za'ra wa'aba mo.

Colosu 3:25

Ni'wam norĩ hã tiwasété si te te 're 'manharĩ u'âsi za'ra mono wamhã, taha wa'rãmi te za 'Re ihâimana u'âsi mono hã hâ za'ra, nimahã na hã. E marĩ wa. Ni'wam norĩ hã po're'õ na 're nomro u'âsi mono nherẽ, tinhimihâzé te te tãma ba'a waihu'u za'ra õ wa za, 'Re ihâimana u'âsi mono hã, dama pire na 're ihâimana za'ra mono norĩ hã, dama wapu na 're ihâimana za'ra mono norĩ zama.

1 Tesalonita 1:10

I'ra hã hâiwa hawi apâ we imorĩzéb zô, te 're simipari u'âsi za'ra, ab're hawi apâ te te ihâiwa'utu zô.” Ãne te wama aiwasu'u za'ra wa'wa. Tane tô. Ta hã Zezusi hã, Wanho'reptui'wa. Ma tô wanho'reptu za'ra, 'Re ihâimana u'âsi mono hã za te te idahâ za'ra zé wi hã.

1 Tesalonita 4:16

Tô sena, Wanhib'apito hã te za wei wazô si'ra za'ra, hâiwa hawi. Tawamhã te za tãma wa'ru za'ra, hâiwa ãma tãma iromhuri pese 'wai ma. Hâiwa ãma tãma iromhuri pese 'wa hã, te za wei hâ, hârâ 'rãihâ na, 'Re ihâimana u'âsi mono nhimnhihârâzém na. Tawamhã isazei'wa norĩ hã 're idâ'â za'ra mono norĩ hã, te za uimrehẽne apâ hã hâiwa'utu za'ra za.

Tiagu 5:7

Ĩsisãnawã norĩ, rowasédé hã 're hâimana mono nherẽ, te za asimi'ẽ na Wanhib'apito zô 're asimipari za'ra wa'aba mo, apâ wei morĩ õ ré. Ma'ãpé rosa'rata za'ra wa'aba, buru tede'wa na. Buru tede'wa norĩ hã te simi'ẽ na, tã zô 're simipari za'ra, a'ẽ ta'a zô, duré ipĩni 'rãsutuzéb zô zama. Simi'ẽ na te sô 're simipari za'ra, ropoto té te te 're i'ubumro za'ra mono zéb zô, tãma sawi za'ra wa, buru nho hã.

1 Pedru 1:17

A norĩ wa'wa hã, 'Re ihâimana u'âsi mono ma 're aimreme zusi aba mono wamhã, Wamama na te 're isisi za'ra wa'aba mo. Ta hã dahâimanazéb zarina da'ãma rowairébé'wa, te 're hâimana. Ãhã wa, 're idahâimana za'ra mono zéb zarina, te za dahâiba mono bâ te te dama ãma 're a'uwaimrami, dahâimana wẽ zarina, duré dahâimana wasété zarina zama. Tahawa, te za 're ihâimana mono zém na asiwi 're iwazéb za'ra wa'aba mo, Wamama hã, ti'ai ãma 're anomro aba mono ré.

1 Zuwã 2:28

Ĩ'ra norĩ, ãne wa za oto aima roti za'ra wa'wa. Zezusi hã apâ wei morĩ õ ré, ma'ãpé õhõ ãma si 're anomro u'âsi aba mono, niwa apâ za wei morĩ wa, tãma aipahi za'ra wa'aba tõ da, duré rowazép te, tãma ai'rãpo za'ra wa'aba tõ da.

Zuda 1:14

Duréihã Enoqui hã te 're hâimana, Adãhã 'ra nhihudu hã. Ta hã ma tô romhâ ré da'ãma waihu'u siro, 're idahâimana wasété za'ra mono norĩ ãma hã. Ãne ma tô da'ãma waihu'u siro: “Ma'ãpé waihu'u za'ra wa'aba. Wanhib'apito te za wei mo. Tãma iromhuri'wa norĩ hã ahâ uptabi na te za we isiré ai'aba'ré.

Apocalipsi 1:7

Ma'ãpé, asiwi waihu'u pese za'ra wa'aba. Zezusi hã te za wei mo, hâiwa'a na. Wei morĩ wamhã, uburé te za dasiwi 'madâ'â za'ra ni. I'a're wi, siwi iwa'ré'wa norĩ hã te za duré 'madâ'â za'ra, siwi iwĩrĩ'wa norĩ hã. Tawamhã da'upsãtã mono bâ te za sô aiwa'õ za'ra ni, daro mono bâ. Tô sena te za ãne hã tiromhâiba.

Apocalipsi 2:23

Pi'õ nhirã zarina 're ihâimana za'ra mono norĩ hã wa za duré hâ za'ra, si'utõrĩ da, isimiroti zarina ta norĩ hã we 're hâimana za'ra mono wa. Tawamhã ãne te tãma rob'manharĩ za'ra wamhã, te za uburé ĩzazei'wa norĩ hã ãma ĩwaihu'u za'ra, pi'uriwi marĩ hã da te 're 'manharĩ za'ra mono newa, duré pi'uriwi danhimirosa'rada hã da te 're 'manharĩ za'ra mono newa, uburé marĩ hã te dawi 're i'awaihu'u mono na hã. Uburé danhimirosa'rada hã ĩma waihu'u pese di, duré marĩ zô 're idanhimnhasi za'ra mono zéb zama. Tawamhã ni'wam norĩ hã marĩ iwẽ hã te te 're i'manharĩ za'ra mono zé wa'rãmip si, wa za marĩ iwẽ na te tãma 're awa'âbâ. Duré ni'wam norĩ hã marĩ te te 're i'manharĩ wasété za'ra mono zéb zarina si, wa za te 're ahâ za'ra.

Apocalipsi 20:12

Tawamhã wa tô duré 'madâ'â za'ra, 're idadâ'â za'ra mono hã, dama ipire norĩ hã, duré dama iwapu norĩ hã. Da'upsãtã mono bâ, te aihĩni pese danhib'apito simasisizém nho're aimasam ni. Â poré mono bâ, â na 're idasi'utõrĩ mono norĩ zama te aimasam ni, adâ 're ihâimana za'ra mono zém hawib zama. Tawamhã ibaihâ ahâ na ma tô sõzi za'ra ni, ti'ab ré uburé marĩ, da te 're i'manharĩ za'ra mono zém na rob'ui'éré ré hã, marĩ iwẽ na, duré marĩ iwasété na zama. Ma tô duré sõzi ibaihâ hã, 'Re ihâimana u'âsi mono 'rata za rowẽ na 're idahâimana u'âsi za'ra mono norĩ nhisi ré hã. Tawamhã ibaihâ na da te 're i'manharĩ wẽ za'ra mono zéb ui'éré zarina, ma tô da'ãma rowairébé za'ra ni. Da te 're i'manharĩ wasété za'ra mono zéb ui'éré zarina zama, ma tô aihĩni pese da'ãma rowairébé za'ra ni.