Mateu 13:23 - ꞌRe Ihâimana Uꞌâsi Mono Zadawa Wasuꞌu

²³ Duré ni'wam norĩ hã aiwa amnho ti'ai wẽ wa irere'e mono ne, te za 're hâimana za'ra. Ta norĩ hã 'Re ihâimana u'âsi mono zadawa wasu'u te te 're wapari za'ra mono wamhã, te za te te sima 're wẽ uptabi za'ra, te te 're waihu'u pese za'ra mono da. Tawamhã rowede i'rãi pese uptabi ne, te za ta norĩ hã wẽ u'âsi 're hâimana za'ra.

Mateu 13:23 ပူးပေါင်းရင်းမြစ်များ

Mateu 12:33

— Rowede hã wẽ wamhã, te za 're 'rãi wẽ u'âsi za'ra. Rowede hã wasété wamhã, te za duré 're 'rãi wasété u'âsi za'ra. Rowede, 're i'rã za'ra mono zéb zarina te za ãma waihu'u za'ra ni, rowede iwẽ na, duré rowede iwasété na.

Mateu 13:8

Ti'ai wẽ wa, ma duré nima norĩ hã rere'e. Tawamhã oto 'wanhipré 'rãihâ mono wamhã, ma tô ti'rã za'ra. Duré 'rãi mono wamhã, nima niwĩmhã 'rãi ahâ prãi mono di, amnho hã. Duré nima niwĩp si hã 'rãi ahâ mono di. Duré nima niwĩmhã 'rãi pese uptabi mono di.

Mateu 3:10

Hâtâra hã te za oto ni'wa hã sarõtõ, wedepa nhihârizéb da hã. Uburé wede hã 're i'rãi pese za'ra mono õ hã te za te te ãma 're anhihâri. Tawamhã unhama u te za te te 're anhamra. — Ãne te dama ãma simiré'é Zuwã hã, 'Re ihâimana u'âsi mono nhimihâzém na hã.

Mateu 3:8

Sena na aiwasédé hã irẽme za'ra wa'aba zém na, da te 're aiwaihu'u za'ra wa'aba mono da, te za oto 're anomro wẽ wa'aba mo.

Marcu 10:15

Tô sena, wa aima waihu'u za'ra wa'wa. Ni'wam norĩ hã ai'uté dama iwapu ne, 're hâimana za'ra mono õ wamhã, 'Re ihâimana u'âsi mono, da'ãma 're isib'a'uwẽ mono zéb u, 're sisisi mono õ di za.

Marcu 4:20

Ni'wam norĩ hã aiwa amnho hã ti'ai wẽ wa irere'e mono ne, te za duré 're hâimana za'ra. Ta norĩ hã 'Re ihâimana u'âsi mono zadawa wasu'u hã te te 're wapari za'ra mono wamhã, te za te te sima 're wẽ pese za'ra. Tawamhã rob're i'rãi pese uptabi ne, te za hâimana wẽ uptabi na duré ta norĩ hã 're hâimana za'ra.

Luca 13:9

Wahub amo na 'rãi wamhã, wẽ di za. Duré ãne nherẽ 'rãi õ wapsi, te za ĩma i'ru, te sizâri da oto.” Ãne, te romhuri'wa hã tinha, buru tede'wai ma.

Luca 8:15

Amnho hã ti'ai wẽ wa, te te i'anhamra mono hã, aimawi a'uwẽ, te wasu'u. Ta norĩ hã ãté te za tipo're na te te 're wapari za'ra, 'Re ihâimana u'âsi mono zadawa wasu'u hã. Tawamhã te za te te 're 'madâ'â pese za'ra. Õne haré, te za isimiroti na 're nomro. Tawamhã rob'rã i'rãi wẽ uptabi ne, hâimana wẽ uptabi na, te za oto 're hâimana za'ra. Ãne amnho potozé wasu'u na, wa aima ãma simiré'é za'ra wa'wa.

Luca 8:8

Ti'ai wẽ wa, ma duré nima norĩ hã rere'e. Ta hã ma tô duré oto 'rã. 'Rãi mono wamhã, 'rãi pese uptabi di, rob're hã. Te duré dama tinha: — Asimipari pese za'ra wa'aba wamhã, ma'ãpé ĩwapari pese za'ra wa'aba ĩnhimirowasu'u na hã, waihu'u za'ra wa'aba da.

Zuwã 15:16

A norĩ wa'wa hã asima ĩwẽ na'rata za'ra wa'aba õ di, ĩsiré 're anomro aba mono da. Wa hã wa tô ĩsima aiwẽ na'rata za'ra wa'wa, ĩsiré 're anomro aba mono da. Wa tô duré aipisutu za'ra wa'wa, datẽme 're anomro aba mono da, da'ãma asimiromhuri 'wa hã ĩma ãma 're uwaimrami za'ra wa'aba mono da. Tawamhã asimiromhuri za'ra wa'aba na hã robaba õ di za. Ãne wamhã, Ĩmama te za te te 're aiwapari u'âsi za'ra wa'wa. Tawamhã uburé marĩ hã te te aima 're iwẽ za'ra wa'aba mono zéb uwaibaba si, tiwi 're rowaptẽrẽ za'ra wa'aba mono wamhã, te za te te aima ãma 're a'uwaimrami 'wa.

Zezusihi zadawa wasuꞌuꞌwa norĩ nhimiromhuri na robꞌuiꞌéré 16:14

Tame te pi'õ hã nhamra, Lidia na isisi hã. Tiatira na 'ri nho'õmo nhisi ãma 're isãmra mono aré ta hã, Lidia hã. Zazahâ iwẽ hã te te dama 're i'awede mono, ihâpré pe hã. Ta hã, 'Re ihâimana u'âsi mono ãma 're iwata mono duré. Tawamhã Pauluhu nhimirowasu'u te te wapari wamhã, Wanhib'apito hã ma tô pawapto, te te ãma saze da.

Zezusihi zadawa wasuꞌuꞌwa norĩ nhimiromhuri na robꞌuiꞌéré 17:11

Beréa ãma 're isi'ubumroi mono norĩ nhimirosa'rada hã, wẽ di. Tesalonita ãma 're isi'ubumroi mono norĩ nhimirosa'rata nei õ di. Zezusihi wasu'uwẽ hã ma tô wapari pese za'ra. Awẽ sidâpâsi, ma tô 'Re ihâimana u'âsi mono zadawa wasu'u na rob'ui'éré 'rada hã da te 're sõré za'ra, Paulu norĩ nhimirowasu'u hã tô sena zô da te ãma 're rosa'rata pese za'ra mono da.

2 Corĩtu 9:10

E 'wa hã te robzâ hã robzuri'wa norĩ ma, te te 're anhomri. E 'wa hã, te dasazé hã te te dama 're anhomri. Ta hã, 'Re ihâimana u'âsi mono. Tane te za duré isõprubzé hã aima 're sa'ẽtẽ za'ra wa'wa, dama 're asõprub za'ra wa'aba mono zé wa'rãmi, sa'ẽtẽ uptabi na oto dama ãma 're asõprub za'ra wa'aba mono da, nimahã na hã.

Filipu 1:11

Tahawa, te za iwẽ si 're i'manharĩ u'âsi za'ra wa'aba mo, Zezu Cristuhu nhimipawaptobzéb zarina si. Ãne na ãma 're aihâimana wẽ za'ra wa'aba mono zém na da te 're aiwaihu'u za'ra wa'aba mono wamhã, 'Re ihâimana u'âsi mono ãma si te za 're dawata za'ra. Tane da, wa ai'ãma 're ĩmreme u'âsi za'ra wa'wa, 'Re ihâimana u'âsi mono ma hã.

Filipu 4:17

E asõprub za'ra wa'aba zém na ĩma ãma sahu za'ra wa'aba da, wa tô ãne hã aima waihu'u za'ra wa'wa. Mare di. Isãna'rata hawi ĩ'ãma 're ana wa'aba mono zéb zarina, 'Re ihâimana u'âsi mono si, iwẽ na za te te aipawa'âbâ za'ra wa'aba zéb da na te te aima ãma sa'ẽtẽ za'ra wa'aba da si, wa tô te ai'ãma 're 'madâ'â u'âsi za'ra wa'wa.

Colosu 1:10

Tawapsi, te za Wanhib'apito zazei'wa hâimanazéb zarina 're anomro wẽ wa'aba mono zém na, tãma ãma asina 're i'uwaimrami za'ra wa'aba mo. Marĩ iwẽ si 're 'manharĩ za'ra wa'aba mono wamhã, Wanhib'apito hã te za toi uptabi na aihâimanazém na te te 're ai'uzei pese za'ra wa'wa. Tawamhã 're aihâimana wẽ za'ra wa'aba mono zém hawi, te za tô marĩ 're i'manharĩ wẽ za'ra wa'aba mono zém na asima 're isa'ẽtẽ za'ra wa'aba mo. Tawamhã 'Re ihâimana u'âsi mono hã iwaihu'u za'ra wa'aba zém na te za duré asima 're isa'ẽtẽ za'ra wa'aba mo, asi'uihâ na.

Colosu 1:6

Cristuhu wasu'uwẽ hã ma tô da te ãma ropé oto, ropâ. Tahawa, ma tô isazei'wa norĩ hã dasina tahâ'â ni oto. Tahawa, ma tô duré dahâimanazém na da te 're saprĩ za'ra, iwẽ u hã. Tane ma tô duré iwasu'uwẽ hã aima 're hâimana za'ra wa'wa, iwapari na'rata za'ra wa'aba zém hawimhã. Tame ma tô oto iwaihu'u za'ra wa'wa, tô sena na 'Re ihâimana u'âsi mono te te 're ida'azawi pese mono zém na hã.

1 Tesalonita 4:1

Wasisãnawã norĩ, wa tô aima waihu'u pari za'ra wa'aba ni, 're i'anomro wẽ wa'aba mono zéb da na, taha zarina, 'Re ihâimana u'âsi mono hã ai'ãma 're toi u'âsi za'ra wa'aba mono da. Taha zarina, te tô oto ãma 're anomro wẽ wa'aba mo. Ãhã na wa za duré aima roti pese za'ra wa'aba ni, 're anomro wẽ wa'aba mono zém nhipai u, asima 're sa'ẽtẽ za'ra wa'aba mono da, Wanhib'apito Zezusihi zadawa para.

2 Tesalonita 2:10

Tinhimiromhuri wasété na te za dawi udâ pese za'ra, 'Re ihâimana u'âsi mono nhiti za 're idahâimana u'âsi za'ra mono norĩ wi. Ta norĩ hã te iwasu'uwẽ hã te te siwi 're wẽ'õ za'ra, tô sena iwasu'uwẽ hã. Tahawa, ta norĩ hã te te 're sõ'reptu za'ra mono õ di za, 'Re ihâimana u'âsi mono hã.

Hebreu 4:2

Ta norĩ hã 'Re ihâimana u'âsi mono nhimiropisutu wẽ hã te te wapari za'ra nherẽ, te te sina uwaimrami za'ra õ di, te te ãma saze za'ra õ wa. Tane duré, wa norĩ zama wa tô 'Re ihâimana u'âsi mono wasu'uwẽ hã wa te 're wapari za'ra. Tane aiwa isimiropisutu wẽ na wa te 're saze za'ra mono õ wamhã, wa norĩ zama tô wa te wasina 're uwaimrami za'ra mono õ di za, te te wama iropisutu za'ra zé hã, 're idawa'utu u'âsi za'ra mono ne, 're wahâimana za'ra mono da hã oto, rowẽ uptabi na.

Hebreu 6:7

Ãne wa za oto ti'ai wasu'u na aima ãma romnhimiré'é za'ra wa'wa. Ti'a hã wẽ wamhã, tã hã 're ta'a mono sidâpâsi, te za ãma 're ro'wanhipré wẽ za'ra, itede'wa norĩ ma. 'Re ti'ai 'ré su'u mono õ wa, te za ãma 're ro'wanhipré wẽ za'ra, ti'ai wẽ na hã. Ãne wa, te za 'Re ihâimana u'âsi mono hã iwẽ hã tãma pisutu, ti'ai wẽ ma hã.

Hebreu 8:10

Tane nherẽ, nimahã bâtâ na wa za te dama iropisutuzép té hã tãma pisutu za'ra Izaraéu nhihudu norĩ ma hã, duréihã te dama iropisutuzém nhowa're're. Ã hã, wa wa hã Danhib'apito uptabi hã aima wasu'u za'ra wa'wa, ĩnhimiroti tém na te dama iropisutuzé hã. Tawapsi wa za ĩnhimiroti hã ipẽ'ẽ 're te tãma 're anhomri, iré 're nomro u'âsi mono wa, te te 're 'madâ'â pese za'ra mono da. Ta norĩ nhib'apito, wa za oto tãma 're ĩhâimana za'ra. Tawamhã ĩnhib'a'uwẽ na si te za tô ta norĩ hã ĩma 're hâimana za'ra.

2 Pedru 3:18

Ma'ãpé, 're aihâimana wẽ u'âsi za'ra wa'aba mono, aihâimana wẽ hã asima 're sa'ẽtẽ za'ra wa'aba mono da, Wanhib'apito Zezu Cristu te te 're iwa'apawapto mono zém na. Duré Wanho'reptui'wa Zezu Cristuhu ãma rowaihu hã, te za asima 're isa'ẽtẽ za'ra wa'aba mo. Ta hã Wanho'reptui'wai wa, wa za ãma 're wawata u'âsi za'ra. Tane tô.

1 Zuwã 5:20

Ãne wa tô duré waihu'u za'ra ni. Zezusi hã, 'Re ihâimana u'âsi mono 'ra hã ma tô wei mo, ti'ai u. Ta hã ma tô tinhimiroti na te te 're wa'apawapto, 'Re ihâimana u'âsi mono hã tô sena uptabi hã wa te 're iwaihu'u pese za'ra mono zéb da hã. I'ra ãma, Zezu Cristuhu ãma 're wanomro mono wa, wa duré Imama ãma 're wanomro, tô sena uptabi 're ihâimana mono ãma. Zezusi hã, ta hã uburé Danhib'apito uptabi. Ta hã dapẽ'ẽ 're dadâ'â ãna 're idanomro u'âsi mono zé hã, te te dama 're i'apisutu mono. Ãne na wa tô wasiwi waihu'u pese za'ra ni.