Mateu 11:23 - ꞌRe Ihâimana Uꞌâsi Mono Zadawa Wasuꞌu

²³ Duré Cafanau ãma 're i'aihâimana za'ra wa'aba mono norĩ hã e danhipai u aipire na 're aihâimana za'ra wa'aba mono da, ma tô asina 're irosa'rata za'ra wa'aba mo. Ropipa u si, te za 'Re ihâimana u'âsi mono hã te te 're asãmra 'wa, dapẽ'ẽ 're dadâ'â u'âsi na 're idahâimana za'ra mono zéb u. Marĩ dama i'manharĩ waihu'u'õ hã asõ'a za'ra wa'aba, te dama 're i'ab'manharĩ wẽ mono ne, duréihã Sodoma ãma 're idahâimana wasété za'ra mono norĩ te ãma 're pawaptob za'ra mono 'wa'âhã, aré ta norĩ hã si'utõrĩ õ di. Rowẽ na te aré 're hâimana u'âsi za'ra.

Mateu 11:23 ပူးပေါင်းရင်းမြစ်များ

Zenezi 13:13

a'uwẽ wasété uptabi na si 're ihâimana za'ra mono ãma, tiwasété si 'Re ihâimana u'âsi mono zada, te te 're i'manharĩ za'ra mono zéb ãma.

Mateu 10:15

Tô sena, wa aima waihu'u za'ra wa'wa. Niwapsi 'Re ihâimana u'âsi mono, da'ãma isipo'ozéb ãma hã Sodoma ãma duré Gomora ãma 're idahâimana wasété uptabi za'ra mono norĩ ma, te te irob'manharĩ pipa zém nhipai u, te za asô 're itob'uzu za'ra wa'aba mono õ norĩ ma hã te te tãma 're arob'manharĩ za'ẽtẽ.

Mateu 16:18

Pedru, ãne wa za aima waihu'u. Ẽtẽ na, wa ai'ãma simiré'é. Ni'wa hã ẽtẽ nhisiwi te za 'ri na'rada hã 'manha, 'ri hã siptete na tãma 're sa mono da. Õne na 'Re ihâimana u'âsi mono te te ĩpisutu na, ma tô a hã ĩwaihu'u na'ra. Tahawa, ni'wa hã ẽtẽ nhisiwi te te i'ri ne, te za oto ĩwaihu'u na'rata zém hawim na ĩwaihu'u za'ra ni, za da te 're ĩzaze za'ra mono norĩ hã. 'Re idadâ'â za'ra mono zé hã dama siptete nherẽ, duré dama pire nherẽ, ĩzazei'wa norĩ ãma hã te te ai'uté waihu'u za'ra õ di za.

Mateu 17:24

Tawamhã Zezusihi siré 're inomro mono norĩ hã ma tô ai'aba'ré, Cafanau na 'ri nho'õmo nhisi u. Sihutu wamhã, rob'uiprazé arĩ ubumroi'wa norĩ hã ma tô Pedru siwi sadanha, 'Re ihâimana u'âsi mono nhorõwa 'ri ma, rob'uiprazé arĩ ubumroi'wa norĩ hã. Ãne ma tô siwi sadanha: — E asib'apito za'ra wa'wa hã rowahutuzé 'madâ'âzéb da, te te dame hã 're wa'âbâ mono õ di.

Mateu 4:13

Tawamhã Nazaré ãma 're isãmra mono da hã, te te sima rowẽ õ di oto. Tahawa, Cafanau na 'ri nho'õmo nhisi u si ma tô mo, tame oto 're sãmra mono da, Galiléa ãma isõ'u zapodo 're ihâimana mono 'rata, Zébulõhõ nhihudu norĩ nhipti'a niwĩmhã, duré Naftalihi nhihudu norĩ nhipti'a niwĩmhã.

Mateu 8:5

Tawamhã Zezusi hã Cafanau na 'ri nho'õmo nhisi u ma tô wi. Wisi wamhã, ma tô aibâ sõpẽtẽ, romanu hã. Ta hã da'wapéi'wa norĩ wada'uri'wa. Tawamhã te te sõpẽtẽ wamhã, ma tô aibâ hã tãma ti'ru Zezusihi ma, tãma iromhuri'wa hã te te tãma pese da.

Luca 10:15

Cafanau ãma 're aihâimana za'ra wa'aba mono norĩ hã, e danhipai u aipire na 're aihâimana za'ra wa'aba mono da, ma tô asina 're irosa'rata za'ra wa'aba mo. Ropipa u si, te za 'Re ihâimana u'âsi mono hã te te 're asãmra 'wa.

Luca 14:11

Tane, ni'wa hã pire wẽ te, 'râwi sina 're wata mono wamhã, 'Re ihâimana u'âsi mono, te za tãma pisutu, wapu na 're hâimana mono da oto. Duré ni'wa hã, tipire na 'râwi 're si'madâ'â mono õ wamhã, te za tãma pisutu, dama pire na 're hâimana mono da oto.

Luca 16:23

Tawamhã ropipa hã te te oto 're sépata za'ẽtẽ, adâ 're isi'ubumroi mono zéb ãma hã. Ta hawi ma tô rob'madâ, isibro pe hã. Te te rob'madâ'â wamhã, ma tô Abra'ã hã tisã, romhâ na. I'rata te Lazaru hã nhamra, isibrob'õ hã.

Luca 4:23

Tawamhã Zezusi te dama tinha, ãne: — Ãté da te dasima inharĩ za'ra zém na, te za ĩma inharĩ za'ra wa'wa, ãne: “Wawede'wa, ma'ãpé 'râwi asipese.” Ãté te za duré ĩma inharĩ za'ra wa'wa, ãne: “Ma'ãpé, ãmeb zama 're wa'apawapto mono, aiwaihu'u pese na, Cafanau ãma 're ida'apawapto mono ne. Aiwasu'u hã wa tô wapari za'ra ni.” Ãté, ãne te za ĩma inharĩ za'ra wa'wa.

Zezusihi zadawa wasuꞌuꞌwa norĩ nhimiromhuri na robꞌuiꞌéré 2:27

Ĩdâ'â nherẽ, ĩrẽme õ di za, adâ 're ihâimana za'ra mono zéb ãma hã. Wa hã te aima 're romhuri wẽ u'âsi mono wa, ĩdâ'â wamhã, ĩhâiba 'roi õ di za. Tahawa, ĩdâ'âzé, wa hã te ĩsima pipa õ di za.

Zezusihi zadawa wasuꞌuꞌwa norĩ nhimiromhuri na robꞌuiꞌéré 2:31

Tahawa, 'Re ihâimana u'âsi mono te te tãma iwaihu'uzéb zarina, ma tô wasu'u siro Dawi hã, Danho'reptui'wa da, te te ipisudu hã apâ za ihâiwa'utuzém na hã, ãne: “Dâ'â nherẽ, 'Re ihâimana u'âsi mono te te rẽme õ di za. Ihâiba hã 'roi õ di za.” Ãne ma tô Dawi hã wahi'rata norĩ ma rowasu'u za'ra, apâ za ihâiwa'utuzém na. 'Re ihâimana u'âsi mono hã ma tô Zezusi hã hâiwa'utu. Apâ te te hâiwa'utu wamhã, wa norĩ hã wa tô 'madâ'â za'ra ni. Tahawa, wa wa te dama 're wasu'u za'ra, ihâiwa'utuzém na hã.

Zuda 1:7

Duré ãma asipo're pu'u za'ra wa'aba, duréihã Sodoma na 'ri nho'õmo nhisi ãma 're idahâimana wasété za'ra mono norĩ ãma, duré Gomora na 'ri nho'õmo nhisi ãma 're idahâimana wasété za'ra mono norĩ ãma, duré i'rata 'ri wa'õtõ mono bâ 're idahâimana wasété za'ra mono norĩ ãma hã. Tamemhã ma tô uburé dahâimana wasété uptabi na 're dahâimana za'ra, dasiwazari. Dahâiba na ma tô dasina 're danhimisaihuri za'ra. Duré aibâ nherẽ, ma tô aibâ si'uiwa na dasina 're dawasété za'ra. Hâiwa ãma aré te te 're iromhuri za'ra mono norĩ hã, 'Re ihâimana u'âsi mono hã te te 're iwapari za'ra mono õ ne, da te 're wapari za'ra mono õ di. Tahawa, ma tô unhama ro'o na dama rob'manharĩ za'ra, 'Re ihâimana u'âsi mono hã, da te 're robzépata u'âsi za'ra mono da, wẽ te bâ, unhama ro'o u'âsi na. Taha na te za ãma 're dasipo're pu'u u'âsi za'ra, ta norĩ zarina ãma 're danomro wasété tõ mono da, isirã za'ra zéb zarina.

Apocalipsi 1:18

Wa tô dârâ aré. Ĩdâ'â nherẽ, wa oto tô 're ĩhâimana u'âsi. Duré oto ĩdâ'â waihu'u õ di za. Ma'ãpé, ãne na hã awaihu'u pese. Te ĩsima ipisutuzéb zarina, wa te te 're da'anho'reptu, adâ 're ihâimana za'ra mono zém hawi, 'Re ihâimana u'âsi mono 'rata, oto 're dahâimana u'âsi za'ra mono da.

Apocalipsi 11:8

Tawamhã 'ri nhi'riti 're za'ẽtẽ ãma, te za taré ihâiba hâ hã tiza'wari zahuré, 'ri nho'õmo za'ẽtẽ ãma, wede nhonhi'rãmi na Isib'apito za'ra, da te dasiwi iwĩrĩzém nho'õmo ãma, dama isa'rese za'ẽtẽ ãma. Sodoma na 'ri nho'õmo nhisi ãma, 're idahâimana wasété za'ra mono ne, ã 'ri nho'u hã. Duré Ezitu na romnhisi ãma 're idahâimana wasété za'ra mono ne hã, ã 'ri nho'u hã. Ãne 'ri nho'õmo zahuré na ãma isimiré'ézé hã, Zeruzalẽ hã.

Apocalipsi 6:8

Tawamhã hârâ wi, wa tô duré 'madâ, dadâ'â wa, dahâiba'a ne awaru ihâiba'a hã. I'mapraba'wa nhisi hã Adâ'â na isisi hã. Duré ihâiba amo, 'râwi te te isa'u mono nhisi hã, Adâ 're ihâimana za'ra mono zém na. Tawamhã ma tô pisutu zahuré ni, te te da'a'uprosi zahuré mono da, daro mono bâ, dasi'wapé na. Duré mram na te te da'uprosi zahuré mono da, ma tô pisutu zahuré ni, dahâzé pire na te te 're idaduri mono na, duré abaze zahi na zama. Tawamhã daza'rata ahâ prã na te za dasi'utõrĩ, daro mono bâ. Maparane si'uiwa na dahâiba wamhã, misi si te za dadâ'â za'ra. Taha zarina te za da'ahâ prã na ai'utõrĩ ni, daro mono bâ.