Marcu 9:9 - ꞌRe Ihâimana Uꞌâsi Mono Zadawa Wasuꞌu

⁹ Tawamhã ẽtẽ 'rãihâ hawi, ma oto si'ra za'ra, Zezusi norĩ hã. Si'aba'ré sina, te Zezusi hã tãma nharĩ za'ra, ãne: — Ẽtẽ 'rãihâ ãma i'madâ'â za'ra wa'aba zém na hã, dama rowasu'u za'ra wa'aba õ di za a'â. Ti'ai ãma Dasiré Ipodo hã ab're hawi hâiwa'utu parip si, te za dama 're irowasu'u za'ra wa'aba mo.

Marcu 9:9 ပူးပေါင်းရင်းမြစ်များ

Mateu 12:19

Ta hã awa'awi te te dama 're anharĩ mono õ di za. Ãma 're idawata za'ra mono zéb da na hã, duré mreme 'rãihâ na te te dama 're rowasu'u mono õ di za, sõ'awimhã.

Mateu 16:21

Tawamhã ta hawim haré te oto Zezusi hã tidâ'âzém na, duré tihâiwa'utuzém na zama tãma 're siwasu'u u'âsi za'ra sõ'awi, tisiré 're inomro mono norĩ ma. Ãne ma tô tãma 're siwasu'u za'ra: — Ĩmama te te ĩma ipisutuzéb zarina wa za mo, Zeruzalẽ u. Tamemhã zudeu norĩ ma roti'wa norĩ hã, duré 'Re ihâimana u'âsi mono ma da'ãma romhuri'wa ipire norĩ hã, duré isimiroti na rob'ui'éré 'rata na dama rowahutu'wa norĩ hã te za ĩma rob'manharĩ wasété za'ra. Taha zarina, wa za robzépata za'ẽtẽ. Te za duré dasiwi ĩwĩrĩ ni. Taha wamhã, maparane bâdâ ĩ'ãma si'utõrĩ õ ré, wa za duré apâ hã hâiwa'udu.

Mateu 27:63

Itẽme si'rã'õtõ wamhã, ãne te tãma nharĩ za'ra: — Apito, õ hã isadawa nhipe hã zahadu 're morĩ ré, dama 're isiwasu'u mono zém na wa tô ãma wapo're pu'u za'ra ni, ãhã na hã. Ãne te dama 're siwasu'u: “Bâdâ si'ubdatõ ĩ'ãma si'utõrĩ õ ré, wa za apâ hâiwa'udu.” Ãne dama 're isiwasu'u mono zé hã.

Mateu 8:4

Tawamhã Zezusi te tãma tinha, ãne: — Ĩwapari pese, asina. Ni'wai ma, asina ĩwasu'u õ di za, te i'aipesezém na hã. Sasedoti u si hã te za aimo, aihâiba wẽ zô te te aihâiba 'madâ'â da. Taha parip si, te za duré tãma asõpru 'Re ihâimana u'âsi mono ma, Mozésihi nhimiroti zarina, aipesezém na da te ãma aiwaihu'u za'ra da, sena na. — Ãne te Zezusi hã tãma roti, aibâ te te ipese ma hã.

Marcu 5:43

Tawamhã Zezusi te ina norĩ ma nharĩ zahuré, rowasu'u na te te dama ãma ropé zahuré tõ da. Mram na si, te duré wada'uri zahuré, ti'ra ma, te te a zahuré da hã.

Marcu 7:36

Tawamhã Zezusi hã te sina dazadawa uwati pese, iwasu'u na da te dasima ãma ropé tõ da. Tane nherẽ, i'madâ'â'wa norĩ hã te nasi dama rowasu'u za'ra, aibâ te te ipesezém na.

Marcu 9:10

Tawamhã imreme ma tô wapari za'ra, Pedru norĩ hã. Tahawa, te 'râwi sima rowasu'u za'ra, ãne: — E niha isiwasu'uzé hã ab're hawi, za te te ihâiwa'utu na. Wa norĩ hã wama waihu'u za'ra õ di.

Marcu 9:8

Taha wamhã, taré te titõmo na hã sô rowaimrami za'ra. Ãhã wamhã, Zezusihi si ma tô siwi 'madâ, ime za'ra siwaprosi isam na hã.

Luca 9:36

We tãma mreme pari wamhã, siwaprosi te oto za, Zezusi hã. Ari'iwi te a'â tihâimana za'ra, mreme ãna, isiré 're inomro mono norĩ hã. Ni'wai ma, te te rowasu'u za'ra õ di a'â, te te i'madâ'â za'ra zém na hã.