Mateu 12:10 - ꞌRe Ihâimana Uꞌâsi Mono Zadawa Wasuꞌu

¹⁰ Tame te aibâ hã nhamra, isimizu'rã're isib'rata rési waihu'u'õ hã. Tawamhã ni'wam norĩ hã ma tô sima wẽ za'ra, duréihã 'Re ihâimana u'âsi mono nhimiroti na Mozési te te ãma irob'ui'éré na hã sabadu na romhuri zahârizém na roti hã, te te ãma upai wa, Zezusihi ãma iwasédé te te ãma hiri za'ra da. Tahawa ma tô ãne Zezusi hã ãma siwi sadanha: — Dawa'utuzém na idapesezé romhuri zahârizém na hã, e Mozésihi nhimi'ui'éré zarina.

Mateu 12:10 ပူးပေါင်းရင်းမြစ်များ

Mateu 12:2

Tawamhã farizeu norĩ hã te te ãma 'madâ'â za'ra wamhã, Zezusihi ma, te nharĩ za'ra, ãne: — E 'madâ'â za'ra ãna, asiré 're inomro mono norĩ hã. Ta norĩ hã ma tô trigu hã te te sima 'rãnhinarĩ za'ra, sabadu na 're iwawa'utu za'ra mono zém na nherẽ. Tahawa, wahi'rata nhimiroti hã ma tô ãma upa za'ra, dawa'utuzé bâtâ na romhuri, wa te dawi 're isawi za'ra mono zém na roti hã.

Mateu 19:3

Tawamhã farizeu norĩ ni'wam norĩ hã ma tô itẽme aihutu Zezusihi u, te te siwi sadawa pibu da, timreme na te te upai wa, te te siwi mreme wẽ'õ da. Ãne ma tô taha wamhã siwi sadanha: — E aibâ hã te za timro marĩ ipire te te tiwi 're 'manharĩ za'ra mono õ nherẽ, te te 're rẽme za'ra. E wahi'rata norĩ nhimiroti zarina hã, ãne hã.

Marcu 3:2

Tame te ni'wam norĩ hã Zezusi hã siwi 'madâ, zudeu norĩ te, romhuri zahârizém na, aibâ hã te te pese zô. E marĩ wa. Sabadu na te te pese wa, te te siwi wẽ'õ da, romhuri zahârizém na roti, te te i'madâ'â õ para.

Luca 13:14

Tane nherẽ, rowahutuzé 'madâ'â'wa hã ma tô sada tizahi, Zezusihi zada, sabadu na nherẽ, te te pese wa. Tahawa, te uburé dama tinha, ãne: — Bâdâ hã, 6 na ihâiba hã, wa te 're iromhuri za'ra mono zéb da hã. Taha bâtâ na si, te za we 're anomro aba mo, da te 're aipese za'ra wa'aba mono da. Sabadu na hã mare di, romhuri zahârizém na hã.

Luca 20:22

Ãne wa, a hã ma'ãpé, marĩ hã wama waihu'u za'ra na, marĩ hã wa te waihu'u za'ra da. E Roma ãma danhib'apito uptabi ma, wa za rob'uiprazé hã wa te tãma 're arĩ za'ra, isimiwada'urizéb zarina. E 'Re ihâimana u'âsi mono ma, wẽ di. E tãma wẽ õ di. Ãne niha na marĩ na isimiroti hã ãma.

Luca 23:14

Itẽme sihutu wamhã, te tãma nharĩ za'ra, ãne: — We ĩtẽme asiwi ãwisi aba wi hã, ma tô ãne ĩma iwasu'u za'ra wa'wa: “Ãhã nhimirowasu'u zarina, te oto ro'wa'rutu na 're dahâimana za'ra.” Ãne ma tô ĩma iwasu'u za'ra wa'wa. Tahawa, wa tô asõ'a za'ra wa'aba, sadanharĩ pese aré, iwasété zô, iwasédé hã ãma sa'ra za'ra wa'aba wa. Tazahã, marĩ hã ãma hâimana õ di, iwasédé hã.

Luca 23:2

Tawamhã te te itẽme siwi ãwisi wamhã, ma tô siwi wasu'u wasété, ãne: — Ã hã ma tô dawi ro'wa'rutu, tinhimirowasu'u na. Roma ãma danhib'apito ma, rob'uiprazé hã da te tãma 're arĩ za'ra mono tõ da, ma tô te te 're da'apa'uwati. Danhib'apito na te duré dama 're siwasu'u, 'Re ihâimana u'âsi mono te te ipisutu na, Danho'reptui'wa da.

Zuwã 5:10

Tahawa, ma tô zudeu norĩ nhib'apito hã tãma nharĩ za'ra, ãne: — 'Re ihâimana u'âsi mono ma tô dama roti, da te 're romhuri za'ra mono tõ da, sabadu na hã. A hã isimiroti 'madâ'â ãna te asa'warizé hã 're i'â, romhuri zahârizém na.

Zuwã 8:6

Mozésihi nhimiroti zarina te te dama 'rui õ wa, te te siwi wẽ'õ za'ra da, ma tô ãne siwi ãma sadanha. Tane nherẽ, Zezusi hã asa te te ãma sada'âbâ za'ra õ di. Ti'a zô ma tô aiwẽ'ẽ, tinhiptõmo na te te ãma ui'éré da.

Zuwã 9:16

Tawamhã ni'wam norĩ si, te Zezusihi ma nharĩ za'ra, farizeu norĩ hã: — Õ hã sabadu na te te pese nherẽ, te te 'madâ'â pese õ di, romhuri zahârizém na roti hã. 'Re ihâimana u'âsi mono hã we te te satõrĩ õ di. We te te satõrĩ 'wa'âhã, te aré te te 're 'madâ'â pese, isimiroti hã. Tawamhã ihâiba amo norĩ hã te rowasu'u za'ra duré: — 'Re morĩ wasété 'wa'âhã, aré waihu'u pese õ di, marĩ dama i'manharĩ waihu'u'õ hã te te dama 'manharĩ da hã. — Ãne Zezusihi ãma ma tô tasisada 'rãmi za'ra ni.