Mateu 12:41 - ꞌRe Ihâimana Uꞌâsi Mono Zadawa Wasuꞌu

⁴¹ Niwamhã 'Re ihâimana u'âsi mono, za da'ãma isipo'ozéb ãma hã, duréihã Niniwé na 'ri nho'õmo nhisi ãma 're idasi'ubumroi mono norĩ hã te za asada tihâimana za'ra wa'wa, aiwasédé hã te te ai'ãma hiri za'ra wa'aba da, 'Re ihâimana u'âsi mono nho'a. E marĩ wa. Duréihã Zona hã 'Re ihâimana u'âsi mono te te tãma 're sadawa wasu'u za'ra mono wamhã, ma tô te te 're wapari za'ra. Tahawa, ma tô ta norĩ hã tiwasété wi 're sipizari za'ra. Zonahã nhimiroti hã pire nherẽ, isipai u ĩnhimiroti si pire uptabi di. Tane nherẽ, a norĩ wa'wa hã ĩzaze za'ra wa'aba õ di, 'Re ihâimana u'âsi mono nhimipisutuzéb zarina we atẽme ĩmorĩ aba zém na hã. Tahawa, te za tô i'uwaibaba aiwasédé hã ai'ãma sa'ra wa'wa, Niniwé ãma 're idasi'ubumroi mono norĩ hã.

Mateu 12:41 ပူးပေါင်းရင်းမြစ်များ

Zona 1:2

— Ma'ãpé asima rob'ubumro na, aimorĩ da, 'ri nho'u isa'ẽne Niniwé na isisi u. Tame te za aimreme 'rãihâ na irowasu'u, 'ri nho'õmo wa, 're idahâimana za'ra mono norĩ ma. E marĩ wa. Ta norĩ 're iwasété za'ra mono zé hã ma tô we ĩtẽme wi. Ta hã wa tô wapa.

Zona 3:4

Zona hã wisi wamhã, ma tô ãzé 'ri nho'õmo u hã. Tame bâtâ wahuré na ma tô 're mo, 'ri baba. Tawamhã ma tô oto ãma sãna'rata, te te dama irowahutu na hã, ãne: — Bâdâ 40 na isi'utõrĩzéb ãma hã, Niniwé hã te za ai'utõrĩ pese.

Mateu 12:39

Tawamhã Zezusi hã te asa tãma nharĩ za'ra, ãne: — Nimosi aipoto té wa'aba mono hã, i'aihâimana wasété za'ra wa'wa. 'Re ihâimana u'âsi mono zô 're asimipari za'ra wa'aba mono zahã, ma tô ĩwi iwaptẽrẽ za'ra wa'wa, marĩ dama i'manharĩ waihu'u'õ hã te 'manharĩ da, asõ'a za'ra wa'aba, 'Re ihâimana u'âsi mono zadawa para, te dama 're i'ab'manharĩ mono na sena na hã ãma ĩwaihu'u za'ra wa'aba da. Tane nherẽ, ãhã na hã marĩ hã te 'manharĩ õ di za. Ãne si wa za a'â aima waihu'u za'ra wa'wa. Duréihã Zona hã 'Re ihâimana u'âsi mono zadawa 'mahârâ 'rata 'wa hã si'ubdatõ ma tô bâdâ hã ãma ai'utõ, tebe isa'ẽtẽ di'i 're, hâimana ré hã. Taha parimhã, ma tô 'Re ihâimana u'âsi mono hã sõ'reptu. Â zada'ré u ma tô tebe hã, Zonahã ré rob u iré 'rãiwatobro. Tane duré, ti'ai ãma Dasiré Ipodo hã si'ubdatõ bâdâ hã te za ãma ai'utõ, dâ'â wa, ab're 're nomro ré hã. Taha parip si, te za duré hâiwa'udu, apâ. Ãne wapsi, te za oto iwaihu'u za'ra wa'wa, 'Re ihâimana u'âsi mono hawi sena na we imorĩ na hã.

Mateu 12:42

Niwa apto'o ré 'Re ihâimana u'âsi mono, za da'ãma isipo'ozéb ãma, duréihã danhib'apito sipi'õ Saba na romnhisi ãma te te 're ida'ab'madâ'â mono hã te za duré asada tihâimana za'ra wa'wa, aiwasédé hã te te ai'ãma sa'ra wa'aba da, 'Re ihâimana u'âsi mono nho'a. E marĩ wa. Ta hã duréihã romhâ uptabi nherẽ, ma tô wi, apito Salomahã u, isimiroti hã te te wapari da, isimiroti hã dahâimanazém na rowaihu'u na hã wẽ uptabi wa. Taha nhimiroti hã pire nherẽ, isipai u ĩnhimiroti si pire uptabi di. Tane nherẽ, ĩnhimiroti hã aima wapari ze za'ra wa'aba õ di. Tahawa, te za tô i'uwaibaba aiwasédé hã ai'ãma sa'ra wa'wa, danhib'apito sipi'õ hã.

Mateu 12:45

Tawamhã tisiré norĩ zô te za mo wa'uburé hã, si'u ãma 're sõrõwa za'ra mono da. Tawamhã te za itẽme ãwisi za'ra, 7 na ihâiba za'ra hã isipai u iwasété uptabi za'ra hã. Tawamhã siré te za tô ãma 're sõrõwa za'ra, aibâ ãma. Duré wa'uburé misi ãma 're sõrõwa mono ré hã, aré aibâ ma hã, tãma rowẽ prã ti, ipẽ'ẽ 'remhã. Ahâ na oto iwa 're hâimana za'ra mono wa, tãma hã rowẽ õ uptabi di. Tane duré, a norĩ wa'wa hã aima 're rowẽ prã za'ra wa'aba mono di aré. Tane nherẽ, aiwasété wi 're aipizari za'ra wa'aba mono newa, zahadu ĩzazei ãna 're aihâimana wasété u'âsi za'ra wa'aba mono wa, aima 're rowẽ õ uptabi za'ra wa'aba mono di za oto.

Mateu 12:6

Tô sena, wa aima waihu'u za'ra wa'wa. Ĩnhimiroti hã pire uptabi di, duréi roti ma hã, 'Re ihâimana u'âsi mono nhorõwa 'ri ãma da'ãma romhuri'wa norĩ hâimanazém na, danhimiroti ma hã.

Mateu 16:4

Nimosi aipoto té wa'aba mono hã i'aihâimana wasété za'ra wa'wa. 'Re ihâimana u'âsi mono zô, 're asimipari za'ra wa'aba mono zahã, te ĩma i'ru za'ra wa'wa, marĩ dama i'manharĩ waihu'u'õ hã te aima 'manharĩ za'ra wa'aba da. Tane nherẽ, te 'manharĩ õ di za. Duréihã Zonahã ma iromhâimanazém na si te za ãma aipo're pu'u za'ra wa'wa, 'Re ihâimana u'âsi mono, marĩ dama i'manharĩ waihu'u'õ hã te te tãma i'manharĩzém na. Tawamhã Zezusi hã te oto tiwi timorĩ za'ra, nimomo morĩ da.

Mateu 17:17

Tawamhã Zezusi ma tô tinha, ãne: — E niha ai'rata 're ĩnhamra u'âsi za'ra wa'aba mono nherẽ, asina 're ĩ'umnhasi za'ra wa'aba mono õ di, te 're i'aipawaptob za'ra wa'aba mono zéb da na hã. Nimosi aipoto té wa'aba mono hã i'aihâimana wasété za'ra wa'wa. E ĩpẽ'ẽzé u'âsi, wa za asiré wa'aba hã 're morĩ u'â, 're ĩ'umnhasi za'ra wa'aba mono õ wa. Ma'ãpé we ĩtẽme asiwi saprõni aba, ai'repudu hã.

Mateu 23:36

Ãne hã wa tô sena, aima waihu'u za'ra wa'wa. 'Re ihâimana u'âsi mono hã te za tô te te 're ai'ahâ za'ra za'ẽtẽ 'wa, nimosi i'aipoto té wa'aba mono hã i'aihâimana za'ra wa'wa hã, ãne na dama 're irob'manharĩ wasété za'ra wa'aba mono zéb zarina, aihi'rata norĩ nhipãrĩ zarina.

Luca 11:32

Niwamhã 'Re ihâimana u'âsi mono, za da'ãma isipo'ozéb ãma hã, duréihã Niniwé na 'ri nho'õmo nhisi ãma 're idasi'ubumroi mono norĩ hã te za asada tihâimana za'ra wa'wa, aiwasédé hã te te ai'ãma sa'ra wa'aba da, 'Re ihâimana u'âsi mono nho'a. E marĩ wa. Duréihã Zona hã 'Re ihâimana u'âsi mono te te tãma 're sadawa wasu'u za'ra mono wamhã, ma tô te te 're wapari za'ra. Tahawa, ma tô ta norĩ hã tiwasété wi 're sipizari za'ra. Zonahã nhimiroti hã pire nherẽ, isipai u ĩnhimiroti si pire uptabi di. Tane nherẽ, a norĩ wa'wa hã ĩzaze za'ra wa'aba õ di, 'Re ihâimana u'âsi mono nhimipisutuzéb zarina, we atẽme ĩmorĩ aba na hã. Tahawa, te za tô i'uwaibaba aiwasédé hã ai'ãma sa'ra wa'wa, Niniwé ãma 're idasi'ubumroi mono norĩ hã.

Zuwã 3:31

Hâiwa hawi we imorĩ hã, uburé dama pire uptabi di. Wa norĩ hã ti'ai ãma a'uwẽ wa, marĩ hã ti'ai ãma, wa te 're i'madâ'â za'ra mono si, wa wa te dama 're wasu'u za'ra. Hâiwa hawi we imorĩ si, uburé dama pire uptabi di.

Zuwã 4:12

Wahi'rada Zaco hã ma tô dama tisõ, ã â zô ab're hã. Ti'ra norĩ me te te 're i'âhuri mono zé, â hã, duré isimizama norĩ zama te te 're i'âhuri mono zé hã. Wahi'rada hã wama pire za'ra di. E a hã tãma aipire wa, te za bété â u'â hã ĩma isõ.

Roma 2:27

A norĩ wa'wa hã zudeu na 're aihâimana za'ra wa'aba mono hã, 'Re ihâimana u'âsi mono nhimiroti 'rata na rob'ui'éré hã 're 'madâ'â pese za'ra wa'aba mono õ di, ibaihâ na rob'ui'éré hã aima 're hâimana za'ra wa'aba mono nherẽ, duré asihâiwata nhihâri ré 're aihâimana za'ra wa'aba mono nherẽ. Tane nherẽ, ni'wam norĩ hã zudeu'õ norĩ hã sihâiwata nhihâri ré, 're hâimana za'ra mono õ nherẽ, te 'Re ihâimana u'âsi mono nhimiroti 'rada hã te te 're 'madâ'â pese za'ra. Taha zarina te za 'Re ihâimana u'âsi mono hã te te siwi 're aiwẽ'õ pese za'ra wa'wa, te te 're aihâ za'ra wa'aba mono da, zudeu'õ norĩ si isimiroti hã te te 're 'madâ'â pese za'ra mono wa, ai'upana za'ra wa'aba.

Hebreu 11:7

Nowé hã, 'Re ihâimana u'âsi mono si te te sina 're i'umnhasi mono zéb zarina, ma tô duré ãma saze, ropipa hã za dazô iwatobrozém na 'Re ihâimana u'âsi mono hã romhâ ré te te ãma ipo're pu'uzém na, zahadu marĩ hã titõmo na te te 'madâ'â õ nherẽ, Nowé hã. Tahawa, isimiroti zarina ma tô uba're za'ẽne hã 'manha, ti'ra norĩ hã te te ãma sõ'reptu za'ra da, duré timro zama hã, duré tisani'aba norĩ zama hã te te ãma sõ'reptu za'ra da. Taha zarina, ma tô 'Re ihâimana u'âsi mono hã siwi da'awẽ'õ pese, dawasété na si 're dahâimana za'ra mono wa, Nowéhé si isimiroti hã te te 're 'madâ'â pese mono wa. Tawamhã Nowé hã, 'Re ihâimana u'âsi mono si te te sina 're umnhasi mono wa, ma tô 'Re ihâimana u'âsi mono hã ãma tiwata, ãne: “Ãhã si te 're timorĩ wẽ.” Ãne 'Re ihâimana u'âsi mono hã, Nowéhé ãma iwatazé wasu'u hã.