Mateu 12:45 - ꞌRe Ihâimana Uꞌâsi Mono Zadawa Wasuꞌu

⁴⁵ Tawamhã tisiré norĩ zô te za mo wa'uburé hã, si'u ãma 're sõrõwa za'ra mono da. Tawamhã te za itẽme ãwisi za'ra, 7 na ihâiba za'ra hã isipai u iwasété uptabi za'ra hã. Tawamhã siré te za tô ãma 're sõrõwa za'ra, aibâ ãma. Duré wa'uburé misi ãma 're sõrõwa mono ré hã, aré aibâ ma hã, tãma rowẽ prã ti, ipẽ'ẽ 'remhã. Ahâ na oto iwa 're hâimana za'ra mono wa, tãma hã rowẽ õ uptabi di. Tane duré, a norĩ wa'wa hã aima 're rowẽ prã za'ra wa'aba mono di aré. Tane nherẽ, aiwasété wi 're aipizari za'ra wa'aba mono newa, zahadu ĩzazei ãna 're aihâimana wasété u'âsi za'ra wa'aba mono wa, aima 're rowẽ õ uptabi za'ra wa'aba mono di za oto.

Mateu 12:45 ပူးပေါင်းရင်းမြစ်များ

Mateu 12:24

Tawamhã ãne na farizeu norĩ te te dawapari za'ra wamhã, ma tô sima nharĩ za'ra, ãne, ta norĩ hã: — Õ hã Bezebuhu zadawa para, ma tô wa'uburé hã te te dama 're anhamra, wa'uburé norĩ nhib'apito zadawa para. Bezebu hã tiwaihu'u pe hã te te tãma 're sõmri mono õ 'wa'âhã, aré te te dama 're anhamra waihu'u mono õ di, wa'uburé hã.

Mateu 23:15

— Farizeu norĩ, duré dama rowahutu'wa norĩ, a norĩ wa'aba ma, aima 're ropipa uptabi za'ra wa'aba mono di za. Ma tô datẽme 're iropéi wa'aba mo daro mono bâ, dama 're rowasu'u za'ra wa'aba mono da, asimirowasu'u na da te 're asaze za'ra wa'aba mono da. Tawamhã ni'wam norĩ hã asiniwĩ 're isipizari za'ra mono hã, 're anomro wasété aba mono zéb zarina, ma tô 're hâimana wasété uptabi za'ra, asimiroti wasété aba zarina. Tahawa, ropipa ãma 'Re ihâimana u'âsi mono te te 're aihâ za'ra wa'aba mono zém nhipai u, te za te te 're ahâ za'ra za'ẽtẽ za, ta norĩ hã.

Mateu 23:24

E itob'a hã simizaprõni wẽ bâ. Ta hã simizaprõni wẽ õ di. Tane te duré a norĩ wa'wa hã roti senai'õ na dama 're iroti wasété u'âsi za'ra wa'aba mo, 'Re ihâimana u'âsi mono nhimiroti hã sena na aima waihu'u pese za'ra wa'aba õ wa. Isimiroti pire norĩ hã 're 'madâ'â za'ra wa'aba mono õ nherẽ, te isimiroti ipire prã norĩ si, 're i'madâ'â pese za'ra wa'aba mono zéb da si, 're asiwasutu u'âsi za'ra wa'aba mo.

Marcu 16:9

Zezusi hã dumigu na ma tô apâ hâiwa'udu, mararé. Tawamhã imorĩ'rata na ma tô Maria Madarénahã ma, sihâi'ré. Ti'ai baba 're morĩ ré, ma tô taha ma, wa'uburé hã 7 na sãmra.

Marcu 5:9

Tawamhã Zezusi te isisi zô sadanha: — E niha asisi hã. — Ahâ di, ĩnhisi hã. E marĩ wa. Wa norĩ hã wa'ahâ wa. — Ãne te Zezusihi ma sisisi.

Luca 11:26

Tawamhã te za rob u watobro, tisiré norĩ zô morĩ da, wa'uburé hã. Tawamhã te za itẽme ãwisi za'ra, 7 na ihâiba hã isipai u iwasété uptabi za'ra hã, si'u ãma 're sõrõwa za'ra mono da, aibâ ãma. Ãhã wana ré hã tãma rowẽ prã na te aré 're sãmra, wa'uburé misi, ãma 're sõrõwa mono ré hã, ipẽ'ẽ 'remhã. Ahâ na oto ãma 're sõrõwa za'ra mono wa, tãma rowẽ'õ uptabi di oto.

Éfézu 6:12

Wa norĩ hã wasiré 're iwahâimana za'ra mono norĩ me, 're wasi'wapé za'ra mono õ di. Wa'uburé norĩ me si, wa za 're wasi'wapé za'ra, hâiwa nho're ãma simiroti wasété na 're ihâimana za'ra mono norĩ me. Wa'uburé norĩ hã ti'ai ãma dapo're'õ na 're idanomro mono norĩ ma hã, simiroti pire di, Wanhib'apito nhimiroti waihu'u'õ'wa ta norĩ hã 're nomro mono wa.

Hebreu 10:39

Tane nherẽ, ta norĩ ne, wa norĩ hã 're wahâimana za'ra mono õ di oto. Nimahã na 'Re ihâimana u'âsi mono wi 're wasipizari za'ra mono õ di, ta norĩ ne. Tahawa, 'Re ihâimana u'âsi mono hã niwamhã ta norĩ zu te te wa'uprosi õ di za. Taha si wa tô wa te wasina 're umnhasi u'âsi za'ra, te te 're iwa'anho'reptui mono da hã. Taha zarina te za tô wa norĩ hã wa'anho'reptu, i'rata oto 're iwahâimana u'âsi za'ra mono da hã, 'râwi.