Mateu 16:16 - ꞌRe Ihâimana Uꞌâsi Mono Zadawa Wasuꞌu

¹⁶ Tawamhã Sima Pedru ma te ãne asa ãma sada'â: — A hã Cristu, 'Re ihâimana u'âsi mono te te i'aipisudu, Danho'reptui'wa da. A hã 'Re ihâimana u'âsi mono 'ra.

Mateu 16:16 ပူးပေါင်းရင်းမြစ်များ

Salmu 2:7

Tawamhã apito te tinha ãne: “Uburé Danhib'apito te te ĩma iwaihu'uzé, wa za dama sadawa 'mahâ. Uburé Danhib'apito, te ĩma tinha ãne: ‘A hã, ĩ'ra. Ã bâtâ na wa tô aimama na aima 're ĩhâimana mono da hã ĩsi'ãma a'ube.

Daniéu 6:26

Uburé a'uwẽ norĩ, ĩnhimi'madâ'âzéb 're daza'rui mono bâ 're i'aihâimana za'ra wa'aba mono ma, wa aima waihu'u za'ra wa'wa, ãne. Ma'ãpé Daniéu, 'Re ihâimana u'âsi mono ãma 're iwata mono hã asiwi 're wazé aba mono. E marĩ wa, õ hã 'Re ihâimana u'âsi mono idâ'â'õ, õne u'â 're ihâimana mono. Niwamhã duré dama i'rãnho'õmo na isimi'madâ'âzé hã isipru waihu'u õ. Duré niwamhã isiptetezé hã tiwi isi'utõrĩ waihu'u õ.

Mateu 1:16

Zaco hã Zuzéhé mama. Zuzé hã Mariaha mro. Ta hawi Zezusi hã ipodo, Cristu na da te 're isisi za'ra mono.

Mateu 14:33

Tawamhã isiré 're inomro mono norĩ hã ma tô ãma tiwata za'ra, Zezusihi ãma. Ãne te ãma tiwata za'ra: — Wanhib'apito, a hã tô sena 'Re ihâimana u'âsi mono 'ra, te 're aimo.

Mateu 16:15

Tawamhã Zezusi hã te duré ãne sadanharĩ za'ra: — A norĩ wa'wa hã bété, e niha ma tô asima 're ĩwasu'u za'ra wa'aba mo.

Mateu 26:63

Tane nherẽ, te Zezusi hã ari'iwi za. Tawamhã sasedoti ipire uptabi hã te duré sadanha, ãne: — E a hã Danho'reptui'wa da, 'Re ihâimana u'âsi mono te te i'aipisudu. E a hã 'Re ihâimana u'âsi mono 'ra. Ma'ãpé sena na wama asiwasu'u na. Duré wawi ai'udâ tõ, 'Re ihâimana u'âsi mono nho'a hã.

Mateu 27:54

Tawamhã Zezusi te te dawi i'madâ'â za'ra norĩ hã da'wapéi'wa norĩ hã, duré da'wapéi'wa norĩ wada'uri'wai me, ti'a isãsã iwatobro hã te te 'madâ'â za'ra wamhã, duré uburé ropipa iwairébé mono te te 'madâ'â za'ra wamhã, ma tô tipẽ'ẽwara pese za'ra. Tawamhã ãne te sima nharĩ za'ra: — Nare õ hã, tô sena 'Re ihâimana u'âsi mono 'ra.

Mateu 4:3

Tawamhã Wa'uburé ma tô itẽme wi. Itẽme wisi wamhã, te tãma tinha ãne: — Sena a hã 'Re ihâimana u'âsi mono 'ra wamhã, ma'ãpé ẽtẽ ma nharĩ, i'u'ẽtẽ wapu na aima si'manharĩ za'ra da.

Marcu 14:61

Tane nherẽ, te Zezusi hã ari'iwi za, te te ãma wa'rãmi ãna timreme na hã. Tawamhã 'Re ihâimana u'âsi mono ma da'ãma romhuri'wa ipire uptabi hã te duré sadanharĩ na sahu, sasedoti ipire uptabi hã, ãne: — E tô sena a hã, 'Re ihâimana u'âsi mono te te aipisudu, Danho'reptui'wa da. E tô sena 'Re ihâimana u'âsi mono 'ra, duré a hã.

Luca 2:11

à bâtâ na ma tô waptãrã Belẽ ãma, danho'reptui'wa da hã, Dawihi za'rui ãma. Ta hã 'Re ihâimana u'âsi mono te te ipisudu, Danho'reptui'wa da, uburé Danhib'apito da hã.

Zuwã 1:49

Tawamhã Natãnaéu asa te duré tãma tinha, ãne: — Rowahutu'wa, a hã 'Re ihâimana u'âsi mono 'ra. A hã uburé Izaraéu nhihudu norĩ nhib'apito.

Zuwã 11:27

Tawamhã Marta ma asa ãma tãma wa'rã ãne: — Ĩhe. Tô sena, wa aimreme hã saze. A hã Danho'reptui'wa da, 'Re ihâimana u'âsi mono te te i'aipisudu. A hã 'Re ihâimana u'âsi mono 'ra. Wahi'rata norĩ hã asô 're isimipari za'ra mono, a hã, ti'ai u we aimorĩ da hã.

Zuwã 20:31

Danho'reptui'wa da, 'Re ihâimana u'âsi mono te te ipisutu na, Zezusihi si 're saze za'ra wa'aba mono da, duré 'Re ihâimana u'âsi mono 'ra na 're saze za'ra wa'aba mono da, ma tô rob'ui'éré'wa hã ãne na ãma romnhihâtâ. E marĩ da, te za Zezusihi si asina 're i'umnhasi za'ra wa'aba mo. Rowẽ u'âsi ãma 're anomro aba mono da, duré 're atâ'â za'ra wa'aba mono ãna 're aihâimana u'âsi za'ra wa'aba mono da, 'Re ihâimana u'âsi mono 'rata, hâiwa ãma. Taha da, te za Zezusihi si asina 're i'umnhasi za'ra wa'aba mo.

Zuwã 6:57

Ĩmama hã ma tô we ĩzatõ, 're imorĩ u'â hã. Ta hã 're hâimana u'âsi mono wa, wa za duré wa hã 're ĩhâimana u'âsi. Tahawa, ĩ'ãma 're dasaihuri mono wamhã, te za ĩsine 're dahâimana u'âsi za'ra hâiwa ãma, 're dadâ'â za'ra mono ãna.

Zuwã 6:68

Tawamhã Sima Pedruhu si te asa tãma tinha, ãne: — Mare di. Wa te airẽme za'ra õ di za. Wa te airẽme za'ra wamhã, e 'wa tẽme, wa za 're wanomro, rowasu'uwẽ hã wa te 're iwapari za'ra mono da hã. Aimreme si wama pire za'ra di. Aimreme na si da te 're asaze za'ra mono wamhã, rowẽ u'âsi te za ai'ãma 're danomro. Te za duré hâiwa ãma 're dadâ'â za'ra mono ãna 're dahâimana u'âsi za'ra, 'Re ihâimana u'âsi mono 'rata.

Zuwã 6:69

'Re ihâimana u'âsi mono, ma tô we asatõ. Wa norĩ hã wa tô asaze za'ra ni. A hã 're aimorĩ wẽ uptabi di. Ãne na wa tô aiwaihu'u za'ra ni.

Zezusihi zadawa wasuꞌuꞌwa norĩ nhimiromhuri na robꞌuiꞌéré 14:15

— Aibâ norĩ, e marĩ da, te za tane i'manharĩ za'ra wa'wa. Tô'ã. 'Manharĩ za'ra wa'aba tõ. Wa norĩ hã aibâ, asine za'ra wa'aba hã. Zezusihi wasu'uwẽ na wa te aima rowasu'u za'ra wa'aba da, wa tô we wanem ni, atẽme za'ra wa'aba. Wa tô duré aima roti za'ra wa'aba ni, taré romhâiba na ãma 're aiwata za'ra wa'aba mono zém hawi 're aipizari za'ra wa'aba mono da, iwaihu'upese newa ãma 're aiwata tõ za'ra wa'aba mono da, 'Re ihâimana u'âsi mono niwĩ 're anomro aba mono da oto. Ta hã ropoto na'rata 'wa, duré hâiwa nhirõtõ 'manharĩ'wa, duré ti'ai 'manharĩ'wa, duré âporé 'manharĩ'wa. Uburé ti'ai ãma 're idanomro mono da hã, ma tô te te da'apoto, hâiwa nhirõtõ ãma 're idahâimana za'ra mono da zama, duré â 'râwi 're inomro mono da zama.

Zezusihi zadawa wasuꞌuꞌwa norĩ nhimiromhuri na robꞌuiꞌéré 8:36

Tawamhã bâdâdi na neb zahuré ré, ma tô â u aimasisi zahuré. Tawamhã aibâ hã ma tô â hã tãma 'mahâ, Filipihi ma: — Ãhãta â. E wanhimizahâri õ di za a'â, â dawabzuri hã ĩma 'manharĩ da.

Zezusihi zadawa wasuꞌuꞌwa norĩ nhimiromhuri na robꞌuiꞌéré 8:37

Tahawa, te Filipi hã asa sadanharĩ pese: — E tô sena, ma tô isazei pe. Sazei pese wamhã, â dawabzuri te za tô i'manha. Tawamhã aibâ, te duré tãma tinha, ãne: — Tô sena wa saze, Zezu Cristu, 'Re ihâimana u'âsi mono 'ra hã.

Zezusihi zadawa wasuꞌuꞌwa norĩ nhimiromhuri na robꞌuiꞌéré 9:20

Tawamhã awa'awi ma tô iwasu'uwẽ na dama ãma sãna'rata oto, rowahutuzé mono bâ, Zezusi hã 'Re ihâimana u'âsi mono 'ra, 're ihâimana mono na hã.

Roma 1:4

Duré 'Re ihâimana u'âsi mono 'ra na, wama waihu'u pese za'ra di, dâ'â uptabi nherẽ, Imama hã tiwaihu'u pese na te te hâiwa'utu wa. Duré Timama hawi we imorĩ na hã wama waihu'u pese za'ra di. Duré 're imorĩ wẽ na zama, wama waihu'u pese za'ra di.

2 Corĩtu 1:19

Zezu Cristu hã bété, 'Re ihâimana u'âsi mono 'ra hã. Ta hã tinhimiroti ahâ na te te ãma 're azaprĩ mono õ di. Tô õhõ si isimiroti hã te tãma 're hâimana. Tane duré, wa norĩ hã isadawa wasu'u'wa norĩ hã, Sila norĩ me duré Timotiu, tô i'uwaibaba si, wa tô wa te aima 're wasu'u za'ra wa'wa. Ta norĩ me hã, wa tô wa te aima 're sadawa wasu'u za'ra wa'wa, Cristu hã.

2 Corĩtu 3:3

Wanhimiromhuri zarina si, Cristu hã 're saze za'ra wa'aba mono wa, te taha na si da te 're wawaihu'u, Cristuhu zadawa para si, wa te dama 're iromhuri mono zém na hã, danhimirob'ui'éré hã da te 're sõré za'ra mono wa, marĩ hã da te ãma 're iwaihu'u za'ra mono ne. Tane nherẽ, marĩ na da te 're irob'ui'éré za'ra mono zéb zarina, 're saze za'ra wa'aba mono õ di, a norĩ wa'wa hã. 'Re ihâimana u'âsi mono hã isi'utõrĩ'õ pẽ'ẽzani nhimipawaptobzéb zarina si, ma tô 're isaze za'ra wa'aba mo. E ẽtẽ tõmo baihâ na rob'ui'éré zarina, ma tô 're isaze za'ra wa'aba mo. Mare di. 'Re ihâimana u'âsi mono pẽ'ẽzani hã marĩ hã aipẽ'ẽ 're te te aima 're iwaihu'u za'ra wa'aba mono zéb zarina si, ma tô oto 're isaze za'ra wa'aba mo, Cristu hã.

2 Corĩtu 6:16

Romhâiba 'manharĩ hã ãma 're idawata za'ra mono zé hã, e 'Re ihâimana u'âsi mono nhorõwa 'ri 're, te aré da te 're sa'ra, 'ri wa. Mare di. E marĩ wa. Aiwab õ wa, dama hã. Tane duré, wa norĩ hã 'Re ihâimana u'âsi mono ãma 're iwata za'ra mono õ norĩ siré, 're wahâimana waihu'u za'ra mono õ di za oto. E marĩ wa. 'Re ihâimana u'âsi mono hã wapẽ'ẽ 're, wa'ãma 're sõrõwa za'ra mono wa oto. Tahawa, 'Re ihâimana u'âsi mono nhorõwa ne, wa oto 're wahâimana za'ra wasiré isazei'wa norĩ hã, 'ri 'rãihâ wam ne, wapẽ'ẽ 're, 're sãmra mono wa oto. Duréihã 'Re ihâimana u'âsi mono zadawa 'mahârâ'wa norĩ hã ma tô imreme na rob'ui'éré za'ra, romhâ ré isib'a'uwẽ norĩ ãma hã, ãne: “Ĩnhib'a'uwẽ norĩ siré, wa za oto 're ĩhâimana u'âsi za'ra, 'râwi i'rata. Wa za duré tô isiré 're ĩmorĩ u'âsi za'ra. Isib'apito, wa za oto tãma 're ĩhâimana za'ra. Tawamhã ĩnhib'a'uwẽ te za duré ĩma 're hâimana za'ra.”

1 Tesalonita 1:9

Aiwasu'u wapari'wa norĩ hã, si'uihâ na te wama rowasu'u za'ra, atẽme iwasihutu aba zém na. Ma tô, u, asima iwawẽ za'ra wa'wa. Te duré wama aiwasu'u za'ra wa'wa, ãne: “Ta norĩ hã, 'Re ihâimana u'âsi mono te te 're sazei pese za'ra. Tahawa, romhâiba 'manharĩ ãma, nasi wata za'ra õ di oto. Te te tãma 're romhuri za'ra mono õ di duré oto. Ma tô rẽme pese za'ra. 'Re ihâimana u'âsi mono si, tô sena hã, u. Tahawa, isadawa wasu'u, ma tô saze za'ra. Tahawa, te taha na si te te tãma 're romhuri pese za'ra.

1 Timotiu 4:10

Taha da, wa za sada 're wanhiptete u'âsi za'ra, wa te 're dapawaptob za'ra mono da, da te ãma 're saze za'ra mono da. 'Re morĩ u'âsi wa, wa tô wasina wa te 're umnhasi za'ra, te te 're wapawaptob u'âsi za'ra mono da. Ta hã uburé Danho'reptui'wa, te 're hâimana. Isazei'wai mono bâ te za tô te te 're wa'anho'reptu.

Hebreu 10:31

Ni'wam norĩ hã 'Re ihâimana u'âsi mono nhib'rata, 're irere'e mono ne, te te 're hâ za'ra mono wamhã, tãma 're ropipa uptabi za'ra mono di za, ta norĩ ma hã.

Hebreu 12:22

Tazahã, a norĩ wa'wa hã tane 're aihâimana za'ra wa'aba mono õ di oto, ãhã na hã. 'Re ihâimana u'âsi mono u aipẽ'ẽ na 'râwi asina 're rob'umhutu za'ra wa'aba mono wamhã, hâiwa ãma Siã na ẽtẽ 'rãihâ nhisi u ne, ma tô 're irob'umhutu za'ra wa'aba mo. Duré hâiwa ãma Zeruzalẽ hã 'ri nho'õmo u ne, ma tô 're irob'umhutu za'ra wa'aba mo, 'Re ihâimana u'âsi mono 're isãmra u'âsi mono zéb u hã, hâiwa ãma tãma iromhuri'wa norĩ hã ahâ uptabi na, i'rata 're isi'ubumroi mono zéb u zama.

Hebreu 3:12

Ĩsisãnawã norĩ, 'râwi te za 're asi'madâ'â pese za'ra wa'aba mo, 'Re ihâimana u'âsi mono nhimiroti hã asimirosa'rata wasété aba zarina, asiwi 're wẽ'õ za'ra wa'aba mono wa, tiwi 're aipizari za'ra wa'aba mono tõ da, aré i'rata 're dasi'ubumroi u'âsi mono da, dapisutu'wai wi hã.

Hebreu 9:14

Ãne hã duréihã danhimizama wapru na dahâiba mana wawi marĩ na 're idasihâiba wasété za'ra mono parizéb da hã, wẽ nherẽ, taha nhipai u, Cristuhu wapru si siptete uptabi di, dawasété parizéb da hã oto. E marĩ wa. Taha si wasété ãna 're hâimana u'âsi mono wa. Tahawa, 'Re ihâimana u'âsi mono pẽ'ẽzani waihu'u pese zarina ma tô wazada sisõmri za'ra 'Re ihâimana u'âsi mono ma, wazada za'ra dâ'â da, tiwapru na te te 're wa'a'upsõi mono da, wapẽ'ẽ 're wadâ'â u'âsi ne 're iwanomro mono zéb zarina, wawasété si wa te 're 'manharĩ za'ra mono wa, 'râwi 're iwasiwẽ'õ u'âsi za'ra mono zé hã te te oto wama 're apari mono da. Taha zarina, wa za oto 'Re ihâimana u'âsi mono ma si, wa te 're romhuri za'ra, wawẽ na wahâimanazém na wa te oto 're upa za'ra mono ãna.

1 Zuwã 4:15

Ni'wam norĩ hã te za ãne te te dama 're wasu'u za'ra: “Zezusi hã 'Re ihâimana u'âsi mono 'ra. Ta hã ma tô 'Re ihâimana u'âsi mono hã we ti'ai u satõ, Danho'reptui'wa da.” Ãne na ni'wam norĩ hã te te dama 're wasu'u za'ra mono wamhã, ta norĩ 'ratap si te 'Re ihâimana u'âsi mono hã 're hâimana, 'râwi. Ta norĩ si te duré 'Re ihâimana u'âsi mono siré hã 're hâimana u'âsi za'ra, 'râwi.

1 Zuwã 5:20

Ãne wa tô duré waihu'u za'ra ni. Zezusi hã, 'Re ihâimana u'âsi mono 'ra hã ma tô wei mo, ti'ai u. Ta hã ma tô tinhimiroti na te te 're wa'apawapto, 'Re ihâimana u'âsi mono hã tô sena uptabi hã wa te 're iwaihu'u pese za'ra mono zéb da hã. I'ra ãma, Zezu Cristuhu ãma 're wanomro mono wa, wa duré Imama ãma 're wanomro, tô sena uptabi 're ihâimana mono ãma. Zezusi hã, ta hã uburé Danhib'apito uptabi. Ta hã dapẽ'ẽ 're dadâ'â ãna 're idanomro u'âsi mono zé hã, te te dama 're i'apisutu mono. Ãne na wa tô wasiwi waihu'u pese za'ra ni.

1 Zuwã 5:5

E 'wam norĩ hã te za tawamhã 'Re ihâimana u'âsi mono wẽ'õ'wa norĩ zada hã, siptete sina 're hâimana za'ra. Zezusi hã, 'Re ihâimana u'âsi mono 'ra na te te 're isaze za'ra mono norĩ si, te za sada 're hâimana u'âsi za'ra, 'Re ihâimana u'âsi mono wẽ'õ'wa norĩ zada hã.

Apocalipsi 7:2

Taha parimhã, wa tô duré 'madâ, hâiwa ãma romhuri'wa aimawi hã. Bâtâ pusizém hawi ma tô we sihâi'ré. Ta hã te rob'ui'éré siro hã tinhib'rata we 're ti'â, 'Re ihâimana u'âsi mono nhib'a'uwẽ ãma te te 're i'aza'ra mono da hã. Tawamhã maparane si'uiwa na hâiwa ãma romhuri'wa norĩ hã te 'mahârâ za'ra, mreme 'rãihâ na, ãne: — Tô'ã. Ti'ai ma, rob'manharĩ za'ra wa'aba tõ a'â, â poré ma zama, duré wede ma zama. Wanhib'apito 'Re ihâimana u'âsi mono nhib'a'uwẽ hã a'â wa te a'uihâ ui'éré mono, pibui pese da, 'Re ihâimana u'âsi mono nhimihâzém na dazu te te robzépata za'ra tõ da. — Ãne te 'mahârâ za'ra hâiwa ãma romhuri'wa hã, tinhib'rata rob'ui'éré siro te te 're i'râ'âri hã. Tawamhã ma tô oto a'uihâ ui'éré, bâtâ pusizém hawi iwatobro hã tisiré norĩ me. Maparane si'uiwa na hâiwa ãma romhuri'wa norĩ ma, ma tô 'Re ihâimana u'âsi mono hã tãma 'ru za'ra aré, isimi'manharĩ waihu'u pese zém na ti'ai ma, te te rob'manharĩ za'ra da aré, duré â poré ma, te te rob'manharĩ za'ra da. Tane nherẽ, hâiwa ãma romhuri'wa aimawi hã ma tô ãma pa'uwati za'ra, ti'ai ma, te te a'â rob'manharĩ tõ za'ra da.