Mateu 11:14 - ꞌRe Ihâimana Uꞌâsi Mono Zadawa Wasuꞌu

¹⁴ Tawamhã isimirowasu'u za'ra na, 're saze za'ra wa'aba mono wamhã, taha zarina te za duré ãne 're isaze za'ra wa'aba mo, Eliasi ti'ai u za we imorĩ na Zuwã te te iwasu'uzém na hã.

Mateu 11:14 ပူးပေါင်းရင်းမြစ်များ

Mateu 11:13

Zuwãhã wana ré hã, ma tô 'Re ihâimana u'âsi mono zadawa 'mahârâ 'rata 'wa norĩ hã te te ãma 're rob'ui'éré za'ra Mozésihi zama, 'Re ihâimana u'âsi mono, za da'ãma 're isib'a'uwẽ mono zé wasu'u na hã.

Luca 1:17

'Re ihâimana u'âsi mono zadawa 'mahârâ'wa, te za 're mo. Wahi'rada Eliasihi ne, te za 're mo, mreme pire na, duré waihu'u pese na. Tawamhã ai'ra nhimiroti zarina, te za damama norĩ ti'ra norĩ hã te te 're sawi pese za'ra. Duré danhimipari ãna 're idanomro mono hawimhã, te za 're dasipizari za'ra, 're idanomro wẽ mono zarina, oto 're danomro mono da. Ãne wamhã, te za danhimiza'rese sô 're danhimipari za'ra, Danhib'apito zô.

Zuwã 16:12

— Uburé marĩ hã ĩnhimirowasu'u na te aima wasu'u ze za'ra wa'aba nherẽ, te aima rowasu'u za'ra wa'aba õ di za a'â. E marĩ wa. Zahadu aima pibu pese za'ra wa'aba õ wa.

1 Corĩtu 3:2

Ai'uté hã tisai uptabi na 're saihuri waihu'u mono õ wa, te za tina hâiwa'u si te te 're wapsõmri za'ra. Ina hã isai uptabi hã te te tãma 're sõmri waihu'u za'ra mono õ di. Tane, wa tô wa hã roti iwapure na si te aima 're roti za'ra wa'wa, Zezusihi wasu'uwẽ na hã, zahadu aima pibui prã za'ra wa'aba wa, 're iwaihu'u pese za'ra wa'aba mono zéb da hã. Ãhã na hã bété. Zahadu tô aima waihu'u pese za'ra wa'aba õ di.

Apocalipsi 20:4

Tawamhã wa tô duré 'madâ danhib'apito simasisizém ne na 're idasi'ubumroi mono zé hã. Ãma isi'ubumroi mono ma, ma tô 'Re ihâimana u'âsi mono hã tãma pisutu za'ra, dahâimanazém na te te 're ida'awaihu'u mono zéb zarina, dama pire na te te dama 're arowairébé mono da, isadawa para. Tawamhã wa tô duré 'madâ'â za'ra, 'Re ihâimana u'âsi mono zadawa wasu'u te te 're sazei pese za'ra mono 'ru te, da te 're i'rãnhihâri za'ra mono norĩ pẽ'ẽzani hã, tô sena na Zezusihi zazei'wa na dama 're siwasu'u za'ra mono 'ru te. Ta norĩ hã â hawi ropoto siwamnarĩ ãma 're iwata za'ra mono õ. Duré ihâiba 'manharĩ na romhâiba ãma 're iwata za'ra mono õ. Duré â hawi ropoto siwamnarĩ nhisi na i'uihâ ui'éré za'ra õ, duré isib'rata ui'éré za'ra õ. Ta norĩ hã ma tô oto hâiba ré apâ 're hâimana za'ra. Ma tô tihâiwa'utu za'ra. Tawamhã Cristuhu siré te oto dama pire na te te dama 're roti za'ra, Satanasi hã pawasisi ré, miu na ãma iwahub u.