Mateu 15:11 - ꞌRe Ihâimana Uꞌâsi Mono Zadawa Wasuꞌu

¹¹ Uburé marĩ na 're dasaihuri mono wa, dapẽ'ẽ 're, 're isisisi mono na 'râwi dapẽ'ẽ 'remhã 're dasiwasété za'ra mono õ di za. Dapẽ'ẽ hawim na danhimirosa'rata wasété zarina, da te dasima 're nharĩ wasété za'ra mono wapsi, te za 'râwi dapẽ'ẽ 'remhã 're dasiwasété za'ra.

Mateu 15:11 ပူးပေါင်းရင်းမြစ်များ

Salmu 10:7

Imreme wasédé hã isadawa 'remhã 'masisi uptabi di, isadawa nhipe hã, duré te te dama 're i'amhâzépa mono zé hã. Ta hã te da'ãma ro'wa'rutu na si, duré marĩ iwasété na si 're mreme u'âsi.

Mateu 15:10

Tawamhã Zezusi ma tô sima dazô hâ, isimirowasu'u hã da te wapari za'ra da. Ãne te taha wamhã dama tinha: — Ma'ãpé, ĩwapari pese za'ra wa'aba za, marĩ hã ãma asiwi waihu'u aba da hã.

Mateu 15:12

Tawamhã isiré 're inomro mono norĩ, ma tô Zezusihi u hã itẽme ubumro, te te ãma siwi sadanharĩ da, ãne: — E ma tô asina iwaihu'u za'ra. Farizeu norĩ hã ma tô siwi aimreme wẽ'õ pese.

Marcu 7:15

Uburé marĩ na 're dasaihuri mono wamhã, taha na 're dasiwasété za'ra mono õ di za. Dapẽ'ẽ hawim na danhimirosa'rata wasété zarina, da te dasima 're nharĩ wasété za'ra mono wapsi, te za 're dasiwasété za'ra, 'râwi.

Roma 14:14

Wa hã Wanhib'apito Zezusihi ãma 're ĩhâimana mono wa, wa tô ĩsina waihu'u sena na, uburé dasa iwẽ na hã, duré iwasété õ na. Tane nherẽ, ni'wam norĩ hã te za ãne hã te te ãma 're rosa'rata upa za'ra: “Ã hã romnhi hã, wasétére di. 'Re ihâimana u'âsi mono ma hã wẽ õ di, wa te 're ihuri mono da hã.” Ãne hã ni'wam norĩ hã te te ãma 're rosa'rata za'ra mono wamhã, õ norĩ ma si, romnhi hã wasété di tô. Tane nherẽ, te te siwi 're wẽ'õ za'ra mono nherẽ, te te 're huri mono wamhã, dawasédé te wasu'u.

Roma 14:17

E marĩ wa. 'Re ihâimana u'âsi mono hã isazei'wa norĩ ãma 're isib'a'uwẽ mono zé hã, dasa hã da te 're iwẽ'õ za'ra mono zé, te te wasu'u õ di. Uburé marĩ hã da te 're i'âhuri mono zéb zama te te wasu'u õ di duré. E marĩ te wasu'u tawamhã, 'Re ihâimana u'âsi mono, da'ãma 're isib'a'uwẽ mono zé hã. Ta hã 'Re ihâimana u'âsi mono nhimiroti zarina 're idanomro wẽ mono zé, te wasu'u. Duré 'Re ihâimana u'âsi mono, Tipẽ'ẽzani na te te 're ida'apawapto mono zéb zarina, rowẽ uptabi na 're idanomro mono zé, te wasu'u, dato sina.

Roma 14:20

Tawamhã dasa siwa'ru 're huri aba mono wa, 'Re ihâimana u'âsi mono, danhiptete sina ãma 're idanomro mono zéb da, te te da'ãma 're iromhuri wẽ mono zé hã tiwi 're uprosi za'ra wa'aba mono tõ da, ãté 're huri aba mono õ di za, siwa'ru dasa na, romnhi hã. Tô sena uburé dasa hã iwẽ si da te 're ihuri mono da hã. Tane nherẽ, dasa hã siwa'ru 're huri aba mono ré, asiré isazei'wa nherẽ, sib'uware na 're inomro mono norĩ hã te te 're ai'madâ'â za'ra wa'aba mono wa, asarina wa'aba tiwasété na 're si'marõpãrĩ za'ra mono wamhã, tawamhã, aiwasédé te za tô 're i'manharĩ za'ra wa'aba mo.

1 Timotiu 4:3

Ta norĩ hã te za dasina 're idamro za'ra mono zé hã dawi sawi za'ra, dasina 're damro za'ra mono tõ da, dasiwaprosi 're dahâimana za'ra mono da. Te za duré dasazé hã dawi sawi za'ra, marĩ mono bâ 're dasaihuri tõ mono da, 'Re ihâimana u'âsi mono hã uburé dasazé hã te te apoto mono nherẽ, ãma 're idasaihuri mono zéb da hã. Isazei'wai mono bâ wama waihu'u pese za'ra di, dasazém na isimiroti hã. Ãne wa, sõpru wa, ãma 're wawata za'ra mono pari, wa za isimipoto na 're wasaihuri.

Titu 1:15

Danhimirosa'rata wẽ u'âsi 're danomro mono wamhã, uburé marĩ iwẽ na 'râwi ãma 're dasiwasété za'ra mono õ di za. Tane nherẽ, danhimirosa'rata wasété u'âsi 're danomro mono wamhã, marĩ wẽ nherẽ, da te ãma 're rosa'rata wasété za'ra mono wamhã, te za 'râwi ãma 're dasiwasété za'ra, isazei'õ'wa na 're idahâimana za'ra mono norĩ hã. Tane nherẽ, dawasété na 'râwi 're dasiwaihu'u za'ra mono ãna, te za 're dahâimana za'ra.

Hebreu 13:9

Cristuhu wasu'uwẽ upana, danhimiroti aimawi na da'ãma 're sasõmri za'ra wa'aba mono õ di za, senai'õ na da te dasima 're irowasu'u za'ra mono na hã. 'Re ihâimana u'âsi mono hã tinhoprubzéb zarina, iwẽ uptabi hã te te wama 're i'apisutu mono na si, wa za wapẽ'ẽ 're ãma 're wanhiptete u'âsi za'ra. Taha si wa norĩ hã wama iwẽ uptabi za'ra hã. Dasa hã da te dasiwi 're isawi za'ra mono na roti hã da te 're i'madâ'â za'ra mono na, ãma 're danhiptete waihu'u za'ra mono õ di, dapẽ'ẽ 'remhã. E marĩ wa. Taré na dasa hã 're hâimana mono wa. Taha na ãma 're dasipawapto waihu'u za'ra mono õ di tô, dasa da te dasiwi 're isawi za'ra mono na roti na hã.

2 Pedru 2:18

Ta norĩ hã simiroti pire newa, 'râwi sina 're wata za'ra mono sina, te za te te dama 're rowasu'u za'ra, da te dasima 're iwẽ za'ra mono zéb uwaibaba, 're dahâimana wasété za'ra mono da, dama ãma 're rowẽ za'ra mono da newa. Ãne wamhã, nimosi isazei'õ'wa norĩ hâimana wasétézém hawi 're idasipizari za'ra mono norĩ hã, te za oto te te ãma 're sasõmri za'ra, senai'õ na rowasu'u'wa norĩ ãma hã.