Mateu 15:30 - ꞌRe Ihâimana Uꞌâsi Mono Zadawa Wasuꞌu

³⁰ Tame sãmra ré, ma tô da'ahâ uptabi na duré itẽmemhã aihutu ni. Ihâzé ré norĩ hã ma tô itẽme da te simro, imorĩ'õ norĩ hã, duré itob'a norĩ hã, duré i'rãtẽire norĩ hã, duré imreme'õ norĩ hã. Uburé siwa'ru ma tô ihâzé ré norĩ ãma dasito, ipapara da te sõré da. Tawamhã uburé ma tô da'apese, Zezusi hã.

Mateu 15:30 ပူးပေါင်းရင်းမြစ်များ

Salmu 103:3

Uburé Danhib'apito, ma'ãpé ĩpẽ'ẽ 're, uburé 're ĩwasété mono zé hã ĩ'ãma 're ab'madâ'â mono tõ. Duré ma'ãpé ĩpese, uburé 're ĩhâzé mono hawimhã.

Marcu 9:43

Tahawa, wa za ãne aima waihu'u za'ra wa'wa. Asib'rata na aiwasédé hã 're waibui wa'aba mono wamhã, asib'rada asiwi 're isihâri za'ra wa'aba mono ne, te za oto 're anomro wẽ wa'aba mo. Asib'rada misire ré si rowẽ uptabi u, 're asisisi aba mono wamhã, aima 're rowẽ za'ra wa'aba mono di za, hâiwa ãma hã. Asib'rata zahuré ré, ropipa u 're asisisi aba mono wamhã, unhama u'âsi u, aima 're ropipa uptabi za'ra wa'aba mono di za.

Luca 14:13

Tahawa, dasaihurizé hã dama 'manharĩ wamhã, te za isibrob'õ norĩ zô aihârâ za'ra, duré imorĩ'õ norĩ zô, duré i'rãtẽire norĩ zô, duré itob'a norĩ zô.

Zezusihi zadawa wasuꞌuꞌwa norĩ nhimiromhuri na robꞌuiꞌéré 2:22

Tawamhã Pedru hã ma tô duré ãma uzusi, tinhimirowasu'u na, ãne: — Wasiré Izaraéu nhihudu norĩ, ĩwapari pese za'ra wa'aba za. Zezusi hã Nazaré ãma aré 're isãmra mono hã, ta hã, 'Re ihâimana u'âsi mono zadawa para, ma tô te te 're da'apawapto, danho'a. Marĩ iwẽ hã dama i'manharĩ waihu'u'õ hã ma tô te te dama 're ab'manharĩ. Tô sena, õ hã 'Re ihâimana u'âsi mono zadawa para, te te dama 're i'ab'manharĩ mono zém na da te 're waihu'u za'ra mono da, ma tô Timama waihu'u pese zarina marĩ iwẽ hã te te dama 're ab'manharĩ. Ai'rata 're hâimana za'ra wa'aba mono wa, ma tô ãne na hã ãma asiwi i'madâ'â waihu'u 'wa.