Mateu 12:46 - ꞌRe Ihâimana Uꞌâsi Mono Zadawa Wasuꞌu

⁴⁶ Tawamhã Zezusi hã te te dama rowasu'u ré, ma tô ino norĩ hã itẽme aihutu, tina norĩ me. Tawamhã rowi simasa wa, ma tô siwi da'maipo're pu'u, Zezusihi ma, da te 'mairowasu'u da, rob u itẽme hã watobro za'ra da.

Mateu 12:46 ပူးပေါင်းရင်းမြစ်များ

Mateu 1:18

Tawamhã ãne Zezu Cristuhu potozé hã: Maria hã Zezusi, ãma ina da hã ma tô sima ropisutu zahuré Zuzéhé me, sina mro zahuré da. Tane nherẽ, sina mro zahuré õ ré, ma tô 'Re ihâimana u'âsi mono pẽ'ẽzani na tiwasã Maria hã, te te sa'rese õ nherẽ.

Mateu 12:47

Tawamhã Zezusihi ma, ma tô 'mairowasu'u ni, ãne: — Ano norĩ hã te rowi asô aimasa, ana ré. Te sima wẽ za'ra, marĩ na te te aima rowasu'u za'ra da hã.

Mateu 2:11

Tawamhã 'ri para u ma tô asisi. Sisisi wamhã, ma tô sabu za'ra 'watébrémi hã, ina iré sãmra ré tipa, Maria hã. Tawamhã hi'rãtitõ ma tô asimro, ãma wata za'ra da. Taha pari, ma tô 'ridawa za'ra, tinhimiro'wapézé te te i'wasari zô, te te ãma sawi za'ra da. Tawamhã taha na ma tô ãma sawi za'ra, tinhoprub za'ra zém na; ẽtẽ waipo pré oru hã, duré wedewati isadaze hã, duré wedewati isadaze si'u'ẽne hã. Taha na ma tô tãma tinhoprub za'ra.

Mateu 2:20

Ãne te tãma tinha: — Oto ai'utu, 'watébrémi hã subzari aba da. Ina hã iré saprõni, Izaraéu nhihudu norĩ nhipti'ai u. Aibâ norĩ hã 'watébrémi te te aré siwi wĩrĩ da, sô isi'aba'ré norĩ hã ma tô tidâ'â za'ra.

Marcu 2:21

Da'uza hâ 'ratare hã, e te za ihâi wẽ na ãma hâiwa'aba ni, ihâ nhihâri tém na. Mare di. Ãne wamhã, te za dawi 're hâzahutu za'ra. Tawamhã ihâ'rada hã te za sina hâta. Te za oto duré dawi hâihatari za'ẽtẽ.

Luca 1:43

Duré a hã Wanhib'apito na te za 're aimo. Tahawa, ĩma aipire di. Tane nherẽ, asisawi õ di, we ĩtẽme aimorĩ tõ da. Tahawa, ĩma rowẽ di.

Luca 2:33

Tawamhã Simiãhã mreme, 'watébrémi ãma te te wapari zahuré wamhã, ma tô ãma titob'uzu zahuré, imama norĩ hã, ina me.

Luca 2:34

Tawamhã Simiã hã te tiwi rowaptẽ, 'Re ihâimana u'âsi mono wi, te te 're pawaptob zahuré mono da. Mariaha ma, te duré tinha: — 'Re ihâimana u'âsi mono, ma tô ai'ra hã pisutu, watẽme wei morĩ da, Izaraéu na warom nhisi u. Tawamhã watẽme wei morĩ wa, te za da'ahâ na danho'reptuzé hã da te dasina 're waihu'u za'ra. Tane nherẽ, da'ahâ na danho'reptuzé hã da te dasina 're waihu'u za'ra mono õ di za. Danho'reptui'wa na da te dasina 're waihu'u za'ra mono da, te te pisutu nherẽ, niwapsi te za ai'ra hã dasiwi wẽ'õ ni, da'ahâ na. Tawamhã da te dasiwi wẽ'õ wamhã, dama waihu'u pese di za oto, danhimirosa'rata wasédé hã ai'ra ãma hã. Sib'ézé i'wa pese na, da te 're danhihâri za'ra mono wamhã, dama 're rowẽ za'ra mono õ di za. Tane ai'ra hã da te dasiwi wẽ'õ wamhã, aipẽ'ẽzé ahâ di za.

Luca 2:48

Duré imama norĩ hã te te 'madâ'â zahuré wamhã, ma duré ãma titob'uzu zahuré. Tawamhã ina te tãma tinha, ãne: — Ĩ'ra, e tiha da, ma tô ãne hã wama i'manha. Taré wa tô asô 're warĩtĩ, aimama me, ai'ãma wapẽ'ẽzé sina.

Luca 2:51

Tawamhã Zezusi te ime timorĩ zahuré apâ, Nazaré u. Tame timama norĩ mreme, te te 're wapari pese. Ina hã i'ra tãma isiwasu'uzéb zahuré na, te te 're rosa'rata u'âsi, tipẽ'ẽ na.

Luca 8:10

Tawamhã Zezusi asa te tãma nharĩ za'ra: — 'Re ihâimana u'âsi mono hã ma tô dawi sawi, a'â da te waihu'u tõ za'ra da, da'ãma 're isib'a'uwẽ mono zé wasu'u hã. A norĩ wa'aba ma si, ma tô oto iwasu'u hã aima waihu'u za'ra wa'wa, waihu'u za'ra wa'aba da, dama iwaihu'u'õ hã. Tahawa, wa tô ĩnhimiromnhimiré'é na si, te dama 're arowasu'u. Tawamhã dapo're na, da te 're wapari za'ra mono nherẽ, da te waihu'u za'ra õ di za, ãma isimiré'ézé hã.

Zuwã 19:25

Tame te pi'õ norĩ hã aimasa, Zezusihi za'ozéb 'rata ina norĩ hã, duré ina wapté, duré Maria, Coropasihi mro, duré Maria Madaréna.

Zuwã 2:1

Tawamhã maparane bâdâ ne pari, ma tô dasaihurizé hã dasiwi 'manharĩ ni, dasina damrozém na hã. Cana na 'ri wa'õtõ nhisi ãma, Galiléa ãma. Zezusihi na hã te tame dame tihâiba.

Zuwã 2:12

Tawamhã Cafanau na 'ri nho'õmo nhisi u te oto mo, Zezusi hã. Ina zama te isiré mo. Ino norĩ zama te duré isiré ai'aba'ré. Isiré 're inomro mono norĩ zama, te duré isiré ai'aba'ré. Tawamhã sihutu wamhã, suru na te tame asimro.

Zuwã 2:5

Tahawa, te ina hã romhuri'wa norĩ ma tinha, ãne: — Tiha te te aima waihu'u za'ra wa'aba wamhã, ma'ãpé imreme hã 'manharĩ za'ra wa'aba za.

Zuwã 7:10

Tawamhã ino norĩ hã datozéb u si'aba'ré za'u si, te oto Zezusi hã mo pi'uriwi.

Zuwã 7:3

Tawamhã ino norĩ hã te apâ siwi satõ Zezusi hã, Zudéa u morĩ da. Ãne te tawamhã tãma nharĩ za'ra: — Apâ te za oto aimo, Zudéa u asazei'wa norĩ u, marĩ iwẽ hã dama ab'manharĩ ré, te te ãma ai'madâ'â za'ra da, asazei'wa norĩ hã.

Zuwã 7:5

Ta norĩ hã tidub'rada hã zahadu te te saze za'ra õ di, 'Re ihâimana u'âsi mono, we te te isatõrĩ na Danho'reptui'wa da.

Zezusihi zadawa wasuꞌuꞌwa norĩ nhimiromhuri na robꞌuiꞌéré 1:14

Tawamhã awẽ sidâpâsi te nasi si'rã'õtõ, 'Re ihâimana u'âsi mono ma, mreme zusi da nasi, Zezusihi no norĩ me, duré ina Maria na isisi hã aimawi pi'õ norĩ me.

1 Corĩtu 9:5

Zezusihi zadawa wasu'u'wa norĩ, wasiré norĩ hã Zezusi te te dama 're sadawa wasu'u za'ra mono da, nimomo 're nomro mono wamhã, timro hã te za siré te te 're simro. Duré Wanhib'apito no norĩ zama, te za timro hã siré te te 're simro. Pedruhu zama te za duré timro hã siré te te 're saprõni. Wa hã bété. Ĩmro ré, 're ĩhâimana mono 'wa'âhã, duré isazei'wa si'uiwa 're wahâimana mono wamhã, e i'uwaibaba 're ĩhâimana mono õ di aré, daza'rui mono bâ, ĩsiré te 're saprõni mono wamhã. Duré wasazéb da, ĩmro ãma zama, 're ana wa'aba mono wamhã, e i'uwaibaba õ di bété aré. I'uwaibaba tô aré, wahâimanazé hã.

Galata 1:19

Ãhã wamhã, Pedruhu siré norĩ hã aihĩni te sõpẽtẽ za'ra õ di, Cristuhu zadawa wasu'u'wa norĩ hã. Tiaguhu si, wa tô tawamhã sõpẽtẽ. Wanhib'apito sisémemhã ta hã.