Mateu 13:46 - ꞌRe Ihâimana Uꞌâsi Mono Zadawa Wasuꞌu

⁴⁶ Tawamhã ẽtẽwaipo iwa'âbâ za'ẽtẽ uptabi hã te te 'masãmri wamhã, uburé tinhibro hã ma tô dama wede, ẽtẽwaipo hã te te sima uipra da. Ãne 'Re ihâimana u'âsi mono, duré da'ãma 're isib'a'uwẽ mono zé wasu'u hã.

Mateu 13:46 ပူးပေါင်းရင်းမြစ်များ

Provébiu 2:4

Ma'ãpé ẽtẽ waipo prã prata zô, niha wamhã, marĩ wa'âbâ za'ẽne sima'uri pese na 're isimi'wara mono zô 're idarĩtĩ za'ra mono ne, te za ãhã zô si asima 're airĩtĩ mo.

Mateu 13:44

Tawamhã ãne te duré tãma rowasu'u za'ra: — 'Re ihâimana u'âsi mono, da'ãma 're isib'a'uwẽ mono zém na, wa za duré aima ãma romnhimiré'é za'ra wa'wa, ãne. Aibâ hã daburu na te te romhuri ré, ma tô ẽtẽ'ubuzi iwa'âbâ za'ẽtẽ uptabi hã 'masã, ti'ai 'rowi ni'wa te te aré dawi isuwa hã. Te te sãmri wamhã, ma tô duré apâ dawi suwa inomrozéb ãma, da te sãmri tõ da. Tawamhã toi uptabi wa, ma tô uburé tinhibro hã dama wede, buru tô õ hã te te dawi uipra da, ẽtẽ'ubuzi, iwa inomro hã te te sima âri da.

Mateu 13:45

— Ãne duré, 'Re ihâimana u'âsi mono, da'ãma 're isib'a'uwẽ mono zé hã. Aibâ hã ma tô sima wẽ, dasima danhipesezé ẽtẽwaipo iwa'âbâ za'ẽne hã te te dawi 'manhopẽtẽ wa, te te sima uipra da, dama i'madâ'â ze hã.

Mateu 13:47

— Ãne hã duré, 'Re ihâimana u'âsi mono, da'ãma 're isib'a'uwẽ mono zé hã. Tepe mrami'wa norĩ hã ma tô abazipara hã sô siwi time, isõ'ui wa. Te te siwi mei wamhã, ahâ na ma tô siwi ãma 'mai'âri za'ra, ipoto mono bâ, tebe hã. Tawamhã tebe hã ahâ uptabi wamhã, ma tô abazipara hã siwi tisa, â zada'ré u. Tame ma tô oto tebe hã iwẽ si siwi waibu, si'õtõ 're, te te siwi séme da. Tebe siwamnarĩ norĩ da te 're ihuri mono õ hã ma tô duré taré siwi sãmra.

Zezusihi zadawa wasuꞌuꞌwa norĩ nhimiromhuri na robꞌuiꞌéré 20:24

Tane nherẽ, ĩhâiba ré 're ĩmorĩ siroptu da hã, ĩhâiba te ĩsima sawi õ di, tarére wa, ĩma hã. Wanhib'apito Zezusi hã ma tô ĩnhimiromhuri hã ĩma tisõ, 'Re ihâimana u'âsi mono nhimizawi pese zé wasu'u na te dama 're sadawa wasu'u mono da. Ĩnhimiromhuri hã te tãma ãma uwaimrami da, wa tô ĩsima wẽ pese, taha si.

Galata 6:14

Tanei õ di, wa hã. Wanhib'apito Zezu Cristuhu ãma si, wa za 're ĩwata u'âsi, wedepo'o nhonhi'rãmi na wazada idâ'â ãma. Tahawa, tiza'ozém na wazada dâ'â wa, ĩwi 're idadâ'â za'ra mono ne, duré wa hã dawi 're ĩdâ'â mono ne, ti'ai ãma danhimirosa'rata na hã oto 're ĩhâimana mono õ di.

Éfézu 3:8

Ĩwana isazei'wa norĩ hã ĩwẽ na te sipa za'ra õ di. Ta norĩ si ma tô tiwẽ na ĩnhipa za'ra. Tane nherẽ, ma tô ĩpisutu, zudeu'õ norĩ ma te tãma 're wasu'u za'ra mono da, iwẽ hã sa'ẽtẽ na Cristuhu ma 're ihâimana mono hã dama ãma 're isõpru mono zéb da hã.

Colosu 2:3

Cristu hã rowasu'u dama iwaihu'u'õ na 'Re ihâimana u'âsi mono nhimiroti wẽ wasu'u waihu'u'wa, ta hã. Ẽtẽ'ubuzi iwa'âbâ za'ẽne hã ti'ai 'rowi 're simi'wara mono nherẽ, da te oto 're isõpẽtẽ za'ra mono ne, ma tô Cristu hã te te dama 're wasu'u hâi'ré sõ'awi, 'Re ihâimana u'âsi mono nhimiroti wẽ wasu'u hã.

Apocalipsi 18:12

Ãne aré rowede'wa norĩ wi, da te 're i'uipra za'ra mono hã; ẽtẽ waipo pré oru hã, duré ẽtẽ waipo prã prata hã, duré ẽtẽ'ubuzi iwa'âbâ za'ẽtẽ upsãtã mono bâ, duré a'é tõmo wawẽ ne itob'a 'manharĩ hã, iwa'âbâ za'ẽne hã. Ãne duré, aré rowede'wa norĩ wi, da te 're i'uipra za'ra mono hã; zazahâ ihâi wẽ uptabi 'manharĩ hã, ihâ prépe hã duré ihâ uzétâ iwa'âbâ za'ẽne hã. Duré wede hã iwa'âbâ za'ẽtẽ upsãtã mono bâ, te te dama 're wede za'ra aré, duré wede wa'âbâ za'ẽtẽ 'manharĩ mono hã, duré uhâ nhisi'reti 'wa'ratahi 'manharĩ mono hã, duré ẽtẽ topsada brõzi 'manharĩ mono hã, duré isi'uwazi tete 'manharĩ mono hã, duré ẽtẽ su'u rã 'manharĩ mono hã.

Apocalipsi 21:21

Duré 12 na 'ri nho'õmo 'wawi wa'ra 'ridawa za'ẽtẽ mono hã, a'é tõmo wawẽ ne itob'a 'manharĩ mono hã, misi si. Duré 'ri nho'õmo 'ri wa'wa 'ri nhi'riti wawẽ hã ẽtẽ waipo pré oru uptabi na i'manharĩ hã, iwazari õ na. Aiwa simhi rã ne sarob'a uptabi di.